Наследие Святой Руси. Памятники древне-русской письменности
 
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Наслѣдiе Святой Руси
-
Гостевая книга
-
Новости
-
Написать письмо
-
Поискъ

Раздѣлы сайта

Святые Кириллъ и Меѳодiй
-
Книги старой печати
-
Патерики и житiя святыхъ
-
Великiя Минеи Четiи
-
Церковно-учит. литература
-
Творенiя русскихъ святыхъ
-
Стоянiе за истину
-
Исторiя Русской Церкви
-
Церковный расколъ XVII в.
-
Исторiя Россiи

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 20 августа 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

СТОЯНIЕ ЗА ИСТИНУ

Преп. Максимъ Грекъ († 1556 г.)
Отвѣты христіяномъ противу агарянъ, хулящихъ нашу православную вѣру христіянскую
.

Понеже часто случается вамъ стязатися съ христіяноборцы измаильтяны о благочестивѣй вѣрѣ нашей, и они христіяноборцы, неточію не хотятъ исповѣдати Христа, Бога истинна и Сына Божія быти, но еще и ругаются намъ, исповѣдающимъ Его Сына Божія и Бога. И аще хощете заградити уста ихъ и посрамляти ихъ, не отъ иного коего богодухновеннаго писанія, точію отъ святыхъ Евангелій, творите имъ показанія. Занеже бѣсодухновенная ихъ книга, глаголема по нихъ коранъ, во многыхъ мѣстехъ хвалитъ è [1] и праведно и свято нарицаетъ è, и съ небесе низпослано мнитъ. И елико убо на показаніе, яко Христосъ и Богъ есть истиненъ, и Сынъ Божій и есть и глаголется, и отъ насъ, вѣрующихъ в онь, покланяемъ и вѣримъ есть, глаголите сице къ нимъ, со всякою кротостію и разумомъ правымъ: понеже и вы исповѣдуете, яко Евангеліе, еже по насъ, праведно и истинно есть, чесо ради преслушаете его, сице явѣ глаголющаго о Божествѣ Христовѣ въ Евангеліи, еже отъ Іоанна? Глаголетъ бо сице чистѣйше: въ началѣ бѣ Слово, и Слово бѣ къ Богу, и Богъ бѣ Слово [2]. Виждь, како явственнѣ глаголетъ Бога Слово Бога и Отца, и яко присно изъ начала бѣ къ Богу, сирѣчь неразлучно бѣ (отъ) Бога Слово, и яко Творецъ всѣхъ есть и Содѣтель; вся, глаголетъ, Тѣмъ бышя, сирѣчь видимая же и невидимая. И безъ него же ничтоже бысть, еже бысть. И да не непщуемъ, яко Слово Бога и Отца есть, якоже наше слово, непричастно животу, и на воздухъ разливаемо и исчезаемо, учитъ насъ святое Евангеліе и глаголетъ: въ немъ животъ бѣ, сирѣчь въ самемъ Божіи Словѣ животъ есть; и той есть животъ и свѣтъ человѣкомъ, вѣрующимъ в онь. А яко Бога и Отца Слово и пріиде въ міръ сей, и бысть человѣкъ совершенъ кромѣ грѣха, — тоже святое Евангеліе пониже глаголетъ: въ мірѣ бѣ, и міръ тѣмъ бысть, и міръ Его не позна; во своя пріиде, и свои Его непріяша, сирѣчь языкъ безвѣрныхъ іюдеевъ. Таже глаголетъ: и Слово плоть бысть, сирѣчь въ плоть человѣчю одѣяся и явися въ міръ сей человѣкъ совершенъ по явленному [3], и Богъ совершенъ по разумному [4]. Потомъ глаголетъ: и елицы пріяшя Его, сирѣчь въ Него вѣровашя, и исповѣдуютъ Его Бога совершенна и человѣка совершенна, и уповаютъ нань, дастъ имъ власть чядомъ Божіимъ быти. Елицы же Его отмѣтаются, и Сына Божія и Бога не исповѣдуютъ, ниже могутъ чяда Божія быти, ниже глаголатися, по Божественому сему Евангелію. Се показа святое Евангеліе, яко Христосъ Слово есть Бога и Отца, и яко Творець и Содѣтель есть всѣхъ видимыхъ и невидимыхъ тварей, яко Свѣтъ и Животъ есть человѣкомъ, вѣрующимъ въ Него, и яко пріиде уже въ міръ и въ плоть человѣчю одѣяся, и яде и питъ съ человѣкы, и бысть человѣкъ совершенъ. По истинѣ, а не по привидѣнію, якоже нѣцыи еретицы блядословишя. Нынѣ же да разумѣимъ и сіе, яко Сына Божія, Его глаголетъ святое Евангеліе, —и аще правѣ мы христіяне, Сына Божія исповѣдуемъ Его и имѣнуемъ? Яко