Наследие Святой Руси. Памятники древне-русской письменности
 
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Наслѣдiе Святой Руси
-
Гостевая книга
-
Новости
-
Написать письмо
-
Поискъ

Раздѣлы сайта

Святые Кириллъ и Меѳодiй
-
Книги старой печати
-
Патерики и житiя святыхъ
-
Великiя Минеи Четiи
-
Церковно-учит. литература
-
Творенiя русскихъ святыхъ
-
Стоянiе за истину
-
Исторiя Русской Церкви
-
Церковный расколъ XVII в.
-
Исторiя Россiи

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 25 апрѣля 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ПАТЕРИКИ И ЖИТIЯ СВЯТЫХЪ

Мѣсяца Іюня въ 12 день.
Житіе и подвиги преподобныя благовѣрныя великія княгини инокини Анны Кашинскія, новыя чюдотворицы.

Господу Богу и Спасу нашему Ісусу Христу, преже волныя и спасителныя Своея страсти и воскресенія, сѣющу слово спасеное живущимъ на земли, и часто не токмо единемъ божественнымъ Своимъ ученикомъ и апостоломъ бесѣдоваше, но и ко всѣмъ народомъ ученіе свое простирая и подвизая ученики своя на проповѣдь, сице глаголаше: Се Азъ посылаю васъ, яко овцы, посредѣ волковъ. Предадятъ бо вы на сонмы и на соборищи, и предъ цари и владыки ведени будете имени Моего ради. И не убойтеся отъ убивающимъ тѣло, души же не могущихъ коснутися. И таковаго пресладкаго и небеснаго и спасенаго ученія мнози явишася, яко звѣзды небесныя множествомъ, мученицы и исповѣдницы и подобницы божественнымъ и спасителнымъ Его страстемъ показашася. Всякихъ видъ мученія доблественно претерпѣша и побѣдители врагу до конца явишася. Иногда же и народомъ бесѣдоваше: Возмите иго Мое на себе и научитеся отъ Мене, яко кротокъ есмь и смиренъ сердцемъ, и обрящете покой душямъ вашимъ, иго бо Мое благо и бремя Мое легко есть. И паки: Аще кто оставитъ отца или матерь, или жену, или чада, и села, и имѣнія имене Моего ради, стократицею пріиметъ и животъ вѣчный наслѣдитъ. И аще кто не возметъ креста своего и вслѣдъ Мене грядетъ, сей нѣсть Мнѣ ученикъ. И не просто учаше, но яко Богъ и Владыка всѣхъ, вѣдый помышленія человѣческа и испытая сердца и утробы, яко не отъ слышанія точію спасеніе бываетъ, но аще кто сотворитъ пречистую волю Его, сей спасенъ будетъ и сице глаголаше: Аще кто слово Мое соблюдетъ, живъ будетъ во вѣки. Таковаго евангельскаго проповѣданія пріемше слово спасеное и развергше бразды сердецъ своихъ, вземше крестъ послѣдоваша Христу, въ пустыняхъ скитающеся, и въ горахъ, и въ вертепахъ, и въ пропастехъ земныхъ живуще, отбѣгающе отъ прелести міра сего, и яко небопарніи орли пріемше крила легкостію смысла своего возлетѣша на небо. Понеже всѣмъ сердцемъ возлюбиша Господа Бога и Тому невозвратнымъ путемъ шествоваша, и ничто же паче любве Его предпочтоша. Якоже и сія блаженная и великая княгиня Анна, о ней же намъ нынѣ слово предлежитъ, отъ юности своея возлюбила божественныя и спасителныя завовѣди Его и Тому невозвратнымъ путемъ шествова, якоже напреди слово явитъ о семъ.

Сея убо преподобныя отечество градъ Кашинъ. Дщи бяше благородныхъ и благочестивыхъ родителей отъ славныхъ боляръ. И добрѣ има воспитáна бывши во страсѣ Господни и накáзана Того пресвятыя заповѣди творити; наученá же бывши и божественному писанію. И добре поучашеся страху Господню и отъ того поученія возгарашеся на любовь Божію. Не взираше бо на красоту вѣка сего, яко прелесть бѣ; ниже уклоняшеся къ сладости пищи и покоя, но пища бѣ ей молитва непрестанная, и желаніе ненаcытно къ Богу; ниже честь и слава возбрани когда ей отъ любве Божія; но присно прилежаше благимъ дѣломъ, како бы угодити Богу, и на Того пресвятую волю полагаше упованіе свое. И весма поучашеся въ законѣ Господни. И яко древо при исходищихъ водъ напояемо бяше божественныхъ словесъ поученіемъ; и отъ того навыче духовнаго веселія. Моляшеся часто Господеви, яко да не лишитъ ю небеснаго Своего чертога, но да сотворитъ о ней, якоже волитъ пресвятая воля Его. Нищимъ же и убогимъ доволну подаваше милостыню. И присно цвѣтущи ей благими дѣлы, въ таковѣй юности и чести и славѣ и во всякомъ покои подвизающуся на божественную ревность.

Егда же пріиде въ совершенный возрастъ, подобна на сочетаніе брака, обручиша ю великому князю Михáйлу Ярославичю, иже тогда ему господствующу во градѣ Твери. Такоже и той благовѣрный князь Михáилъ велми благочестивъ и боголюбезенъ смиреніемъ и кротостію, и благотвореніемъ къ нищимъ и къ страннымъ попремногу преспѣвая, иже послѣди скончася мученическимъ подвигомъ и вѣнцемъ увязеся мученія отъ вседержительныя руки, якоже напреди пошедъ слово явитъ о семъ. Живущима же има во благочестіи и въ законѣ Господни, поучающеся день и нощь, и преспѣвающе красотою дѣланія своего, еже къ нищимъ и ко убогимъ нищепитательствомъ, и къ страннымъ, и къ болнымъ, якоже и древле Авраамъ праведный, и, по Іову терпѣливому, всѣмъ всяка быста: нога хромымъ и око слѣпымъ. Велми же любяста священническій чинъ, яко Божія слугѝ, и яко слово воздати хотяще о даннѣй имъ благодати. И попремногу почитаста иноковъ, яко присныхъ Божіихъ заповѣдей дѣлателей. Не зряше бо на красоту вѣка сего суетнаго, яко прелесть бѣ и скоро преходитъ, и яко сѣнь мимо течетъ. Ниже возвеличáстася благородіемъ и величествомъ господьства своего, или гордостію превзимастася, якоже нѣцыи творятъ, взимаютъ бо ся величествомъ благородства своего, и яко безсмертни творятся, дменіемъ и киченіемъ, тщеславіемъ же и высокоуміемъ, и гордостію превзимающеся еже другъ на друга, не вѣдуще, яко гордости ради, иже иногда бывый денница, отпаде славы Божія, и вмѣсто свѣта тма бысть, и діяволъ преименовася. И хотящимъ въ смиреніи жити, вельми супостатъ душъ нашихъ запинаетъ и въ преисподняя съ собою сводитъ. Сице и Адама праотца нашего высокоумія ради изъ породы изгна. И сицѣ вспоминаста въ себѣ благовѣрныи и благочестивыи великіи князь Михáилъ со благовѣрною и великою княгинею своею Анною, вельми смиреніе любяста и любовь равнý ко всѣмъ держаста. Вѣдуще отъ божественнаго писанія, яко любви ради Сынъ Божіи преклонь небеса и сниде съ небесъ и воплотився нашего ради спасенія отъ преблагословенныя Владычицы нашея Богородицы и Приснодѣвы Маріи, и бысть совершенъ Богъ и совершенъ человѣкъ, и толико смиривъ Себе, Творецъ и Зиждитель всея твари, и бывъ послушлѝвъ даже до креста и смерти, якоже апостолъ глаголетъ, да насъ примиритъ Богу и Отцу Своему. И вся сія пострадавъ безгрѣшныи, да насъ свободитъ отъ клятвы законныя и наслѣдники ны сотворитъ Царства Своего небеснаго. Сія помышляста въ себѣ блаженная, како отъ толикія высоты сведе себе и премногія ради благости бывъ подобенъ намъ, кромѣ грѣха, и яко не имѣяше, гдѣ главы подклонити. Не паче ли нáма глаголаше: смертныма сущима и тлѣнныма, подобаетъ Его ради смирятися и любити всѣхъ, не токмо своихъ и единоплеменныхъ, но и враговъ нашихъ по евангельскому гласу. И сице видѣвъ Богъ наше смиреніе, отпуститъ намъ согрѣшенія нáю и наслѣдники насъ сотворитъ небеснаго Своего Царства. И сице разсуждая въ себе блаженныи и благочестивыи князь Михáилъ съ супружницею своею, великою княгинею Анною, присно поучающеся во псалмѣхъ и пеніихъ, и пѣснехъ духовныхъ, Богови молястася, о еже сохранитися отечеству и всей державѣ ихъ отъ нашествія иновѣрныхъ языкъ. И сице блаженныма цвѣтущима благими дѣлы, беззлобіемъ и кротостію, и смиреніемъ, и благотвореніемъ во всей велицѣй Росіи, яко нѣкая два свѣтила великая, озаряющи всюду своимъ житіемъ и ничимъ же лишена быста Авраама, и Іова, и Давыда, но во всемъ послѣдоваста сродникомъ своимъ, иже въ Росіи бывшимъ свѣтиломъ: великому князю Михáйлу Черниговскому и дѣду своему великому князю Александру Невскому. По семъ же родистася има четыре сыны: первый князь Дмитріи, вторыи князь Александръ, третіи князь Василіи, четвертыи князь Констянтинъ. И добре ихъ воспитаста и наказаста въ страсѣ Господни и боятися Бога и Того пресвятую волю творити.

Что же по сихъ видѣвъ врагъ и сопостатъ душъ нашихъ блаженнаго и великаго князя Михáйла въ таковѣи славѣ и чести, и яко царь почитаемъ, и ничимъ же отъ него побѣжденъ бываетъ, но присно побѣждается, и въ конецъ разрушися непріязненная его сила, и весма попираемъ, яко птица худая, испрошаетъ на него отъ Бога, яко же древле и на праведнаго Іова, взущаетъ на него злыми своими ухищреніи, своихъ има единоплеменныхъ по плоти сродникъ. И коварствуетъ льстивыи діяволъ на великаго по истиннѣ во блаженныхъ князя Михáйла, хотя его доброму теченію спону сотворити и великой княгине Аннѣ. Но онѣ пояху: «Господь намъ помощникъ и не убоимся; что сотворитъ нама смертный человѣкъ, аще бо и воздвизаетъ діяволъ на святыхъ брань, но по малѣ на его главу болѣзнь возвратится». Тогда многа зависть и крамолá на блаженныхъ воста, и многа брань отъ своихъ ему на его державу пріидоша. Но Господь, видя своего угодника и непорочное житіе, дарова ему побѣду велію на сопостаты его и на совостающая на него единородныхъ ему братію.

