Наследие Святой Руси. Памятники древне-русской письменности
 
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Наслѣдiе Святой Руси
-
Гостевая книга
-
Новости
-
Написать письмо
-
Поискъ

Раздѣлы сайта

Святые Кириллъ и Меѳодiй
-
Книги старой печати
-
Патерики и житiя святыхъ
-
Великiя Минеи Четiи
-
Церковно-учит. литература
-
Творенiя русскихъ святыхъ
-
Стоянiе за истину
-
Исторiя Русской Церкви
-
Церковный расколъ XVII в.
-
Исторiя Россiи

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 17 августа 2017 г. Сейчасъ на порталѣ посѣтителей - 26.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ИСТОРIЯ РУССКОЙ ЦЕРКВИ

Посланіе архіепископа Новгородскаго Серапіона къ митрополиту Московскому Симону [1].

Святѣйшему епископу богоспасаемаго града Москвы, отцу ми и господину Симону, митрополиту всеа Русіи, отъ Бога врученнаго ти порожденія церковное оправданіе. Малѣйшій и смиренный владычества ти сынъ, заточенный архіепископъ Божія церкви Великаго Новаграда и Пскова владыка Серапіонъ, въ благодареніи припадаю святыни ти и величеству челомъ бію.

Что, господине, сказываете, что азъ не назнаменовахъ вины прехвальному вашему Іосифу? Ино ему се первая вина, что изъ моего предѣла отъ святыя церкви Божія Премудрости изскочилъ, якоже вторый Іюда изъ лика апостольска, здался съ монастыремъ, а мнѣ того дѣла не сказалъ о своихъ обидъ ни малымъ писаніемъ къ намъ ни возвѣстилъ, нашего благословенія ни мало отъ насъ пріялъ. О таковыхъ Богоотецъ Давыдъ пророкъ глаголетъ: не восхотѣ благословенія и удалися отъ него, и облечеся въ клятву яко въ ризу; и паки: прокляти уклоняющіися отъ заповѣдей Твоихъ. Но самъ се презорливый нанесе сію клятву себѣ, уподобися онъ прежнему Цемблаку, иже расколъ сотвори велицѣй апостольской церкви, святѣйшей велицѣй митрополіи, иже ложно себе поставилъ, въ митрополиты; не воспріялъ ли проклятія отъ своея неправды? А сей ябедникъ не тоже ли сотворилъ? Не вражду ли устроилъ святѣйшей церкви и митрополіи? Не ненависть ли сотворилъ промежи насъ своими ложными словесы на толико время? Слыши, господине, и вонми разумно, иже въ Карѳагенѣ святото собора правило 17: прозвитеръ аще будетъ епископомъ своимъ отлученъ отъ области тоя, митрополиту, епископомъ припадати не возбраняется; аще же къ тѣмъ не припадаетъ, не смирится, но расколъ творяй, гордяся, святыня Богови принесетъ, рекше, паки начнетъ служити, да будетъ проклятъ; что убо онъ таковому правилу не повиненъ ли бысть? Не расколъ ли сотвори? Не гордыню ли вознесе? Не уподоби ли ся прежнему оному, иже бѣ преже денница, нынѣ же сверженъ бысть за гордость и наречется тма, сирѣчь сотона? Оле таковыя высокія гордыня, яко сниде въ преисподній адъ темный! Къ симъ же аще ко злой сей гордыни лжу приплете тѣми лестными своими словесы и посланіи, Государя и Великого Князя обругова, на злобу сведе, и тебе, господина моего, ненавидѣти насъ сотвори; въ тѣхъ его злыхъ дѣлахъ мнози отъ государя въ темницахъ заключени, во мнозѣхъ мукахъ продолжали, у многыхъ имѣнія восхищены и мнози и доселѣ отъ государя не въ любви. А не все ли, господине того злою ложію? Не сбысть ли ся на немъ апостольское слово, еже о Ананіи в Сапфирѣ, иже украдоста отъ цѣны села и хотяще Духъ Святый искусити и оболгати? Яко же глаголетъ Іоаннъ Лѣствичникъ о лжи: никтоже мнитъ, яко малъ быти грѣхъ лжа, на се бо Духъ Святый не меньше иныхъ грѣховъ хулу изнесе. Ино убо, господине, нѣсть ли никакія вины на Іосифа? Безъ послуха ли сія написахъ тебѣ? Не божественное ли писаніе его самаго обличаетъ? Ты же, господине, что усмотриши? Какову правду его обыскали? Тако ли святыхъ апостолъ преданіе и святыхъ отецъ правила повелѣваютъ, еже изъ чужаго предѣла изскочившаго, отъ своего епископа неблагословенна, никія ради вины во инъ предѣлъ прійдетъ, иному епископу въ пріобщеніе таковаго не пріяти. Зри, господине, иже въ Лаодикіи святаго собора еже есть въ средцѣ правило 15-е. Ино, господине, вѣдомо тебѣ, что есми къ тебѣ послы посылахъ, да и грамоты многія, билъ есми тебѣ челомъ, чтобы ты самъ жаловалъ, а Государю Великому Князю печаловался, чтобы велѣли на Москвѣ быть мнѣ. И вы, господине, моего посла зиму изволочивъ, отпустили ни съ чѣмъ, а грамоты потомуже. И азъ, господине, самъ о себѣ хотѣлъ ѣхати, и Князь Великій велѣлъ намѣстникомъ дѣтей боярскихъ и коней поимать; а азъ хотѣлъ бити челомъ Великому Князю да и тебѣ митрополиту и всѣмъ епископомъ на соборѣ на того Іосифа жаловатися о его неправдахъ, якоже выше писахомъ; и вы мнѣ быти къ себѣ не велѣли, а его естя приняли, а мнѣ естя своего собору не сказали и паки въ совѣтъ не приняли о таковомъ дѣлѣ, и азъ вашему собору неповиненъ. А не мощно было вамъ въ томъ дѣлѣ мене оставити, ни презрѣти. А еще, господине, тотъ Іосифъ пріемлетъ въ монастырь у себе поповъ черньцовъ изъ митрополіи и епископеи всѣхъ, и тотъ имъ Іосифъ у себя въ монастырѣ служити велитъ, а безъ нашего благословенія, ни намъ, ни нашимъ десятникомъ грамотъ ставленныхъ, ни отпускныхъ не являютъ. Такъ ли, господине, правила повелѣваютъ? А въ ставленныхъ граматахъ сами пишете, что не велите переходити отъ церкви къ церкви и отъ предѣла въ предѣлъ безъ отпускныя грамоты; а который попъ, или дьяконъ перейдетъ отъ предѣла въ предѣлъ, ино явити ставленная грамота да и отпускная епископу града, гдѣ перейдетъ; аще ему повелитъ, да литургисаетъ, или десятнику явити ему грамота ставленная и отпускная. И тотъ Іосифъ нынѣ насъ во всемъ презрѣ, нашего благословенія не востребовалъ. Ты же, господине, если есте въ Номоканонѣ по закономъ искали? Если естя исправили святыхъ отецъ преданія? се ли уже исполнили естя мѣру святыхъ отецъ? Во истинну ли сбыстся на васъ истинное слово Владыки Христа: вы есте свѣтъ міру, вы есте соль земли? Аще во истину нарекостеся такъ по Владычню слову, во истину благодарю Бога и всѣхъ васъ; и ащели же не тако будетъ, аще соль обуяетъ, чимъ осолится? но токмо вонъ изсыпана бываетъ и попираема человѣки. Вы же, господине, нынѣ таковаго человѣка, ни малу ни въ чемъ правду доспѣвша, ни къ смиренію ни мала дѣла явивша, паче же на буесть и на гордость обращающася и презорствомъ обладаема, черезъ каноны святыхъ апостолъ и святыхъ отецъ благословляете и прощаете, да и грамоту прощальную дали ему. Се ли есте изобрѣли въ канонѣхъ святыхъ апостолъ и святыхъ отецъ? Се ваша правда въ неправду воистинну, по Богоотцу Давыду: любяй неправду ненавидитъ свою душу; а индѣ пишетъ: съ неправдою глаголы устъ ихъ. А мене грѣшнаго преже суда отъ церкве отлучили и санъ сняли и заточенію предали естя. Се ли ваше благочестіе? Се ли ваша добродѣтель? Се ли есте исправили слово истиннее, что душу неповинну анаѳемѣ предаете, не сотворша никакогоже дѣла