Наследие Святой Руси. Памятники древне-русской письменности
 
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Наслѣдiе Святой Руси
-
Гостевая книга
-
Новости
-
Написать письмо
-
Поискъ

Раздѣлы сайта

Святые Кириллъ и Меѳодiй
-
Книги старой печати
-
Патерики и житiя святыхъ
-
Великiя Минеи Четiи
-
Церковно-учит. литература
-
Творенiя русскихъ святыхъ
-
Стоянiе за истину
-
Исторiя Русской Церкви
-
Церковный расколъ XVII в.
-
Исторiя Россiи

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 25 марта 2017 г. Сейчасъ на порталѣ посѣтителей - 21.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

Исторiя Русской Церкви —» Источники

Посланіе опальнаго къ новгородскому архіепископу Макарію.

Право печалованія, т. е. ходатайства предъ государемъ или челобитья за невинныхъ, которые не могли однако оправдаться въ обыкновенныхъ судахъ, или и за виновныхъ, но заслуживавшихь почему-либо снисхожденія или освобожденія отъ наказанія по дѣйствовавшимъ законамъ, издревле принадлежало русскому духовенству, особенно высшему. Духовенство часто пользовалось этимъ прекраснымъ правомъ, и государи внимали его ходатайству; поэтому осужденные съ надеждой обращались къ пастырямъ, какъ къ послѣднему прибѣжищу спасенія. Поэтому же уклоненіе отъ ходатайства имѣло слѣдствіемъ охлажденіе паствы къ пастырямъ; такъ о митрополитѣ Даніилѣ современники говорили: неизвѣстно, «есть ли митрополитъ на Москвѣ: учительна слова отъ него нѣтъ никотораго, и не печалуется ни о комъ; а прежніе святители сидѣли на своихъ мѣстахъ въ манатьахъ и печаловались государю о всѣхъ людехъ» [1]. Митрополитъ Макарій нерѣдко пользовался своимъ правомъ печалованія, какъ видно изъ лѣтописей: такъ когда въ 1548 году бѣжали въ Литву князья Глинскій и Пронскій, и «царь вину ихъ сыскалъ», то за несчастныхъ ходатайствовалъ митрополитъ Макарій; и царь «для отца своего Макарія митрополита ихъ пожаловалъ — вину ихъ отдалъ» [2]. Когда за такую же вину князя Семена Лобанова-Ростовскаго «царь приговорилъ съ бояры казнити смертію»: то «митрополитъ Макарій и со владыками и архимариты отпросилъ его отъ смертные казни» [3]. Когда Едигеръ, взятый въ плѣнъ, долженъ былъ подвергнуться смертной казни: то въ уваженіе къ искреннему желанію принять христіанскую вѣру «митрополитъ Макарій царю и великому князю о немъ билъ челомъ, и царь и государь его пожаловалъ для вѣры христіянской, и креститися ему поволилъ» [4]. Однимъ словомъ, примѣровъ ходатайства высшаго духовенства за виновныхъ или несчастныхъ очень много; но такихъ граматъ, которыми виновные просятъ пастырей ходатайствовать за нихъ предъ государемъ, мы имѣемъ очень немного. Къ числу этихъ немногихъ граматъ принадлежитъ издаваемое нами посланіе къ архіепископу Макарію, которымъ неизвѣстный, подвергшійся опалѣ, проситъ архіепископа ходатайствовать предъ государемъ о возвращеніи ему прежнихъ милостей. Посланіе это замѣчательно и какъ образецъ краснорѣчія первой половины XVI вѣка, и какъ свидѣтельство того глубокаго уваженія, которымъ пользовался знаменитый пастырь за свою ученость и пастырскія добродѣтели. — Посланіе издается по списку, къ сожалѣнію неисправному, находящемуся въ сборникѣ казанской академической, бывшей соловецкой, библіотеки № 902.

Посланіе къ архіепископу Макарію.

