Наследие Святой Руси. Памятники древне-русской письменности
 
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Наслѣдiе Святой Руси
-
Гостевая книга
-
Новости
-
Написать письмо
-
Поискъ

Раздѣлы сайта

Святые Кириллъ и Меѳодiй
-
Книги старой печати
-
Патерики и житiя святыхъ
-
Великiя Минеи Четiи
-
Церковно-учит. литература
-
Творенiя русскихъ святыхъ
-
Стоянiе за истину
-
Исторiя Русской Церкви
-
Церковный расколъ XVII в.
-
Исторiя Россiи

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 25 марта 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ИСТОРІЯ РУССКОЙ ЦЕРКВИ

Грамата цареградскаго патріарха Луки Хрисоверга къ кн. Андрею Боголюбскому.

Грамота великого Патріарха Луки ко Князю Ондрею Ростовскому, Боголюбскому.

Любимый о Господи, духовный сыну, преблагородный Княже Ростовъскій и Суждальскій! Грамота благородія твоего къ нашему смиренію твоимъ посломъ принесена бысть и прочтена бысть в соборѣ. Увѣдавше на ней, оже въ твоей земли твоимъ почтаніемъ благочестіе умиряется, яко многи по мѣстомъ молебныа домы создалъ еси Богу, доброе се твое почтаніе вси похвалихомъ, и еже къ Богу правую твою вѣру готовахомъ, и не токмо же грамотою благородія твоего сія извѣствовахомъ, но отъ того самого епископа твоего многа благая о благородіи твоемъ, и свидѣтельствова предъ нашимъ смиреніемъ и предъ Божественнымъ Соборомъ, и предъ державнымъ нашимъ святымъ царемъ. Сказываетъ же намъ писаніе твое, иже градъ Володимерь изъ основанія воздвиглъ еси великъ со многомъ человѣкъ, въ немъ же и церкви многи создалъ еси. Не хощеши же его быти подъ правдами епископьи Ростовскіа и Суздальскіа, но обновити е митрополіею и поставити отъ насъ въ не митрополита, тамо сущаго у благородія твоего Ѳеодора. Да еже убо о градѣ твоемъ, иже внемъ святыхъ церквей, яже воздвиглъ еси на славу Богу: но той ти множицею благородію твоему воздасть; а еже отъяти таковый градъ отъ правды епископьи Ростовскіа и Суждальскіа и быти ему митрополіею — не мощно есть то. Да вѣдомо буди благородію твоему; понеже бо, якоже слышимъ, оже не иноя страны есть ни области таковый градъ; не ново бо есть зашелъ къ любви и къ твоему княженію нынѣ бы приложенъ, но тое же самое земли и области есть, въ ней (же) суть прадѣди твои были; и ты самъ обладаеши ею нынѣ, въ ней же едина епископья была издавна, и единъ епископъ во всей земли той. Ставимъ же по временомъ священнымъ Митрополитомъ всеа Руси, еже есть отъ насъ святыя и великія церкве, ставимъ и посылаемъ тамо; а не можемъ мы того сотворити, занеже явѣ съвъпрашати сважатися съ Божественными и священными правилы. Правила убо святыхъ Апостолъ и Божественыхъ отецъ каяждо митрополіа и епископья цѣли и не порушимо своя держати оправданіа повелѣли, и никто же отъ святыхъ можетъ Божественныхъ и священныхъ преступити правилъ, аще не страненъ отъ Бога хощетъ быти.