убо Сынъ Божій правѣ и преподобнѣ глаголется, Самъ Богъ и Отецъ, во святыхъ Евангеліихъ, Сына своего возлюбленна именуетъ и свидѣтельствуетъ свыше гласомъ, услышаннымъ, егда крестися во Іорданѣ рѣцѣ, отъ Іоанна Предотечи, и второе, егда преобразися предъ ученикы своими, на горѣ Ѳаворстей, егда слышанъ бысть съ небесе гласъ Божій, глаголющь: сей есть Сынъ мой возлюбленный, о немъ же благоизволихъ, того послушайте. Елма убо [5] святая Евангелія являютъ Бога и Отца, именующа Христа Сына своего возлюбленнаго; чесо ради вы, агаряне, отрицаетеся сыновства и Божества Его, и насъ укаряете, глаголющихъ его Сына и Бога? Аще убо праведно и истинно исповѣдуете святое Евангеліе, вѣрите прочее и вы, и съ нами исповѣдуйте, яко ей воистину Сынъ Божій есть же и глаголется Христосъ. Елма сицевое свидѣтельство самого Бога и Отца есть, съ небесе сшедше, — добрѣ убо и правѣ мы христіяне, вѣрующе свидѣтельствующу Богу и Отцу, Сына Божія исповѣдуемъ и именуемъ Христа, а не раба, ни человѣка проста, якоже вы глаголете, и обрѣтаетеся досажаюте въ Него. Еще же услышимъ и ино евангельское свидѣтельство и показаніе о Христѣ, яко Сынъ Божій и Богъ и есть и глаголется Христосъ. Князь нѣкій отъ іюдеевъ, Никодимъ званіемъ, пришедши ко Христу нощію, слышати отъ него желая высокое нѣкое и предивное ученіе, — и Христосъ къ нему сице отвѣща, рекъ: сице возлюби Богъ міра, яко Сына Своего далъ есть Единороднаго, да всякъ, вѣруяй в Онь, не погыбнетъ, но да имать животъ вѣчный [6]. И паки глаголетъ [7]: не посла бо Богъ Сына своего въ міръ, да судитъ міру, но да спасется Имъ міръ; вѣруяй в Онь не судится, а не вѣруяй уже осудися, зане не вѣрова во имя единороднаго Сына Божіа. Сей же есть судъ, яко Свѣтъ пріиде въ міръ. И возлюбишя человѣцы тму паче, нежели Свѣтъ; бѣша бо дѣла ихъ лукава. Виждь, яко явьственѣйше третицею, самъ себе именуетъ Сына Единороднаго, Бога Вышняго, и яко Свѣтъ въ міръ пріиде, и яко не вѣруяй в Онь осужденъ есть, а вѣруяй не боится осужденія, но спасенъ будетъ отъ грядущаго праведнаго и страшнаго гнѣва Божія на сыны непокоривые. Выже откуду чяете спасеніе улучити, на страшномъ дни втораго Его пришествія, елма отметаетеся Божества Его и сыновства? Аще убо по истинѣ, а не по лицемѣрію, хвáлите святое Евангеліе и глаголите, яко инзиль хакъ [8], престаните прочее досажати и хулити на Христа, и исповѣдите Его съ нами Сына Божія и Бога, якоже свидѣтельствуетъ святое Евангеліе; аще убо желаете избѣжати грядущаго праведнаго и страшнаго гнѣва Божія на сыны непокоривыя, отметающіяся единороднаго Сына и Слова Божія, якоже и блаженый Іоаннъ Креститель и Предотеча Христовъ свидѣтельствуетъ во Еваніеліи, еже отъ Іоанна сице явѣ и твердѣ глаголя о Христѣ [9]: и свидѣтелствова Іоаннъ глаголя, яко видѣхъ Духъ сходящь, акы голубь, съ небесе, и пребысть на Немъ; и азъ не вѣдахъ Его, но пославый мя крещати, сирѣчь Богъ и Отецъ, рече мнѣ: на Немъ же аще узриши Духъ сходящъ и пребываяй на Немъ, той есть крещаяй Духомъ Святымъ. И азъ видѣхъ и свидѣтелствовахъ, яко той есть Сынъ Божій. Той же Іоаннъ божественный глаголетъ и сія о Спасѣ Христѣ: грядый свыше, выше всѣхъ есть. Сіе глаголетъ о Христѣ; а о себѣ глаголетъ, уничижаа себе: сый отъ земли, отъ земли есть и отъ земли глаголетъ. И пакы глаголетъ о Христѣ [10]: грядый съ небесе выше всѣхъ есть, — и еже видѣ и слыша, то и свидѣтельствуетъ, и свидѣтелства его никтоже пріемлетъ. Отецъ любитъ Сына и вся далъ есть въ руцѣ Его; вѣруяй въ Сына имать животъ вѣчный, а не вѣруяй Сыну не узритъ животъ, но гнѣвъ Божій пребудетъ на немъ.

Толь велика и сильна свидѣтельства отъ святыхъ Евангелій имуще мы христіяне, вѣруемъ и исповѣдуемъ всею душею и сердцемъ Сына Божія и Бога быти Христа, и крещаемся, сирѣчь очищаемся отъ грѣхъ нашихъ призываніемъ Отца и Сына и Святаго Духа, по заповѣди и завѣщанію самого Спаса Христа, глаголющаго святымъ Своимъ ученикомъ и апостоломъ [11]: шедше въ міръ, научите вся языкы, крестяще ихъ во имя Отца и Сына и Святаго Духа; вѣровавый и крестився спасенъ будетъ, а не вѣровавый осуженъ будетъ. Вы же, агаряне, аще по истиннѣ вѣрите яко Евангеліе есть истинно и праведно и съ небесе сшедше, чесо ради толикыхъ сильныхъ свидѣтельствъ и показаній евангельскыхъ о Божествѣ Христовѣ отмѣтаетеся и преступаете, нижè Бога Его исповѣдуете, нижè Сына Бога Вышняго, нижè крещаетеся во имя Отца и Сына и Святаго Духа? И во что прочее уповаете спастися? али, во еже обрѣзывати срамныя уды вашя, іудейскы уповаете спастися? прельщаетеся злѣ: ничимъ же прочее пользуетъ васъ таковое обрѣзаніе. Преже пришествія Христова въ міръ сей совершаемо обрѣзаніе, по закону Моѵсеову, имѣяше силу, зане по повелѣнію Божію бываше, и обрѣзаеміи имѣяху упованіе спасенія, ей аще и прочихъ заповѣдей Божіихъ храняху. А отъ негоже времени пріиде Христосъ и училъ есть новый и совершенный евангельскый законъ; оттолѣ Моисейское обрѣзаніе преста и упразнися въ конецъ, и ни едину прочее силу имать. Понеже пріиде истина Христосъ, преста сѣнь, сирѣчь Моисейская завѣщанія, яже о жертвахъ, и іудейскыя обычяи. Но ни еже умывати водою по вся дни срамныя уды ваша ни сице очищаетъ душы ваши отъ плотскыхъ вашихъ нечистотъ, якоже ни псовъ очищаетъ николиже отъ сквернаго и гнуснаго смрада ихъ, еже лизати имъ языкомъ своимъ проходы ихъ и срамныхъ удъ, — пребываютъ бо и тако гнусни и злосмрадни и нечисти всегда; — нижè отпущеніе грѣховъ своихъ пріемлете отъ умовенія аѳедроновъ вашихъ и срамныхъ удовъ. Внѣшнее сткляници и блюду очищаете, а внутренее полно есть всякыя нечистоты; исполоскайте внутреннее чаши, сирѣчь очистите душа ваша святымъ крещеніемъ, совершаемымъ во имя Отца и Сына и Святаго Духа, и тогда чиста будутъ душя и серця ваша отъ всякого нечестія, беззаконія же и всякыя нечистоты, занеже святое Евангеліе, егоже почитаете и глаголете, яко иньзиль хакъ, есть сирѣчь, праведно и истинно, сице повелѣваетъ, и глаголетъ къ Никодиму, князю іудейскому [12]: аминь аминь глаголю тебѣ: аще кто не породится свыше, не можетъ видѣти царствія Божія. И пакы къ немуже глаголетъ самъ Христосъ [13]: аминь аминь глаголю тебѣ: аще кто не породится отъ воды и Духа не можетъ внити въ царствіе Божіе. И сіе чесоли ради? занеже вода едина, кромѣ призыванія Святыя Троицы, внѣшную руду [14] тѣлесную точію очищаетъ, а не и душевную проказу. Очистите убо душевныя ваша проказы святымъ крещеніемъ, совершаемымъ во имя Отца и Сына и Святаго Духа, и тако будете чисти.

