Наследие Святой Руси. Памятники древне-русской письменности
 
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Наслѣдiе Святой Руси
-
Гостевая книга
-
Новости
-
Написать письмо
-
Поискъ

Раздѣлы сайта

Святые Кириллъ и Меѳодiй
-
Книги старой печати
-
Патерики и житiя святыхъ
-
Великiя Минеи Четiи
-
Церковно-учит. литература
-
Творенiя русскихъ святыхъ
-
Стоянiе за истину
-
Исторiя Русской Церкви
-
Церковный расколъ XVII в.
-
Исторiя Россiи

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 1 мая 2017 г. Сейчасъ на порталѣ посѣтителей - 19.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

Патерики и житiя святыхъ

Мѣсяца мая, во 20-й день.
Обрѣтеніе честныхъ и многоцѣлебныхъ мощей иже во святыхъ отца нашего Алексія, митрополита Кіевскаго и всея Русіи чудотворца. Слово вкратцѣ.
Списано же бысть обрѣтеніе Гермогеномъ Патріархомъ. [1]

Въ лѣта благочестиваго и христолюбиваго самодержда Русскія земли, великаго князя Василія Васильевича всея Русіи, при святѣйшемъ митрополитѣ Ѳотіѣ Кіевскомъ и всея Русіи. Егда восхотѣ Богъ болма своего угодника прославить, свѣтильнику не подъ землею быти, но всѣми-же видиму быти. Случися и се по нѣкоему строенію Божію. Церкви обвалившеся весма во время божественныя Литургія; священникомъ еще во алтари. Но благодатію /л. 358 об./ Христовою и молитвою угодника его Святаго Чудотворца митрополита Алексія вси невредими сохранени быша. И тако тоя мѣсто очистивши, хотяще паки воздвигнути новую церковь. И начаша копати рвы во основаніе церкви, и абіе обрѣтоша тѣло блаженнаго Алексія цѣло и невредимо, и ризы его не истлѣвша. О, превеликое чюдо! толикимъ лѣтомъ поминувшимъ и святому во гробѣ лежащу - не измѣнися святое его тѣло и ризы его, яко вчера оболчены; понеже убо да сбудется реченное Богомъ во святомъ Евангеліи - не можетъ градъ укрытися верху горы стоя, и никтоже, вжегъ свѣтильникъ /л. 359./ поставляетъ его подъ спудомъ, или подъ одромъ. Такоже и саму свѣтильнику не мощно на толико лѣтъ сокровену быти подъ землею; се же все бысть премудраго Бога промышленіемъ. Яко же слышано бысть Святаго обрѣтеніе, и се слышавше благовѣрный и христолюбивый князь Василій Васильевичъ и вси благовѣрніи князи - пріидоша скоро на дивное чюдо и на обрѣтеніе тѣла Святаго и при святѣйшемъ же Фотіи, митрополитѣ Кіевскомъ и всея Руссіи, и съ нимъ же епископы и прозвитеры, весь чинъ церковный пріидоша со псалми и пѣніемъ и свѣщами и съ кандилы хвалу велію воздающе всемогущему Богу /л. 359 об./ и угоднику его Чудотворцу Алексію. Народи же московстіи мнози съ радостію стекошася видѣти честное и святое его тѣло. Пришедъ же благовѣрной и великій князь Василій Васильевичъ всея Русіи и вси благовѣрніи князи - видѣвша таковую славу Божію и поклонишася Святому и божественному его тѣлу преподобнаго отца нашего Алексѣя и возрадовася радостію великою зѣло; и, вздохнувъ изъ глубины сердца, глаголя: хвалю и славлю Тя Господи Боже мой и Пречистую и Непорочную Твою Матерь, яко сподобилъ мя еси раба твоего въ моя лѣта видѣти таковое сокровище и благости /л. 360./ державы моея явити ми. Якоже убо далъ еси намъ вторый источникъ благодатный во градѣ нашемъ Москвѣ, творящая намъ, дивныя чюдеса послѣднему роду нашему, не токмо же единому граду нашему, но и всѣмъ градомъ и страномъ съ вѣрою притекающимъ. Но и такова дивная чюдеса и дары милости Твоея получити, Владыко, уже ничимъ же охуженъ есми Божія благодати отъ всѣхъ Святыхъ мужей. О, Предобне Святителю нашъ, Чудотворче Петре, и Святителю Христовъ, преподобне отче нашъ, Чудотворче Алексѣю! не престайте вкупѣ къ Богу молиста за ны и за вся вѣрныя рабы своя; вы бо еста скорая /л. 360 об./ помощника и заступника земли нашей Рустѣй и стѣна необоримая присному граду нашему Москвѣ. Великій же христолюбивый князь и вси съ нимъ благовѣрніи князи и боляре и вельможа ихъ и вси московстіи народы цѣловаста святое его тѣло любезно. И по семъ церковь воздвижена бысть, зѣло прекрасна, Богу на се поспѣшествующу. И святаго тѣло въ рацѣ положиша въ предѣлѣ честнаго Благовѣщенія Владычица нашея Богородица, на десной странѣ, идѣже суть видими святыя его мощи и донынѣ, всѣмъ исцѣленія обильно подающе; принесены же быша мощи его месяца мая въ 20 день, на память св. мученика Ѳалилея, да не умолч/л. 361./ано будетъ истина, и да речено будетъ праведное: Елма бо обаче Богъ не токмо въ животѣ прославляющихъ его прославляетъ, но и по смерти явлену быти многими различвыми чудесы, о нихъ же да речется мало отъ многихъ.

Чюдо 1-ое св. Алексія, новаго Чудотворца, о испустившемъ ума.

Нѣкоему человѣку, именемъ Тимофею, ума ему испустившу до толика, яко не вѣдѣти ему, камо и откуда грядетъ; иногда же и вопрошающу ему, камо идти. Но убо Богу хотящу явити чюдеса и прославити угодника своего, во умъ ему тако вложи: молитися нѣкіимъ - довести его въ монастырь архистратига Михáила. /л. 361 об./ Бывшу же ему тамо и гробъ св. Чюдотворца Алексія видѣвшу, и абіе въ себѣ бысть; и яко отъ нѣкоего сна возбудившуся ему и бысть здравъ и смысленъ Благодатію Христовою и молитвами св. Алексія, яко ничтоже пострадавъ, и отъиде хваля и славя Бога, и благодать велику исповѣдуя его угодника, яко его ради молитвъ помилова его Богъ, такоже и человѣцы, иже прежде видящи его. Не чувственна и ничтоже вѣдущу, такоже, яко единаго отъ человѣкъ мысляща, такоже и тѣ, и славу воздаяху Богу, творящему Богу дивная святымъ своимъ.

Чюдо 2-е о умершемъ отрочати.

Ниже се да умолчано будетъ. /л. 362./ Отъ чудесъ св. Алексія, не токмо стяжавша даръ отъ Бога его же немощныхъ исцѣляти, но и мертвыя воскрешать. Яко же прилучися болѣвшу нѣкоему отроку, именемъ Димитрію. Сему отъ зельныя болѣзни изнемогшу умрети. Принесоша же его въ погребатальныхъ ризахъ во время Литургія поющу и свершившеся божественной Литургіи. И изшедшимъ же братіямъ изъ церкви архистратига Михáила въ трапезу ясти, того же отрока оставивше у раки св. Алесѣя. Родителя пришедша, хотяще его погре(б)сти. Бяше же отроча третьимъ лѣтомъ суще, влѣзоста-же въ церковь /л. 362 об./ - священницы и родители его, хотяше нести ко гробу, и обрѣтоста отрока жива суща. И радости же велія исполнишася. Вземъ отроча живо и возвратишася въ домъ свой, славяще Бога и угодника его, Алексія.

Чюдо 3 е о разслабленномъ.

И иному же паки человѣку, Андрею именемъ, родомъ же града Мурома, многими времены разслаблену, ему лежкащу на одрѣ, и принесоша его на носилицахъ въ церковь архистратига Михáила, лютѣ сему тако страждущу. И положиша его близъ раки Святаго и абіе, исцѣленіе получивъ, отъиде; его же въ малѣ прежде чуждыми /л. 363./ руками принесена - сей на своихъ ногахъ здравъ въ свой домъ возвратися, велику славу воздая Богу и его угоднику Святому великому Алексѣю.

Чюдо 4-е о крилицѣ о Михáилѣ.

Нижé се да умолчено будетъ. Содѣянное Святымъ нѣкоему же мужу славну въ градѣ томъ, именемъ Владимеръ. Воздвигшу ему церковь Воздвиженья Честнаго и животворящаго Креста. Крилику же тоя церкви, Михáилу именемъ, уязвлену ему бывшу отъ нѣкоего стрѣлою, тѣмъ же и къ язвѣ той лютъ недугъ приразися. И сему тако страждущу и многи дни въ язвѣ той пребывающу, яко и живота ему отчаятися, и возопи же /л. 363 об./ глаголя: несите мя ко гробу Святого Алексѣя, яко да отнесутъ его въ монастырь св. Архистратига Михáила, къ чудотворному гробу святого Алексѣя. Они же, послушавше его; отнесенъ же бысть четырми, ни чесомъ же ему владущу: принесше его и полижиша близъ раки богоноснаго отца Алексѣя - начаша пѣти божественную Литургію. И абіе оному клирику видится Святый Алексій промежду обою раму у священнику стоящу и святый потыръ въ руцѣ держащу, и якоже видѣ и возопи веліимъ гласомъ: Святый Алексіѣ помилуй мя! Они же запрещаху ему молчати. Онъ же множае /л. 364./ вопіяше: Святый Алексій, помилуй мя! Святый же Алексій къ нему обратився, яко Христово се рекъ слово: возми одръ свой, иди въ домъ свой. И отъ того часа больный исцѣленіе получи; видимъ же паки блаженнаго онаго чудотворца возлегшаго во своей рацѣ. Возставше же въ той часъ здравъ бысть, яко ничтоже пострадавъ. Видѣвше же священницы скорое мужа исцѣленіе, начаше молебенъ пѣти блаженному чудотворцу Алексѣю. Того же часа той исцѣлѣвшій клирикъ, вземша книги своима рукама, и начатъ конархати Святаго канунъ. Видѣвше же вси, ту бывшее вскорѣ чудо, и прославиша /л. 364 об./ Бога и угодника его чудотворца Алексѣя.

