Наследие Святой Руси. Памятники древне-русской письменности
 
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Наслѣдiе Святой Руси
-
Гостевая книга
-
Новости
-
Написать письмо
-
Поискъ

Раздѣлы сайта

Святые Кириллъ и Меѳодiй
-
Книги старой печати
-
Патерики и житiя святыхъ
-
Великiя Минеи Четiи
-
Церковно-учит. литература
-
Творенiя русскихъ святыхъ
-
Стоянiе за истину
-
Исторiя Русской Церкви
-
Церковный расколъ XVII в.
-
Исторiя Россiи

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 25 апрѣля 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ПАТЕРИКИ И ЖИТІЯ СВЯТЫХЪ

Житіе преподобнаго Антонія Римлянина

Житіе преподобнаго Антонія Римлянина написано ученикомъ его Андреемъ, бывшимъ съ 1147-1157 года игуменомъ основаннаго Антоніемъ монастыря. Такъ значится во всѣхъ нынѣ извѣстныхъ спискахъ житія [1]. «Увѣдѣ преподобный свое отшествіе къ Богу, - говоритъ самъ жизнеописатель, - призва мене священноинока Андрея, и нарече себѣ мене отца духовнаго, и добрѣ исповѣдавъ со слезами, повѣда моему окаянству преподобный свое пришествіе изъ Рима и о камени и о сосудѣ древяномъ, о делви, сирѣчь о бочки, еже исперва писано, и повелѣ ми вся сія написати по преставленіи своемъ и церкви Божіи предати чтущимъ и послушающимъ на пользу души». Въ 1598 году, по открытіи мощей преподобнаго Антонія (въ 1597), Нифонтъ постриженникъ Антоніева монастыря подвергъ это древнее жизнеописаніе новой редакціи, описалъ въ Сергіевой лаврѣ чудеса преподобнаго съ 1578 по 1597 годъ, присовокупилъ витіеватый приступъ и многорѣчивое похвальное слово, сохранивъ, впрочемъ, за исключеніемъ двухъ вставокъ, первоначальный, основный составъ древняго житія. Онъ, безъ сомнѣнія, внесъ въ житіе анахронизмъ, будто преподобный построилъ и расписалъ каменную церковь въ своемъ монастырѣ при епископѣ Никитѣ, тогда какъ, по достовѣрному свидѣтельству новгородской лѣтописи, св. Никита скончался въ 1108 г., а каменная церковь заложена Антоніемъ уже въ 1117 г. и расписана въ 1125 г. [2]. Точно также замѣчаніе относительно «гривеннаго слитка», предложеннаго Антоніемъ рыболовамъ: «понеже въ то время у новгородскихъ людей не бысть денегъ, но ліяша слитки серебряныя, ово въ гривну, ово въ полтину, ово въ рубль», - это замѣчаніе принадлежитъ, конечно, редактору XVI вѣка, когда въ 1535 году царь Іоаннъ Василъевичъ «повелѣ дѣлати деньги серебряныя новыя, и начаша въ Новгородѣ дѣлати новыя деньги» [3]. Предлагаемъ житіе по списку XVI вѣка, находящемуся въ сборникѣ Соловецкой библіотеки подъ № 854.


СКАЗАНІЕ
О житіи преподобнаго и богоноснаго отца нашего Антоніа римлянина. и о прихожденіи изъ Рима въ великіи Новъ градъ. и о зачалѣ монастыря. списано бысть ученикомъ его священноинокомъ Андреемъ. иже бысть по нем тояже обители игумен
[4].

