Наследие Святой Руси. Памятники древне-русской письменности
 
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Наслѣдiе Святой Руси
-
Гостевая книга
-
Новости
-
Написать письмо
-
Поискъ

Раздѣлы сайта

Святые Кириллъ и Меѳодiй
-
Книги старой печати
-
Патерики и житiя святыхъ
-
Великiя Минеи Четiи
-
Церковно-учит. литература
-
Творенiя русскихъ святыхъ
-
Стоянiе за истину
-
Исторiя Русской Церкви
-
Церковный расколъ XVII в.
-
Исторiя Россiи

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 23 октября 2017 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

Патерики и житiя святыхъ

Житіе преподобнаго Авраамiя Смоленскаго.

Житіе препод. Авраамія Смоленскаго, подвизавшагося въ концѣ XII и въ началѣ XIII вѣка, написано ученикомъ его инокомъ Ефремомъ. Жизнеописатель самъ говоритъ о себѣ въ концѣ жизнеописанія, описавъ кончину преп. Авраамiя и приступая къ похвалѣ его: «се конецъ блаженнаго и праведнаго отца нашего Авраамия. азъ же грѣшныи и недостоиныи Ефремъ... не могу дивнаго и божественнаго преподобнаго образъ и подобіе похвалити» и проч. Житіе написано не тотчасъ по кончинѣ преподобнаго, случившейся въ 1221 году, а между 1224-1237 годами, когда Россію постигло уже бѣдственное нашествіе монголовъ. Это видно: а) изъ словъ жизнеописателя: «день успения преподобнаго нынѣ празднующе. память чтемъ. се же братие вспоминающу ми житіе преподобнаго, и несущу написану. печалью по вся дни держимъ бых. и молихся Богу. Господи сподоби мя вся по ряду писати о житьи богоноснаго отца нашего Авраамия»; б) изъ того, что жизнеописатель молитъ Пресвятую Богородицу объ избавленіи русскаго народа отъ нашествiя монголовъ: «поганых нашествия испроверзи... измаильския языки разсыпли». — Житіе препод. Авраамія представляетъ нѣсколько замѣчательныхъ церковно-историческихъ фактовъ, въ особенности относительно духовнаго просвѣщенія Россіи XII и начала XIII вѣка. Издаемъ его по сборнику соловецкой библіотеки подъ № 805, писанному въ 1558 году въ Калугѣ, какъ видно изъ послѣсловія.

Мѣсяца августа въ 21 день
Житие и терпение преподобнаго отца Авраамiя просвѣтившагося в терпѣнии мнозѣ и новаго въ святых града Смоленска [1].

О Пресвятыи Царю. Отце и Сыне и Святыи Душе. Слове Божии искони сыи. и в вѣкы створивыи небо и землю. видѣмая же и невидѣмая. отъ небытия насъ въ бытия приведыи. невосхотѣ насъ презрѣти въ мнозѣй прелести мира сего. но посла на избавленіе наше Сынъ Свой единочадый. глаголеть бо пророкомъ Духъ Святый. ни ходатый ни ангелъ осия ны. но и самъ Сый приклони небеса и съниде и родися отъ Святыя и Пречистыя и неискусобрачныя Приснодѣвы Мария без сѣмени отъ Святаго Духа. и поживъ яко человѣкъ на земли и страсть претерпѣ отъ твари своеа и смерти укуси на крестѣ безстрастенъ сый и безсмертенъ сый божествомъ. и въ гробѣ положенъ. и въскресъ третей день. явися ученикомъ своимъ. и увѣривъ я. и много знамения и чудеса показа предъ ученикы. и възыде на небо къ Отцу и сяде одесную и посла Святыи свой Духъ на святыя апостолы. и тѣмъ вся языкы просвѣти. и научи ѝ истинѣ вѣровати и славити Бога. и се заповѣдая глаголаше. се Азъ с вами есмь по вся дни и до сконьчаниа вѣка. и се преже написания молю ти ся Господи Ісусе Христе Сыне Божии. молитвами Пресвятыя Дѣвы Матере. и всѣх небесных силъ и всѣх святых молбами. идѣже ми разумъ просвѣщенъ Христовою благодатью. подай же мнѣ худому и грѣшнѣйшю паче всѣх. свѣтлый подвигъ жития и терпѣния начати. еже о житии. преподобнаго Авраамия. бывшаго игумена монастыря сего святыя Владычица нашея Богородица. его же день успения нынѣ празднующе. память чтемъ. се же братие въспоминающе ми житие преподобнаго Аврамия. и не суща написану. печалью по вся дни держимъ бых. и молихся Богу. Господи сподоби мя вся по ряду писати о житьи богоноснаго отца нашего Аврамия. да и по насъ сущии черноризци. приемше наказанія и почитающе. тии видѣвше мужа доблести. въсхвалять Бога. и угодника Его прославляюще. и на прочие подвигъ укрѣпяться. паче же въ странѣ сей. яко такъ мужъ явися угодникъ Божей. о семъ бо рече Господь пророкомъ. яко отъ утробы матерне възвахъ тя. хотящу ми начати исповѣдати. преже молю. благослови. глаголя сице. Владыко мой Вседержителю. благымъ подателю. Отче Господа нашего Ісуса Христа. приди на помощъ мнѣ и просвѣти сердце мое на разумѣние заповѣдей Твоих. и отверзи устнѣ мои на исповѣдание устенъ Твоих и чюдесъ и на похваление святаго Твоего угодника. и да прославится имя Твое. яко Ты еси помощникъ всѣмъ уповающимъ на Тя въ вѣкы.