Но нѣчто глаголете, яко мы христіяне три Бога глаголемъ, исповѣдующе Отца и Сына и Святаго Духа: не дай Господи, да не будетъ сіе! Аще кто три Бога именуетъ, да будетъ проклятъ въ вѣкы вѣкомъ аминь! Мы единого Бога вѣмы, Творца и содѣтеля всѣхъ, имуща Слово и Духа, равночестна и равнобожна [15] и собезначална себѣ и сприсносущна. Николиже бо бѣ Богъ безъ Слова и Духа; не буди намъ таково что хулити. Тѣмъже и глаголемъ: присно Богъ и Отецъ, присно Сынъ и Слово Его, и съ Нимъ присно и Духъ Святый, иже отъ Отца исходитъ. Единъ Богъ трое, а не три Бози, да не будетъ. Якоже глаголемъ умъ, слово и духъ — едина душа трое, а не три души, якоже глаголемъ дискосъ [16], свѣтъ, луча — едино солнце три сія, а не три солнца, сице и таинство Святыя Троицы: аще бо и глаголемъ Богъ Отецъ, Богъ Сынъ и Слово Его, Богъ Всесвятый Духъ, но не три Бози. Три сия, но единъ Богъ — три сія — безначаленъ и бесконеченъ. Слышите и инъ образъ. Домъ высокъ, трикровенъ, раздѣляемъ на трое, и подклѣть домъ и есть и глаголетъся, и еже свыше подклѣта такоже домъ и есть и глаголется, такожде и яже превыше тѣхъ часть, юже и горницу глаголемъ, домъ есть и глаголется; обаче не тріи домы трія сія, но единъ домъ. Такоже и о всякомъ древѣ: корень, стебль, вѣтви, тріа сія едино древо есть же и глаголется, а не три. Такожде и о дни: разстояніе, еже отъ утра даже до обѣда, день есть и глаголется, и еже отъ обѣда даже до полудни, день же, и еже отъ полудни до вечера день же есть и глаголется; обаче не три дни трія сія, но единъ день. Такоже и о Божествѣ: Богъ Отецъ, Богъ и Сынъ, Богъ и Святый Духъ; обаче не три Бози, но единъ Богъ трое сіи: едино царство, едина власть, едина сила. Аще же еще не вѣруете и, еже паче ума и слова, таинство сіе не пріемлете, ни разумѣти можете, азъ имамъ показати, яко и вы, не разумѣюще и не хотяще, исповѣдуете единого Бога трисоставна [17] суща. Рцыте ми: егда исповѣдуете зловѣріе ваше, чесо ради не подимаете пальца вашего, но подимаете лихана [18]? Явленно есть, яко палецъ точію два состава имать, і сего ради нѣсть приличенъ къ показанію тріехъ Богоначалныхъ ипостасей. Лиханъ же три состава имать, и якоже едина каяждо чясть отъ состава, въ составѣ перстъ глаголется, обаче не три персты, но одинъ перстъ три сія чясти есть. Се прочее и вы, не разумѣюще и не хотяще, исповѣдуете, подиманіемъ лихана перста, трисоставна единаго Бога, сирѣчь Святую Троицу. Въ ту изволите и вы креститися, да сподобитеся быти чада вѣрна и свойственна Сарры, свободныя жены патріеарха Авраама. Зане, дондеже не крещени есте, рабыни Агари чяда есте беззаконна и чюжда и изгнана отъ наслѣдія праведнаго Авраама, и не имате ни едино участіе со Исаакомъ, сыномъ свободныя. Имѣхомъ и ина многа и сильна свидѣтельства и показанія предложити вамъ отъ Моисейскыхъ книгъ и пророческихъ, на увѣреніе ваше, яко да извѣстится, что едина есть истинна и неблазненна и богоугодна вѣра, яже православнымъ христіяномъ, евангельская и апостольская. Но понеже Божественое Евангеліе хвалите и чюдитеся паче всякыя иныя книги; сего ради и мы отъ Евангелія единого показанія сотворихомъ вамъ, да не имате глаголати, яко вы христіяне лжива свидѣтелства и показанія творите къ намъ.