То же видѣвъ врагъ, яко ничтоже успѣ сотворити великому князю, и яко попрáна бысть непріязненая его сила, паки подвизаетъ на него брань лютѣиши перваго: взущаетъ на него ординскаго царя Озбякá и совѣтника его, паче же своего угодника беззаконнаго Колгý. Благочестивыи же и великіи князь Михáилъ, слышавъ беззаконнаго царя, яко хощетъ пленити его державу и пролити кровь христіянскую неповинныхъ сущихъ, вельми душею скорбя и плакася, глаголаше къ супружнице своей великой княгини: «О, госпоже, яко слышу повелѣніе злочестиваго царя и востáющую на наю зависть, и яко хощетъ многа брань сотворитися между нами и кровь проліятися стада Христова. Но азъ хощу, аще Богу вóлящу, итти самъ въ Орду къ беззаконному царю и собою отвѣтъ сотворити и душу мою положити за овцы стада Христова по Христову словеси». Сіе слышавши, блаженная и великая княгиня Анна оскорбився душею и въ себѣ глаголаше: «Что ми, благовѣрныи мой князь, яко хощу итти въ орду къ нечестивому царю и душу свою положити за овцы стада Христова? будетъ ли се истина, яко хощетъ за имя Христово пострадати?» И сице глаголаше къ нему: «О, драгіи мой, любимыи, великіи княже Михáиле! Почто боишися злочестиваго царя и его беззаконнаго повелѣнія, аки немощенъ трепещеши? Еда не имаши бранныхъ и силныхъ оруженосцовъ у себе, или тмы темъ окружающихъ тя храбрыхъ воиновъ. Еда не можеши съ толикою силою ратныхъ людей, паче же зъ Божіею помощію сопротивъ стати беззаконнаго царя. Не ты ли пріялъ еси искусъ Божія помощи предъ малыми сими деньми, егда пріиде на тя съ ратію братъ твой, великіи князь Юрій, со окаяннымъ Кавгадыемъ, варваромъ? И колико тогда побилъ еси пришедшихъ на тя отъ ихъ воиньства, и самого варвара въ руки твоя предалъ тебѣ Богъ! И нынѣ ли, благочестивыи мой княже, боишися злочестиваго царя и хощеши предати себе самоволно, яко агнецъ злохищному волку!» Онъ же глагола къ ней: «Азъ, госпоже, отъ многа времени желаю пострадати за имя Христово и душу мою положити за поручéнное мнѣ стадо: но не сущу такову времени. Нынѣ же, аще Богъ восхощетъ, готовъ есмь пострадати за Иже мене ради пострадавша. И мню, яко лучше есть мнѣ единому ýмрети за стадо Христово, нежели мене ради мнозѣй крови христіянстѣй отъ мучителя проліятися». Сія слышавши по истиннѣ блаженная княгиня Анна, и яко истинно хощетъ пострадати за имя Господа Ісуса, и рече къ нему съ тихостію: «О, господи мой, благочестивыи княже? Вѣсть убо Господь нашъ Ісусъ Христосъ, яко нѣсть неправды нашея предъ беззаконнымъ царемъ. Но понеже велегласныи учитель вселенныя, божественныи апостолъ Павелъ, пиша къ Тимоѳею, глаголетъ, яко вси хотяще жити благочестно о Христѣ гоними будутъ, лукавіи же человѣцы предуспѣютъ на гóршее. И Самъ, бесѣдуя, Сынъ Божіи ко ученикомъ Своимъ глаголаше: Аще бысте отъ міра были, міръ убо своя любилъ бы. Но Азъ избрахъ вы отъ міра, сего ради и міръ васъ ненавидитъ. Паки ко іюдеомъ глаголаше: Сего ради ищете Мя убити, яко слово Мое не вмѣщается въ васъ. И по сему Христову словеси, господи мой, аще быхомъ были мы подобни ихъ житію и ласканіе бы къ нимъ творили, не бы убо на насъ такова зависть когда востала, или на нашу державу отъ братіи твоихъ кто позавидѣ, но понеже Спасъ ко ученикомъ Своимъ глаголаше: яко хощете, рече, скорбь имѣти, но дерзайте, яко Азъ побѣдихъ міра и прелесть его. И не убойтеся отъ убивающихъ тѣло, души же не могущихъ убити. Но паче подобаетъ боятися могущаго по убіеніи тѣло и душу воврещи въ дебрь огненую. И смотри, благочестивыи и драгіи мой княже, яко сродницы твои, благовѣрніи князи Борисъ и Глѣбъ, отъ брата своего Святополка зависти ради убіена быста, и сего ради отъ Бога вѣнчанна быста. Такоже и благовѣрныи и великіи князь Михáилъ Черниговскіи съ боляриномъ своимъ Ѳеодоромъ, колико пострадаста за вѣру Христову отъ злочестиваго Батыя и никакоже покористася беззаконному велѣнію, но кровь свою изліяша за Христа: сего ради и вѣнцемъ мученія отъ вседержительныя руки вѣнчастася и мученицы Христови нарекошася. И аще сице, господи мой, благовѣрныи княже, пóйдеши во Орду къ беззаконному царю, и самоволно хощеши пострадати за имя Господа Ісуса, никому же тя понуждающу, поистиннѣ тогда блаженъ будеши во вся роды, и память твоя во вѣки будетъ, токмо потщися усердно во званіи своемъ стояти, и Господь тебѣ помощникъ будетъ». Блаженныи же и великіи князь Михáилъ рече къ ней: «Что бо мнѣ сладчайши сего или краснѣйши, еже за имя Господа моего Ісуса Христа пострадати! И уповаю на щедроты Его, яко исполнитъ желаніе сердца моего». Тогда блаженная къ нему глагола: «Молю тя, господи мой, благовѣрныи княже! Егда предстанеши нечестивому царю, яко добръ воинъ Христовъ, и егда нанесутъ тебѣ злоковарныя своя муки, хотяще покорити тя своему умышленію, тогда, господи мой, никако да не убоишися отъ грядущихъ на тя золъ, нижé огнь или колеса, или мечи, или сѣчива устрашать тя. Но буди терпѣливно во званіи своемъ, въ неже еси хощеши самоволно итти. Ниже доброму твоему помышленію возбранитъ ти величество державы твоея; ниже ино что отъ земныхъ и тлѣемыхъ да препнетъ самоволному твоему званію: вся бо она мимо ходятъ. Ниже терпѣнія твоего ослабятъ другъ твоихъ ласканія, и ниже да укрáдутъ твоея яже во Христа вѣры нѣкоторыми лестными словесы и начинаніи. Отнюдъ ненавиди тѣхъ нечестивыхъ совѣты, но токмо возлюби, господи мой, единаго Господа Ісуса Христа, возлюбившаго тя отъ младыхъ ногóтъ и предавшаго Себе за тя. Тогда азъ буду блаженна тебе ради во всѣхъ русскихъ женáхъ». Сія глаголаше блаженная и великая княгиня Анна супругу своему, благочестивому великому князю Михáйлу, бояшеся, да не како отбѣгнетъ добраго подвига, еже о Христовѣ имени страданія.

Онъ же яко слышавши таковыя глаголы, вельми дивляшеся премудрости словесъ ея и премудрому совѣту, и Бога похваляя, яко извѣщеніе пріимъ Божія помощи, еже къ подвигу желаемаго ему пути, яко женою ему подаде таковыи совѣтъ. Видите, братіе, и почюдитеся блаженныя и великія княгини Анны премудрому совѣту! Не восхотѣ бо супруга своего въ малѣ времени славима быти, но во вѣки блажима и похваляема и отъ Бога прославляема добраго ради исповѣданія. И не яко Евва совѣтова Адаму древа вкушеніемъ въ раи, но яко Ревека совѣтова о благословеніи сыну своему Іякову. Таже рече къ ней обрадованнымъ нѣкако лицемъ: «О, госпоже моя, супружнице Анно! Мнѣ бо еже жити Христосъ, и еже ýмрети пріобрѣтеніе жизни Его. И что ми сладчаиши сего и возжелѣннѣйши, яко ýмрети за имя Господа моего Ісуса Христа». И сія рекъ умолчé. Та же призвавъ дѣти своя, и поучивъ ихъ страху Господню, и по всему накáзоваше подобитися своему благому житію. «И матери, рече, своей покаряйтеся, и на ню взирайте, и непорочному дѣланію, и многимъ добродѣтелемъ ея послѣдуйте». Конечное же прирекъ: «Якоже видѣсте, рече, наю творяща, сице и вы творите, и Богъ мира да будетъ съ вами». И раздѣливъ имъ наслѣдіе достоянія своего, подавъ имъ благословеніе комуждо своя грады, и пріимъ благословеніе у епископа своего, блаженнаго Варсонофія, и отиде во Орду, точію поимъ единаго сына своего, князя Димитрія, да видитъ страданіе его, много же плачющимъ всему народу, мужéмъ, и женáмъ, и дѣтемъ. Хотяиже увѣдети о семъ, да прочтетъ житіе и страданіе блаженнаго и великаго князя Михáйла, како подвизався добрымъ своимъ самоволнымъ званіемъ, еже о имени Господа нашего Ісуса Христа, и колико отъ беззаконнаго и нечестиваго царя и его боляръ, пачеже отъ треклятаго и звѣрообразнаго варвара Кавгадыя пріятъ поношенія и уничиженія, біенія, и досады, и различныхъ томленіи, и озлобленіи, последи же блаженную кончину пріятъ: мечемъ усѣкновенъ бысть, и тако мученія вѣнцемъ увязеся, добрымъ подвигомъ подвизався, теченіе скончавъ и вѣру соблюде въ лѣто 6827-е, мѣсяца Ноембрія въ 22 день. Тѣло же его пресвятое принесено бысть изо Орды сыномъ его княземъ Димитріемъ въ славный градъ Тверь и положенó бысть чéстно со псалмы и пѣсньми, и пѣньми духовными, и со многими слезами отъ всего народа въ соборнѣй и апостольстѣй церкви, идѣже и донынѣ безчисленная чюдеса истачаетъ съ вѣрою приходящимъ къ пречистому гробу его и прикасающимся многоцѣлебнымъ мощемъ его.

Благовѣрная же и благочестивая и великая княгиня Анна радовашеся душею и велми Бога благодарствовавши, яко сподобилъ супружника ея, великаго князя Михáйла, пострадати за имя Его пресвятое и страшное и въ добромъ исповѣданіи блаженную кончину пріяти. И нападши на перси его духовными слезами, яко къ живу, сице глаголаше: «Блаженъ еси нынѣ, господи мой, великіи княже, и по истиннѣ во вся роды блаженъ будеши, яко пострадалъ еси по Пострадавшемъ по насъ, и се нынѣ отшелъ еси къ возлюбившему тя Христу. И тамо божественную и неизреченную Его славу зриши, и вкупѣ со ангелы воспѣваеши Пресвятую и Живоначалную Троицу и Нераздѣлимую. И нынѣ молю тя, о, страдалче Христовъ! да не оставиши мя погружену прелестьми житія сего, но помяни мя у престола Вседержителя Христа Бога нашего, яко да достойна и азъ буду небеснаго чертога съ мудрыми дѣвами, и яко да не угаснетъ свѣтилникъ души моея отъ добраго подвига. Тебе бо нынѣ стяжахъ о мнѣ ходатая къ Богу и молитвенника крѣпка». И сицѣ доволно помолившися и цѣловавши любезно пресвятое тѣло его и, вмѣсто многоразличныхъ ароматъ, многими слезами обліявши тѣло его, отъиде въ домъ свой, славящи и благодарящи Христа Бога нашего и Его рождьшую Дѣву Владычицу нашу Богородицу и Приснодѣву Марію.

