Наследие Святой Руси. Памятники древне-русской письменности
 
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Наслѣдiе Святой Руси
-
Гостевая книга
-
Новости
-
Написать письмо
-
Поискъ

Раздѣлы сайта

Святые Кириллъ и Меѳодiй
-
Книги старой печати
-
Патерики и житiя святыхъ
-
Великiя Минеи Четiи
-
Церковно-учит. литература
-
Творенiя русскихъ святыхъ
-
Стоянiе за истину
-
Исторiя Русской Церкви
-
Церковный расколъ XVII в.
-
Исторiя Россiи

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 15 декабря 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ДОГМАТИКО-ПОЛЕМИЧЕСКІЯ СОЧИНЕНІЯ

Преп. Максимъ Грекъ († 1556 г.)
Сказаніе противу глаголющихъ, яко плотскимъ совокупленіемъ и рожествомъ хотяше множитися человѣческій родъ, аще (бы) и не согрѣшили праотцы.

Елма же нѣкихъ слышахъ глаголющихъ, яко аще (бы) рода нашего праотцы пребыли, соблюдше данную имъ изначала всѣхъ Содѣтеля и Владыки заповѣдь, тѣмъже совершаемому нынѣ скотолѣпну образу хотяше родъ нашъ множитися, обаче кромѣ похоти и страсти и женскихъ болѣзней, — сіе же глаголютъ, не отъ божественых писаній показаніе творяще, но человѣческими помыслы многоучителнаго внѣшняго наказанія препираеми и водими, — праведно судихъ малыми нѣкими взысканіи бесѣдовати къ нимъ, неизъявительнѣ, ниже уставительнѣ, но гадательнѣ и словесномысленнѣ и простѣ сице съ ними стязаяся. Рцыте намъ, о предобріи, нетлѣнныхъ ли и безсмертныхъ мните созданныхъ бывшихъ изначала родоначальниковъ нашихъ, или тлѣнію и смерти подлежащихъ? и аще убо рекутъ второе, явственнѣ обличаются лжуще отъ божественнаго гласа, глаголющаго первозданнымъ (Быт. 2, 17): вонже день ни снѣсте отъ заповѣданнаго, сирѣчь плода, смертію умрете. Сіе же рекъ Содѣтель, явственнѣ есть научилъ насъ, яко безсмертныхъ создалъ есть ихъ и безсмертны всяко пребыли (бы) убо до конца, аще бы соблюли были святую его заповѣдь, якоже и онъ божественный гласъ свидѣтельствуетъ, глаголющь (Псал. 81, 6): азъ рѣхъ: бози есте и сынове Вышняго вси, сирѣчь вышши всякоя тли и мертвости; таже приводитъ: вы же яко человѣцы умираете и прочая. И паки (Псал. 48, 13): человѣкъ, въ чести бывъ, не разумѣ, сирѣчь въ нетлѣніи и равноангельномъ пребываніи, прикладовася, рече, скотомъ несмысленнымъ и уподобися имъ, еже есть подпаде тлѣнію и смерти и безсловеснымъ страстемъ, не познавъ своея чести, сирѣчь нетлѣнію и безсмертію санъ. Такоже и Соломонъ премудрый рече: смерти Богъ не сотвори, завистію же діаволею смерть въ міръ вниде (Прем. 2, 24). Аще же отъ божественнаго писанія препираеми исповѣдятъ и нехотяще, яко нетлѣнни и безсмертни создашася и яко и до конца соблюдшеся убо были въ нетлѣніи, аще бы Божію заповѣдь не преступили, како сіе глаголютъ, яко совершамымъ нынѣ скотскимъ образомъ хотяше множитися иже по насъ родъ, обаче кромѣ похоти и страстей женскихъ болѣзней? Вѣмы же, яко дѣтородныя уды двоихъ ради присоздашася обоему полу, яко да тѣми пребудетъ родъ человѣческій, а не до конца изчезнетъ, и да тѣми выстощаются всегда излишняя гніющихъ брашенъ; иже бо вся вѣдый прежде бытія ихъ предъувѣдаше всяко и отпаденіе первозданныхъ, такожде и виновное отпаденію ихъ вѣдаше, яко равни Богу быти вожделѣютъ. Сего ради премудрый Содѣтель сицевы скотскія уды присозда имъ и зѣльное раждьженіе скотскія похоти привсѣялъ въ нихъ, да яко и не хотяще совокупляются другъ другу и дѣти раждаютъ. Инако бо не хотѣли быхомъ совокуплятися другъ другу, поминающи обой полъ многихъ и нестерпимыхъ злостраданій дѣтотворенія и воспитанія раждаемыхъ, женскій убо полъ поминающи девятомѣсячнаго тяжчайшаго во чревѣ ношенія и ихже терпитъ гнусныхъ горестей, и ихже по рожествѣ имать неотреченныхъ печалей о младенцы, дондеже поступитъ на возрастъ большій, а отецъ и той поминаючи многихъ попеченій воспитанія отъ своихъ родъ, како сихъ воспитати добрѣ и наказати благочестивѣ, и женамъ убо сыны своя, мужемъ же дѣвы совокупитъ. Отъ сего убо явственнѣ показуется, яко инымъ нѣкимъ образомъ вышшимъ и человѣча разума превосходящимъ и приличнымъ созданному по образу Божію и по подобію хотяше премудрый Содѣтель умножити иже по насъ родъ, аше убо родоначальники пребыли, соблюдающе божественную заповѣдь, и никакоже понуженъ былъ бы, иже единъ ненудимый, таково стыдное и скотское безобразіе и смѣшеніе скверное примѣтати своему образу. Нѣсть убо праведно мудръствовати и глаголати, яко созданное по образу Божію и по подобію, рекше безсмертное и безстрастное и нетлѣнное, аще бы пребылъ въ заповѣди создавшаго, сицевымъ и сквернымъ и скотскимъ совокупленіемъ хотяше множитися. Идѣже бо скотское совокупленіе, ту всяко истицаніе скверное, безъ таковаго бо зачатіе не бываетъ. Аще же истицаніе, то убо и тлѣніе и страсть сокровенна, то убо нѣсть безсмертно зачатое и рожденное и воспитанное, но тлимое и мертвенное и маловременное. Все бо, еже отъ тля начатъ, тли и смерти подлежитъ. Инымъ убо образомъ чюднѣйшимъ и нашего разума превосходящимъ хотяше множитися родъ человѣческій, а не совокупленіемъ скотолѣпнымъ, якоже нѣцыи недостойна божественнаго образа непщеваша. Не мудръствуемъ убо всуе превосходящихъ разума и достиженія нашего; иже бо по насъ разумъ и земенъ есть и немощенъ и во множайшихъ погрѣшаетъ, по божественному слову, глаголющу: Господь свѣсть помышленія человѣческа яко суть суетна (Псал. 93, 11). И ино писаніе: помышленія человѣческа немощна и замышленія нетверди, а дѣла Божія непостижима всякому созданному естеству. Кто бо позна умъ Господень? или кто совѣтникъ ему бысть? Къ симъ же помыслимъ безсчисленныя тмы безплотныхъ силъ. Како вскорѣ и въ мегновеніи ока составишася вседѣтельнымъ мановеніемъ его? Еда не можаше ли иже единъ всесильный тѣмъже вседѣтельнымъ мановеніемъ своимъ умножити родъ человѣчь, якоже и мысленная воинства безчисленныхъ безплотныхъ силъ, аще бы убо родоначальники пребыли въ даннѣй имъ божественнѣй заповѣди? Ей, можаше всяко. Что бо не возможно содѣтельному мановенію его, имъже бесчисленными тмами звѣздъ вскорѣ небо преукраси и множество четвероножныхъ земли и рыбъ морскихъ и птицъ небесныхъ отъ небытія въ бытіе приведе вскорѣ, и землю всю безчисленными цвѣты и различными сады же и лѣсы преукраси? Но елика убо дастъ благодать глаголати, о семъ толика. Аще же кто сими не покоряется, пребываетъ же еще пряся, мы таковъ обычай не имамы ни церкви Божія, глаголетъ святый проповѣдникъ Божій, егоже вседѣтельнымъ и всесильнымъ мановеніемъ всяческая вскорѣ сотворишася и соблюдаются и правятся. Емуже подобаетъ всяка слава и честь и поклоненіе во вся вѣки. Аминь.

Источникъ: Сочиненія преподобнаго Максима Грека, изданныя при Казанской Духовной Академіи. Часть первая: Догматико-полемическія сочиненія. — Изданіе второе. — Казань: Типо-литографія   И м п е р а т о р с к а г о   Университета, 1894. — С. 431-435.

/ Къ оглавленію раздѣла /


Наверхъ / Къ титульной страницѣ

0