Наследие Святой Руси. Памятники древне-русской письменности
 
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Наслѣдiе Святой Руси
-
Гостевая книга
-
Новости
-
Написать письмо
-
Поискъ

Раздѣлы сайта

Святые Кириллъ и Меѳодiй
-
Книги старой печати
-
Патерики и житiя святыхъ
-
Великiя Минеи Четiи
-
Церковно-учит. литература
-
Творенiя русскихъ святыхъ
-
Стоянiе за истину
-
Исторiя Русской Церкви
-
Церковный расколъ XVII в.
-
Исторiя Россiи

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 28 марта 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ДОГМАТИКО-ПОЛЕМИЧЕСКІЯ СОЧИНЕНІЯ

Преп. Максимъ Грекъ († 1556 г.)
Сказаніе о рукописаніи грѣховнѣмъ.

Послѣднимъ невѣдѣніемъ и неискуствомъ святыхъ писаній недугуетъ воистину глаголяй, яко первозданный Адамъ далъ на себе прельстившему его діаволу рукописаніе вѣчныя работы. Аще бо вѣдалъ бы силу реченныхъ Содѣтелемъ къ прельстившемуся, и аще бы послушалъ тайноглагольника, крѣпцѣ завѣщавающа: не всякому духу вѣруйте, еже есть различнымъ ученіемъ, но искушати ихъ, аще отъ Бога суть (1 Іоан. 4, 1), сирѣчь аще согласуютъ богодухновеннымъ пророческимъ и апостольскимъ реченіемъ, не бы убо сице горцѣ солгалъ на первозданнаго, ниже сицевымъ неправдосудіемъ укорилъ бы праведнаго Судію. Сіе же глаголю, яко землю убо ничимже неправдовавшу проклялъ рекъ: проклята земля въ дѣлехъ твоихъ, а отступившаго отъ него и богомеръзскому демону сочтавшагося не точію оставилъ безъ казни, но и премного показалъ о немъ и сѣмени его промыслъ и попеченіе отъ рода въ родъ, поставилъ ему и сѣмени его ангели Свои хранители, якоже есть писано во второй пѣсни сице явѣ глаголющаго: вопроси отца твоего и возвѣститъ тебѣ, и старѣйшихъ тебе и рекутъ ти: егда раздѣляше языки Вышній, поставилъ предѣлы языкомъ, по числу ангеловъ Божіихъ, и бысть достояніе Господне людіе его Іаковъ (Втор. 32, 7-8) и прочая. А яко не пощадѣлъ бы его Содѣтель его, аще бы вѣдалъ его раба себе волею написана богоборцу демону, явственно есть имиже глаголетъ божественное писаніе: уничижилъ всѣхъ отступающихъ отъ оправданій Твоихъ. Чего ради? яко, рече, неправедно помышленіе ихъ. И паки: возненавидѣлъ еси всѣхъ творящихъ беззаконіе, погубиши вся глаголющая лжу (Псал. 5, 6-7). Явственно убо есть отъ сихъ святыхъ писаній, яко и возненавидѣнъ былъ бы тогда всяко первозданный отъ Сотворшаго и аки отступивъ отъ заповѣди Сотворшаго ѝ, и уничиженъ былъ бы, аки содѣявъ превеліе беззаконіе и погубилъ бы é до конца абіе, аки нечествовавша въ толь велію яже о себѣ благость Создавшаго ѝ. Елма же убо Содѣтель его ни уничижи его, ниже возненавидѣ, ниже абіе погубилъ его, паче же долготерпѣливъ о немъ человѣколюбнѣ глаголаше къ нему, аки тужа о немъ: Адаме, гдѣ еси? не мѣста, въ немже крыяшеся не невѣдый, Иже вся вѣдый, пыташе, но аки бы реклъ: разумѣеши ли, о несмысленне, отъ каковыя славы и чести въ таково безславіе и безчестіе препалъ еси? Отъ сего явственѣйше обличаемы бываютъ лжуще оглаголющіи его и глаголюще, яко рукописаніе вѣчныя рабочы далъ на себе прельстившему его лукавому бѣсу. Къ симже, что благо прочее надѣяся приимати отъ лукаваго бѣса, имже лишенъ бысть равноангельныя оноя славы, или что прочее бояся его, егоже главу сокрушати сподобися отъ Владыки всѣхъ, рукописаніе на себе даяше прочее, и наипаче слышавъ отъ своего Содѣтеля вражду положену промежъ ономъ и человѣческимъ родомъ? враждѣ убо положеннѣ бывшѣй слышавъ отъ своего Содѣтеля и Владыки, како паки оному врагу сущу даяше на себе первозданный рукописаніе? Блядь убо явленна и кощунна сицевое безумныхъ нѣкихъ мудрословіе; не отъ божественныхъ бо писаній приемше имутъ себѣ, но отъ своея ненаказанныя мысли умысливше, обносятъ сіе вездѣ и сказуютъ подобнымъ себѣ ненаученнымъ, не боящеся отнюдъ глаголющія божественныя рѣчи: погубиши вся глаголющая лжу. Сему убо ложну показавшуся, аки ни едино свидѣтельство имущу утвержающее, и нынѣ время изъяснити разумъ обносимаго рукописанія въ божественныхъ писаніихъ како намъ подобаетъ разумѣти é. Вѣдомо убо да есть, яко у божественнаго апостола Павла рукописаніе взято отъ среди и къ кресту Спасову пригвождено, сирѣчь бездѣльно прочее бывше разумѣется, якоже учими бываемъ еже къ Ефесяномъ посланіемъ: закономъ моисейскихъ заповѣдей и преданій, елика писана суть въ книзѣ Второзаконія о жертвахъ и всесожженіихъ и о пасхѣзаконнѣй о обрѣзаніи и о заповѣданыхъ брашенъ и о различныхъ очищеніихъ и полосканіихъ тѣлесныхъ, которая книга и средостѣніе оплоти и вражду именовати обыче апостолъ, глаголя сице явьственѣ въ еже къ Ефесяномъ посланіи: Той бо есть примиреніе наше сотворивый обоя едино, сирѣчь людей іюдейскихъ и языки вѣровавшіе и срѣдостѣніе оплоты разоривъ вражду по плоти, во плоти своей, закона заповѣдей во ученіи раззоривъ, да обоихъ созиждетъ собою во единаго новаго человѣка, уби вражду въ себѣ (Ефес. 2, 14-16), якоже и въ еже къ Колоссаемъ посланіи глаголетъ: оставивъ вамъ прегрѣшенія, истребивъ рукописаніе ученіи, еже на ны, еже бѣ сопротивно намъ и то взятъ отъ среды, пригвоздивъ é ко кресту (Кол. 2, 13-14). Вражду же и средостѣніе оплоты наричетъ é тягости для писанныхъ рукою и черниломъ въ ней Моисейскихъ завѣщаній, егоже ради и рукописаніе глаголетъ, ихже не могуще блюсти іюдеи, вражда къ Богу обрѣташеся имъ и средостѣніе оплоти, разлучая насъ и отчуждая Божія любви. А яко неудобь исправляема бяху іудеемъ законная завѣщанія, блаженный Петръ апостолъ явѣ научилъ въ Дѣяніихъ, глаголя къ вѣровавшимъ фарисеомъ и глаголющимъ, яко подобаетъ обрѣзати обращающася къ Богу языки и всего закона Моисеова блюсти, глаголетъ бо сице: и нынѣ чтó искушаете Бога, наложиша иго на выи ученикомъ, егоже ни отцы наши, ни мы возмогохомъ понести, но благодатію Господа нашего Ісуса Христа вѣруемъ спастися (Дѣян. 15, 10-11). Сіе убо рукописаніе сирѣчь книгу Моисейскихъ завѣщаній вражду и средостѣніе оплоти именуему, иго сирѣчь тягость, аки клятвы, а не благословенію ходатаицу, единородный Сынъ Слово Божіе безначальнаго Отца во плоть облеклъся и бывъ подъ закономъ, да подзаконныя искупитъ, ко кресту Своему пригвоздилъ, сирѣчь разорилъ, прочее отъ среды взятъ é, якоже святый апостолъ Павелъ вопіетъ въ посланіи еже къ Галатомъ, глаголя: Христосъ насъ искупилъ отъ клятвы законныя, бывъ насъ ради клятва, писано бо есть: проклятъ всякъ висяй на древѣ (Гал. 3, 13-14), даже убо освободитъ насъ писанныя клятвы въ книзѣ ветхаго закона глаголющаго: проклятъ всякъ, иже не пребываетъ во всѣхъ писанныхъ въ книзѣ закона, яко сотворити я, да свободитъ убо насъ сицевыя и страшныя и горкія клятвы, Господь и Богъ нашъ Ісусъ Христосъ изволилъ пріяти такову поносную смерть