Что же по семъ благовѣрная княгиня Анна пребываше въ дому своемъ съ сыномъ своимъ благовѣрнымъ княземъ Констянтиномъ Михáйловичемъ; тому бо юнѣйшему сыну его той славныи градъ Тверь, отча достоянія, въ наслѣдіе достася. Яко горлица чадолюбивая вдовствующи, молитвами частыми и многимъ моленіемъ выну Бога молящи, яко да и ту не лишитъ достоянія святыхъ лику и наслѣдія небеснаго Царствія. И многому посту и воздержанію себе вдавши, кротостію же и смиреніемъ украшашеся. Нищихъ питая, и странныхъ и убогихъ повелеваше въ домъ свой вводити, и пищу имъ и одежду доволну подаваше, и сиротъ и вдовицъ заступая, и насилующимъ возбраняше, наказуя и уча ихъ не обидѣти нищихъ и сиротъ. И сице глаголаше, яко сиротáмъ есть и вдовицамъ и убогимъ Отецъ Небесныи помощникъ и заступникъ, якоже и пророкъ глаголетъ: Терпѣніе убогихъ не погибнетъ до конца. И паки: Сиру и убогу Ты буди помощникъ. И всяку неправду ненавидя и всяко нечестіе потребляя, учаше же и сына своего возлюбленнаго, благовѣрнаго князя Констянтина, еже любити Господа Бога всѣмъ сердцемъ и всею душею, и всею мыслію и Того выну предъ собою имѣти, и святыя заповѣди Его хранити, и судъ праведенъ творити, и ласканія и лукавыхъ словесъ отъ вельможь ненавидѣти, и любовь ко всѣмъ равну имѣти, и отъ насилующихъ сиротъ и убогихъ изимати. И таковыми благочестивая и великая княгиня Анна тогда плоды добродѣтелей цвѣтяше и Богу угождающи, якоже и древніи святіи. Помышляше же, како бы отврещися мiра и единому Богу въ молчаніи работати, и Того доброты выну ненасытнѣ насыщатися, понеже рече: Уязвлéнна есмь Того любовію; и вслѣдъ Твоего человѣколюбія потеку, глаголаше къ Богу: «Пріими мя, женишé небесныи, Ісусе Христе, Твоею любовію, и сопричти мя мудрымъ дѣвамъ». И сице моляшеся Богу и исповѣдовашеся. Таже по семъ блаженная, разсуждая въ себѣ, глаголаше: «Аще пребуду азъ въ дому своемъ въ таковѣй чести и славѣ и въ покои, паче же въ молвѣ и сýетіи, явѣ отлучатъ мя отъ Божія любве и никогда же попуститъ мя въ безмолвіи единому Богу молитвою бесѣдовати. И кая польза будетъ, аще человѣкъ и весь міръ пріобрящетъ, душу же свою отщетитъ. Ибо и Моисей, онъ Боговидецъ, никогда же бы сподобился славы Божія видѣти и въ купинѣ на горѣ Синайстѣй законъ пріяти, аще бы токмо не отлучился чести и покоя, и еже нарицатися сынъ дщери фараоновы. Сего ради подобаетъ работающему Богу отъ всего усердія и на высоту добродѣтелей взыти, всякаго покоя и славы міра сего бѣгати, и въ дому Божіи примѣтатися и безъ молвы Богу работати, се бо и Господь нашъ Ісусъ Христосъ учѝтъ насъ глаголя: Аще кто не отвержется себе, сирѣчь пристрастія земнаго, и не вóзметъ креста своего и въ слѣдъ Мене грядетъ, не можетъ Мой быти ученикъ. Сему гласу святіи отцы послѣдоваша и святыя жены поревноваша, въ пустыняхъ вселишася и въ горахъ, и въ вертепахъ, и въ пропастехъ земныхъ, и еже чюдо, яко и дневныя пиши лишаеми бяху, и озлобляеми отъ бѣсовъ; якоже и божественыи апостолъ Павелъ глаголетъ: Ихъ же недостоинъ весь міръ. Сего ради и Богъ ихъ воспрослави, понеже возлюбили Господа Бога всѣмъ сердцемъ. Что же успѣетъ и мнѣ міръ сей, и слава его, богатство же и красота вѣка сего, и многая молва и мятежъ бывающіи! Невозможно бо единемъ окомъ зрѣти на небо, а другимъ на землю; невозможнѣиши же и весма неудобно во многой молвѣ отъ всего сердца Богу единому работати, понеже прелесть вѣка сего помрачаетъ очи душевныя и ослѣпляетъ мысли умныя и работающимъ Богу запинаетъ во всякой добродѣтели. Что же ползова и рай праотца нашего Адама и Еввы, егда бо видѣста красоту древа, отъ него же заповѣдь пріяста не вкусити. И что сотвориста, еда ли не прельстистася Евва очима ко древу; еда ли не поползеся Адамъ и не токмо испаденіе изъ рая пострадаста, но и отъ Бога отлучистася и смертію осудистася; еда ли азъ крѣпчайшіи онѣхъ буду, въ таковѣй чести сыи. И предо очима моима всяка честь и слава господства сего, и яко царица почитаема отъ боляръ и отъ всѣхъ людей. И како могу азъ избыти ловленія и сѣти діяволи; понеже мнози отъ многихъ начаша въ мірѣ добродѣтели проходити, и маліи обрѣтошася сохраншіи. Сего ради дѣвьственныи сосудъ, возлюбленныи ученикъ Христовъ Іоаннъ Богословъ глаголетъ: Не любите міра и яже въ немъ. Вся бо сущая видимаго сего міра похоть плотская, и похоть очнáя, и гордыня житейская. И сицѣ разсуждая въ себѣ блаженная, и поистиннѣ благочестивая великая княгиня Анна, вскорѣ и дѣлу касается: вѣсть бо, яко медлѣніе раскаяніе обыче творити. Тогда блаженная оставляетъ міръ и сраспинается Христу, оставляетъ домъ и господьство вѣка сего и изволи примѣтатися въ дому Божіи, паче и съ понесшими тяготу и варъ дневныи водворитися, нежели жити въ царскихъ палатахъ, имѣти славу и господьство мимотекущаго, и яко сѣнь преходящаго вѣка сего. Се бо и Моисей Боговидѣцъ изволилъ страдати съ людми Божіими и имѣти поношеніе Христово, нежели имѣти временнаго грѣха сладость и жити въ дому фараоновѣ. Приходитъ убо въ монастырь дѣвичь, нарицаемый Соѳейской, въ немъ же храмъ Премудрости Слова Божія, и тамо поклоняется Богови, радостными слезами обливаяся, и на многъ часъ Богу исповѣдовашеся, пометаетъ же себе съ великимъ смиреніемъ на нозѣ сущимъ тамо постницамъ и молитъ съ кротостію, яко да и она отъ нихъ тамо сочтанá будетъ въ ликъ. Онѣ же необычному премѣненію и великому смиренію блаженныя дивляхуся. И яко раба моляше ихъ, а госпожа всѣмъ сыи; сего ради бояхуся и ужасахуся и въ трепѣте велицѣ послýшаху словесъ ея, великія княгини Анны. Видяще же и сына ея, благовѣрнаго князя Констянтина, и всѣхъ боляръ, и всего народа плачющихся, и дивляхуся, како толикъ плачь не возможе блаженную отторгнути отъ любве Божія. Та же повелѣваетъ себе пострѝщи во святыи ангельскіи образъ. И сему бывшу, и приведе себе Богу жертву непорочну, и яко юница нескверная принесеся на всеплодіе Вышнему Архіерею, Господу нашему Ісусу Христу. И исторжеся мірскія прелести, яко птица отъ пругла и яко серна отъ тенета. И весма радовашеся о Господѣ Бозѣ своемъ, яко получи желаніе сердца своего. Отъ юности бо своея непрестанною молитвою Бога моляше, дабы сподобилъ Благіи свой яремъ понести и Того единаго доброты выну наслаждатися. И тако благодатію Христовою нача подвизатися: постомъ и молитвами, и бдѣніемъ всенóщнымъ, и слезы многія изливая, и непрестанно томяше себе алчбою и жаждею. Глаголаше бо, яко подобаетъ плоть презирати, прилѣжати же паче о души вещи безсмертнѣи, вѣдяше бо, яко многъ трудъ иноческаго житія и многими труды подобаетъ внити въ Царство небесное. Нужно бо есть Царство небесное, и нужницы восхищаютъ é. Смиреніе же и кротость велми любяше, вѣдяше бо, яко смиренія ради вся коварства вражія растлѣваются. Послушаніе же ко всѣмъ равнó имѣяше и всѣмъ постницамъ покоряшеся о Господѣ. Кто бо тоя слезы исповѣсть или трудъ, смиреніе же и кротось, и послушаніе, и терпѣніе, и бдѣніе, всенóщное стояніе, и любовь, яже къ Богу? Како бо возможно словомъ постигнути или писанію предати. Выну бо пояше: Прилпѣ душа моя по Тебѣ, Христе Боже, и возжада душа моя къ Богу крѣпкому и живому. Когда пріиду и явлюся лицу Божію. И тако помощію всесилнаго Бога, въ малѣ времени превзыде добродѣтельми всѣхъ сущихъ тамо постницъ. Егда же прихождаше ко преподобнѣй сынъ ея, благовѣрный князь Констянтинъ, благословенія ради и поученія съ велможами своими, она же учаше его, како Бога боятися и Тому угодная творити и ничто же отъ видимыхъ, паче любве Его, предпочитати и на Того уповати. «Той бо есть, рече, Царь царствующимъ и Господь господьствующимъ; тѣмъ бо цари царствуютъ и силніи держатъ землю, и ему же хощетъ подастъ царство. Той бо есть мертвитъ и живитъ, и низводитъ во адъ, и возводитъ, убóжитъ и богатитъ, смиряетъ и выситъ, возставляетъ отъ земля убога, и отъ гноища возноситъ нища, и посаждаетъ съ могущими людіи, и престолъ земнаго царства подаетъ ему. И нѣсть кому мóщно противитися величеству славы Его. Воли бо Его кто противитися можетъ? Якоже и пророкъ Давыдъ глаголетъ: Ты страшенъ еси, и кто противустанетъ Ти. Яко Богъ веліи Господь и Царь веліи по всей земли, яко въ руцѣ Его вси концы земленіи, и высоты горъ Того суть. Сего ради воспоминаше ему, да не величествомъ господьства своего возгордится когда, но быти смирену и кротку и невавидѣти неправду, поминати же смертныи часъ и во всемъ послѣдовати отцу своему великому князю Михáйлу. И сице учаше его преподобная, отпущаше въ домъ свой. Къ прочимъ же никакоже бесѣдоваше великая, но въ молчаніи пребываше и единому Богу въ молитве упражняшеся, поя Господеви въ сердцы своемъ: Господь помощникъ мой и защититель мой, на Того упова сердце мое, и поможе ми, и процвѣте плоть моя, и волею моею исповѣмся Ему. И день отъ дне возхожденіе полагая въ сердцы своемъ, и душу свою просвѣщая божественнымъ свѣтопролитіемъ, и ума зрительное очищая, и яко безплотна во плоти подвизаяся, и безплотныхъ ликостоянію тщащися усердно постигнути, и разума духовнаго непрестанно боговидѣнія и разсужденія пріяти. Имяше же во умѣ память смертную и сего часа поминаше, плакаше велми, како по исхожденіи отъ тѣла испытаніе душамъ бываетъ на воздусѣ отъ лукавыхъ бѣсовъ. И люто по истиннѣ тогда бываетъ душамъ, иже не имѣвшимъ тогда плода благихъ дѣлъ и во времéннѣй сей жизни не подвизавшимся, како бы угодити Богу и избыти вѣчнаго осужденія. Сего ради и божественыи апостолъ Павелъ, уча насъ, глаголетъ: облецетеся, рече, во вся оружія Божія, яко возмощи вамъ стати противу кознемъ діявольскимъ, яко нѣсть наша брань къ крови и плоти, но къ началомъ, и ко властемъ, и къ міродержителемъ тмы вѣка сего, къ духовомъ злобѣ поднебеснымъ. Сего ради возьмéте вся оружія Божія, да возможете противитися въ день лютъ, и вся содѣявши стати. И якоже алчющему невозможно безъ хлѣба быти, сице и хотящему спастися невозможно есть, аще не имать памяти смертныя.

