Наследие Святой Руси. Памятники древне-русской письменности
 
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Наслѣдiе Святой Руси
-
Гостевая книга
-
Новости
-
Написать письмо
-
Поискъ

Раздѣлы сайта

Святые Кириллъ и Меѳодiй
-
Книги старой печати
-
Патерики и житiя святыхъ
-
Великiя Минеи Четiи
-
Церковно-учит. литература
-
Творенiя русскихъ святыхъ
-
Стоянiе за истину
-
Исторiя Русской Церкви
-
Церковный расколъ XVII в.
-
Исторiя Россiи

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 24 мая 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ПАТЕРИКИ И ЖИТIЯ СВЯТЫХЪ

Сказаніе объ обрѣтеніи мощей святаго благовѣрнаго Андрея, Князя Смоленскаго [1].

Бывшу нѣкогда преподобному Даніилу на Москвѣ, и воспомяну Самодержцу о состарѣвшихся церквахъ близъ вратъ града Переславля, дабы велѣлъ новыя поставити. церковь святаго и великаго пророка Іоанна Предтечи, у нея же придѣлъ великомученицы Варвары, и другая церковь великаго чудотворца Николая. еже и повелѣ царь новыя церкви поставити. и тогда преподобный Даніилъ повѣда царю и великому князю Іоанну Васильевичу и преосвященному Іоасаѳу митрополиту, есть. рече. у церкви святаго чудотворца Николая, о ней же повѣдахъ. яко состарѣлася, и ту лежатъ мощи въ земли, чудна мужа и свята князя Андрея Смоленскаго, его же никто же помняше, мы же не предъ многими лѣты своима очима видѣхомъ. память ему сотворяему во храмѣ. въ немже мощи его почиваху. и службу ему совершаему, и стихеры, и канонъ ему пѣваемый. и на иконахъ образъ его написуемъ, и съ вѣрою приходящіи къ мощемъ его, призывающе въ молитвѣ того святаго князя Андрея, не отхождаху тщи, но пріимаху яже на пользу прошенія, нынѣ не вѣмъ. чесого ради таковъ святъ мужъ ни отъ кого поминаемъ. И сего ради возвѣстихъ Вашей Державѣ, бояся, да не конечному забвенію предастся таковое дѣло, и азъ да не буду молчанія ради осужденію повиненъ. Царь же и первосвятитель рекоша, что сотворимъ о сихъ? Старецъ же, уповая нѣкоимъ отъ Бога извѣщеніемъ, рече: аще повелитъ держава ваша, и въ Переславли да соберется соборъ священный, и да помолятъ Бога, и премилостивый Богъ ради Твоея царскія вѣры и благословеніемъ первосвятителя, и молитвами всесвященнаго собора, да явитъ намъ Богъ мощи раба своего, хощу уповая на Бога и на молитвы раба его, искати сихъ. И повелѣша ему сія дерзати. Глаголютъ же о семъ князи Андреи въ повѣстехъ нѣцыи сице, аще истинна суть. единъ Богъ вѣсть, яко сей бяше единъ отъ Смоленскихъ князей, и за нѣкую крамолу и братоненавидѣніемъ, утаився своихъ си, оставивъ княженіе, домъ и отечество, изыде отъ града Смоленска и въ Переславль пріиде. и ту никимже знаемъ, и странствовавше Христа ради, и пребысть у церкви святаго Николы. пономарствуя и труждаяся. яко единъ отъ убогихъ, лѣтъ яко тридесять, претерпѣвая всяко оскорбленіе и нужду, и никтоже вѣдяше, кто есть, или откуду пріиде. И егда преставися отъ житія сего къ Богу, нѣцыи глаголютъ. тогда обрѣли у него писаніе, яже о немъ. и чепь злату, и перстень златъ, и отъ того писанія увѣдаша, яко князь есть Смоленскій, и златую его чепь и перстень глаголютъ взялъ князь великій Іоаннъ Васильевичъ, и за сіе далъ ругу къ церкви святаго Николы. яже есть и до нынѣ, писаніе же то нынѣ не обрѣтается, еже о немъ, развѣ токмо стихеры и канонъ.