Сеи преподобныи и богоносныи отецъ нашъ Антоніе родися во градѣ въ велицѣмъ Римѣ. иже отъ западныя части отъ италіискіа земля. отъ латынска языка отъ христіану родителю. и навыче вѣрѣ христіанстѣи. еяже деръжаста родителіе его втаинѣ, крыющеся в домѣхъ своихъ. понеже Римъ отпаде вѣры христіанскіа, и преложишася в латыню. конечнѣ отпаде от папы Фармоса, даже и доднесь. и ина многа о отпаденіи римскомъ повѣда ми, и о богомерскои ереси ихъ. но убо о семъ да премолчимъ, о преподобнемъ же да глаголемъ. Отецъ же его и мати, в добрѣ исповѣданіи, отъидоша к Богу. преподобныи же навыче грамотѣ. и изъучи вся писаніа греческаго языка. и прилѣжно начатъ чести книги ветхаго и новаго завѣта. и преданіе святых отецъ седми соборовъ, еже изложиша и изъясниша вѣру христіанскую. и вожделѣ въспріяти иноческіи образъ. и помолився Богу, и раздая имѣніе родителеи своихъ нищимъ. а прочее отъ иміѣніа своего положи въ сосудъ древянъ в дельву, рекше в бочку. и заковавъ и всякою крѣпостію утвердивъ, сокры, и вверже в море. самъже поиде от града в далніе пустыни взыскати мниховъ живущихъ и тружающихся Бога ради. крыющеся отъ еретикъ, в пещерахъ и в разсѣлинахъ земныхъ. и Божіимъ промысломъ вскорѣ изобрѣте мнихы, в пустыни живущихъ. в нихже бѣ единъ имѣяше презвитерскій чинъ. преподобныи же Антоніе много моляшеся имъ со слезами, дабы его присочетали къ своему Богомъ избранному стаду. ониже много его вопрошаху о христіанствѣ. и о ереси римстѣи. боящеся искушеніа отъ отступникъ и отъ еретикъ. онъ же имъ христіана себе исповѣдавъ. они же ему рекоша. чадо Антоніе, понеже юнъ еси и не можеши трьпѣти постническаго житія и трудовъ чернеческыхъ. понеже ему бывшу въ то время осминадесяти лѣтъ. и ина многа ему повѣдаху узкаго и прискорбнаго пути шествія иноческаго трьпѣніа. он же неослабно моляшеся имъ и кланяяся с великимъ умиленіемъ о воспріятіи мнишескаго образа. и едва получи желаніе свое. и постригоша его во иноческіи образъ. и пребысть же преподобный с ними в пустыни тои двадесять лѣтъ, тружаяся и постяся, и моляся Богу день и нощь. Бысть же рече. вдалѣе насъ яко 30 поприщь в пустыни возграждена оть ту живущихъ иноковъ церкви мала. во имя боголѣпнаго преображеніа Господа Бога и Спаса нашего Ісуса Христа. обычаи же бяше всѣмъ инокомъ ис пустыни сходящеся к велицѣи суботѣ. презвитери же и діакони литургисавъ божественную и святую службу. и вси причастившеся божественныхъ таинъ. весь же день тои и вощь поюще и молящеся. во утріи же на самый праздникъ свѣтлаго Христова тридневнаго воскресеніа на святую пасху, пѣвъ заутренюю. и святую и божественную литургію. такоже причащавшеся святыхъ пречистыхъ божественныхъ и животворящихъ таинъ Христовыхъ, и отхождаху кіиждо во свою пустыню. ненавидяи же добра діаволъ воздвиже гоненіе конечное на христіаны. послаша князи града того и богомерзкіи отступникъ папа римскіа области по пустынямъ. и начаша имати мнихы, и предаяху на мученіе. преподобнымъ же онѣмъ отцемъ богоизбраннаго Христова стада, отъ страха того разшедшимся по пустыни, и невозвѣдаша другъ друга. преподобныи же Антоніе начатъ жительство имѣти при мори в непроходныхъ мѣстѣхъ. толико на камени нощію и во дни безпрестани стоя и моляся Богу. и никакогожъ покрова и хижа не имѣя. точію мало пищи вкушая отъ недѣля до недѣля. еже принесе изъ пустыни своея. и пребысть ту на томъ камени преподобныи годищное время и мѣсяца два. и толико трудися къ Богу моляся в постѣ и во бдѣніи и молитвахъ и без пища пребывая, елико ангеломъ подобенъ бысть. понеже убо таину царскую подобаетъ хранити. похвально и безбѣдно есть и вельми полезно хранящимъ ю да никимъже невѣдомо будетъ. да не инако будетъ царьское повелѣніе. дѣла же Божіа и чудеса преславная подобаетъ вездѣ и повсюду и всяко с высокимъ проповѣданіемъ и извѣщеніемъ сія проповѣдати. и ничтоже отъ нихъ скрыти или забвенію предати. но во общую ползу и спасеніе всѣм христоименитымъ людемъ. но на преже реченная возвратимся. Бысть же въ лѣто 6000-ное 614 [1105]. мѣсяца сентября въ 5 день на память святаго пророка Захаріи отца Предотечева. восташа вѣтри велицы зѣло. и море восколебася. яко николиже быша тако. и волнамь морскимъ до камени восходящимъ, на немъ же пребываше стоя и безпрестанни молитвы Богови возсылая. и абіе внезапу, едина волна напрягшися, и подъятъ камень на немъ же преподобныи стояше. и несе его на камени, якоже на корабли легцѣ. ни какоже ничимъ не повреди ни устраши его. преподобныи же стояше и безпрестани моляся Богу. возлюби убо Бога всею душею своею. сладость бо и просвѣщеніе и радость присно есть любящимъ его. и якоже возлюби ̀и, присно такоже и въ немъ живетъ Богъ. преподобныи же имѣя образъ его въ сердцы своемъ присно. икону Божiю преславну, не шаромъ образовану, или на иномъ нѣчемъ. но ту глаголю икону Божію, бываемую добрыми дѣлесы. постомъ воздръжаніемъ. исправленіи добрыми. бдѣніемъ и молитвами. вписуя себѣ сокровено въ сердцы своемъ выну шаромъ иконнымъ образъ небеснаго Владыкы. и зряше умныма сердечныма очима изъ облака пречистую Богородицу. деръжащю пречистыма своима рукама предвѣчнаго младенца Господа и Бога и Спаса нашего Ісуса Христа. и не свѣмъ рече когда день когда ли нощь. но свѣтомъ неприкосновеннымъ объятъ бысть. камени же текущю по водамъ, ни кормилца имущи ни кормъчіа. ни разумъ человѣчь можетъ изрещи. ни страхъ. ниже скорбь. ни туга. ни ина которая печаль. ни алчба. ни жажда не пріиде ко преподобному. но токмо пребысть моляся Богу во умѣ своемъ, и веселяся душею. и всесильному Богу и пречистѣй Богородицѣ, веліе благодареніе воздая. и отъ римскіа страны шествіе его бысть по теплому морю. из негоже в рѣку Неву. и из невы рѣкы въ Невое озеро. из Неваж озера вверхъ по рѣцѣ Волхову. противу быстринъ неизреченныхъ. даж и до великаго Новà града. до уреченнаго мѣста камень не приста нигдѣже. и приста камень. на емже преподобныи стоя и моляшеся. при брезѣ великіа рекы нарицаемѣи Волхова. на мѣстѣ идѣже нынѣ Божiею благодатію и пречистыя Богородица и преподобнаго отца нашего Антонія молитвами обитель стоитъ. в таже времена бысть в третюю стражу нощы. въ сельцы. еже именуемо Волховскомъ. [5] начаша во градѣ звонити к заутреннему пѣнію, якоже обычаи есть и услыша преподобныи звонъ великъ во градѣ, и ста на многъ часъ во страсѣ мнозѣ и в