виновна? Помни, святѣйшій, на чемъ мя есте ставили и что ми еси заповѣдалъ. Обѣщался есми, господине, тебѣ, своему отцу, твоя заповѣди сохранити безъ вреда; исповѣдался есми, господине, тебѣ, святѣйшему митрополиту, и всѣмъ епископомъ и всему святому собору во святѣй Божіей церкви Пречистыя Богородицы у цѣлебоносного гроба Петра чудотворца, что ми не боятися въ правдѣ Великого Князя, ни множества народа; понеже пишетъ: правдою предъ цари не стыдяхся и глаголахъ; и далъ есми слово Богу и вамъ, что ми ходити по преданію святыхъ апостолъ и святыхъ отецъ, и далъ ми еси хиротонію, по нейже велѣлъ еси ми творити, и далъ ми еси власть вязати и рѣшати. И нынѣ азъ видѣхъ того Іосифа неправду и гордыню и многое его ко мнѣ презорство, что живучи у насъ, въ нашемъ предѣлѣ, подъ нашею властію, и намъ повиненъ есть отъ древнихъ государей и прежнимъ многимъ и братіи, архіепископомъ Новогородскимъ тоя области, и та пустынька и въ ней живущія, а отъ насъ благословенія не требуютъ; и азъ за то того Іосифа не благословляю и чужа его имѣю и извержена по правиломъ святыхъ отецъ, якоже глаголетъ святый Аѳанасій Александрійскій ко Антіоху князю о недовѣдомыхъ вещахъ о священныхъ. Вопросъ: аще мужъ святъ послетъ казнь и мученіе или бѣса, или смерть, или нѣкое показаніе на домъ, или на чада, или на существо человѣку, и убо можетъ ли человѣкъ онъ умолити иного святого и убѣжати осужденія, егоже послалъ рабъ Божій? Отвѣтъ. Аще мужъ святъ есть мученіе послалъ, явѣ, яко совѣтомъ Божіимъ сотворилъ; и кто есть прочее, иже совѣтъ Божій возбранити хотя? Обаче же ни святи сами другъ друга ратуютъ, свѣдуще любовный союзъ, яко не услышитъ Господь святаго, молитвою возбранити хотящаго на святаго молитву, ни бо есть се Богови подобно — единого убо оскорбити а другаго успокоити своего раба. Отнюдуже въ Коринѳѣ соблудившаго Павелъ связавъ, той и разрѣшилъ. И Илія убо такоже небо связавъ, еже не одождити, той и разрѣшилъ паки такоже, Богу имущу семь тысящь святыхъ, иже не преклониша колѣна Ваалу. Паки досаждену бывшу Іову отъ своихъ ему друговъ, что сотвори Богъ? Прости ли имъ согрѣшеніе ихъ? Ни, но глаголахъ имъ: идѣте къ рабу моему Іову, и помолится о васъ. Якоже во ангелѣхъ не сопротивно дѣется единъ другому, сице и о святыхъ непщую. Слыши, господине, что глаголетъ писаніе: кто убо связа, сей и разрѣшити можетъ. Чрезъ сія же правила и надписаніе кто дерзнетъ пріяти таковаго въ пріобщеніе, той самъ судъ имѣетъ по правиломъ святыхъ апостолъ и святыхъ отецъ преданію. Мнѣ же послѣднему не буди сотворити, якоже тебѣ обѣщахся, еже повиноватися неправдамъ, а за правду дай же ми, Боже, пострадати. О семъ вселенскій учитель апостолъ Павелъ учитъ, глаголя: мнѣ убо еже жити — Христосъ, а еже умрети зань — пріобрѣтеніе. Кто убо насъ разлучитъ отъ любве Христовы? Никтоже. Кровь же мою взыщетъ Господь Богъ отъ рукъ вашихъ; азъ же чаю отъ Владыки Христа мзды и воздаянія праведныхъ.

Примѣчанiе:
[1] Печатается по рукописи Іосиф. Волоколам. монастыря XVI в. № 500.

Печатается по изданiю: Памятники старинной русской литературы, издаваемые Графомъ Григоріемъ Кушелевымъ-Безбородко. Выпускъ четвертый: Повѣсти религіознаго содержанія, древнія поученія и посланія, извлеченныя изъ рукописей Николаемъ Костомаровымъ. – СПб.: Въ типографiи П. А. Кулиша, 1862. – с. 210-212.

Наверхъ / Къ титульной страницѣ

0