Но понеже и сіе глаголете къ намъ и поношаете намъ: аще Богь бѣ Христосъ вашъ, никакоже, человѣцы суще, іудее возмогли бышя озлобити Его, и смертію безчестною уморити. Противу сего безумнаго и богоборнаго прекословія вашего тѣмъ же пакы святымъ Евангеліемъ отвѣщаемъ вамъ. Но, яко убо Христосъ Богъ есть Вседержитель и всѣхъ Творецъ, уже показахомъ вамъ сіе Евангельскыми свидѣтельствы, ихъже предложихомъ вамъ. А яко волею предалъ есть себе на смерть, а не по безсилію вочеловѣченіа своего іудее яша Его и умертвишя, и яко силенъ бѣ не точію Іеросалимъ и живущая въ немъ іудеи, но и обрѣтаемыя по всей вселеннѣй непокоривыя іудеи, въ мгвовеніи ока, вся вкупѣ потребити, то и покажемъ вамъ тѣми же святыми Евангеліи. Яко убо самъ себе волею предалъ есть на смерть за спасеніе человѣковъ, самъ Той вамъ свидѣтель есть, глаголя сице въ Евангеліи, еже отъ Іоанна [19]: Азъ есмь пастырь добрый. Пастырь добрый душю свою полагаетъ за овця. И пакы: Азъ есмь пастырь добрый, душю мою полагаю за овця. Сего ради любитъ мя Отецъ, яко Азъ душю мою полагаю да пакы пріиму ю. Никтоже емлетъ ю отъ мене, но Азъ полагаю о себѣ; власть имамъ положити ю, и власть имамъ пакы пріяти ю. Сію заповѣдь пріяхъ отъ Отца моего, сирѣчь по совѣту и изволенію Отца моего небеснаго пріидохъ въ міръ сей, да мною вѣдомо будетъ всѣмъ человѣкомъ имя святое Его, и смерть вкушу плотію, за спасеніе человѣковъ. Сего ради любитъ мя Отецъ мой, яко бодрено [20] изволяю убо умрети, да родъ человѣческый, моею смертію, получитъ живота вѣчнаго. И азъ, волю Отца моего совершая, полагаю волею душю мою за спасеніе многыхъ, сирѣчь смерти вкушаю по человѣческому. Якоже и индѣ глаголетъ [21]: не пріиде Сынъ человѣческый, да погубитъ душя человѣческыи, но да спасетъ, и дати душю Свою избавленіе за многыхъ, якоже и индѣ глаголетъ [22]: се восходимъ во Iеросалимъ, и скончаются вся писанная пророкы о Сынѣ человѣчестѣмъ, преданъ бо будетъ языкомъ, и поругаемъ будетъ, и бивше убіютъ Его, и въ третъй день воскреснетъ. И понеже, по Божественѣй воли, сице божественніи пророцы о Немъ сія предвозвѣстишя, и Онъ самъ изволилъ бодрено сія вся терпѣти, чесо ради, вы агаряне, отметаетеся таковаго человѣколюбія Божія строенія, и намъ поношаете, вѣрующимъ и исповѣдующимъ сія вся, акы по Божію неизреченному совѣту, строена? Еда бо мы сія предвозгласихомъ о Немъ и писахомъ? ни, но пророцы Божіи святіи, Духомъ Святымъ просвѣщаеми, сія о Спасѣ Христѣ предвозвѣстишя. Который убо поносъ [23] и безславіе Христу же и намъ, аще онъ убо такова пострада по Божіей воли? Мы же и вѣруемъ та и спасаемся въ покланяемыхъ страстехъ Сына Божіа. Не слышите ли, како самъ Христосъ поношаетъ невѣрію ученикъ Своихъ и ими всѣмъ отметающимся яже о Немъ предвозвѣщана святыми пророкы? Глаголетъ бо сице во Евангеліи, еже отъ Лукы: о, несмысленная и косная сердцемъ, еже вѣровати всѣмъ, ихже глаголашя пророцы; не тако ли подобаше пострадати Христу и внитти въ славу Свою. Вы убо несмыслени и косни сердцемъ и невѣрніи, невѣрующе глаголаннымъ отъ пророкъ о спасителныхъ страстехъ Христовыхъ, въ нихже и имиже прославися и вниде въ славу Свою и царствіе небесное; мы же вѣрніи мудри у Бога есмы и вмѣняемся и спасаемся вѣрою, яже въ Него. Вопрошаемъ васъ: рцыте намъ, которыхъ святыхъ писаній вы послушающе, отметаетеся Христова Божества и сыновьства и спасительныя страсти Его, безъчестіе и безславіе Его непщуете, и насъ укаряете и