недоумѣніи. и от страха начатъ быти въ размышленіи, и во ужасѣ велицѣ, и чаяше яко ко граду Риму принесенъ бысть на камени. нощи же мимошедши. и дневному свѣту солнцу возсіявшу. преподобному же на камени стоящу. стекошася людіе к нему иже ту живуще. и зряще на преподобнаго дивящеся. и пріидоша к нему и начаша вопрошати о имени и о отечествѣ и отъ коея страны пріиде. преподобному же ни мало русску языку умѣющу, и ни котораго отвѣта не доумѣяше имъ сказати. но токмо кланяяся, самъ же с камени не поступи. и пребысть ту три дни и три нощи. на камени стоя и моляся Богу. въ четвертыи же день преподобныи помолися Богу на многъ часъ о увѣдѣніи града и о людехъ. и дабы ему послалъ Богъ таковаго человѣка. иже бы ему повѣдалъ о градѣ и о людехъ. и сниде преподобныи с камени, и поиде во градъ. и обрѣте человѣка греческіа земли гостбу [6] дѣюща, купецкіи чинъ имуща. иже умѣяше римскимъ и греческимъ и рускимъ языкомъ. узрѣвъ же преподобнаго, вопроси его о имени и о вѣрѣ. преподобныи же ему повѣдаше имя свое. и христіяна себе нарече и грѣшна инока и недостойна ангельскаго иноческаго образа. купецъ же онъ паде къ ногама святаго, прошаше благословеніа отъ него. преподобныи же ему благословеніе дарова и о Христѣ цѣлованіе. вопросившу же его преподобному о градѣ семъ и о людехъ и о вѣрѣ и о святыхъ Божіихъ церквахъ. готфинъ же преподобному повѣдаше вся по ряду глаголя. градъ сей есть великіи Новъ градъ. людіе же въ немъ православную христіянскую вѣру имуще. соборная же церкви святая Софіа премудростъ Божіа. святитель же Никита во градѣ семъ епископъ. владѣющу градомъ симъ благочестиву великому князю Мстиславу Владимировичю Манамаху. внуку Всеволодову, преподобныи же слышавъ отъ греченина сего повѣсти сія, возрадовася душею. и всесильному Богу веліе благодареніе воздаяше во умѣ своемъ. вопроси же преподобныи греченина готфина глаголя. еще мнѣ повѣжь друже. колико разстояніе отъ града Рима до града сего. и в колико время преходятъ людіе путь сеи; онъ же рече. дальшая страна есть, и нуженъ путь по морю и по суху. едва преходятъ въ полгодищное время, аще кому Богъ поспѣшитъ. преподобному же размышляющу и дивящуся въ себѣ о величіи Божіи. како в два дни и въ двѣ нощи. толику долготу пути преиде. наипаче же, яко и выше естества на камени по водамъ. и едва отъ слезъ удержася въ то время, и поклонися ему да земля, миръ и прощеніе ему даровавъ. и вниде преподобныи во градъ помолитися святѣй Софѣи премудрости Божіей, и великаго святителя Никиту видѣти. и видѣвъ церковное благолѣпіе и чинъ, и святительскій санъ, вельми возрадовася душею. и помолився и обхождаше всюду. и паки отыде на мѣсто свое. святителю же Никитѣ въ то время никако не явися преподобныи. понеже еще не навыче словенску и русску обычаю и языку. Начатъ же преподобныи молитися стоя на камени своемъ день и нощь, дабы ему Богъ открылъ русскіи языкъ. и видѣвъ Господь Богъ преподобнаго подвигы и труды. и начаша приходити к нему, иже ту близъ живущеи людіе и гражане, молитвы ради и благословеніа. и Божіимъ промысломъ, преподобныи вскорѣ отъ нихъ начатъ разумѣти, и глаголати русскимъ языкомъ. людемъ же