И пришедъ Даніилъ въ Переславль. И возвѣсти царское повелѣніе и святительское благословеніе священному собору, еже о взыскаши мощей князя Андрея. и всѣмъ любезно бысть, и хотѣша звонити, да народъ увѣсть. и нѣкто отъ собора рече: аще угодно Богу явити мощи раба своего. то безъ звону молебная пѣвше. идемъ надъ мощи, и отъ сего увѣмы. аще пріятно будетъ дѣло сіе Богу, и угоднику Его. и тако само дѣло возопіетъ, и аще кому извѣститъ Богъ, и той самозванъ да пріидетъ. и угодно бысть слово сіе Даніилу и прочимъ. и вшедше въ соборную церковь. молитвовавше, идоша къ церкви святаго Николы. и молебная отпѣвше, изыдоша надъ мощи, и храмину, яже надъ мощми, разобраша, и начаша копати. и снидеся народъ безчисленное множество. священническаго и иноческаго чина, и отъ вельможъ, граждане же и поселяне мужеска полу и женска, отъ малыхъ до великихъ, никимже зовоми, со умиленіемъ и со слезами, и со свѣщами. Даніилъ же прилежно Бога моляше, и отъ очію слезы непрестанно испущаше, и нищихъ милостынею удовляше, и обрѣтоша мощи не во гробѣ, но скалами берестовыми обвиты и около его множество гробовъ исполнены костей человѣческихъ. Онъ же ничимже не врежденъ, ниже смѣсися съ иными костьми, аще и вкупѣ лежаху мощи же его яко мѵромъ обліяны видяхуся, яко благоуханіе нѣкое испущающе. и вси радости исполнени бяху зряще нань, власи же бяху главніи русы и велицы и цѣли бяху, и яко свѣтъ свѣтяхуся, и ризы его, въ нихъ же Бога ради препроводи житіе, въ сихъ же и погребенъ бысть, и обрѣтошася сверху главы и до ногу, на едину страну яко скутаны бяху, на нихъ же бяху и пугвицы мѣдяны. мощей же не двигнуша. дондеже извѣстятъ святителю. и егда отгребаху отъ мощей землю, въ ней же бяху и крупицы многія береста онаго, имже быша мощи обвиты, и тыя крупицы мнози недужніи взимаху и исцѣлѣваху, народи же дивляхуся и славляху Бога. И вскорѣ посла Даніилъ священника къ святѣйшему митрополиту извѣстить, како изволитъ сотворити. яже о обрѣтеніи мощей. Митрополитъ же возвѣсти сіе царю и великому князю Іоанну Васильевичу всея Россіи. И послаша освященныхъ избранныхъ мужей — Чудовскаго архимандрита Іону, сановита суща. иже послѣди бысть епископъ Суждалю, и Успенскаго собора протопопа Гурія, мужа нарочита и благоговѣйна, видѣти мощи и устроити о нихъ по достоинству. яко же лѣпо быти. Они же въ Переславль пришедше и въ соборной церкви молебная пѣвше, пріидоша къ церкви святаго Николы. и съ ними безчисленное множество священническаго и иноческаго чину, и отъ вельможъ, и народа людей, паче перваго, мужеска полу и женска. и всякаго возраста. и мощи видѣвше, и надъ мощми панахиду пѣвше. Чудовскій архимандритъ Іона. яко истязуя, вопрошаше Даніила: коея ради вины взыскалъ еси мощей сихъ и отъ кого повелѣніе вземъ? Даніилъ же рече: извѣстихъ сіе благочестивому царю и преосвященному Митрополиту, ея же ради вины повелѣно ми бысть отъ нихъ, и все сіе явственно. нынѣ же паче благоволи Богъ вашему великому священству своима очима видѣти святаго сего. се образъ его зрите на иконѣ написанъ, такожде и служба ему же стихеры и канонъ въ старыхъ книгахъ писано. не отъ мене сіе изложено, ни мною повелѣно, но вельми прежде мене, и вопрошайте народа, чтó видѣша, и недужніи како исцѣлѣша, и отъ сихъ уразумѣвайте.

Чудо святаго Благовѣрнаго князя Андрея.

И повелѣша представити исцѣлѣвшихъ, и вопрошаеми повѣдаша сице: нѣкто приставникъ царевыхъ селъ, именемъ Іоаннъ, по реклу Оклячеевъ, азъ, рече, боленъ быхъ отъ многихъ лѣтъ главою, и никогда же ослабы улучихъ, ниже поклонитися могохъ, но вельми болѣзненно поклоненіе имѣхъ. и егда прикоснуся мощемъ святымъ симъ, и въ той часъ преста болѣзнь главы моея, и се нынѣ здравъ есмь.

Чудо второе.

Жена нѣкая пришедши отъ града, повѣдаше, глаголя: азъ три лѣта гортанію болѣхъ, и отъ болѣзни тоя никогда же не могохъ проглаголати. и егда обрѣтошася святыя сія мощи, и пріидохъ сѣмо, и обрѣтохъ крупицу береста отъ мощей святаго и потрохъ гортань мою берестомъ тѣмъ, и абіе преста болѣзнь, вкупѣ же и проглаголахъ, и не стражду ничтожъ и до-нынѣ. и сему свидѣтель мужъ мой, и сосѣди наши, и свидѣтельствоваше, яко тако быша.