Всесвятаго великого Бога произволеніемъ всяко дѣло благо и всякъ даръ свершенъ свыше сходитъ отъ божественнаго промысла. Во имя Святые и живоначальныя и нераздѣлимыя Троицы, Отца явѣ и Сына и Святаго Духа. Всеправославному государю пре(о)священному архіепископу богоспасаемыхъ градовъ Великаго Новаграда и Пскова, и всея Русійскія земли солнцу, владыкѣ Макарію, всемірному свѣтильнику, церковному свѣту, святому и всесвятѣйшему отцу отцемъ и всеначальнѣйшему пастырю пастыремъ, блаженному учителю, святыя вселенскія соборныя апостольскія церкви на(и)достойнишему правителю, въ первыхъ священныхъ чиноначаліяхъ свѣтлосіяющему, просвѣщеніемъ небеснаго разума озаренія свещенноначальнѣйшаго великаго свѣта паче ясно зрительныхъ херувимовъ блистаяся, умовиднымъ просвѣщеніемъ великаго Бога всинаипресвѣтлейшаго въ себѣ образъ нося, единоченъ отъ серафимъ пламенно-блистаемыхъ свѣтовъ, чюдноумному и свѣтлому серафиму, огнемъ небеснымъ разгоряему, и многорачительнымъ желаніемъ всегда палимъ отъ божественныя любве, и паки божественную любовь, у престола сущи великаго Бога, трисвятую Ему пѣснь принося отъ всѣхъ и за вся, отъ него просвѣщаемъ и освещаемъ въ духовную благодать свершенный просвѣщаемъ всего свѣтлаго свѣта освѣщеніе душамъ, все привлеча желаніемъ любве, яже къ нему, въ чюдный Его свѣтъ, еже есть непостижимъ всякому уму; и тако отъ него много свѣтъ паче всѣхъ свещенноначалій церковныхъ, и прочіимъ преподобія и сущимъ подъ вашею святостію блаженною свещенноносною святынею, кождо по мирѣ раздѣяся [5] духовная дарованія, о всемъ просвѣщеніе и совершенное благословеніе во вся и на вся церковныя чины, начала же и власти ангельскія же и всякія человѣческія умы и духи изливая въ нихъ обильно свѣтъ богоразумія, къ просвѣщенію ихъ душамъ, еже ти подастъ многорачительная премудрость Божія, (къ) совершенію святымъ, пасти церковь и избранное стадо своихъ словесныхъ овецъ, яже ти Господь поручи. О великій пастырю, пастыремъ начальникъ, и всѣхъ священноначалія первенешнему свѣту, церковному свѣтильнику, всемірному свѣту, всѣхъ ходатаю Новаго Завѣта Христа, избравшаго тя въ сій чинъ, по благословенію [6] хотѣнія своего; во образъ свой божественный святый, и воставлей тя на престолѣ великаго православія — на сѣдалищи блаженнаго архіепискупа Иванна и пречюднаго архіепискупа Еѵфимія, прявяще слово истинное истиннаго Бога, возвѣщающе во все православіе и въ концы ея спасеніе Божіе во свидѣтель(ство) всѣмъ хотящимъ вѣровати истинному Сыну Божію, подавая въ весь міръ здравіе и всесвященное благословеніе силою всемогущаго Бога на спасеніе всѣмъ душамъ. Тако бо угоденъ еси во всемъ первосвятитель, по писанію, преподобенъ, незлобивъ, безскверненъ, благоугоденъ, всемилостивъ и отлученъ отъ грѣшникъ нравомъ и житіемъ. О великій начальнѣйшій отцемъ отче! та(ко) великъ и толикъ многоблаженъ еси неизреченно (по) достоинствію Бога. Да кто отъ человѣкъ возможетъ изглаголати или изрещи предивные достойности величествія святынь твоихъ, или ублажити по достоянію святительство твое изрядное, имже тя Господь Богъ ублажи паче