Бѣ сей блаженый Аврамей отъ вѣрну родителю рожься. бѣста та въ законѣ Господни. добрѣ живущи въ законѣ благочестно. бѣ же отець его всѣми чтимъ и любимъ. отъ князя честь пріемля. бѣ бо въистину отъ всѣх опознанъ. яко и правдою украшенъ и многимъ въ бѣдахъ помогая. милостивъ и тихъ къ всѣмъ. къ молитвѣ и къ церквамъ прилежа. тако же и мати его всѣмъ благочестиемъ украшена. таже не яко неплоды бѣста. двѣманадесять дщерема отъ него рожешимся. и не бѣ има отрочати. и се бысть има отъ Божия строения. многимъ желаниемъ моляста Бога подати има отроча. многы же обѣты и милостыни церквамъ и монастыремъ дающе. и послуша ею Богъ и дасть има отроча. еще бо ему носиму въ утробѣ матернѣ. обитà Христова благодать в немъ и възванъ бысть святыи яко преже Самуилъ. и съвершившимся днемъ рожения. родиста блажена дѣтища. таче въ осмыи день принесоста ко свѣтителю Божию. якоже обычеи есть христіяномъ. имя дѣтищу нарещи. таче минуща 40 днии дѣтищу крещениемъ освятиша ю. отроча же ростяше. и кормима родителема своими. и благодать Божия бѣ съ нимъ и Духъ Божии измлада вонь вселися. и егда же бѣ отрочатемъ въ взрасть смысла пришедшю. родителя его даста книгамъ учити. не бо унываша отроча. яко прочая дѣти. но и скорымъ прилежаниемъ извыча. къ сему же на игры съ прочими съ инѣми не съхожаша. но на божественная и на церковная пѣниа и почитания прежее инѣхъ притекая. яко о семъ родителема радоватися. а инѣмъ чюдитися. таковому дѣтища разуму. Господня бо бѣ благодать на немъ. просвѣщающа разумъ его и наставляющи на путь заповѣдии Христовых. егда же въ большии възрастъ прииде. всею тѣлесною красотою и добротою. яко свѣть сияше. родителема же его браку понужающимъ. но той самъ не восхотѣ. наипаче поучивъ ею и наказавъ презрѣти и възненавидѣти житейскую сию славу. прелесть мира сего. и въсприятъ мнишескыи чинъ. тѣма же отшедшима жития сего к Богу. онъ же по велику обрадовася. и дасть Богу славу тако извольшему. богатество же. еже остависта родителя его. убогимъ раздаде, вдовицамъ и сиротамъ и черноризцамъ. вся бояся. како бы без печали всѣх земных отъити и наставити мысль свою къ Богу. утвержая учася Господнему словеси глаголющему. аще кто не возметь креста своего. поидеть въ слѣдъ Мене. нѣсть Мнѣ подобенъ. богодухновонныя же. книги и святых жития почитая, и како бы ихъ жития и труды и подвигъ въсприяти. измѣнися свѣтлыхъ ризъ и въ худыя облечеся и хожаше яко единъ отъ нищихъ. на уродство ся преложи. и расмотряя и прося и моляся Богу. како бы спастися и въ кое мѣсто прити. и оставивъ всѣхъ. Богу наставляющу. отшедъ отъ града далече 5 поприщь. острыжеся ту. якоже мнози вѣдать Святыя Богородица монастырь. къ въстоку. селище нарицають é. и бысть оттолѣ по благодати Христовой болий на подвигъ. и вся труды подвизаяся и мыслью вспоминая святаго града Iеросалима и гробъ Господень и вся честная мѣста. яже Избавитель Богъ и Спасъ всего мира. идѣже страсть приятъ нашего ради спасения. и вся честная мѣста и преподобных отець пустыни. идѣже суть подвигъ и трудъ съвершивше. дивнаго начальника всѣмъ и въсиявша равно ангеломъ. великаго мню Антония бывшаго крѣпка храбра и побѣдившаго силою крестною духи неприязненыя. Иларіона бывшаго ученика его. по немъ свѣтлаго въ постницах чюдотворца Еуѳимія. и по них Саву и Ѳеодосія архимандрита и старѣйша всѣх. наставника черноризцем суща окрестъ Иеросалима. и изо всѣх любя часто почитати учения преподобнаго Ефрема Великаго вселенныя учителя и Иоанна Златоустаго. и Ѳеодосья Печерьскаго. бывшаго архимандрита всея Руси. иже въ святых богодухновенных книгъ житиа их и словеса приходя и унимая почиташе [2] день и нощь. безпрестани Богу моляшеся. и поклоняяся. и просвѣщая свою душу и помыслъ. и кормивъ словомъ Божиимъ. яко дѣлолюбивая пчела вся цвѣты облѣтающи. и сладкую себѣ пищу приносящи и готовящи. тако же и вся отъ всѣх избирая и списая ово своею рукою. ово многыми писци. да якоже пастух добрыи. вся свѣдыи паствы. и когда на коеи пажити ему пасти стадо. а не якоже невѣжа невѣдый паствы. да овогда гладомъ. иногда же по горамъ разыдутся. инии отъ звѣрей снѣдени будуть. тако всѣмъ есть вѣдома невѣжамъ взимающимъ санъ священства. тако же и корабленикъ и хитрыи кормьници. вѣдуще путь и пристанища их. милости ожидающе отъ Бога. и подобна вѣтра. а не противу бури и волънамъ морьскымъ. но съ Божиею помощью. како доити нареченаго града. бес пакости и потопленна. аще ли въ градъ далнии хотяще поити. то вѣдущих просимъ. егда суть пути различны и мѣста сущихъ разбойникъ. и того всего боимся и молимъ Бога. дабы без всякоя бѣды доити. нъ на прежереченная възвратимся отнележе начахомъ о дарѣх слова Божиа. данных отъ Бога преподобному Авраамию. якоже кто хотя нареченъ быти въ воеводы отъ царя. то не вся ли събираетъ храбрыя оружники. тако стати крѣпко урядившеся на противныя съ Божьею помощью наступити и побѣдити. тако и сеи таковому дару и труду божественных писаний прилежа и почитая. како бы корабль своеа душа съ Божиею помощью съблюсти. многых бурь и волнъ. рекý же. напастей отъ бѣсовъ и отъ человѣкъ. и съ упованіемъ непогружену отъ сих бѣдъ. онаго пристанища спасения подоити и въ тишину небеснаго Иеросалима Бога нашего приити. пишетъ бо. смерть искушения и брань по