Таже по нѣколицѣхъ лѣтехъ, сыну ея, благовѣрному князю Констянтину, отшедшу ко Господу, тогда приходитъ во Тверь вторыи сынъ ея исъ Кашина града, благовѣрныи князь Василей Михайловичь, по рекломъ Кашинъ, и молитъ матерь свою, преподобнуго и благочестивую и великую княгиню Анну, яко да прейдетъ отъ Твери града въ господьствующіи его градъ Кашинъ и яко да посѣтитъ отечество свое, яко да онъ тамо выну зритъ святое, ангелоподобное лице ея и сладкаго ученія присно да наслаждается. И сице моляше ю: «Елма убо, мати моя, преподобная и благовѣрная великая княгиня Анно! Сице Богу изволившу судбами своими, яко скончавшуся брату моему, твоимъ пресладкимъ ученіемъ присно наставляемъ, аще мнѣ тогда и скорбно бѣ и весма неутѣшео, яко лишенъ тогда сладкаго твоего и частаго ученія, но не восхотѣхъ оскорбити брата моего и тебе молити, дабы пришла жити во градъ мой. Нынѣ же не могу терпѣти, еже быти ми отъ тебе въ далнѣмъ разстояніи и еже не насыщатися твоего божественнаго ученія. И что животъ мой и слава моя, и княженіе мое, еже быти ми лишéну твоего ангелоподобнаго зрѣнія?» Преподобная же мати его отвѣща къ нему и рече: «Чадо мое возлюбленное, странно наше иноческое житіе, и ложно нѣкако ко Христу обѣщаніе, еже до послѣдняго издыханія на единѣмъ мѣстѣ, на немъ же обѣщахомся, терпѣти всяку скорбь Христа ради, аще не времени нѣкоему позывающу ли гоненія ради, или частыхъ наносимыхъ ради скорбей бывающихъ, Христа ради понесшимъ тяготу и варъ дневныи; но и се подобаетъ преобидѣти любве ради Божія. Или паки смотренія ради нѣкоего подобаетъ бѣгати въ другое мѣсто, по Христову словеси: аще гонятъ вы изъ града, бѣгайте въ другіи градъ. Нынѣ же помощію всесильнаго Бога, нѣсть во градѣ семъ ни гоненія, ни иныхъ скорбей находящихъ, якоже въ прежнее время было при отцѣ твоемъ, великомъ князѣ Михáйле Ярославиче, отъ поганыхъ нашествія и своихъ сродникъ крамолы и зависти. И аще оставлю градъ сей и въ твой градъ преселюся, буду подобна ищющимъ славы міра сего. Никто же, рече Сынъ Божіи, возложь руку на рало, зря вспять, управленъ будетъ во Царство небесное. Не бо и Авраамъ праотецъ нашъ повелѣнъ бы былъ отъ Бога оставити отечество свое и преселитися въ чужую землю, аще не бы возбранило ему отеческое идолобѣсіе отъ Божія любве и познанія. И како могу оставити градъ сей, въ немъ же дарова всещедрыи Богъ страстотерпца Своего и моего супружника великаго князя Михáйла, его же въ заступленіе и помощь имѣетъ и къ Богу ходатая весь градъ сей; и азъ имѣю предъ очима моима пресвятое и страстотерпческое тѣло его и, зря нань, усердно теку въ добромъ семъ подвизѣ; его же молитвами, аки нѣкими крилы, вперяюся умомъ къ Богу. Ни, чадо мое, ни, престани понуждати мя преселитися во градъ свой, и прочее не стужай ми». Онъ же со слезами моляше блаженную и не хотяше восклонитися отъ святою ногу ея. Паки рече къ ней: «Вѣси, мати моя преподобная, яко отъ младыхъ ноготъ твоей любви привязанъ и тобою паче прочихъ братіи моихъ любимъ бѣ, и никогда же твоего повелѣнія преслушахся, и никогда же бо хотѣлъ отлучитися твоего сопребыванія. Но Божіихъ судебъ нѣсть кому возможно постигнути; зане по жребію и благословенію святаго отца моего и твоимъ достася мнѣ въ наслѣдіе градъ той. И есть ми любезенъ ради покоренія и послушанія боляръ моихъ, и велможъ, и всего народа. И аще бы хотѣлъ оставити градъ той и преселитися сѣмо по смерти брата моего, и твоего выну слышати медоточнаго языка ученія, и зрѣнія ангеловиднаго насыщатися, но никако же оставятъ мя вельможи мои и весь градъ, ради любве моея еже къ нимъ, оттолѣ къ тебѣ преселитися. Сего ради, по совѣту боляръ моихъ и вельможь и всего града, пріидохъ молити тя, весь бо градъ желаетъ видѣти ангелоподобныи твой зракъ и въ себѣ имѣти. И сице глаголютъ, яко да посѣтитъ преподобная и благовѣрная княгиня Анна отечество свое и да въ немъ пребываетъ. Того бо града, рекоша, таковая благочестивая и святая отрасль израсте отъ благовѣрну родителю, и есть намъ печаль не мала належитъ, яко лишихомся пресладкаго ученія и святаго лица ея зрѣнія. Иди, благочестивыи княже, во градъ Тверь и моли преподобную матерь свою, яко да преселится во градъ своего отечества, яко да будетъ граду нашему Кашину и всей области его вѣчная похвала тоя пришествіемъ. Граду бо Твери дарова Богъ молитвенника тепла и заступника скора, страстотерпца своего, отца твоего благовѣрнаго великаго князя Михáйла Ярославича, нашему же граду всяко даруетъ всещедрыи Богъ преподобную матерь твою, благовѣрную и великую княгиню Анну, въ помощь и заступленіе во вся роды до вѣка. Токмо потщися усердно доити во градъ Тверь и умолити матерь свою, и Богъ благіи исполнитъ желаніе сердца твоего. Сего ради, о святая и блаженная мати моя, да не оставиши мя тща, ради своего еже къ намъ преселенія, да не презриши моленія всего града, паче же мене возлюбленнаго сына своего, да не печалію снѣденъ буду, еже лишену быти мнѣ твоего медоточнаго языка ученія; и лучши ми есть здѣ ýмрети, нежели возвратитися тщу во свой градъ». Таковые глаголы благовѣрный князь Василіи ко преподобнѣй матери своей со многими слезами изрече и въ себе Бога моляше, яко да получитъ желаніе сердца своего. Блаженная же и преподобная княгиня Анна таковое моленіе отъ сына своего слышаше и вѣру его видѣвши, не безъ Божія промысла, разсуди, сему быти, но яко отъ Бога посланъ бысть къ ней, преклоняется на моленіе и обѣщавается преселитися во свое отечество и тамо пребыти до дне исхода своего еже къ Богу. И сице рече къ нему: «буди, сыну мой возлюбленныи, по твоему моленію и якоже Богу годѣ, тако и будетъ». Благовѣрныи же князь, сынъ ея, слышавъ таковые глаголы, радости многи исполняшеся и всесилнаго Бога прославляше, яко не презрѣ моленія его. Тогда преподобная и великая княгиня Анна созва къ себѣ постницы, иже въ монастырѣ томъ, и повѣдаетъ имъ свое еже отъ нихъ отшествіе. Онѣ же яко услышавше отъ преподобныя сицевые глаголы, слезъ исполнившеся, глаголаша къ ней: «Камо грядеши, госпоже наша, и что ради разлученіе твое отъ насъ хощетъ быти? Еда въ чемъ прогнѣвахомъ тя, или неправдовахомъ предъ тобою, или скорбь кую наведохомъ твоему непобѣдимому и терпѣливому смиренномудрію? Еда гражане гонятъ тя отъ нашего сопребыванія? Повѣждь намъ, госпоже преподобная мати, вину отшествія своего». Она же: «Не плачите, рече, сестры мои, видите, яко сынъ мой пріиде исъ Кашина града, благовѣрныи князь Василіи, и той понуждаетъ мя и молитъ со многими слезами еже преселитимися отсюду во свой ему градъ. Азъ же много отрицахся, дабы не отлучитимися отъ вашего постническаго пребыванія. Онъ же непрестáяше моля мя, дабы поити ми въ Кашинъ градъ. Азъ же разсудила въ себе: не безъ Божія промысла сему быти, но яко отъ Бога посланъ пріиде ко мнѣ и моля мое смиреніе, дабы преселитимися отсюду, и Богу хотящу, и молитвамъ вашимъ поспѣшествýющимъ мнѣ во благое, хощу итти во градъ Кашинъ къ сыну моему, благовѣрному князю Василію. Вы же, сестры мои, оставайтеся здѣ зъ Богомъ и въ молитвахъ своихъ поминайте мое смиреніе». Онѣ же рѣша къ ней: «Аще, госпоже наша, отходиши отъ насъ, на кого воззримъ и кто намъ путь смиренія и кротости и безмолвія покажетъ? Кто же ли намъ безъ тебе ученіе прóстретъ, да яко возможемъ ловленія діяволя преити?» Блаженная же рече къ нимъ: «Богъ благіи благодатію своею да сохранитъ вы отъ многоплѣтенныхъ сѣтей вражіихъ. Токмо молю васъ, яко да имѣете попеченіе о душахъ своихъ и красоту дѣвьства вашего храните безъ всякаго вреда и свѣщу вашего теченія добраго соблюдите неугасиму, дондеже пріидетъ небесныи Женихъ, Христосъ Богъ нашъ. И аще обрящетъ ны въ первѣмъ нашемъ воздержаніи и добромъ теченіи иноческаго жительства, тогда введетъ ны на браки своего небеснаго Царства со всѣми святыми. Аще ли не таковыхъ насъ обрящетъ, всяко и намъ возглаголетъ, яко и буимъ дѣвамъ: Отъидите отъ Мене, яко не вѣде васъ. И тогда плакати имамы во вѣки вѣкомъ, яко погубихомъ трудъ чернечества нашего. Но подобаетъ намъ со всякимъ смиренномудріемъ и кротостію духа молити человѣколюбиваго Бога Господа нашего Ісуса Христа, дабы сподобилъ насъ съ мудрыми дѣвами небеснаго своего чертога наслѣдницамъ быти, и дабы доброе теченіе соблюлъ по своей ему благости цѣло и непорочно, яко Тому подобаетъ всяка слава во вѣки, аминь». Онѣ же слышавше ученіе ея, велми дивляхуся безмѣрному смиренію и рѣша къ ней: «О, госпоже наша, преподобная мати! Кто убо видѣ безмѣрное твое смиреніе и любовь, послушаніе же и терпѣніе, кротость и незлобіе, и милосердіе ко всѣмъ, успѣхъ своему житію не пріимаше и всемилостиваго Бога не прославляше. Мы, видевше твое постническое житіе, постъ и воздержаніе и непрестанную любовь, яже къ Богу, зѣло успѣхъ своему житію пріимахомъ. Нынѣ же, госпоже, отходиши отъ насъ, како не сѣтованіе намъ будетъ твое разлученіе, и како намъ не плакати: еже дарова Богъ, сего лишаемся. Но молимъ тя, госпоже, не оставляй насъ сирыхъ, но пребуди съ нами». И сицевыми словесы хотяще удержати неудержимую, мняще, аще послушаетъ тѣхъ, паки пребудетъ съ ними. Но блаженная и преподобная мати утѣшаше ихъ сладкими ученіи: «Не скорбите, рече, сестры мои и госпожи, аще отхожу отъ васъ, но и тамо вы со мною есте, и азъ съ вами буду духомъ. И аще всеблагіи Богъ соузомъ духовныя любве совокупилъ насъ, кое тѣхъ разлученіе или разстояніе пріиметъ?» И миръ давъ имъ, и лобза коюждо святымъ цѣлованіемъ, отходитъ въ соборную церковь, и тамо на многъ часъ Богу моляшеся, покрыти ю своимъ человѣколюбіемъ, идѣже аще изволитъ ей быти. Паки же припадаетъ со многими слезами и ко гробу супруга своего, страстотерпца Христова, благовѣрнаго и великаго князя Михáйла, яко да и тамо помогаетъ ей молитвами своими. «Понеже, рече, велика стяжахъ тебе къ Богу ходатая и молитвеника». И сице помольшися и пріимши благословеніе отъ епископа, пути касается, всѣмъ людемъ плачющимся о отшествіи преподобныя, яко мнѣти имъ тогда и глаголати, яко прогнѣвася на насъ Богъ тоя ради отшествія и, аще не бы согрѣшихомъ предъ Богомъ, не бы попустилъ когда отъити пренодобнѣй отъ града нашего. Благовѣрныи же князь Василіи многу милостыню подавъ сущимъ тамо постницамъ, и пищею удоволивъ, и всѣмъ нищимъ и убогимъ, яже во градѣ, такоже многу милостыню пóдавъ, и благословеніе пріимъ отъ епископа, отходитъ во свой градъ, поимъ съ собою и матерь свою, преподобную и благочестивую княгиню Анну, велми прославляше въ сердцы своемъ всемилостиваго Бога и Пречистую Богородицу, яко получилъ желаніе своего благаго хотѣнія.