вопрошающимъ его о отечествѣ, и коея земля рожденіе, и воспитаніе. и о пришествіи его. преподобныи же никако не повѣдаше о себѣ токмо себѣ грѣшна именуя. По малѣ же времени доиде въ слухъ о немъ до святителя Никиты тогоже великаго Новаграда. святитель же Никита посла по него и повелѣ его привести предъ себя. преподобныи же во страсѣ велицѣ бывъ, еще же и радостію одержимъ бысть, и иде ко святителю въ велицѣ смиреніи. святитель же введе его в келію свою. и сотворивъ молитву преподобныи, и рече аминь. и пріемлетъ благословеніе отъ святителя со страхомъ и с любовію, яко отъ Божіа рукы. святитель же Никита провидѣ Святымъ Духомъ еже о преподобнемъ. и начатъ вопрошати его о отечествѣ. и о пришествіи его въ великіи Новградъ. откуду и како пріиде. преподобныи же святителю не хотя повѣдати таины, славы ради человѣческіа. но токмо грѣшна себя именуя. святитель же Никита с великимъ прещеніемъ, еще же и съ заклинаніемъ, вопрошая преподобнаго и рече. мнѣ ли брате не повѣси таины своея. а вѣси яко Богъ имать открыти нашему смиренію яже о тебѣ. ты же судъ преслушаніа пріимеши отъ Бога. преподобныи же падъ предъ святителемъ на лицы своемъ, и плакаше горко. и моля святителя. да не повѣсть таины сея никомуже, дондеже преподобныи в жизни сеи. и повѣда о себѣ таину на единѣ святителю Никитѣ вся поряду. о отечествіи своемъ, и о воспитаніи. и о прихожденіи своемъ изъ Рима в великіи Новоградъ. яже исперва писана. святитель же Никита сія слышавъ отъ преподобнаго, не мняше его яко человѣка, (но) яко ангела Божіа. и воставъ отъ мѣста своего. и отлагаетъ жезлъ пастырскіи. и на многъ часъ ста и моляся, и дивяся бывшему. яко же прославляетъ Богъ рабъ своихъ. по молитвѣ же рече преподобныи аминь. святитель же Никита падъ предъ преподобнымъ на землю, прося благословеніа и молитвы отъ него. преподобныи же падъ предъ святителемъ на землю, моляся и прося благословеніа отъ святителя. себе же недостоина и грѣшна именуя. и оба лежаста на земли, плакастася, помочая землю на многъ часъ. другъ у друга благословеніа просяще и молитвы. святитель же Никита рече къ преподобному. ты великаго дара сподобленъ еси отъ Бога. и древнимъ чюдесем уподобился еси Иліи Фезвитянину, или апостоломъ, иже на Успеніе пречистѣи Богородицы принесени быша на облацѣхъ. тако и градъ нашъ Господь присѣти тобою своимъ угодникомъ. новопросвѣщенныхъ людеи благослови и присѣти. преподобныи же рече ко святителю. ты еси іереи Бога вышняго, ты помазанникъ Божіи. тебѣ довлѣетъ о насъ молитися. святитель же воставъ отъ земля и не можаше утѣшитися отъ слезъ. воздвизаетъ преподобнаго отъ земля. давъ ему благословеніе и о Христѣ цѣлованіе. и много бесѣдовавъ съ преподобнымъ. и никакоже можаше насытитися сладкыхъ и медоточныхъ словесъ тѣхъ отъ преподобнаго. и хотѣ прославити чудо, но не хотяше преподобнаго моленіа презрѣти! святитель же Никита много моляше преподобнаго, дабы избралъ себѣ мѣсто потребно у него. и пребывалъ съ нимъ до исхода душа своея, преподобныи же никако восхотѣ сего сотворити. и отвѣщавъ рече. Господа ради святче Божій не нуди мене. довлѣетъ бо ми на томъ мѣстѣ терпѣти, идѣже ми Богъ повелѣ. святитель же Никита давъ благословеніе, и отпусти преподобнаго съ миромъ на богоизбранное мѣсто. Не по мнозѣ времени поѣха Никита епископъ ко преподобному Антонію видѣти камень и мѣсто. преподобныи же стояше на камени, аки на столпѣ, и никакоже схождаше моляся Богу день и нощь. и якоже узрѣ святителя грядуща к нему, съшедъ с камене, и поиде во срѣтеніе ему, и пріимъ благословеніе и молитву отъ святителя. начатъ же святитель дивитися в себѣ о чудеси. и обхождаше мѣсто села того сюду и сюду. и рече ко преподобному святитель Никита, изволилъ Богъ и пречистая Богородица, и избра мѣсто сіе. хощетъ, да воздвигнется твоимъ преподобствомъ храмъ пречистыя Богородицы честнаго и славнаго ея Рожества. и будетъ обитель велія, во спасеніе мнихомъ. понеже на предпразднство того праздника на се поставилъ тя Богъ на мѣстѣ семъ. преподобныи же рече. воля Господня да буди. святитель же хотя поставити ему хижицу близъ камени. преподобныи же сего никакоже восхотѣ, но всяку скорбь терьпяше Бога ради. святитель же Никита хотя истѣе увѣдѣти о чудеси, бояся искушеніа. начатъ разводя на единѣ селянъ тѣхъ вопрашати о явленіи преподобнаго. они же единодушно рѣша ему, воистину святче человѣкъ сіи Божіи по водамъ принесенъ бысть на камени. и вся поряду ему извѣстно изрекоша о преподобнемъ. святитель же наипаче возгорѣся духовною любовію ко преподобному. и дастъ благословеніе преподобному и отъеха ко святѣй премудрости Божіей Софѣи во дворъ свои.

Святитель же Никита посылаетъ по посадниковъ. по Ивана и по Прокопіа по Ивановыхъ дѣтеи посадничих, и рече имъ. чада моя послушаите мене. есть во отечествѣ нашемъ сельцо близъ града рекомое Волховско. Богъ изволи и пречистая Богородица на мѣстѣ томъ воздвигнутися храму пречистыя Богородицы честнаго и славнаго ея Рожества, и устроитися обители страннымъ симъ преподобнымъ Антоніемъ. и возшлется молитва къ Богу о спасеніи душъ вашихъ, и воспамяновеніе будетъ родителемъ вашимъ. посадницы же с любовію послушаша святителя. и отмѣриша подъ церковь и подъ монастырь земли на вся страны по пятидесяти саженъ. и повелѣ епископъ Никита возградити церковь древяну малу, и освяти ея. и едину келейцу постави на прибѣжище мнихомъ.

По лѣтѣ же единомъ пришествія преподобнаго. близ камени преподобнаго рыболовцы ловитву дѣюще. и объ всю нощь тружавшеся и не яша ничтоже. и отъ труда изнемогоша. и извлекоша мрежа своя на брегъ и в велицѣи скорби быша. преподобныи же скончавъ молитву, иде къ ловцомъ и глагола имъ. чадца моя. токмо имамъ гривенный слитокъ сребра. понеже въ то время у новгородскихъ людеи не бысть денегъ. но ліаша слитки сребряныя. ово в гривну, ово в полтину, ово в рубль. и тѣми куплю дѣяху. и сію гривну слитокъ вдаю вамъ. послушаите мене [7]. вверзите мрежа своя въ великую сію рѣку Волховъ. и аще что имете, то вдамъ пречистыя Богородица. они же не восхотѣша сего сотворити и отвѣщавше рѣша. объ всю нощь тружавшеся и ничтоже яхомъ, толико изнемогохомъ. преподобныи же съ прилежаніемъ моляше ихъ, дабы послушали его. они же по повелѣнію преподобнаго ввергоша мрежа своя въ рѣку Волховъ. и извлекоша на брегъ множество много великыхъ рыбъ молитвами святаго. едва не проторжеся мрежа. яко николиже тако яша. еще же извлекоша сосудъ древянъ делву, сирѣчь бочку, оковану всюду обручми желѣзными. преподобныи же благословяше ловцовъ глаголя. чадца моя, вѣдите милость Божію, како Богъ промышляетъ рабы своими. азъ же васъ благословляю и вдаю вамъ рыбу, себѣжь сосудъ делву сирѣчь бочку. понеже ми Богъ вручи на созданіе монастыря. ненавидяи же добра діяволъ хотя пакость сотворити преподобному. порази и ожести сердца лукавствомъ ловцовъ тѣхъ. и начаше рыбу давати преподобному, бочку же хотяще взяти себѣ. и рекоша къ преподобному. се мы наяхомся у тебе рыбы ловити, а бочка наша есть. еще же и жестокими словесы досаждающе укоряху преподобнаго. преподобныи же отвѣщавъ рече. господіе моя. азъ с вами не имамъ никоеяже пря о семъ. но идемъ во градъ, и повѣдаемъ градскимъ судіамъ. судія бо есть учиненъ отъ Бога, еже разсуждати люди Божія. ловцемъ же угоденъ бысть совѣтъ преподобнаго. и вложиша бочку в лодицу свою, и вземше преподобнаго. и вшедшимъ имъ во градъ. и пришедшимъ предъ судіа, и начаша стязатися съ преподобнымъ. преподобныи же рече. сіи ловцы объ всю нощь тружавшеся и ничтоже яша, и отъ труда изнемогоша. азъ же много молихъ ихъ, да быша взяли наемъ у мене, еже имѣяхъ у себе гривну слитокъ серебрянъ. они же не хотѣша послушати мене. и едва повинувшеся нашеи худости. вземше наемъ, и ввергоша мрежа своя, и извлекоша множество рыбъ. еще же и бочку сію. азъ же имъ уступавъ вся рыбы глаголя. бочку сію вручи ми Богъ на созданіе монастыря пречистыя владычица нашея Богородица и приснодѣвы Марія. они же мнѣ даяше рыбы. а бочку емлюще себѣ. судіа же вопросиша ловцовъ. рцыте намъ. таколи якоже рече старецъ сеи. они же рекоша. мы бо наяхомся рыбы ловити. рыбу и даемъ ему. а бочка наша есть. понеже мы ввергохомъ ю в воду сію. на соблюденіе себѣ. старецъ же рече. господіе мои. вопрашаите ловцовъ сихъ. что они имутъ вложеное в бочку сію, ловцы же недоумѣющеся, что отвѣщати ктому. преподобныи же рече. сіа бочка нашея худости. вдана морстѣи водѣ в Римѣ сущемъ отъ нашихъ грѣшныхъ рукъ. вложеное же в бочку сосуди церковніи, златіи и сребреніи и хрустальніи. потири и блюда. и иная многа отъ священных вещеи церковныхъ. и злато и сребро отъ имѣніи родителеи моихъ. вверженое же в море сокровище сіе тоя ради вины еже бы не осквернилися священнѣишіи сосуди отъ богомерзкихъ еретикъ. и отъ опрѣсночныхъ ихъ бѣсовскихъ жертвъ. подписи же на сосудехъ римскимъ языкомъ написаны. судія же повелѣша разбити бочку. и обрѣтоша вся по словеси преподобнаго. и даша преподобному бочку и отпустиша его с миромъ. и ктому никтоже смѣяше вопросити его. ловцы же отыдоша посрамлени. преподобныи же Антоніе иде ко святителю Никитѣ. радуяся и благодаря Бога о обрѣтеніи бочки. и повѣда вся святителю. святитель же о семъ многу хвалу воздавъ Богу. и разсудивъ благаразсуднымъ своимъ разсужденіемъ и рече. преподобне Антоніе. на се бо тя Богъ предпостави по водамъ на камени из Рима. въ великомъ Новѣградѣ. еще же и бочку вверженую в Римѣ вручи тебѣ. да воздвигнеши церковь камену пречистѣи Богородицы. и устроиши обитель. преподобныи