святымъ книгамъ. наше же житие се есть. яко неудобъ есть без напасти прѣйти. никто можетъ. аще бо Самъ Владыка Спасъ Господь и Творецъ всѣмъ и създавыи вся и пришедыи на спасение наше отъ Пречистыя Дѣвица Богородица. толику страсть приятъ отъ Своея твари. кромѣ бывъ всякаго грѣха. и всѣх святых колико. не тоже ли претерпѣша. и тако улучиша царство небесное. его же получити и мы помолимся. и пребысть блаженыи Авраамій пребывая въ преженареченые монастыри въ трудѣ и въ бдѣнии и въ алкании день и нощь. якоже и самому игумену зрящу добраго жития радоватися. и всеи братьи. и славити Бога. мнозѣмъ отъ мира притекати отъ него утѣшения приимати отъ святых книгъ. и бѣ въ всемъ повинуяся игумену и послушание имѣя къ всѣмъ братиямъ. и любовь и смирение имыи. Бога ради покараяся всѣмъ. искусивъ же его игуменъ. яко въ всемъ повинуется ему и послушаеть. бѣ бо и самъ игуменъ хитръ божественнымъ и вся свѣдыи и проходя. якоже мнози свѣдять. и никто же смѣя предъ нимъ отъ книгъ глаголати. и принуди же блаженнаго Аврамия приять священническый санъ. и поставлену ему бывшу диякономъ. и потомъ ереемъ при княженьи великаго христолюбиваго Мьстислава Смоленъскаго и всея Рускыя земли. приимъ же святыи блаженный священный санъ. болѣи смирения приятъ. яко таку благодать Христосъ ему дарова. божественную литоргею съ всяцѣмъ тщаниемъ [3]. юже за всего мира Христосъ повелѣ приносити. и ни единаго же дне не остави. якоже и мнози вѣдятъ его бывша и до самоя смерти и не оставившаго церковьная правила и божественныя литоргія и своего подвига. нищету же и наготу. и укорения же отъ диявола. и тугу и искушения отъ игумена и отъ всея братия и отъ рабъ кто можетъ исповѣдати. якоже ему самому глаголати. бых 5 лѣтъ искушения терпя. поносимъ. безчествуемъ яко злодѣй. якоже не терпя его и видя себе дияволъ побѣжена отъ святаго. и въздвиже нань сию крамолу. своими совѣты хотя ѝ оттолѣ прогнати. якоже и бысть. видѣ бо дияволъ. яко мнози отъ града приходять и учениемъ духовнымъ его множатся. отъ многих грѣх на покаяние притекають. аще ли сице речемъ. Богу хотящу. яко нѣсть лѣпо свѣтильнику въ тмѣ сияти. и укрытися граду выше горы сущу. пишеть бо о великомъ свѣтилѣ и учители всего мира. о Златоустѣмъ Иоанѣ. яко егда отъиде въ пустыню и пребысть неколько время въ пустыни. яко многымъ трудомъ и въздержаниемъ и олъканиемъ приятъ вредъ и нужу отъ тѣла. якоже бысть и се ему отъ Божия промысла. да не учитель далече отъ града будеть. оттолѣ въниде въ градъ учя и наказуя вся на страхъ Господень. сице же и сему бысть отъ дияволя научения. ибо нѣции отъ иерей. друзии же отъ черноризець. како бы нань въстети. овы же отъ града потязати и укорити исходяще. друзии и спиру творяще. яко ничто же свѣдуще. противу нань глаголаху. и тако посрамлени съ студомъ отхожаху. и пакы непреставааху крамолы нань въздвизающе. въ градѣ и вездѣ глаголюще. се уже весь градъ къ себѣ обратилъ есть. есть бо. о братия. о семъ приложити слово на утѣшение вамъ. тако бо бѣ благодатию Христовою утѣшая приходящия и плѣняя их душа и смыслъ их. дабы възможна не отхожащу быти. яко сему и мнози суть послуси. яже и самому игумену не стерпѣти. многыя къ нему видя притекающія. и хотя того его отлучити и глаголаше. азъ за тя отвѣщаю убо Богу. ты же престани уча. и много озлобления нань възложи. и оттолѣ въниде въ градъ. и пребысть въ единомъ монастыри у честнаго креста. и ту начаша болѣ приходити и учение его множайшее быти. а врагъ сѣтоваше. а Господь Богъ раба Своего прославляше. и съблюдаше на всяко время. благодать и силу подавая рабу Своему. и пребысть мало время. и отъ многъ приемля утѣшениа. подаваху ему на потребу и лише потребы. и потомъ скоро раздаваше вдовицамъ и нищимъ. а самъ еже въ потребу себѣ приимаше. украси же церковь иконами и свѣщами. и мнози начаша отъ града приходити и послушати церковнаго пѣния и почитания божественных книгъ. бѣ бо блаженный хитръ почитати. дасть бо ся ему благодать Божия не токмо почитати. но и протолковати яже мнозѣмъ не свѣдущимъ. и отъ него сказанная всѣмъ разумѣти. и слышащимъ ксему изоустъ и памятью сказая. яко ничтоже ся его не утаить божественных писаний. якоже николиже умлъкоша уста его ко всѣмъ. къ малымъ же и къ великимъ. рабомъ же и свободнымъ и рукодѣльнымъ. тѣмъже ово на молитву. ово на церковная пѣния. ово на утѣшение притекающимъ. яко и въ нощь мало сна приимати. но колѣнное поклонение и слезы многы отъ очию излиявъ. и въ перси бья и кричаниемъ Богу припадая. помиловати люди Своа. отвратити гнѣвъ Свой. и послати милость Свою и належащихъ бѣдъ избавити ны. и миръ и тишину подати молитвами Пречистыя Дѣвы Матери Богородицы и всѣх святыхъ. написа же двѣ иконѣ. едину страшныи судъ втораго пришествія. а другую испытания въздушных мытарствъ [4]. ихже всѣмъ нѣсть избѣжати. якоже великыи Иоаннъ Златоустъ учить. чемерить [5] день поминаеть и самъ Господь и вси святии Его сеи проповѣдають. егоже избѣжать негдѣ. ни скрытися. и рѣка огнена пред судищемъ течеть. и книгы разгибающиися. и Судия сидяи. и дѣла открываются всѣх. тогда слава и честь и радость всѣмъ праведнымъ. и грѣшнымь же мука вѣчная. еяже и самъ сотона боится и трепещеть. да аще страшно есть братие слышати. страшнѣе будетъ самому увидѣти.