Егда же приближишася ко граду, тогда изыдоша вси людіе града Кашина, іереи и иноцы, мужи и жены, и старцы со юнотами, во срѣтеніе преподобныя и блаженныя Анны и, другъ друга предваряюще, хотяще преподобную видѣти, и овіи прикасахуся воскрылію ризъ ея, освященіе пріимаху, иніи же зрѣніемъ токмо ангелоподобнаго лица ея освящахуся и Бога прославляху и Того Пречистую Матерь Пресвятую Богородицу. И сице приглашаху: «Пріими, славныи граде Кашине, свою похвалу и славу неотъемлему и радость присноцвѣтущую. Яже ты изведе отъ себе плодъ богоданенъ и вѣтвь благочестивую, паки преблагіи Богъ къ тебѣ приведе, и радуйся радостію непобѣдимою во вся роды, и радости твоея никто же отъиметъ отъ тебе. И тако Божіими судбами и Того хотѣніемъ преподобная и блаженная великая княгиня Анна, супружница великаго князя Михáйла Тверскаго, преселися во свое отечество, въ славныи градъ Кашинъ, отъ града Твери. И начатъ ту подвизатися большими труды и подвиги, и пощеніи, и молитвою непрестанною вооружатися на невидимые враги, и стояніемъ всенощнымъ побѣдила бѣсовскія брани. И толико истни себе блаженная постомъ и многимъ воздержаніемъ, яко токмо познаватися составу человѣческому, якоже глаголетъ пророкъ: Прилпѣ кость моя плоти моей, и колѣна моя изнемогостѣ отъ поста и плоть моя измѣнися елея ради. И весма плоть покорила духу, и жилище явися пресвято Пресвятыя и Единосущныя и Животворящія и Нераздѣлимыя Троицы. Пришедъ бо Христосъ со Отцемъ и со Святымъ Духомъ, обитель сотворилъ себѣ въ пресвятѣй души ея; и толико возлюбилъ красоту, благородіе чистоты ея, яко и по смерти соблюде святое тѣло ея невредимо отъ тлѣнія, якоже и нынѣ всѣмъ видится воочію. Любляше же блаженная безмолвіе и никому же бесѣдоваше, но точію егда прихождаше къ ней сынъ ея, благовѣрныи князь Василіи, и сего учаше и накáзоваше, како любве ради Христовы видимая презирати и ни во что же красоту вѣка сего вмѣняти, любити же и боятися и почитати страшнаго и славнаго всесвятаго Бога, и Того вѣчныхъ благъ искати милостынею и благотвореніемъ къ нищимъ: «Ничто же бо, рече, тако просвѣщаетъ человѣка и до престола душу доводитъ, якоже милостыня»; поминати же смертныи часъ: «Понеже, рече, чадо мое возлюбленное, аще царь или князь, или богатъ, или нищъ, рабъ или свободь, всѣ смерти предаются, и никто же отъ нихъ на земли во вѣки пребываетъ, но яко сѣнь скоро преходитъ и яко цвѣтъ скоро увядаетъ, держати же ся правды, понеже правда же во вѣки пребываетъ». Праведныи рече прѝточникъ: «отъ вѣры живъ будетъ, вмѣсто же его предается нечестивыи». А еже смирену и кротку, и милостиву, и долготерпѣливу, и «аще, рече, тако поживеши, будеши долголѣтенъ на земли, и никто же на тя злое помыслитъ когда, и сопостатомъ твоимъ страшенъ будеши, и вѣчнаго блаженства отъ Господа нашего Ісуса Христа покой на небесѣхъ пріимеши». И сими поученми накáзоваше сына своего, благовѣрнаго князя Василія, отпущаше его въ домъ свой. Сама же единому Богу бесѣдоваше молитвою непрестанною и прочими богодухновенными дѣлы просвѣщаше душу свою. Благовѣрныи же князь Василіи, таковыми ученми отъ преподобныя матере своея наставляемъ и наказуемъ, яко древо при исходищихъ водъ напаяемо, возращая сториченъ плодъ, и никогда же преступаше наказанія богоблаженныя, но тщашеся усердно послѣдовати стопамъ ея. Поживе же преподобная княгиня Анна, по прешествіи отъ Твери въ Кашинъ, нѣколико лѣтъ во мнозѣхъ трудѣхъ и пощеніихъ, и воздержаніи, и въ молитвахъ. Таже, увѣдавши свое отшествіе къ Богу, призываетъ къ себѣ сына своего, благовѣрнаго князя Василія, и много поучивъ его о вѣрѣ и о милостини, по семъ же нѣкако сказуетъ ему и отшествіе свое къ Богу. Онъ же, яко услышавъ, вельми восплакася и рече ко блаженнѣй: «О, мати моя преподобная! Кому насъ оставляеши, и отъ кого по твоемъ отшествіи ученіе воспріиму, что же ли животъ мой, кромѣ твоего пресладкаго ученія и наказанія? Уне ми съ тобою ýмрети, нежели по отшествіи твоемъ лишену быти ми ангелоподобнаго твоего зрѣнія». Великая же рече къ нему: «Не плачи, чадо мое возлюбленное, и не скорби о семъ: предаю бо тебе и весь градъ сей въ руцѣ всемилостивому Богу и Пречистѣй Богородицы. Той да наставитъ васъ на всяку истину и исправитъ стопы ваша къ дѣланію божественныхъ заповѣдей Его. Токмо, чадо мое возлюбленное, держися, яже наученъ еси, и въ ихъ же пребываеши, и имѣй къ Богу вѣру несумнѣнну, и Богъ мира да будетъ съ тобою. И молитвы отца твоего, великаго князя и страстотерпца Христова Михáйла, и мое благословеніе во вѣки на тебѣ пребудутъ». Тако же наказавши и вельможъ его, како всѣмъ сердцемъ Бога боятися и угодная предъ Нимъ творити, и Того пресвятыя заповѣди безлѣностно соблюдати, и послушаніе и покореніе во всемъ имѣти къ сыну своему, благовѣрному князю Василію, и судъ въ правду судити и не насиловати немощнымъ, воспоминати же имъ евангельскихъ шесть заповѣдей, «ихъ же, рече, истязани будете отъ Бога. И аще тако сотворите, и того ради сподобитеся отъ Бога милости и небеснаго Царствія наслѣдія». И сице поучивъ блаженная и преподобная и великая княгиня Анна и помолився за нихъ и о всемъ градѣ, таже возлежé на одрѣ и опрятавшися велелѣпнѣ, и сице рече: «Владыко, Господи, Ісусе Христе мой, ненадѣющимся надежда, источниче благоутробія, Тебе свѣта пресладкаго возжелѣхъ и Тебѣ душу мою предаю, пріими ю и покой со всѣми святыми». И тако предаде честную свою и ангеломъ говѣйную душу въ рýцѣ Господеви, Его же возлюби отъ юности своея и непрестанно вслѣдъ Того человѣколюбія течаше, въ лѣто 6846-е, мѣсяца Октоврія въ 2-й день.