Прочтохомъ же и присланые грамоты твои, на нихъ же біаху обинныи вины на Боголюбиваго епископа твоего. А понеже увѣдахомъ и священного Митрополита грамотою епископъ, и отъ самого посла деръжавнаго и святаго нашего царя, и отъ инѣхъ многихъ, оже таковая епископа твоего обиненіа молвена суть многажды по своемъ тамо у васъ соборѣ и предъ великимъ княземъ всея Руси, пришедшимъ о томъ нѣкымъ мужемъ благородія твоего, явилася не крѣпка, якоже бы епископу спакостити, и оправленъ убо сій епископъ своимъ сборомъ; и неподобно, и мы мнѣхомъ, отинудъ того порядити, занеже суть истязанна тамо; яко бо и священная правила не велятъ намъ того творити, иже велятъ коемуждо епископу своимъ соборомъ судитися. Но понеже епископъ, надѣяся на свою правду, прележаше моляся намъ истязати паки намъ, таковая намъ послушахомъ молбы, и прочтохомъ иже на него благородіемъ твоимъ присланую грамоту. А понеже противу которой винѣ своей во правду силнѣ по правиломъ отвѣщалъ есть, и оправданъ есть нами, и въ службу его с собою пріяхомъ, и служилъ съ нами. И се же епископъ твоему благородію посланъ, какъ и отъ самого Бога, нашимъ смиреніемъ, Божественымь и священнымъ великимъ соборомъ. И извѣстно надѣемся, яко не восхощешися противити суду всѣхъ святитель и нашему смиренію, и, просто, аще хощеши имѣти часть съ Богомъ, смѣсившаго небесная и земная своимъ къ намъ сшествіемъ, и благословенія великіа соборныя церкве и молитвъ всѣхъ, иже здѣ сшедшихся, святитель и нашего смиреніа, духовный отчей сыну! Всяку убо, юже имѣеши жалобу и да въ души своей на Боголюбиваго епископа своего, сложи съ сердца своего; с радостію же его пріими, со всякою тихостію и любовію, яко же Божіею благодатію достойна суща яко и слова почтена, и добродѣтелію свѣтящее, и смысломъ украшена и свѣдаетъ право паствити и управливати порученное ему Богомъ стадо. А пастыря имѣя яже не такого, то болѣ не проси иного, но имѣ его, яко святителя, и отца, и учителя, и пастыря и пріими его опять въ свою землю, да паствитъ Божіе стадо, да не забываетъ, ожели то твое благородіе будетъ в томъ грѣсѣ. Пусти же ему строити своея церкве, яко же благодать Святаго Духа въздаетъ ему; се бо и Богу и человѣкомъ есть угодно. Аще ли твое благородіе годующе хощеть жити въ созданнѣмъ тобою градѣ, а хотѣти начнетъ и епископъ въ немъ с тобою быти, да будетъ сій Боголюбивый епископъ твой съ тобою; въ томъ бо ему нѣсть пакости, занеже есть таковый градъ подъ областію его. Ожели паки, якоже не имамъ вѣры, ни дай Богъ быти, по его оправленіи и священнымъ Митрополитомъ всеа Руси, и его епископы и нашимъ совершенымъ утверженіемъ отнюдь, — а не будешь к нему, якоже подобаеть, ни повинутися начнеши его поученіемъ и наказаніемъ, но и еще начнеши гонити сего, Богомъ ти данного святителя и учителя, повинуяся инѣмъ чрезъ законъ поученіемъ, а вѣдомо ти буди, благословеный сыну, то аще всего міра исполниши церкви и грады и возградиши паче числа, гониши же епископа, главу церковную и людскую, то не церкви, то хлѣви, ни единоя жити»... [1]

Примѣчаніе:
[1] Надобно замѣтить, что это посланіе Луки Хрисоверга къ кн. Андрею Боголюбскому извѣстно было, не по лѣтописи только Никоновой, а и въ отдѣльныхъ рукописяхъ, еще въ XVI вѣкѣ (см. статью: «Сильвестръ Медвѣдевъ, отецъ Русск. библіогр.», стр. XXIII, и за тѣмъ: «Оглавленіе книгъ, кто ихъ сложилъ», стр. 54, въ Чтен. Моск. Истор. Общ. 1846. № 3, отд. IV).

Источникъ: Исторія Русской Церкви. Макарія, Архіепископа Харьковскаго. Томъ III. — Второе, исправленное изданіе. — СПб.: Типографія Юлія Андр. Бокрама, 1868. — С. 298-300.

/ Къ оглавленію раздѣла /


Наверхъ / Къ титульной страницѣ

0