Се же оставльше на се пакы обратимся. яже о блаженнѣмъ Авраамьи. и сеи убо не престаяше страшнаго поминая суда. испытания бояся. и не престая прилежно Бога моля и въ нощи и во дни. и ко всѣмъ приходящимъ онаго страшнаго дня не престая о томъ глаголя и почитая великаго онаго свѣтлаго учителя вселенныя Иоана Златоустаго и преподобнаго Ефрема и всѣх богогласных святых. Святаго Духа глаголаннаго ими собѣ унимая и всѣмъ проповѣдая. и бѣ блаженый с воздержаниемъ отъ многаго питья. пьянства же отинудь ненавидя. ризы же [худыя] по смирению любя. драгых велми бѣгая. и смирение присно имѣя. на трапезы же и на пиры отинудь не исходя. многых ради зазираний. якоже бывають отъ мѣста избирающих [6]. и инѣх ради многых бывають. отъ многа ради пиянъства и бѣды. и того ради сего убѣгаше. образъ же блаженнаго и тѣло удручена бяше. и кости его и съставы. яко мощи ищести. и свѣтлость лица его блѣда имуща отъ великаго труда въздержания и бдѣниа. отъ многъ глаголъ. яже тружашеся. поя и почитаа и молитву принося къ Богу. и божественному приступаше жертвеннику на божественное приношение. отъ Господа преданное апостоломъ на вечери. и апостолы намъ. онаго завѣта [7] въ оставление грѣховъ. съ богобоязньствомъ и съ вниманиемъ. отинудь запрещаше же въ церкви глаголати. паче же на литоргіи. и заповѣдая и уча всю имѣти веля мысль и съ душею тогда къ Богу. стройно же и почину лѣпо. егда устрояшеся въ священническыи санъ. образъ же и подобие на великаго Василья. чръну браду таку имѣя. плѣшиву развѣ имѣя главу. но не зазрите ми братиа моеи грубости. не лжа бо си глаголю. или какою хитростию или мудростию. но многых ради. иже его не видѣша и не слышаша. и въспоминаю Господа глаголюща. рабе лѣнивыи и лукавыи. подобаше ти дати сребро Мое купцемъ. да Азъ бых на них узялъ съ лихвою. тѣмъ бояся сего осуждения. сиа написаю. да сего послушавше прославимъ Бога. давшаго сию благодатъ и помощь граду Смоленску. блаженнаго Аврамия. хотящу ми еще глаголати помозите ми въ молитвах ваших. да ми поможетъ Господь и конець съвершити положити. хотящимъ почитати и поревновати житию преподобнаго или преписати ѝ. великую отъ Бога милость приятъ здѣ и въ будущии и страшныи день въздаяния Христова. но на прежереченное поминая възвратимся. отнудуже поидохомъ. видя же себе сатана побѣждена Христовою силою отъ святаго. яко явльшеся ему овогда в нощь. овогда въ день устрашая и претя. яко огнь освѣчая ѝ въ нощи. яко мнозѣмъ еще не спящимъ. овогда стужая. овогда являяся въ мнозѣх мечтаниих. пакы яко левъ нападая. яко звѣрие лютии устрашающе. другое. яко воини нападающе и сѣкуще. иногда и съ одра смѣтающе я. егда отъ сна въстаяше блаженныи. но малу сна вкусивъ отъ злых окаянных бѣсовских мечтаний. и въ день болѣ ему о семъ стужающе. тѣмже ово собою. ово въ жены бестудныя преображающеся. тоже яко о великомъ Антонии пишеться. видя Господь силу неприязньну. и его злобу на ны не попусти всеи силы его. но якож Самъ вѣсть. тако и попущаеть по силѣ приимати его брань. и якоже Господь въ Еуангелии рече. яко ни на свиньях имать власти без Божия повелѣния. да искусни Божии раби явяться. к сему же учить Златоустъ глаголя. Господи аще попустиши единаго врага. то ни весь миръ ему не удолѣеть. то како азъ возмогу калъ и брение. укрѣпивыи же Господь Антониа. явлься ему дерзати повелѣвъ. не боися. Азъ ти помогу. и то же и сему блаженному Свою благодать и силу подаваше и избавляше. и сими блаженнаго всѣми искусивъ сатана и не удолѣвъ. Богу помогающу. и ину крамолу нань въздвиже. якоже и при Господѣ бысть. въшедъ сатана въ сердце июдѣемъ и съвѣтъ сотвориша нань. и много поругавшеся и страсти предаша Господа славы. сице же и на сего бысть. якоже бо сатана отъ прежняго монастыря отгна. сице и нынѣ сътвори. не могыи окаянныи терпѣти бывающия ради благодати помощи вѣрнымъ и христолюбивымъ христіяномъ. и отъ всѣхъ побѣжаемъ силою Христовою. и въшедъ сатана въ сердца безчинных и въздвиже нань. и начаша овии клеветати къ епископу. инии же хулити и досаждати. овии еретика нарицати ѝ. а инии глаголаху нань. г'лубинныя книгы [8] почитаешь. инии же къ женамъ прикладающе. попове же зияюще и глаголюще. уже наши дѣти вся обратилъ есть. друзии же пророкомъ нарицающе и ина же многа нань вѣщания глаголюще. ихже блаженный чюжь. истиною реку тако. а блаженыи все радуяся терпяше о Господи. събрашежеся вси от мала до велика весь градъ нань. инии глаголють заточити. а инии къ стѣнѣ ту пригвоздити и зажщи. а друзии. потопити. и проведше сквозѣ град. всѣмъ же събравшимся на дворъ владычнь игуменомъ же и попомъ и черньцомъ. княземъ и бояромъ. дияконом и всим церковницамъ внегда послаша по блаженнаго. уже всѣмъ събравшемся. посланныя же слугы емше. яко злодѣя влачаху. овии ругахуся ему. и безчинная словеса кидающе. и весь градъ и по торгу и по улицамъ. вездѣ полно народа. мужи же глаголюще и жены и дѣти. блаженный же бѣ яко птица. ятъ руками. не умѣя что глаголати или что отвѣщати. но едино упованіе имѣя къ Богу. и к нему моляся о тая избавити печали. в собѣ воспоминая страсти Господа Бога и Спаса нашего Ісуса Христа. яко вся сиа претерпѣ нашего ради спасениа. и моляся. Господи не постави имъ грѣха сего. и не попусти на раба Твоего. предатися въ руцѣ ихъ. но укроти и запрети. яко же пред ученикы на мори вѣтру повѣлѣ умолкънути, яко же и бысть. князю бо и вълостелем умякчи Богъ сердца. игуменомъ же и ереемъ. аще бо мощно живаго позрѣти. ведому же ему на снемъ [9]. явися Господь в то время преподобному Луцѣ прусину. у церкви честнаго архангела Михáила. стоящю ему на молитвѣ. въ 9 часъ. и гласъ бысть ему глаголющь. яко възводять блаженнаго ему угодника на снемъ. съ двема ученикома истязяти хотять. тыжь о немъ никако же съблазнися. и глаголаше блаженныи Лука на снимающихся на блаженнаго Аврамиа и на уничижающих его. много бо без правды хулящии уничижають. но да быша грѣси его на мнѣ были. и вы слышасте яко хотѣша сътворити преже сего не имуща страха Божиа. таций же безумний. и епискупъ како хотяше без правды убити ѝ. иже и еще порокъ золъ. и хула. и клятва зла и гнѣвъ Божии за 30 лѣтъ пребысть. и еще время будеть. аще се того не покаете. възвратимся о нем же начахъ глаголати. приведену бывшю блаженному на суд. ничтоже нань вины не обрѣтающимъ. но безчинным попом. яко волом рыкающим вины. такоже игуменом. князю же и вельможемъ не обрѣтающимъ вины. но изыскающе все. нѣст неправды ни коеяже. но всю лжють. тогда яко едиными усты неповинны. да будемъ владыко рекуще къ всѣмъ еже таку нань крамолу въздвигнули есте. и неповиннии есмы еже нань глаголати. ли что съвѣщаете. како любо беззаконно убииство. и глаголюще. благослови отче и прости Авраамия. и тако отъидоша во свояси. видѣвше же сия. тако отъидоша. и яко неимъ конца. въ чемъ осудити ѝ. и рѣша от епископа. на се приготованнымъ крѣпко стрѣщи ѝ. и блюсти ѝ. и на два и от ученикъ его. иже преподобному служаще добрѣ. на утрии же събравшися игумении и ереи. и вины яже преже глаголаху. укоривше. озлобивше. възложиша нань. и от того времяне пакы видевъ монастырь. идѣже бѣ преже отстриглъся блаженный. яко не пріимшу ему ни коего зла. се же от сего времене многа зла пребысть. елико бяше блаженнымъ научено. всѣ ти обратишася на своя дѣла злыхъ грѣхъ. но и славу Богу. тьрпящему сих всѣхъ. и еще тогда блаженному Лазарю ереемъ сущу. и по Игнатии епископу бывшу. истиною рещи яко поборникъ и пастух Христовы церкви словесных овець. сыи бо бѣаше Бога ради оставилъ епископью свою и за многая обидения святых церквей. иже обидѣть властели. отъимающе чюжая без правды. и обидяще вдовицы и сироты. сии бо видя и слыша яко вся без правды. яже на блаженнаго Авраамия ону крамолу въдвигнули. Богу бо о семъ възложившю. се пришедъ глагола къ епископу Игнатью. велико есть быти опитемъи граду сему. аще се добрѣ не опечалиши. яко же и бысть. блаженный Игнатій сего послуша скоро. посла по всѣмъ игуменомъ и ко всѣмъ попомъ заповѣдая и запрещая всѣмъ. отъ всякаго речения зла престати. яже на блаженнаго Авраамия. се бо послушавъ вас. на ся от Бога въсприях в вѣкы опитемъи. а вы чада покайтеся. сами вѣсте что прияше от Бога въставъ. аще же ся не покаете. то тоже и вы приимете. сего же ради блаженный имя нарекълъ собѣ. своего святца подражае. яко же Иоаннъ. подражая много пострадавъ. от оноя вси и за ня моляся Богу. обращая вся къ Богу. и спасе я. блаженный же терпя их запрещения. тако же бѣ и сему ихъ запрещение. яко ино кому же не приходити к нему. мнози же мечници на всѣхъ путех стрѣжаху. а нѣции разграблени быша. Богу же хотящу всѣмъ спасти. овогда же человѣколюбие свое и милость являеть. овогда же казни. бѣды дая. глад смерть бездождия. сушю. туча. тажъ кыя поганых нахажения. градъ пленение. и вся еже на ны от Бога приходять. и тѣми обращая и приводя къ себѣ. да не бо есмы без грѣха. а терпяше сих разсудимъ поменемъ колико злых. яже сътворихомъ. во дни же и в нощи съгрѣшающим. овии осужають и хулять. святителя и ерея и черноризьца. а сами яко без грѣха суще. а слышасте Господа глаголюща. святителя моя и черноризьца. и ерея. честно имѣйте и не осужайте их да ни сами приимете от Господа горкый суд. да не сами забудете Господа заповѣдающа. рече бо Господь. за весь празденъ глаголъ въздати слово въ день судный. а Павелъ апостолъ вселенный учитель глаголеть. что осужаете чюжаго раба. своему господину или падаеть или стоить. или въстанеть. силенъ же Господь поставить ѝ. и пакы их ради приходить гнѣвъ Божии на сыны непокоривыя. тѣмже внимаимы кождо себѣ. кождо за ся въздати имать слово въ день суда. достоино же есть. и здѣ помянути слово. яже от житія преподобнаго Савы. и о патріарсѣ Иеросалимъстемъ Илии. его же Анастасии царь. без правды повелѣ изгнати от престала иного в него мѣсто возведе. яко же се услышаша въ Иеросалимѣ градѣ. яко изгнанъ бысть патриархъ. и зѣло поровашася ему. яко за то прииде на ня гнѣвъ Божии. и бысть на ня 5 лѣтъ глада. да накажутся. не радоватися о злѣ ни о коемже. яко же пріити иконому. къ преподобному Савѣ и глаголати. уже суть братия неядъше всю недѣлю. да уже есть намъ не ударіти въ трапезное било. преподобный же Сава утѣшая глаголаше. яко не имать Богъ презрѣти рабъ Своих. по глаголу же преподобнаго бысть. нѣкто христолюбецъ 30 вельбуд имѣя. яже къ блаженому посла въ лавру. всякаго брашна наполнивъ до изобилья. яко же призва иконома Сава. и глагола к нему есть ли ударити въ било. икономъ же повелику похули себе. а иже о цари Анастасии рекохом. иже патріарха Илію съ престола отгна. и гнѣвъ за то постыже Божій. яко сказуеть смерть его. явибося облакъ и молнья. развѣ о палатѣ Христовѣ. тако гоним убиенъ бысть гнѣвом. достоить же здѣ есть помянути о великомъ свѣтилѣ всего мира. иже на святаго Іоанна Златоустаго въставше злии изгнаша ѝ. явися ему великія апостола Петръ и Павелъ глаголюща. дерзай страстотерче Божии. Господь с тобою. миръ буди. мужаися и крѣпися. прияти бо имаши въ зданіе небесное царство. и вѣнецъ свѣтелъ отъ Господа. а воставшіи на тебе лютую смерть от Бога казнь приимуть яже и на скорѣ прияти имуть. и здѣ. и в будущий суд. скончавшюжеся блаженному. събысться проповѣдь святою апостолу на крамольствовавшихъ и на отгнавших святаго. да ови отъ епископъ напрасную смерть приимаху. инемже прыщи синии по ногамъ бываху просѣдающеся. иному напрасенъ огнь свыше съшедъ руцѣ и нозѣ усуши. иному же нога обертися. и нача гнити. и претираемѣй ей яко от тоя и другой и тотъ же вред прияти. и въ 3 лѣто едва душю испусти. иному же языкъ яко затыканъ въ устнѣх бяше. и въ дъску въписавъ. глаголаше свой грѣхъ. яко на святаго Іоанна Златоустаго хулу глаголахъ. Евдоксию же лютый недугъ порази. лономъ бо ей кровь грядяше. и потомъ бысть смрад и черви. и породи тако горькую смерть. и животъ свой злѣ сконча. ибо видѣти гнѣвъ Божии напрасно да них находяй и многымъ мукамъ и смертѣмъ предая тяжко. но и на глаголанная возвратимся. да уже о блаженнемъ Авраамии помянемъ. скоро на сих бысть. да овии от игуменъ. инии же от поповъ напрасную смерть приимаху. яко ведуще. и бывше въ сонмѣ на блаженнаго тужаху. и припадаху ему на ногу прощения