Благовѣрныи же князь Василіи, сынъ ея, видѣвъ матери своея преподобныя и блаженныя и великія княгини Анны отшествіе къ Богу, и нападъ на перси ея, со слезами вопіяше: «О, мати моя преподобная и преблаженная, свѣте очію моею, учителнице и наказательнице моего ума! Аще и скончала еси свою жизнь и прешла еси отъ временныхъ на безконечная, и отъ многихъ трудовъ на вѣчныи покой, но духомъ не отступай отъ насъ, чадъ своихъ, и молися Христу Богу нашему о сохраненіи державы моея и о спасеніи всего града, въ немъ же изволила еси жити и душу свою предати Господеви, и избавитися намъ отъ всѣхъ находящихъ намъ видимыхъ и невидимыхъ врагъ и спастися душамъ нашимъ». Слышано же бысть по всему граду преставленіе преподобныя, скоро притекоша мужи и жены и со младенцы, нищіи и убозіи. Велможи плачющеся, яко истинная имъ бѣ учителница и окормленіе животу ихъ, нищіи же и убозіи, сироты же и вдовицы рыдаху, яко питателницы своея и крѣпкія помощницы, и непобѣдимыя заступницы лишишася. И тако положиша на одрѣ честное и трудолюбезное тѣло блаженныя и великія княгини Анны, понесоша честно со псалмы и пѣсньми и пѣнми духовными сынъ ея и съ вельможами своими въ соборную церковь Пресвятыя Владычицы нашея Богородицы честнаго и славнаго Ея Успенія, и отпѣвше надгробная пѣнія, и погребоша тѣло преподобныя подъ соборною церковію со псалмы и пѣсньми и пѣнми духовными; отдаша персть персти, много плачющеся и сѣтующе, яко лишишася добрыя учителницы и крѣпкія заступницы, обаче надѣющеся, и по отшествіи ея иже къ Богу, незабвенно въ молитвахъ своихъ память имѣти о отечествіи своемъ. И тако разыдошася кождо въ дóмы своя, славяще и благодаряще Бога.

Сѝцево житіе преподобныя, таково иже во плоти равноангельное блаженныя и великія княгини Анны на земли пребываніе, иже отъ младыхъ ногóтъ нача Богу работати благими дѣлы, всѣмъ сердцемъ любити. И ничто же отъ видимыхъ сущихъ на земли, яже прелесть міра сего, хотящимъ Богу работати помрачаетъ очи, паче любве Божія предпочте, и до конца гнушашеся славы вѣка сего суетнаго, и якоже преже сопряженія добродѣтелей прилѣжа, тако и въ сопряженіи и наипаче божественнымъ заповѣдемъ вседушно прилѣжа. И по скончаніи супруга своего, великаго князя Михáйла, чистоту своего благородія нескверну соблюде, и въ постничестѣмъ тризнищи, иноческомъ пребываніи добрымъ пóдвигомъ подвизася. И ничто же возможе отлучити ю отъ любве Божія: ни слава міра сего, ни красота вѣка сего, ни честь, ниже величество, но вся сія отъ юности преобидѣти нача, тако и сконча; и во уметы положи и до конца оплева, токмо единаго Христа да пріобрящетъ, и Того добрóты выну и славы божественныя да насладится. Сице и Христосъ Сынъ Божіи возлюби ю и вѣнча святыи вѣрхъ главы ея свѣтлымъ вѣнцемъ правды, и достойну сотворилъ ю небеснаго Своего чертога, и съ мудрыми дѣвами причте ю въ Царствіи Своемъ небеснемъ. Сынъ же ея, благовѣрныи и великіи князь Василіи, такоже и той житіе свое благочестно и мирно препроводилъ, и съ миромъ ко Господу отъиде того же лѣта, мѣсяца Іюля въ 24 день. Бѣ бо смиренномудръ и кротокъ, и милостивъ до конца, и во всемъ ревновáше житію родителема своима. О всемъ мірѣ молятся и ходатайствуютъ о отечествіи своемъ.

Сія тебѣ моихъ словесъ плетенія, о преподобная мати и богоблаженная великая княгиня Анно, пріими é, яко даръ любочестенъ, и аще точно твоему равноангельному иже во плоти житію буди благодареніе Богу, того бо есть даръ и отъ еговыхъ велелѣпному Божества славы Его вся сія приносимъ, якоже и оная вдовица убогая, иже двѣ цатѣ принесыи Богу въ даръ и свидѣтелствована бывши паче множества принесшихъ. Аще ли что и еще недостаточно явися твоему богоугодному пребыванію, обаче по силѣ принесохомъ тебѣ, елико подаде благодать Святаго Духа. Кто бо можетъ по достоинству изрещи ваше иже во плоти ангельское пребываніе и еже многія труды и пóты, пощеніе и воздержаніе, и слезы непрестанныя, смиреніе же и кротость, и любовь нелицемѣрную, еже и сами ангели удивишася невещественному вашему житію! Ты же молися, преподобная и богоблаженная великая княгиня Анно, о мнѣ недостойнѣмъ ко Христу и Богу, и достойна мя сотвори небесныя породы наслѣдника быти и избавитися вѣчнаго осужденія, и твоими молитвами въ настоящемъ семъ житіи сохранену быти отъ мнотоплетеннаго коварства вражія. Благодатію и человѣколюбіемъ Господа нашего Ісуса Христа, съ Нимъ же Отцу купно и Пресвятому и Животворящему Его Духу всяка слава и держава отъ всея твари честь и поклоняніе, нынѣ и присно, и во вѣки вѣкомъ. Аминь.

О явленіи преподобныя матере нашея благовѣрныя великія княгини Анны и чюдо о пономарѣ, именемъ Герасимѣ.

Прешедшимъ убо многимъ лѣтомъ по успеніи блаженныя и великія княгини Анны, яко двѣстѣ и четыредесять и три лѣта, въ неже время всещедрыи Богъ благостію Своею явилъ намъ источникъ неисчерпаемыи, гробъ знаменоносныя матере и великія княгини Анны. И по явленіи томъ невѣдомъ бѣ и небрегомъ святыи гробъ ея, зане сущу времени тогда въ Російскомъ господарствѣ нестройну бывшу, отъ нашествія богомерзкихъ, латинскія ереси воспріемниковъ, литовскихъ людей, якоже лѣтописныя книги повѣствуютъ.

Царствующу бо тогда въ Московскомъ господарствѣ и скиѳетры Россійскаго царства правящу царю Василію, тогда убо окрестъ Московского царства безчисленное воинство бяше литовскихъ людей, на взятіе царствующаго града готовляхуся, прочіе же грады окаянніи плѣнующе и пожигающе, и въ запустѣніе полагающе. И многія святыя мѣста, и честные монастыри разориша, и крови христіянскія окаянніи множество проліяше: отъ Москвы даже и до Великаго Нова града и окрестъ окіяна моря протече необуздáнное ихъ воинство. Богу тако попущающу за грѣхи наша, яко да накажемся человѣколюбіе Его не гнѣвати, и яко да научимся пресвятыя заповѣди Его не преобидѣти, но да всегда предъ Нимъ угодная навыкнемъ творити. Той бо самъ глаголетъ пророкомъ своимъ: аще Мене послушаете, благая земли снѣсте; аще ли не послушаете, оружіе вы поястъ. И яко же речено бысть, яко злохищніи волцы, литовстіи людіе нещадно погубляюще овцы стада Христова, и нѣсть кто возбраняя имъ или сопротивляяися. Понеже царю Василію и самому тогда сущу въ велицѣ утѣсненіи, бывшу елико отъ литовскаго воиньства, паче же отъ своихъ присныхъ мятéжи и нестроенія бяху.

Единою же нападше окаянніи литовстіи людіе изгономъ на градъ Кашинъ внезапу, людемъ же града Кашина о приходе ко граду невѣдущимъ и нестрегущимся, и острогу около града въ то время не было. И елицѣхъ незапно во граде обрѣтоша, многихъ посѣкоша, иныхъ раниша и многіе домы разграбиша, и вскорѣ отъ града отъидоша. По отшествіи же ихъ, литовскихъ людей, града Кашина граждане собравшеся и поставиша по осипи острогъ и начаша стрещися. И егда поставиша острогъ, последи же приразишася окаянніи литовстіи людіе ко граду Кашину не токмо единою, но и дважды и трижды, но ничтоже возмогоша успѣти или зла сотворити, Богу его соблюдающу ради молитвъ благовѣрныя княгини Анны. Людіе же, сущи тогда во градѣ, бяху ратніи и простіи, видѣвше милость Божію, иже отъ нашествія латинскія ереси воспріемниковъ невредимъ пребываетъ градъ, и разумѣвше, яко не отъ своея имъ силы соблюдается, обаче не вѣдяху, яко кто бѣ по нихъ побараетъ и избавляетъ ихъ отъ плѣненія сопротивныхъ, понеже всѣ грады плещи своя вдаша воюющимъ. Тогда убо тогда премилостивыи Богъ восхотѣ показати рабу свою и явити людемъ своимъ цѣлебныи источникъ и сущую помощницу во градѣ, преподобную и благовѣрную великую княгиню Анну, симъ образомъ.

По отшествіи убо преподобныя къ Богу, погребено пресвятое тѣло ея подъ соборною церковію Пресвятыя Богородицы честнаго и славнаго ея Успенія, и многими лѣты пришедши той церкви въ ветхость, якоже и помóсту церновному обвалившуся до самыя земли и разрушшуся. Тогда гробъ великія княгини Анны обрѣтеся на вѣрху земли, и людіе же воѝньстіи, иже во градѣ томъ учиненіи бяху на сохраненіе града, приходяще во храмъ Пресвятыя Богородицы помолитися и отъ невѣденія пологаху шапки свои на гробъ блаженныя, иніи же неразумніи и саждахуся, мняше быти гробу прóсту, и никакоже помышляху, кого нетлѣнію причастна быти въ немъ и сущую во градѣ заступницу. Господу Богу изволившу въ то время явити угодницу свою людемъ своимъ, яко да не къ тому преобидима бываетъ благодать Его, юже дарова угодникомъ своимъ, но да прочее яко свѣтило сіяетъ на подсвѣщнице.

Въ то время, о дивна дѣла Твоя Господи! въ неже тма богомерзкихъ и треклятыхъ литовскихъ людей повсюду обношашеся, и крови христіянскія проливахуся, и людіе въ велицѣй скорби и печали суще, и страхомъ сердцá ихъ сокрушахуся, тогда убо Господь нашъ Ісусъ Христосъ изволилъ рабу свою явити. Является преподобная и богоблаженная и великая княгиня Анна, въ велицѣмъ иночестѣмъ образѣ одѣяна, пономарю церкве Пресвятыя Богородицы, именемъ Герасиму, ему же тогда въ велицѣ болѣзни бывшу и весма ко вратомъ смертнымъ приближающуся и отнюдъ не начаему живу быти. И явленіемъ своимъ исцѣленіе ему подаде и здрава его сотворила. Таже повѣдаетъ ему о себѣ, кто бѣ. Потомъ, поношая имъ о неразуміи ихъ, сице глаголетъ. «И почто, рече, гробъ мой ни во что же вмѣняете, и мене презираете, и яко просту помышляете гробу быти? Не видите ли людей приходящихъ и шапки свои пометающихъ на гробъ мой и садящихся, понеже отъ васъ невозбраняеми бываютъ, и отнюдъ небрегома бѣ отъ васъ и преобидима, и нѣсть разумѣвающаго въ васъ? И доколѣ тако быти ми отъ васъ попираемѣ ногами. Или не вѣстѣ, яко азъ молю всемилостиваго Бога и Того рождьшую Матерь Пресвятую Богородицу, дабы не преданъ былъ градъ сей въ руки врагъ вашихъ, и отъ многихъ пакостей, находящихъ на вы, соблюдаю васъ? И понеже се въ невѣдѣніи твористе. Обаче нынѣ не мозѝ, человѣче, ослушатися моихъ словесъ, да не горша сихъ постражеши. Но иди ко презвитеру сея церкви и ко всему причту, и повѣждь имъ вся сія реченная отъ мене, яко дабы отселѣ гробъ мой честнѣ имѣли и приходящимъ бы возбраняли садитися нань, и шапки класть не велѣли, и свѣщу бы есте возжегли на гробѣ моемъ предъ Нерукотвореннымъ образомъ Господа Бога и Спаса нашего Ісуса Христа». Той же пономарь отъ видѣнія въ себѣ бывъ и скорому премѣненію еже отъ болѣзни здрава себе видѣвъ, велми дивляшеся и Бога прославляше, яко безчисленное богатьство благости своея открылъ есть и отъ вратъ смертныхъ возведе, и великую княгиню Анну немолчными усты похваляше.