Чудо третіе.

Иная жена пришедши повѣда: азъ болѣхъ очима много лѣтъ, и на свѣтъ воззрѣти не могохъ, ниже паки главы восклонити, и нѣцыи свойственніи приведоша мя сѣмо и даша ми часть берестца отъ мощей святаго, и осязахъ берестцемъ тѣмъ по очима и по главѣ: и се нынѣ вижу, и болѣзни не ощущаю.

Архимандритъ же Даніилу рече: господинъ митрополитъ глаголетъ, яко не извѣстно ему о сихъ, ниже повелѣхъ что.

О прореченіи святаго отца Даніила, еже послѣди сбыстся.

Преподобный же Даніилъ, источники непрестанныя изливая слезъ. глаголаше: О, господіе мои, честнѣйшій архимандрите, не буди намъ искушати Святаго Духа, дѣйствующаго присными своими рабы. такожде не буди того глаголати великому господину. преосвященному Іоасафу митрополиту, яко не извѣстно ему о сихъ. Богъ свидѣтель, яко усты ко устомъ о сихъ извѣстихъ ему, наиначе же и самому благочестивому царю и великому князю Іоанну Васильевичу увѣдеся. и по повелѣнію ихъ дерзнухъ видѣти святыя мощи сія. аще ли же сіе забвеніемъ ключимо, или нѣкоимъ преткновеніемъ мнимо, азъ о сихъ орудія не имамъ. вы узрите, еже и самѣмъ вамъ случится. И прорече преподобный. овому престола премѣненіе, овому же скорбныхъ наведеніе, прочему же прорече, аще не супруги, обаче любимаго сына лишенъ будетъ. еже и сбыстся сицевымъ дѣйствомъ: въ та времена благочестивому Государю юну сущу [2], старѣйшимъ же сигклитомъ между собою крамолующимъ и убивствомъ другъ на друга содѣвающе. тогда жъ первосвятитель Іоасафъ митрополитъ [3] гонзну, и таковыхъ ради великихъ крамолъ престола отлучися. въ него же мѣсто возведенъ бысть на превеликій престолъ Россійскія митрополіи преосвященный Макарій, архіепископъ великаго Новаграда [4], со многимъ моленіемъ благочестиваго царя и великаго князя Іоанна Василіевича всеа Россіи и всего священнаго собора. Архимандрита же Іону многи скорби постигоша, и людскаго имѣнія истязуемъ бѣ, и едва отъ сихъ освободися; протопопу же любимый сынъ преставися, пѣвецъ бывый царскаго величества. Сія старецъ изрече. иже добродѣтелію и достоинствомъ извѣстный, яко даръ благодати отъ Бога имѣя, хотящая послѣди быти преди глаголаше, еже и сбыстся во свое время. Сія же отъ старца слышавшу Іонѣ Чудовскому и Успенскому протопопу Гурію, глаголаху: «старецъ сей великія ради старости смысла премѣнися, яко же мнозѣмъ сице случается престарѣвшимся деньми». Преподобный же рече: простите мя госпóдіе мои, яко старъ азъ есмь и грѣшенъ, еже глаголахъ, и паки глаголю: никто же усумнися о блазѣмъ семъ Божіи рабѣ, но сотворите о немъ. якоже достоитъ и еже повелѣно есть вамъ, якоже Святый Духъ наставитъ васъ. И преложиша мощи блаженнаго князя Андрея въ новый гробъ обвивше новыми плащаницами. и се чудно видѣти. аще бо тѣло его и причастно тлѣнію, но обаче составы костей его вкупѣ бяху и не разсыпашеся, такожде и власи главніи и брада ничимже вреждени бывше. И отпѣвше узаконенныя погребенію службы, и погребше его честно, возвратишася кійждо во свояси. Аминь.

Примѣчанія:
[1] По рукописи Данилова Переяславскаго монастыря 1556 года, содержащей описаніе житія Даніила.
[2] Царь Іоаннъ Васильевичъ Грозный родился 1530 г., а сталъ царемъ съ 1533-го г.
[3] 1539-1543 г. святительствовалъ.
[4] 1543 — 1564 г.

Источникъ: Архіепископъ Никаноръ [Каменскій]. Обрѣтеніе мощей святаго благовѣрнаго Андрея, Князя Смоленскаго, по древнему сказанію (1556 года). // Журналъ «Православный собесѣдникъ». — Казань: Центральная типографія. — 1908 г. — Второе полугодіе. — С. 647-652.

/ Къ оглавленію раздѣла /


Наверхъ / Къ титульной страницѣ

0