приимаху. а не бывше въ сонмѣ радовахуся. пишеть бо въ златых чепех [10]. вся вселенныя святых отець. яко же бысть нѣкий отецъ от преподобных. многым пользу творя словом и житием. нѣции же от дѣиства диявола. завидивше и оклеветавше. многы отсекаша от него. и яже к нему пользы лишиша. послѣдиже уразумѣша дияволю лесть и покаяшася ему и прощение от него приимаша послѣди. ови въ различьныя въпадша беды. грѣха ради. рече бо Спасъ. смущая васъ. ту прииметь суд. кто любо буди. се есть подобна помянути повѣсть нѣкоего отца духовна. къ сыну духовну [11]. корабль есмы мы. корьмникъ же Богъ всего мира. направляя и спасая. и Своими присными угодными рабы реку же пророкы. апостолы. святители и всѣми учители Божии. даже и до скончания вѣку сему. да аще мы на ся възмемъ. инѣх осужати и изгоняти въ правду или без правды. ту же отгонили есмы от Бога. и отдали есмы оному противному рекше дияволу Божии коробль. нынѣ же не вѣмы ся в чемъ есмы. понеже взяла есть противная буря. а егда ны принесеть къ истоплению. тогда всѣ погибнемъ без года. яко никто же нас о своих грѣсѣх нудится и плачеть. но иныя осужаемъ и хулимъ. яко же рече Господь. человѣцы узяша суд Мой. уже бо их судиша. Азъ имъ не сужю. того ради да не осужени будете от Бога. аще бо кто прииметь благодатъ от Бога. и даръ поучения. то ни весь миръ таковаго можеть оскорбити. имать бо над всѣми Бога помощника. яко же рече Господь. Азъ есмь с вами. никто же на вы. се же оставльше. на се възвратимся. бывшю же бездужьдию велику въ градѣ. яко изсыхати земли и садом и нивамъ. и всему плоду земному. яко незаколико бысть время. всѣмъ тужащимъ. и молящимъ Бога. и самъ епископъ блаженный Игнатій. съ честнымъ крылосомъ. и съ богобоязнивыми игумены. и ерѣи. и диякони. и черноризци. и со всѣмъ градомъ. мужи и женами. и весь младый возврастъ въкупѣ. весь град окрестъ ходяще съ честнымъ крестомъ. и съ иконою дръжащею Господа. и съ честными святых мощи и съ великым умилениемъ и съ слезами помиловати люди Своя. и послати милость Свою на землю. и отвратити гневъ Свой. пустити дождь. подождити лице земли молишася. святыи кончавшимъ постъ. крестом и святых мощьми воду освятивше. и отъидоша кождо во свояси. и не бысть дождя на земли. и бывше въ печали велицѣ. се же все бысть от Божия промышления. и хотя Богъ блаженнаго Авраамия объявити. и възложи Богъ на сердце нѣкоему сущу иерею. яко шед помяну христолюбивому епископу Игнатию. о блаженнемъ Авраамии. глаголя сице. вси молихомся. не послуша насъ Богъ. кая вина такояже на преподобнаго Авраамия. яко лишенъ бысть божественныя литоргия. еда и того ради бысть от Бога казнь. тогда блаженный Игнатии вскорѣ посла по блаженнаго Авраамия. и призвавъ ѝ и спытавъ. яко все лжа и оглаголания по зависти и злобѣ дияволи бысть. и прости и глаголя. и благослови честный отче. за неведение мое. се ти сътворих. послушавше лживых клеветникъ и оглагольникъ. и благослови паки пречистою и честною литоргию съвръшати. и моли Бога о градѣ. и о всѣх людех. да помилуетъ Господь. и подастъ богатно дождь Свой на землю. и глагола блаженный къ святителю. кто есмь аз грѣшный. да сице повелеваеши выше силы моея. но глагола воля Божия да будетъ о всѣх нас. и ты преже о нас помолися честный святителю о своемъ богопорученнемъ избраннемъ стадѣ святѣм словесных овець. отшедшю же блаженному и молящуся Богу. и глаголющю. услыши Боже и спаси Владыко Вседержителю. молитвами Твоего святителя и всѣх ерѣй Твоихъ и всѣх людей Твоих. и отврати гнѣвъ Твой от рабъ Твоих. и помилуй градъ сей. и вся люди Твоя и приими молитвы. всѣх въздыхания. и съ слезами молящихтися. и пусти дождь и напои лице земли. человѣкы и скоты възвесели. Господи услыши и помилуй мя. еще преподобному не дошедшю своеа келіи. одожди Богъ на землю дождь. яко славити Бога всѣмъ. и глаголати. слава Тебѣ Господи. яко скоро послуша раба Своего. и бысть многа радость въ градѣ. и оттолѣ начаша притекати въ градъ. и вси глаголати Еросалимъ град. яко помилова Богъ. избави ны от всѣхъ бѣдъ. твоими господи отче молитвами отселѣ болѣ просвѣтися. по благодати Христовѣ. лѣпо же помянути и о житии преподобнаго отца Ѳеодосия Печерскаго всея Руси. хотя Богъ вѣру раба Своего явити. и от того мѣста на другое преселити. и пресвѣтлѣйшю церковь възградити. уже умножившися братии. и показа Богъ чюдо в нощи яко сказають рекуще. яко дуга въ образъ от верха церковнаго. другый холмъ конець ея. и преподобнаго отца Ѳеодосия душа съ иконою Пречистыя Богородица и братьи въ слѣд идуща и поюще. яко же и бысть потомъ. тако же и нынѣ помянемъ о преподобномъ Авраамии. и о молитвѣ Пресвятыя Богородица. и братьи въ слѣдъ идуща и поюща. яко же бысть потомъ и хотящимъ показати мѣста на немъ же блаженный о Бозѣ хощеть жити инѣм мнозѣмъ. иже имуть с нимъ спасатися. преподобныи и благочестивый Игнатии. мышляше създати церковь каменну. во имя святаго Игнатья. во имя собе [12]. внѣ града таково суще мѣсто близ равно. угодно на поставленіе церкви. и все могуще въсприяти ряд монастырскъ. и скупи огради овощьныя крестъ [13] его. и постави церковь во имя Богоносца [14]. и потомъ ту разрушивъ. и на ино мѣсто пресели. и основа большю. и нарече въ имя Святое Владычицѣ нашея Богородица положение честныя ризы и пояса. и быша в нем неколико братии. блаженнымъ питаеми епископомъ Игнатием. нѣкотории же буйци и несмысленнии уни ждаху глаголаше. аще хощеть кто да идеть на игуменьство. имя нарицающе. преподобный же епископъ ко мноземъ глаголаше. и благодатью же Божіею прозря духовныма очима. яко имать прославити Богъ мѣсто се. и молитва Пречистыя Богородица. и мнози имуть в нем спастися. о Христовѣ благодати. о Бозѣ пребывающе. и в немъ притекающе христолюбивыя людие. по мнозѣ же времени. Богу о семъ промышляющу стужаше бо в себѣ блаженный Авраамии яко далече сущу града. приходящимъ такоже. блаженный епископъ помянувъ Божиею волею. тогда призва единаго от своего честнаго крылоса перваго от старѣйшиих протопопа именемъ Георгия. глагола к нему о блаженнем Авраамии. помянувъ яко далече ему сущу