Таже нимало замедливъ, бояся прещенія, но скоро приходитъ ко презвитеру и съ нимъ всему причту тоя церкви повѣдаетъ вся реченная отъ преподобныя, и яко здрава его сотворила отъ недуга и неисцѣлныя болѣзни, и отнюдъ къ смерти приближающася посѣщеніемъ явленія своего отъ смертныхъ вратъ возведе. Они же слышавше таковая и онаго вѣдяху велми болѣзнена бывша и неначáема, видѣвше исцѣленіе получивша, благодарственными пѣсньми всесилнаго Бога и Пречистую Богородицу воспрославиша, яко неистощимое богатьство и небесное сокровище, и крѣпкую помощницу явилъ имъ, и блаженную и великую княгиню Анну прославляюще, таже и всѣмъ людемъ повѣдаша. И оттолѣ вси людіе града Кашина, яко стяжавше крѣпкую по градѣ побарательницу и непобѣдимую во бранѣхъ помощницу, никако же не имѣяху скорби еже отъ нашествія безбожныхъ и латинскія ереси воспріемниковъ, скверныхъ и преокаянныхъ литовскихъ людей, вѣдуще, яко не оставитъ преподобная отечества своего въ руцѣ нечестивыхъ предану быти. Таже по повелѣнію преподобныя на гробѣ ея предъ нерукотвореннымъ образомъ Господа Бога и Спаса нашего Ісуса Христа свѣщу неугасимую возжгоша, и мнози приходяще съ вѣрою помолитися Пресвятѣй Богородицы и гробу богоблаженныя честнѣ и велелѣпнѣ, яко же подобаетъ святымъ, поклоняхуся и почитаху. И вси, иже многоразличными болѣзньми содержиміи, прикасахуся честному гробу ея и неоскудную благодать отъ преподобныя почерпающе, отхождаху въ домы своя здравы, славяше и благодаряще Христа Бога нашего и Того рождьшую Матерь Пресвятую Богородицу, и благодать велію исповѣдающе благовѣрныя и великія княгини Анны, яко молитвами ея здрави бываху. Но тогда аще и многимъ чюдесемъ, бывающимъ отъ гроба преподобныя, и мнозѣй благодати, изливающейся отъ живопріемнаго гроба, обаче въ простотѣ ума своего, или Богу тако изволившу судбами своими, не подщашася таковыи свѣтилникъ, иже подъ спудомъ сокрытыи, пресвятое и нетлѣнное тѣло богоблаженныя и великія княгини Анны, на свѣщницѣ поставити, сирѣчь яве быти мощéмъ, дабы видимъ былъ таковый источникъ неисчерпаемыи всѣмъ приходящимъ, якоже подобаетъ святымъ и другóмъ Божіимъ и творящимъ волю Его. По еже отшествіи ихъ къ Богу, церкви Божія пріятъ воспѣвати псалмы и пѣсньми и пѣньми духовными прославльшихъ Господа своимъ божественнымъ житіемъ. Богъ же и се творитъ смотренія ради нѣкоего, яко да покажетъ всѣмъ явѣ таковое неистощимое богатество, древнія своея благости источникъ неисчерпаемыи во свое время, когда Онъ вѣсть судьбами своими. И отъ того времени, въ неже явленъ бысть гробъ преподобныя, тако почитаемъ бѣ и покланяемъ чéстнѣ и велелѣпнѣ.

О обрѣтеніи честныхъ мощей преподобныя благовѣрныя великія княгини Анны.

Во дни благовѣрнаго и христолюбиваго царя и великаго князя Алексѣя Михáйловича, всея Русіи самодержца, и при святѣишемъ патріарсѣ Іосиѳѣ Московскомъ и всея Русіи, благіи и преблагіи и всемилостивыи Богъ нашъ, иже неизреченнаго своего благоутробія пучину излія на насъ богатно щедротами своими, даровавъ намъ божественнаго своего сокровища неистощимое богатьство, и открылъ есть въ послѣдняя сія роды иже подъ спудомъ лежащіи свѣтилникъ, и подаде неисчерпаемыи источникъ отъ приснотекущія своея благости, мóщи преподобныя и благовѣрныя княгини ѝнокини Анны, и толикимъ бо лѣтомъ прешедшимъ по преставленіи блаженныя и никако же тлѣнію причастны показалъ. И яко же прежде варивше рѣхомъ неизслѣдимыми судбами Владыки всѣхъ и Бога, творящаго преславная и непостижимая чюдотворенія роду человѣческому, явився гробъ благовѣрныя княгини, ѝнокини Анны, поверху земли, и многимъ преестественнымъ чюдесемъ отъ него изливающимся. И сіе видѣвше презвитеръ тоя церкви и со иже съ нимъ причéтъ церковныи, таже и прочіи священническіи чинъ и вси людіе пресловущаго града Кашина, како таковыи неисчерпаемыи источникъ повсегда истекаетъ и никогда же оскудѣваетъ, и въ себѣ помышляюще, яко Богъ благодатію своею дарова граду нашему таковое сокровище неистощимое, и яко многу времени прешедшу по явленіи гроба преподобныя, и никого преже насъ бывшихъ, глаголаше, подщавшихся, вѣдяху, еже бо мóщи преподобныя явѣ сотворити. И се нынѣ предъ нами во очію нашею всякому приходящему отъ всечестнаго гроба ея изливается благодать, спасительная всѣмъ человѣкомъ, и явѣ показующи намъ преестествеными чюдесы, аще и намъ молчащимъ, но многая чюдеса явѣ творятъ данную благодать, иже отъ юности возлюбившей Христову смиренію и Его легкое иго поносившей, благовѣрной и великой княгинѣ Аннѣ. И како таковыи божественныи сосудъ, иже небеснаго мѵра полныи во гробѣ лежащіи, аки подъ спудомъ сокрытыи и никимъ же вѣдомъ. И доколе супостатъ нашъ, врагъ и діяволъ, и сопротивникъ святыхъ, таковымъ нашимъ не радѣніемъ и небреженіемъ понóситъ намъ. Той бо вся козни и лукавства и ухищренія, во Христову благодать оболкшеся, того пронырства до конца побѣдиша, и яко худая птица попираемъ отъ нихъ. По смерти же своей, вся наша страсти неисцѣлныя исцѣляютъ и того козни явѣ намъ творятъ. И сего ради лукавыи сатана не хощетъ ни единымъ божественнымъ мощéмъ ихъ въ видѣніи быти всѣмъ человѣкомъ. Якоже и въ пренесеніи мощей явлéно есть первомученика и первослужителя апостола архидіякона Стефана отъ Іеросалима въ Царь градъ, како нечистіи дуси на пути вопіяху: «О, горе намъ, яко первомученикъ Стефанъ ѝдетъ мучити насъ!» И аще не бы Божія десница, тѣхъ стремленія возбранила, не бы убо когда попустили лукавіи бѣси мощемъ его явленымъ быти всѣмъ людемъ. Якоже и въ прочихъ житіяхъ святыхъ написано есть вся козни и ухищренія лукаваго сатаны, творимая отъ святыхъ мощей. И таковая въ себѣ помышляху, любовію вперяющеся, еже бы доити въ царствующіи градъ Москву и повѣдати госудáрю царю и великому князю Алексѣю Михáйловичю, всея Русіи самодержцу, о таковыхъ и толикихъ многоразличныхъ чюдесѣхъ благовѣрныя и великія княгини Анны, дабы повелѣлъ государь царь таковому свѣтилу изъ подъ спуда на свѣщницѣ поставитися и церкви Божія Матери свою красоту воспріяти. И сему бывшу, вскорѣ дѣлу касаются.

И царствующаго матери градовóмъ, богоспасаемаго града Москвы, достизаютъ и тамо госудáрю царю и великому князю Алексѣю Михáйловичю, всея Русіи самодержцу, вкупѣ со святѣйшимъ Іосифомъ патріархомъ Московскимъ и всея Русіи, таковыи неисчерпаемыи источникъ во своемъ градѣ, гробъ благовѣрныя и великія княгини ѝнокини Анны, супружницы благовѣрнаго и великаго князя и страстотерпца Христова Михáйла Тверскаго, на вѣрху земли повѣдаютъ, вкупѣ же и многія и различныя чюдеса, бывающія отъ всечестнаго гроба ея молитвами преподобныя, явѣ извѣщаютъ. И яко отъ лица церкви Божія Матери благочестиваго царя молиша, сице глаголюще: «Даруй, царю благочестивыи, мою красоту велелѣпную и утварь многоцѣнную, и сокровище неистощимое, и свѣтилникъ пресвѣтлыи, источникъ неисчерпаемыи, сосудъ божественнаго мѵра полныи, гроздъ истинныя лозы; повели открытися гробу моея дщери возлюбленныя и явѣ быти мощемъ преподобныя всѣмъ приходящимъ. Доколѣ таковому небесному сокровищу подъ спудомъ лежати? Не могу бо сея надóлзѣ зрѣти во гробѣ затворену, понеже аки многимъ óблакомъ, спокрывшимъ пресвѣтлыя лучи чювственаго солнца, сице и моея дщери во гробѣ затворенныя мóщи доселѣ никѝмъ вѣдомы. И доколѣ въ поношеніи есмь отъ всѣхъ ради таковаго презрѣнія? Се бо и Женихъ мой небесныи, иже предобручилъ мя Себѣ невѣстою, Сынъ Божіи единородныи и соприсносущныи Отцу и Святому Духу, иже сыи сіяніе славы Отча, вопіетъ во святѣмъ своемъ евангеліи, яко неподобно свѣтилнику возженному подъ спудомъ быти, но на свѣщницѣ полагатися, яко да свѣтитъ всѣмъ, иже во хрáминѣ суть. Аще ли откровено будетъ таковое пречистое сѣленіе, божественыи сосудъ, тогда буду отъ всѣхъ славима и ублажаема, воспріимши въ себѣ таковыи источникъ, иже отъ многихъ лѣтъ сокровенныи. Такова слава моя, таково украшеніе мое, таковою добрóтою и утварію украсивъ мя небесныи мой Женихъ и твой Творецъ и Владыка. Кромѣ же таковыя утвари, еже есть мощéй святыхъ и образóвъ подобія ихъ написаныхъ, лишена бываю славы и яко горлица пустынная пребываю».