поношаете? но не можете сія показати. Самъ бо Христосъ пакы, святымъ Евангеліемъ своимъ, загражаетъ уста вашя, глаголя: нынѣ прославися Сынъ Человѣческый, и Богъ прославися въ Немъ; и Богъ прославитъ Его въ Себѣ и абіе прославитъ Его. Сіе же глагола, егда Іюда предатель, въставъ отъ вечери, потече ко архіереомъ іюдейскымъ, да предаеть Христа, имъ жаждущимъ смерть Оного. Сего ради, и Господь нашъ Iусъ Христосъ, жаждя еще страдати о спасеніи нашемъ, вѣдый лукавое помышленіе [24] Іюдино, со многымъ веселіемъ возгласи къ прочимъ своимъ ученикомъ: нынѣ прославися сынъ человѣческый, и прочяя. Видите, како славу свою и самого Бога и Отца глаголетъ же и мнитъ креста и тридневную смерть свою и прочяя страсти. Каколи же прославися? Зане спасительною страстію Своею и воскресеніемъ и на небеса вознесеніемъ изліяся благодать и даръ Святаго Духа на святыя Его ученикы, и ими на вся языкы, и прелесть богомерзскаго идолослуженія исчезе въ конецъ, и возсія вездѣ свѣтъ неблазненнаго богоразумія. Сія есть слава Христова человѣческое спасеніе, егоже вы, по многу вашему безчювствію, отпадаете безъ ума. Разумѣйте же и инако, яко славу Христову спасителныя страсти его суть [25], а не безчестіе, якоже вы злѣ непщуете. По еже бо предати себе волею на распятіе беззаконымъ іудеомъ, какыми грознѣйшими знаменіи прослави Его Отецъ Его небесный! На крестѣ висяше мертвецъ безъ дыханія видимъ, и день абіе въ тму преложися, лунѣ омрачившей солнечный свѣтъ на три чясы, земля вся тряслася трусомъ грознѣйшимъ, каменіе разспадеся, гроби отверзошяся и многа тѣлеса усопшихъ святыхъ воскресошя и явишася многымъ во святомъ градѣ Iеросалимѣ, якоже писано есть во святыхъ Евангеліихъ. Разумѣйте убо, какова страшна сила распятаго и погребенію преданнаго. Еда не можаше ли такова страшна знаменія и преже распятія своего сотворити, и противящихся Ему ужасити и, якоже Даѳана и Авирона, погрузити въ пропастехъ адовыхъ? Ей можаше, акы Богъ всесиленъ. Аще бо мертвецъ бездыханенъ, такова страшна знаменіа возможе показати, множае паче возмоглъ бы, живъ сый, но не восхотѣ яростію и гнѣвомъ непостояннымъ [26], но кротостію и благостынею и долготерпѣніемъ обратити къ себѣ и спасти родъ человѣческый. — Познавше убо благость Его и неисчетную Божественую силу отъ безчисленыхъ чюдесъ, ихъ же самъ собою сотвори въ языцѣ зловѣрныхъ іудеевъ, и Своими ученикы по всей вселеннѣй, и отъ страшныхъ знаменій въ день распятія Его, отступите сатанинскаго, отцы преданнаго, безвѣріа вашего, и приступите, въ совершенномъ покаяніи, Спасу Христу и Богу всѣхъ, и просвѣтитеся просвѣщеніемъ богоразумія неблазненнаго, возмите иго Его на себе, евангельскый законъ, и слово право и благо и бремя Его легко, сирѣчь спасительныхъ заповѣдей Его, имиже дýши вѣрующихъ слагаютъ тягость многообразнаго грѣха, воспріемлютъ же некрадомое богатство духовныхъ дарованій, по нихже прочее бываютъ божественно жилище, якоже самъ Господь обѣща, глаголя: аще кто любитъ Мя, слово Мое да соблюдаетъ, и Отецъ Мой возлюбитъ ѝ, и къ нему пріидемъ и обитель у него сотворимъ. Аще убо по истиннѣ хвáлите и имате [27] божественое Христово Евангеліе праведно и истинно, попецытеся блюсти писанныхъ въ немъ Христовыхъ словесъ, сирѣчь заповѣди, повелѣнія, догматы, яже о Отцѣ и Сынѣ и Святѣмъ Дусѣ, да будете прочее домъ святъ Святыя Троицы, изгнаннымъ бывшимъ отъ васъ, живущимъ въ сердцахъ вашихъ, лукавымъ и нечистамъ духовомъ.