по неисчетнѣй благости Своей и человѣколюбію, да благословеніе Авраамово на языки будетъ, Ісусомъ Христомъ Господемъ нашимъ, да обѣтованіе Духа воспріимемъ вѣрою, яже во Христѣ Ісусѣ Господѣ нашемъ. Сицевому убо рукописанію преставшу крестомъ Господа нашего Ісуса Христа, нѣсмы ктому подъ закономъ Моисеовыхъ заповѣдей, но подъ благодатію и свѣтомъ Евангельскаго совершеннаго законоположенія, егоже ради ни обрѣзатися нужа належитъ намъ, но божественнымъ крещеніемъ очищаемся отъ всякія скверны духа и плоти. Обрѣзаніе внѣшнее чаши точію очищати являшеся, а святое крещеніе и внутреннее и внѣшнее и чиститъ и святитъ по писанному: окропиши мя иссопомъ и очищуся, омыеши мя, и паче снѣга убѣлюся (Псал. 50, 9). Не во единомъ ктому градѣ Іерусалимѣ древнѣмъ повелѣваемы бываемъ заклати законную пасху, но во всякомъ градѣ и странѣ поволися намъ приносити Господеви жертву чисту и благопріятну, Самого Агньца Божія вземлющаго грѣхъ міра, по писанному: тогда благоволиши жертву правды, возношеніе и всессожженія (Псал. 50, 21), якоже индѣ глаголетъ: жертву и приношенія не восхотѣлъ еси, тѣло же свершилъ ми еси, сирѣчь самое Господьское тѣло, принесенное Богу и Отцу, за спасеніе наше вмѣсто всякія иныя законныя жертвы, и вкратцѣ рещи: все вкупѣ оно древнее рукописаніе преста крестомъ Христовымъ, по писанному: древняя мимо идоша, се быша вся нова (2 Кор. 5, 17). Таковъ бо есть толкъ носимаго у апостола рукописанія. Нынѣ же услышимъ и сказаніе рукописанія грѣховъ нашихъ, каково есть; писано бо есть въ молитвѣ 6 часа сице: И честнымъ Его крестомъ рукописаніе грѣхъ нашихъ разтерзалъ еси. Таковаго рукописанія сказаніе сицево есть. Елма же слышимъ, во еже отъ Іоанна евангелиста глаголющаго къ непокоривымъ іюдеомъ: всякъ бо творяй грѣхъ, рабъ есть грѣху (Іоан. 8, 38); такоже и блаженный Петръ апостолъ пишетъ: имже бо кто побѣжденъ есть, сему и поработися (2 Петр. 2, 19)! Кождоже насъ пленицами своихъ согрѣшеній связуемъ отъ нихъ, якоже безсловесенъ скотъ, къ еже согрѣшати влекомъ всегда бываетъ, похотенъ своея плоти, аки госпожамъ нѣкимъ, невоздержно работая: въ лѣпоту таково наше страстное порабощеніе наречеся рукописаніе грѣховъ, по подобію рабомъ, дающимъ своимъ господемъ на себе рукописанную крѣпость, яко работати имъ даже до смерти своея. Сіе убо наше злѣйше страстное порабощеніе, рукописаніе приточнѣ именуемо, растерзалъ Спасъ нашъ крестомъ своимъ, давъ намъ даръ Святаго Духа, въ Немже вопіемъ: Авва Отче, отъ негоже просвѣщаеми и укрѣпляеми, разтерзается, еже дахомъ на ся, рукописаніе, лукавымъ похотемъ плоти нашея, благодатію же Господа нашего Ісуса Христа и содѣйствомъ Святаго Духа свобождьшеся толь лукаваго страстей порабощенія грѣховнаго, бываемъ Божія чада возлюбленна, свободою убо, еюже крестъ Спасовъ освободилъ насъ, да стоимъ, да не паки подъ игомъ работы подлагаимъ себе, да не столпъ сланенъ будемъ, да не речется и о насъ премудрая притча: свинія въ тинѣ сквернавѣ умывшися, и песъ обращься во свою блевотину.

Источникъ: Сочиненiя преподобнаго Максима Грека, изданныя при Казанской Духовной Академіи. Часть первая: Догматико-полемическія сочиненія. — Изданiе второе. — Казань: Типо-литографія   И м п е р а т о р с к а г о   Университета, 1894. — С. 424-430.

/ Къ оглавленію раздѣла /


Наверхъ / Къ титульной страницѣ

0