Сія слышавъ, благовѣрныи и христолюбивыи государь царь и великіи князь Алексѣй Михáйловичь, всея Русіи самодержецъ, вкупѣ зъ богомолцомъ своимъ и отцемъ, святѣйшимъ Іосифомъ патріархомъ, радости многи наполнившеся и благодарственыя пѣсни всемилостивому Богу возславше, яко таковое сокровище своея благости во дни благочестивыя державы его открылъ есть, таже вскорѣ посылаетъ своя царская писанія во градъ Тверь къ сущему тамо архіепископу Іоне, повелѣваетъ ему немедленно доити во градъ Кашинъ и мощи благовѣрныя и великія княгини ѝнокини Анны со всякимъ благоговѣніемъ открыти, и таковое небесное сокровище и источникъ приснотекущіи не ктому покрывати или въ земли положити, но яко свѣщникъ на свѣщницѣ возложити, яко да видѣвше чада церковная и Христова стада словесныя овцы мощи богоблаженныя и великія княгини Анны, прославятъ Бога Отца и Единороднаго Сына Его, Господа нашего Ісуса Христа, и Пресвятаго и Животворящаго Его Духа. Принесену же бывшу таковому царскому писанію во градъ Тверь ко архіепископу Іонѣ, и прочетъ вскорѣ пути емлется, поимъ съ собою весь клиросъ соборныя церкви.

И пришедъ во градъ въ Кашинъ, молебная пѣнія и благодарственыя пѣсни ко Христу Богу и Пречистѣй Богородице принесе, таже и всенóщному бдѣнію и утренему славословію бывшу во храмѣ Пресвятыя Владычицы нашея Богородицы и Приснодѣвы Маріи честнаго и славнаго Ея Успенія надъ гробомъ преподобныя и великія княгини ѝнокини Анны. И послѣ божественныя литургіи, пѣвша надгробная пѣнія богоблаженнѣй со псалмы и пѣнми, и пѣсньми духовными, со всякимъ умиленіемъ и благоговѣніемъ, и многому благодаренію бывшу, людемъ же всѣмъ взывающимъ: «Господи помилуй!» И абіе преосвященныи Іона, архіепископъ, священныма своима дланма со архимандриты и игумены, и со множествомъ священническаго чина всечестному ковчегу касается, и открывше приснотекущіи источникъ, мóщи богоблаженныя и великія княгини ѝнокини Анны и видѣвше яко кринъ во удоліихъ сіяющъ и яко финикъ цвѣтущіи. О, непостижимымъ судбамъ Твоимъ, Владыко Христе Царю! Обрѣтше мощи, его же не надѣявшеся, цѣлы и неразрушимы, и никако же тлѣнію причастны быша, ни поне ризамъ ея; аще и нѣкая часть къ сродному сродное отдадеся. Но слава Всемогущему Богу и Пресвятѣй Его Матери, Пресвятѣй Богородице, яко тако прославляютъ угодниковъ своихъ. Таже благоуханія неизреченнаго воздýхъ наполнився отъ мощей преподобныя и всѣхъ услаждая и возвеселевая сердца, подвизая на благодареніе и славословіе, иже во святыхъ чюдодѣйствующему Богу, таковая преславная чюдеса творящему. Таже архіепископъ Іона со всѣмъ освященнымъ соборомъ многая благодаренія Богу изрече, яко въ послѣдняя сія роды таковое небесное богатество, отъ многихъ лѣтъ сокровенное, нетлѣнно явилъ людемъ своимъ. И «Слава Ти, Владыко мой, Ісусе Христе, глаголаше, яко сподобилъ мене недостойнаго видѣти приснотекущіи источникъ, древнія своея благости сокровище, пречестныя мощи благовѣрныя великія княгини ѝнокини Анны. И что воздадимъ мы недостойніи Твоему непостижному и человѣколюбному благодѣянію, иже твориши человѣческому роду своимъ человѣколюбіемъ. Веліи еси Господи, и чюдна дѣла Твоя, и ни едино достойно слово къ похваленію чюдесъ Твоихъ». И таковое благодареніе воздавъ всесильному Богу, и цѣловавъ любезно святыя мощи преподобныя и богоблаженныя и великія княгини ѝнокини Анны, и благословивъ когождо по единому, отъиде во свой градъ Тверь, славя и благодаря Христа Бога нашего и Того рождьшую Пречистую Матерь, Пресвятую Богородицу, и ихъ угодницу преподобную и великую княгиню ѝнокиню Анну. Таже и писаніемъ возвѣщаетъ госудáрю царю и великому князю Алексѣю Михáйловичю, всея Русіи самодержцу. «Яко во дни, рече, твоея благочестивыя державы, благочестивыи и христолюбивыи царю, открылъ есть Господь въ послѣдняя сія роды, ради боголюбивыя твоея вѣры, юже имаши ко святымъ Его угодникамъ, таковое безцѣнное богатество и поистинне дражайшее паче древняго кіовота, мощи благовѣрныя и великія княгини ѝнокини Анны. И мы видѣвши, яко благодатію Христовою никако же тлѣнію причастны явишася, ни поне ризамъ ея». Благочестивыи же и богомудрыи государь царь, слышавъ таковая, великою радостію радуяся о обрѣтеніи мощей благовѣрныя и великія княгини ѝнокини Анны, и вельми Бога благодарьствивъ и Пречистую Богородицу, яко посѣтилъ люди Своя, ихъ же стяжа пречистою кровію Своею, таковымъ безцѣннымъ сокровищемъ. Но кто можетъ изрѣщи иже тогда благочестиваго царя вѣру и любовь ко преподобнѣй! Аще бы мощно ему взяти златыя крылѣ, по пророку богоотца Давыда, и прелетѣти желаніемъ богодуховнымъ вскорѣ во градъ Кашинъ, якоже нѣкогда Аввáкумъ пророкъ въ Вавилонѣ обрѣтеся, или, паче рещи, къ богопріятному и пречестному селенію божественнаго кивота Пресвятыя Богородицы на Тоя Успеніе апостоли снидошася на óблацѣхъ въ мегновеніи ока отъ конецъ земли, тако и онъ, благочестивыи и Богомъ хранимыи государь царь и великіи князь Алексѣй Михáйловичь, всея Росіи самодержецъ, толикою любовію божественною возгорѣвся, и желаніемъ паримъ видѣти мощи благочестиваго корени, пресловущаго благовѣрнаго и великаго князя Михáйла Ярославича Тверскаго, супружницы его благовѣрныя и великія княгини ѝнокини Анны, и цѣловати любезно пресвятое тѣло ея и поклонитися целбоносному гробу ея. Аще бо тогда и отложилъ на время путное шествіе ко граду Кашину, но обаче въ пріидущее лѣто вѣру свою боголюбивую дѣломъ совѣршилъ ю, якоже въ пренесеніи честныхъ и многоцѣлебныхъ мощей преподобныя и богоблаженныя великія княгини ѝнокини Анны написася о семъ.

Мы же, церковная чада, сошедшеся во обрѣтеніе честныхъ и святыхъ мощей благовѣрныя и великія княгини инокини Анны, духовнѣ празднуемъ, во псалмѣхъ и въ пѣніихъ и пѣснѣхъ духовныхъ восхваляюще Господа Бога и Творца своего, и пріимшаго труды и подвиги угодницы своея благовѣрныя и великія княгини инокини Анны, и тоя вѣрхъ пресвятыи вѣнчавшаго божественною славою своею, и многими преестественными чюдесы обогащьшаго, немолчными усты воспоемъ и восхвалимъ. И тако въ таковомъ духовнемъ торжествѣ любовію вперившеся и на высоту божественнаго разума возшедшую похвалами воспоемъ, сице рекуще: «Радуися, преподобная и богоблаженная великая княгиня Анна, иже отъ юности своея нача Богу работати и того пресвятыя заповѣди усердно въ сердцы своемъ пріяла еси. Радуися, духовная мати, иже возненавидѣ красоту и славу міра сего, токмо единаго возжелѣ преславнаго свѣта Ісуса Бога нашего доброты выну наслаждатися и Того божественныя славы наслѣдница быти. Радуися, преподобная и преблаженная великая княгиня Анна, иже супругу своему, благовѣрному и великому князю Михáйлу, подала еси совѣтъ благъ къ страданію мученія добрымъ пóдвигомъ еже за Христа кровь свою изліяти. Радуися, ластовице прекрасная и горлица чадолюбивая, иже по оного иже за Христа мученіи, вдовствующи и чистоту дѣвьства своего сохранила еси, и къ Богу выну бесѣдовала еси молитвою и постомъ и воздержаніемъ многимъ, якоже древле блаженная пророчица Анна, иже во евангеліи свидѣтельствованная, въ дому Божіи присно соводворяющися. Радуися, пречистое селеніе и жилище Святаго Духа, иже всяку славу и честь и господьство вѣка сего оставила еси, и до конца оплевала еси, и ни во что же яко уметы положила еси вся сущая въ мірѣ, и Христу единому послѣдовала еси, и Его пресвятое иго на рамѣ носила еси, и многими добродѣтельными дѣлы угодила еси. Радуйся, преподобная мати Анно, иже невозвратнымъ путемъ шествовала по заповѣдѣмъ Владыки своего Христа, и ничтоже паче любве Его предпочте, сего ради и Христосъ возлюби тя, яко невѣсту прекрасную, и съ мудрыми дѣвами въ чертозѣ своемъ сочталъ тя есть, и по успеніи твоемъ соблюде пресвятое тѣло твое нетлѣнно, душу же твою святую въ премірная сѣленія вселилъ и многими чюдесы обогатилъ тя есть. Радуися, крѣпкая помощнице отечеству своему, граду Кашину, и всей области его великое утвѣрженіе. Радуися, заступнице и всѣмъ скорбящимъ душею божественое утѣшеніе. Радуйтася и веселитася, супрýга Христова, благовѣрныи и великіи княже Михáйле, вкупѣ съ супругою своею великою княгинею Анною, и радости ваю никто же отъиметъ отъ ваю. Радуитася, свѣтила пресвѣтлая, иже всю Русскую землю просвѣтила еста божествеными зарями чюдесъ ваю. Радуйтася и веселитася, угодника Христова, вы бо врача показалася еста всѣмъ приходящимъ съ вѣрою къ цѣлбоноснымъ мощемъ ваю и исцѣляета страсти наша неисцѣлныя. Молитася, святая, вкупѣ Христу Богу нашему даровати благовѣрному царю нашему на враги побѣду и одолѣніе, и міру смиреніе, и всей Російской землѣ великое утверженіе, яко да и мы молитвами ваю получѝмъ оставленіе грѣховъ и житію исправленіе, и небеснаго Царствія наслѣдницы будемъ. Благодатію и человѣколюбіемъ Господа Бога и Спаса нашего Ісуса Христа, съ Нимъ же купно Отцу и Пресвятому и Животворящему Духу подобаетъ всяка слава, честь и поклоняніе, нынѣ и присно и вó вѣки вѣкóмъ. Аминь.

Печатается по изданію: Служба, житіе и чюдеса преподобныя благовѣрныя великія княгини инокини Анны Кашинскія, первымъ тисненіемъ съ древняго перваго рукописнаго подлинника, хранящагося въ Патріаршей библіотекѣ въ Москвѣ, подъ номеромъ 622-мъ. — М.: Въ тѵпографіи единовѣрцевъ, при Свято-Троицкой Введенской церкви, 1909. — Листъ 35-88.

Наверхъ / Къ титульной страницѣ

0