всѣхъ земныхъ сыновъ человѣческихъ, и самихъ тѣхъ сыновъ свѣта славою и честію вѣнчавый тя. Мню убо, многоблаженный святителю Божій, великій пастырю, вселенскій учителю, законоположенный вторый Моисею, паче Аарона прославленный отъ Бога архіерею, самого того превышши чюднаго Самоила, новаго завѣта Христа совершенный умъ, церковное око, правителю новаго ковчега завѣта Христова, въ немже лежитъ; не скрижали каменыи, но самое то слово Божіе, живописанное и позлащено Духомъ Святымъ въ сердцы твоемъ святомъ, вкоренено отъ Духа манною небесною и воспитано всесвятѣйшею пречистою плотію и кровію Агньца Христа непорочнаго, Избавителя всего міра. Да что еще о семъ продолжаю время? Глаголю, отче; воистинну, яко ниедино есть слово тако возможно быти; е(же) отъ насъ, достойно или возможно къ похваленію чюдныхъ и предивныхъ святыхъ твоихъ. Которое бо благое похваленіемъ земнородніи ненаученіи принесемъ ти ублаженному еще отъ самого вышняго Бога, богоносе всеблаженне отче? Не можетъ бо отъ человѣкъ данная ти милости и почести словомъ изрещи, аще кто всѣхъ премудростей языкъ имать. Но токмо еже отъ усердія теплыя вѣры и палимыя любве; юже имамъ къ тебѣ святѣйшему Божію, по елико возможно есть отъ насъ сія, приносимъ малое се гранословіе, господине великій святителю. Отъ Бога бо данъ еси отецъ всѣмъ христіянскимъ душамъ, прежде лѣтъ прознаменованъ еси отъ Духа Святаго свыше пороженія. О всесвятый избранный Божій, вселенскій пастырь, отъ великаго пастыря Христа учиненный! Воистинну истинный ты еси священникъ Бога вышняго, приносяще Ему жертву святую и безкровную о мирѣ всего міра, и о благостояніихъ святыхъ Божіихъ церквей, и о совокупленіи мира. Которые ти достойны похвалы словомъ представлю, иже паче славы достоинства витѣя любославныя молчаніемъ стослова добродѣтель похваляти наказуетъ, и самого естества превозшедшему мѣры всего міра горнихъ? Развѣ бо славнаго языка ученіе, емуже и сила дая, первенецъ слово глаголаше: «языкъ мой трость книжника скорописца» (Псал. 44, 2). Что же (къ) симъ дерзнемъ, всяко усердію любовному насъ влекуще къ вашей всенаисвятѣйшей отческой святости? Высокое бо истинное любомудріе иноческое, еже есть мнишеское, глаголю житіе, избравъ и Богови во всѣхъ присвои вся, есть невозможная инакая, развѣ отъ усердія стяжати любовь и быти съ ними едино, возлюбивъ законъ и много лѣтъ пребыва(я) во уставѣ преподобнаго Паѳнотія, въ немже много лѣтъ пребывъ и достойно ходивъ, житіе жестокое искусивъ, дондеже призри Господь на смиреніе твое, видя много-трудъ терпѣнія и вдрученіе тѣла твоего зрѣти къ любиволюбителю, и сего ради посѣтилъ тя есть Востокъ свыше и направи ти ноги твоя на путь святительства великаго и стараго Новаграда, да упасеши людіе христіянское стадо, къ симъ же [7] рече великій Павелъ, сирафимскій языкъ, глагола: «всякъ, иже призоветъ имя Господне, спасется» (Римл. 10, 13). Дерзъ великого яснѣйшаго самодержца, государя православного, царя всея Русіи и великого государя Ивана Васильевича всеа Русіи, убогій въ прегрѣшеніихъ своихъ и художшій холопъ, и дерзаю — твою святыню