граду скорбь ему велия. да призоветь скоро. блаженный прииде по повелѣнию епископа. и въшедъ сотвори поклонениа. глаголя. благослови владыко святый раба твоего. призва блаженнаго Авраамиа епископъ утѣшая глаголюще. како отче о Господѣ пребываеши. оному же рекшю. ей владыко святый. истинно молитвами твоими добрѣ. и рече к нему епископъ. хощу дати благословение. аще приимеши. отвѣщавъ блаженный глаголаше честно есть. благослови же его и глагола к нему епископъ. сіе благословение даю ти и поручаю Пречестнои Богородицѣ, поиди похваля Бога и славя. и помоли о всѣхъ. блаженный же радовашеся и хваля Бога. тако даровавшаго благодать рабу Своему. молитвами святыя Богородица. и въходящу ему въ врата монастырьская. но како свѣть въсия ему въ сердца от Бога и съ радостию просвѣщая душю его и помыслъ. яко же се и всѣм повѣдаша. яко же сице въ снѣ виде лѣстьвицю досезающуся до небесъ. и глаголаше. яко есть Богъ на семъ мѣстѣ. тотъ же сему открывашеся. уже бо Господь искусна яви. сбысться псалом Давыдовъ. вьздѣ человѣкы на главы наша. и проидохом сквозѣ огнь и воду. изведе ны. яко же бо царь по многых побѣдах и трудѣхъ. на большии санъ честь возводить своего воина. да уже и сему Господь Богъ самъ дасть. рабу Своему утѣшениа. яко трудившеся. и всѣхъ сердца обращая своею благостию далнимъ же и ближнимъ. и просвѣщая вся душа и оттолѣ нача пребывати. въ первомъ подвизѣ. и всѣмъ иже притекающимъ с радостию великою. ибо велия благодать Божия на градѣ вся просвѣщающи и веселящи. тишину же морьскую и миръ всѣхъ благих на многа лѣта подающи. и еще не оскудѣти имать. молитвами святых Богородица и преподобнаго Авраамия. и всѣх святых Его. и оттоли прослави Господь болѣ. зане же злѣ блаженнаго оскорбивше. обращатися начаша и приподати на ногу. просяще прощения. иже всѣми ненавидимъ бывъ. всѣмъ бысть да иже преже бояхуся приити. то убо не боящеся. но радующеся приходяху. не точию гражене едине приходяху. но и со женами и съ дѣтми. инъ от княз. и от велможь. работнии же и свободнии притекаху. вси своя грѣхи исповѣдающе к нему. и тако отхожаху во домы своя радующеся. пріимже блаженный домъ Святыя Богородица. и украси ю яко невѣсту красну. яко же и преже и болѣ ркохомъ. иконами и завѣсами. и свѣщами. яко же и нынѣ есть видѣти. и всѣм притекающимъ в домъ Ея. милости и заступлению въ хвалу Богу и угодника Его. мнози же хотяху быти черноризци. но не ту абіе пострижаше. ведый трудъ искушение велика. от общаго всего врага. и се братие числомъ. 17. сице же блаженный искушаше от Христовыи благости. вся бо ему Господь откровенная даяша разумѣти. житие хотящимъ и к нему притекающим тако отвѣщавая глаголюще. къ послушливымъ и смиреннымъ. веля имъ часто притекати къ себѣ. елико бо их от златолюбства и злобы. тѣх удѣлящася. сице бо от своихъ напастей. многи от черноризець приимаше искушения. да того ради не скоро приима. искушаше же сице. ведый по книгамъ. но слышаше нѣкоего игумена сице бывше точию до 12. то числомъ имяше мних два же въ искусѣ. а егда кто хотяше от него пострищися. то знаменаша преже къ коему брату внидеть. да аще пойдяше. къ подвижну брату. то стоя славяше Бога руцѣ въздѣвъ. и о немъ моляся Богу. аще ли не к такому. то печаленъ бываше. вѣдый яко нудно есть. лѣнящимъся сии подвигъ черноризцемъ. а подвизающимся рече Господь. възмете иго Мое на себе. научитеся от Мене. яко кротокъ есмъ. и съмиренъ сердцемъ. и обрящете покой душам вашимъ. и утѣшение ибо ярем Мой благъ и бремя Мое легко есть. всѣмъ притекающимъ к тебѣ истинным сердцемъ. велику же любовь потомъ стяжаста. блаженныя. епископъ радовашеся. яко таковаго дарова ему Богъ свята и блаженна мужа. Авраамий же радовашеся. яко тако дарова ему Богъ свята блаженна епископа. Авраамий же паки радовашеся. яко та въ даръ благодать приемъ от него. мало же по такои любви поживъ епископъ и преставися к Богу. по правдѣ рѣщи. въ истину святую преподобному и к Богу тако подвизався. от юности потрудився. и до самыя сѣдины. великаго священничьства. и тако преставися къ Богу святитель. великии Игнатии. града Смоленьска. яко же въ преставлении его. мнози повѣдають о немъ глаголюще. яко великъ свѣтъ сниде на ня с небесе яко страх нападе на вся. и тако възыде радуяся на небеса. свершивъ течение добрѣ о Господѣ Бозѣ. и вси въспросимъ милости от Бога. да помилует ны по милости Своей. яко дарова святителя такого граду сему. оттолѣ болѣ начатъ подвизатися блаженный Авраамии. и о таковѣмъ разлучении. преподобнаго въ смирении мнозѣ и в плачи от сердца съ въздыханием. и съ стѣнаниемъ. поминаше бо о себѣ часто. о разлучении души от тѣла. блаженный Авраамии часто себѣ поминая. како истяжють душю пришедше ангели. и како испытаниемъ на воздусѣ. от бесовьскых мытаревъ. како есть пред Богомъ и отвѣтъ о всемъ въздати и в кое мѣсто поведуть. и како во второе пришествие предстати пред судилищемъ страшнаго Бога. и како будеть. от судія отвѣтъ и како огнена рѣка потечеть, пожигающи вся. и кто помогая будеть развѣ покаяніе. милостыня и безпрестанныя молитвы. и ко всѣмъ любы. и прочая иная дѣла благая. яже обрѣтаються помогающия души. мы же сего ни на памяти имам. по о всѣм. а другое о иномъ станемъ. не имуще ни единаго слова отвѣщати пред Богом. пребысть же блаженный въ таковомъ подвизании вся дни лѣта живота своего. всѣм бдя. и моляся съ воздыханиемъ. многи же научивъ. и наказавъ пребывати въ добром трудѣ. въ бдѣнии же. и въ молитвѣ. и въ терпѣнии. иже и смирении. въ милостини же. и в любви. и сице утверди вся съ слезами многыми. сих же не забывати николиже. и глаголаше имене смиреннаго. не забывайте въ молитвах ваших. моляшеся Владыцѣ и Богу. и Пречистой Его Матери. съ всѣми святыми Его. и потомъ болѣзнь. на божественнаго нашедши. и тако преставися. предавъ блаженную душю Господеви. его же желаше. и получи царство небесное. и пребысть блаженный Авраамии. подвизася лѣтъ. 50 от уности до конца живота своего. о Христѣ Ісусѣ Господѣ нашемъ. ему же слава и дръжава со Отцемъ и Святымъ Духомъ. и нынѣ и присно и во вся безконечныя вѣкы. аминь.

Примѣчанiе:

[1]
По языку и способу писанія предлагаемый списокъ принадлежитъ къ такъ называемой синкретической или смѣшанной рецензіи. Потому въ немъ древніе палеографическіе признаки перемѣшаны съ новыми знаками, входившими въ письменность въ XVI в.
[2]
бралъ и читаль.
[3]
совершалъ.
[4]
Изображеніе мытарствъ и страшнаго суда и въ поученіяхъ русскихъ пастырей XII и XIII в. встрѣчается весьма часто. Въ Измарагдѣ солов. библ. подъ № 270 есть одно древнее поученіе о страшномъ судѣ, которое, судя по нижеслѣдующимъ словамъ жизнеописанія, съ вѣроятностію можетъ быть приписано преп. Авраамію.
[5]
Такъ въ рукописи.
[6]
Отъ мѣстничества на пирахъ.
[7]
Должно быть: Новаго Завѣта.
[8]
Подъ г'лубинными книгами жизнеописатель разумѣлъ или ту таинственную голубинную книгу, о которой сложенъ извѣстный народный стихъ о голубинной книгѣ, или апокрифическую книгу «глубина», о которой упоминается въ извѣстной статьѣ о ложныхъ книгахъ. Паерикъ, сохраненный переписчикомъ XVI вѣка въ словѣ г'лубинный между буквами «г» и «л», предполагаетъ въ древнѣйшемъ спискѣ житія преп. Авраамія звукъ «ъ», замѣнявшій въ древнихъ рукописяхъ «о», какъ напр. въ словѣ: въстокъ. Въ такомъ случаѣ надобно читать: «голубинныя книги».
[9]
на сонмъ, въ народное собраніе.
[10]
Златая чепь — сборникъ разныхъ поученій о молитвѣ, милостынѣ, смиреніи, нестяжательности и другихъ христіанско-аскетическихъ добродѣтеляхъ, или, какъ сказано, въ началѣ ея, «книгы, Господня заповѣди и сихъ толкованiя имущая, также совокупляюще и послѣдующе отеческыхъ ученій, едина главизна отъ другой пріемлющи вину, якоже се нѣкія златы чепи, съ драгымъ каменемъ и съ жемчугомъ съплетены, выю крестъянства украшаютъ» (Спис. Златой чепи солов. библ. XV в. № 258.). Древнѣйшіе списки ея XIV вѣка. Изъ житія же преп. Авраамія видно, что она была уже въ русской литературѣ въ началѣ XIII вѣка.
[11]
Повѣсть эта встрѣчается, кромѣ другихъ сборниковъ, и въ спискахъ Златой чепи въ которой, какъ видно, и вычиталъ ее жизнеописатель. По списку Златой чепи напечатано въ Москвитянинѣ 1851 года № 6: «Слово нѣкоего отца къ сыну своему душеполезно». Слова отца духовнаго къ духовному сыну встрѣчаются и въ другихъ рукописяхъ. Царскаго № 361. 369. 179. Измарагдъ солов. библ. № 270. Сборн. № 803.
[12]
т. е. въ честь тезоименитаго себѣ святаго.
[13]
окрестъ.
[14]
во имя святаго Игнатія Богоносца.

Печатается по изданiю: Памятники Древле-Русской духовной письменности: Житіе преподобнаго Авраамiя Смоленскаго. // Журналъ «Православный собесѣдникъ», Казань. – 1858 г. – Книга III. – с. 136-148, 369-390.

Наверхъ / Къ титульной страницѣ

0