Примѣчанiя:
[1]
Евангеліе.
[2]
Іоан. 1, 1.
[3]
по образу явленія Его въ мірѣ.
[4]
по внутреннимъ, умопостигаемымъ свойствамъ.
[5]
Если же.
[6]
Іоан. 3, 16.
[7]
Тамже — 17.
[8]
Слово взятое изъ корана, значитъ: Евангеліе истинно.
[9]
Іоан. 1, 32.
[10]
Тамже — стих. 31.
[11]
Матѳ. 28, 19.
[12]
Іоан. 3, 3.
[13]
Тамже — 5.
[14]
грязь, нечистоту.
[15]
равнымъ между собою по Божеству.
[16]
кругъ.
[17]
тріѵпостаснаго.
[18]
Греч λιχανός — указательный палецъ, который у магометанъ называется пальцемъ исповѣданія, потому что этотъ палецъ обыкновенно поднимаютъ вверхъ вступающіе въ магометанство, въ то время, когла произносятъ исповѣданіе магометанской вѣры.
[19]
Iоан. 10, 11. 15. 17. 18.
[20]
твердо.
[21]
Матѳ. 20, 28.
[22]
Матѳ. 20, 18.
[23]
поношеніе.
[24]
Въ друг. спискѣ: умышленіе.
[25]
составляютъ.
[26]
неудержимымъ.
[27]
считаете.

Печатается по изданiю: Сочиненiя преподобнаго Максима Грека, изданныя при Казанской Духовной Академiи. Часть первая: Догматико-полемическiя сочиненiя. — Изданiе второе. Казань: Типо-литографiя Императорскаго Университета, 1894. — С. 122-136.

Наверхъ / Къ титульной страницѣ

0