къ себѣ призываю, и сего ради молю тя много, яко да посли свою милость и свое прошеніе о мнѣ согрѣшшемъ прещедрому, общему всего христіянства, великому и многомилостивому царю и государю нашему: въ немъ лежатъ милости безъ числа обильно, милосердія его имъ государемъ подаваема полна всему православію. Всесвятѣйшимъ отцемъ отецъ, государь архіепископу Макарію, буди ми тобою всесвятое благословеніе, и совершенное прощеніе [8], и всеконечное грѣху моему разрѣшеніе. Есми согрѣшилъ предъ государемъ царемъ всеа Русіи, а согрѣшеніе наше твоей святыни вѣдомо, чающе отъ тебе блаженнаго упованіе сіе получити. О всенаисвятѣйшій отче, помяни слово глаголющее великаго пастыря Христа первоначальному всѣхъ преже пастырю верховному Петру, емуже самъ вручивъ пасти своя овца, повелѣвая ему не токмо седми кратъ на день человѣкомъ отпущати, но седмьдесятъ седмерицею (Матѳ. 18, 22), яко да не отчаяваются спасенія своего, имуще толико обѣщаніе на (о)ставленіе долгомъ. Нынѣ же, государь имярекъ, и мы того ради желаемъ милосердыхъ твоихъ добродѣтельныхъ даровъ отъ вашей всенаисвятѣйшей милосердости, аки пастыря милостиваго и утѣшителя душамъ. Понеже убо алченъ есмь царскія милости наияснѣйшаго государя самодержца царя всеа Русіи, сего ради молю твое человѣколюбіе, алчнаго мя накорми и насыти симъ милосердіемъ царскимъ, жаждущаго напой царскою милостію отъ источникъ его царскихъ милостивыхъ. Ибо желаю его царскіе милости; аки желаетъ елень палимъ на источники водныя, тако желаетъ душа моя милости царскія и отпущенія грѣху моему, отъ егоже царскія милости вжадаю ктому во вѣки. Мы убо вѣруемъ быти яснѣйшаго царя государя всеа Русіи и того самого источника милости, истекающей [9] всему православію; сего ради со благоговѣніемь вѣры притекаю прилежно ко царскому источнику съ радостію почерпити свѣтлаго государя царя всеа Русіи милости, все православіе охлаждяя отъ нежадна недуга; и его царскія десница въ сытость напояетъ жадаемыхъ милости, и его царскіе источники истекаютъ, аки посредѣ рая, божественною благодатію безпрестани кипяще, отъ негоже истекаютъ четыре рѣки, напаяюща всю тварь на оживленіе. Сего ради помози ми, отче всенаисвятѣйшій, доити царского двора, яко да въ немъ ходяще, и зрятъ свѣтлое и неприкосновенное лица его царского, и гдѣ есть православнымъ христіяномъ милость. Многія убо у царя милости суть по мирѣ дарованіе комуждо раздѣлено. О всесвятый отче, тебѣ вся сія отъ вышняго Бога и государя всеа Русіи дарована и вручена суть. Сего ради молю тя, о всесвятѣйшій отче, сего царскаго двора благолѣпія доити, и его благолѣпія и милости доити; но твоими молитвами и благословеніемъ вся сія возможна будутъ намъ. Но, милостивый архіерей, сподоби мя (не)достойнаго великаго дарованія внити въ домъ царскій и видѣти славу царскаго лица. Умилосердися паки надо мною, отче святый, пріодѣй на мя одежею царскія милости, яко да грѣхъ мой симъ царскимъ милосердіемъ покрыемъ теплотою царскія милости, да избавиши мя царскія опалы своими святыми молитвами, милостивый пастырю, и предпоставиши мя праведному солнцу царю