Чюдо 5-е о слѣпомъ.

И такоже убо у нѣкоего человѣка, славна и богата, суще сына, именемъ Ѳеодосіе. Сему убо на многа времена зракъ очію отъятся и многимъ врачамъ приходящвмъ къ нему, но не успѣша ничтоже, и посемъ же къ рацѣ чудотворнаго отца пришедше и ту исцелѣніе вскорѣ пріемлетъ и здравъ бысть, яко ничтоже пострадавъ тѣмъ же и отъ того дне обѣтъ положи въ вѣка: въ пятокъ милостыню давати священникомъ того монастыря. И отъиде въ домъ свой здравъ и славя Бога и угодника его Алексѣя.

Чюдо 6-е о болящемъ трясавицею.

Инъ же паки человѣкъ, Іоаннъ именемъ: трясавицею одержимъ бяше на много времена, ни хлѣба ядуща, да толка - яже и живота отчаятися. Сей убо Іоаннъ, слышавъ о Святомъ, и приходитъ къ его рацѣ съ вѣрою и скоро исцелѣніе получилъ. И отъиде здравъ въ домъ свой, радуяся, яко и многимъ дивитися отъ такого недуга человѣка онаго пременена.

Чюдо 7-е о женѣ слѣпой.

Жена же нѣкая, такожъ отъ богатыхъ, Матрена именемъ, слѣпа бывша многими времяны. Слышавше же, елика чудеса творитъ Богъ Святымъ своимъ угодникомъ, и вѣру велику къ нему имущи и повелѣ написати образъ /л. 365 об./ подобія св. Алексѣя. И яко совершившись иконѣ той, и принесе ѝ въ церковь, и поставленной бывша. И абіе, исцѣленіе получивъ, отъиде въ домъ свой, славяще и благодаряще Бога и угодника Его Святаго Алексѣя.

Чюдо 8-е о разслабленномъ.

Такоже иное прилучися, нѣкоего велможи, Ѳеóдора именемъ. Имѣяше повара, именемъ Климентія. Сему убо Климентію, въ болѣзнь велику впадшу, елико всѣмъ удомъ его разслабитися, не могущу ему ничтоже ни ясти, ни пити, до толика времена, яко и живота всѣмъ отчаятися. Той же предреченный вельможа Ѳедоръ, вѣру велику имѣя ко блаженному Алексѣю, и повелѣ отнести его къ целѣбной рацѣ блаженнаго Алексѣя; вечернее пѣніе свершивше и заутра такоже молебное совершивше - исцѣленіе получи по малехъ днехъ, яко ничтоже пострадавъ.

Примѣчанiе:

[1]
Подлинникъ находится въ рукописи Московской Сѵнодальной библіотеки, № 802, представляющій изъ себя собранiе житій святыхъ, такъ называемые Милютинскiе Четьи Минеи. Рукопись въ 4'' листа. хорошо сохранилась. Сказанiе объ обрѣтенiи мощей Св. Алексія помѣщено въ мѣсяцѣ Февралѣ, отъ 358 л. и слѣд. Рукопись XVII в., Милютинскіе Четьи Минеи, какъ извѣстно, датированы: они писались отъ 1646-1654 г. (См. Библіографическій Словарь и черновые къ нему матеріалы П. М. Строева. Изд. подъ ред. А. Ѳ. Бычкова. Спб. 1882 г. стр. 140).

Печатается по изданiю: Твороенiя святѣйшаго Гермогена, Патрiарха Московскаго и всея Россiи. Съ приложенiемъ чина поставленiя въ Патрiарха. - Изданiе Церковной Комиссiи по чествованiю юбилейныхъ событiй 1612, 1613 и 1812 годовъ. М.: Печатня А. И. Снегиревой, 1912. - с. 51-56.

Наверхъ / Къ титульной страницѣ

0