и государю всеа Русіи; и тако невозбранно предстану лицу цареву, хваляще и благодаряще Всемогущаго Бога и тебе; милосердый, милостиваго отца. Всесвятѣйшій отче пречестный, опальнаго мя посѣти и исцѣли много(ю) печал(ью) отягчена, и скорбми различными, тяжкими бѣдами стягнута, и вопіюща къ тебѣ изъ глубины душа: о врачю, потщися, умилосердися на мя, помози ми, яко изгибаю во грѣсѣ своемъ лютѣ. Тебе бо такова премудраго врача вѣдуще, могуща исцѣлити и спасти всяко наше согрѣшеніе и всяку печаль, къ тебѣ прибѣгаемъ, вѣрою и смиреніемъ припадающе и любовію просяще: рцы о мнѣ слово ко государю и яснѣйшему царю православному, самодержцу всеа Русіи; тогда исцѣлѣю душею и тѣломъ, и тако спасенъ буду отъ всѣхъ болѣзней своихъ и опалы. Ты же, яко добрый врачю, возведи мя отъ моего согрѣшенія, болящаго оживи и исцѣли; всесвятѣйшій отче, пріими нынѣ наша молитвы, и подаждь ми печальному утѣху. Ты бо еси, государь имярекъ, животъ христіянскимъ душамъ; ты бо вѣси время и часъ, егда умолити православнаго царя и государя всея Русіи о нашихъ согрѣшеніихъ; тобою да подастъ намъ милость, и прощеніе грѣху моему, и свое многое милосердіе. Сію, государь имярекъ, благовѣствуй радость въ скорби и печали сѣдящему; первыя его царскія милости жалованіе погубихъ своимъ преступленіемъ, и того ради изгнанъ бысть во тлю и сѣни смертнѣй, въ мѣсто озлобленія, во юдоли плачевнѣ, въ мѣстѣ идѣже положенъ есмь, нынѣ осуженною оболченъ есмь кожею, яже есть въ темницы горькой души моей, въ нейже слежу опалѣ, алчюще и жаждуще, слезами обливающеся [10], изъ глубины душа тяжко воздыхающе, и милосердому царю и государю всеа Русіи кричаще: государь, изведи изъ опалы сея душу мою исповѣдатися царской милости твоей. Ожидаю бо сего, дондеже воздастъ ми не по грѣхомъ моимъ, ни по беззаконіемъ. Но, милостивый отче, помози ми сего твоими святыми молитвами о мнѣ, буди ко государю милосердый ходатай и помощникъ въ скорбѣхъ, яко къ тебѣ прибѣгаю, не отврати раба твоего тоща. Тебе бо вѣрую [11] великого помощника и дѣлъ ходатая изрядна о насъ опальныхъ ко государю православному, яко да избавиши мя отъ тмы и опалы горшія, и направи на путь смиренъ и введи мя паки въ чюдный его свѣтъ немерцающе(й) и въ незаходимый, присносіяющи облистаемый неизреченною красотою и просвѣщеніемъ сіявшаго царскія наслажденія [12], идѣже вси православніи веселятся, — хвала, радованіе и веселіе царское постигло ихъ. Ты бо еси, всесвятѣйшій милостивѣйшій отче, всѣхъ сихъ царскихъ даровъ раздаятель, алчющихъ питатель, жаждущихъ напоитель, въ опалахъ утѣшитель страннымъ всѣмъ, да вся утѣшиши, да всѣхъ милуеши и ущедриши сію царского милостію великого государя. Сія вся словеса и моленія пишемъ къ вашей всесвятѣйши святосте, вѣдуще добръ, яко вся премудрости и разума глубокихъ философскихъ ученій и богословенскихъ книгъ всяка вѣси великоразумно и твоимъ всесвятѣйшимъ премудрости умомъ твоимъ, и ясно зриши неизреченная, ихже умолча умъ человѣчь, постигнути не можетъ. Ибо есть царскій священный языкъ есть святительство блаженное, камень живый отъ Бога избранъ честенъ, на немже камени основалъ есть Христосъ церковь свою, ейже врата адова никогда одолѣти не могутъ. И богомудрый учитель и всеразумный святый отецъ, вѣси, како премудростію сво(е)ю паки опальнаго мя утѣшити и печаль мою на радость преложити, яко да паки возрадуюся и возвеселюся о утѣшеніи и о печалованіи твоемъ, и ниединаго сомнѣнія въ совѣстехъ моихъ не постражду, и (о) вашей, всенасвятѣйшій, великомилостивно(й) святости. О отче пресвятый, государь имярекъ, оно о семъ о всемъ слава буди въ вышнихъ Богу, на земли миръ и благословеніе человѣкомъ тобою дарова, показуя въ человѣцѣхъ благословеніе своея благости, яко да вси спасутся и познаютъ его сущаго истиннаго Бога, давшаго тебѣ таковую власть, предивная великая творя. Сего ради и мы о толикихъ и таковыхъ твоихъ небесныхъ (благо)словити тя благословеннаго отъ вышняго Бога, кланяхтися покланяемому (отъ) всего собора христіянского, славословимъ тя, разными словесы ублажающе тя, благодаримъ тя великія ради славы твоея, юже имаеши свыше отъ Бога. Великій архіерею, Мельхиседече небесный, святый отецъ духовныхъ даровъ, Вседержителя Спаса Единороднаго Господа Ісуса Христа единонравный ему служителю святый, Святаго Духа всесвятая душа, отпущая грѣхи всему міру, помилуй насъ, прощая грѣхи всему міру, пріими молитвы наша, сѣдяй одесную престола славы величествія во церкви святѣй Его аки на небесехъ, помилуй насъ и милостивъ буди намъ, начальнѣйшій отецъ, всепресвятѣйшій многоблаженный учителю, славою и честію отъ Бога и Отца многопочтенный паче всѣхъ земнородныхъ сыновъ человѣческихъ. Сего ради хвалимъ и благословимъ имя твое во вѣки, хваляще и благодаряще великаго Бога о несказаннѣмъ его дарѣ таковѣмъ, сущемъ на тебѣ, имже тя ублажилъ самъ великій Царь царствующимъ и Господь господствующимъ, единъ безсмертный, живый въ неприступнѣмъ свѣтѣ трисвѣтлаго Божества, блистаемаго сіянія славы своея всегда, а токмо отъ иныхъ силъ небесныхъ умовъ, въ нихже и ты самъ всесвятѣйшій серафимъ живеши; и комуждо ихъ по мѣрѣ просвѣщеніе божественное подавается, въ нихже онъ непрестанно воспѣваемый и славимый, и хвалимъ есть Богъ отъ всѣхъ земнородныхъ родовъ, величаемый отъ всякаго дыханія. Яко Того есть единаго превѣчная слава и честное величіе, область же и держава, яже еще прежде всѣхъ вѣкъ бѣ, и нынѣ есть, и будетъ безконечныя превѣчная вѣки, аминь.

Буди же ктому благословеніе на насъ тобою, всесвятѣйшій отче, всегда, и нынѣ и присно, и во вѣки, аминь.

Примѣчанія:

[1]
Сказ. Курбск. стр. 5.
[2]
Никон. лѣт. ч. VII. стр. 60.
[3]
Тамже, 1554 г. стр. 212.
[4]
Тамже, 1553 г. стр. 199.
[5]
Т. е. комуждо по мѣрѣ раздѣлишася.
[6]
Должно быть: по благоволенію.
[7]
къ нимже?
[8]
въ рукописи: прещеніе.
[9]
въ рукописи: астекающе.
[10]
въ рукописи: отливающе.
[11]
въ рукописи: вѣрою.
[12]
Мѣсто, очевидно, испорченное.

Печатается по изданiю: Памятники Древле-Русской духовной письменности: Посланіе опальнаго къ новгородскому архіепископу Макарію. // Журналъ «Православный собесѣдникъ», Казань. – 1863 г. – Книга III. – с. 406-420.

Наверхъ / Къ титульной страницѣ

0