же Антоніи полагаетъ сокровище свое во святительстѣй ризницы на соблюденіе. а самъ вземъ благословеніе у святителя. и начатъ строити обитель. и купи землю около монастыря у посадниковъ градскихъ, и съ живущими иже на тои земли людми прилучившимися. и въ прочая лѣта. доколе Божіимъ строеніемъ миръ вселенныя стоитъ. и при великой рѣцѣ Волховѣ рыбную ловитву купи на потребу монастырю. и межинами отмежавъ, и писму вдавъ, и въ духовную свою грамату написавъ [8]. и начатъ тружатися безпрестани, чрезъ весь день. и труды къ трудамъ прилагая. нощи же без сна пребывая. на камени стоя и моляся. и видя его богоподобное ангельское житіе. князь великіи Мстиславъ. и святятель Никита. и вси старѣишины града того и людіе начаша блажити и велію вѣру имѣти. таины же о пришествіи его не вѣдяше никтоже. развѣ епископъ Никита. и начаша прибиратися братіа ко преподобному. онъ же съ любовію пріимаше. Мнѣ же недостоиному священноиноку Андрею Богъ сподобилъ воспріяти ангельскіи образъ во обители сеи, - и быхъ в послушаніи и во ученіи преподобнаго.

Потомъ начатъ святитель Никита совѣтъ совѣщевати съ преподобнымъ о церкви каменой. дабы заложити церковь каменну. глаголя. на се бо Богъ сокровище вручи тебѣ. и начатъ преподобныя разчитати обрѣтеное въ бочкѣ сребро и злато на строеніе храму. и рече преподобныи. надѣюся на Бога и на пречистую Богородицу и на святыя молитвы. токмо ты благословеніе намъ даруи. святитель же Никита. размѣривъ мѣсто церковное и сотворивъ молитву. и начатъ подшву церковную своима честныма рукама копати [9], и соверши Богъ. и подписа чудно. и всякимъ украшеніемъ украси ея, образы и сосуды церковными златыми и сребряными. и ризами, и книгами божественными. въ славу Христа Бога нашего и пречистѣи его Матери. якоже подобаше церкви Божіей. и потомъ обложиша трапезницу каменну. присовокупивъ еи и церковь во имя Срѣтеніа Господа Бога и Спаса нашего Ісуса Христа. и кѣліи возгради. и ограду устроивъ [10], якоже годѣ. имѣніа же преподобныи ни отъ когоже не воспріятъ, ни отъ князей ни отъ епископа, ни отъ вельможъ градскихъ. но токмо благословеніе отъ чудотворца Никиты епископа. но все строяше из бочки сея, еже из Рима Богъ постави водами въ великомъ Новѣградѣ. и поты и труды своими. и аще кто что принесетъ Бога ради потребная отъ имѣніа своего, или пищу. преподобныи же тѣмъ братью питая. еще же и сиротъ и вдовицъ убогихъ, и нищихъ питая. и потомъ преподобныи з братіею. и с сиротами своими начатъ прилагати ко трудомъ труды. не по мнозѣ же времени святитель Христовъ Никита епископъ начатъ изнемогати. и призва преподобнаго. и повѣда ему отшествіе свое отъ жизи сея. и много наказавъ его отыде къ Богу. преподобныи же в велицѣи скорби и в слезахъ бысть о преставленіи святителя Никиты. понеже великъ духовный совѣтъ имѣяху между собою.

Божіею помощію и пречистыя Богородица и молитвами преподобнаго начатъ обитель распространятися. и братіа собиратися. и начатъ преподобныи з братіею совѣтъ совѣщавати, дабы избрати игумена себѣ во обитель. многу же избранію бывшу, и не обрѣтоша такова человѣка. и начаша братія молити преподобнаго Антоніа, глаголюще ему. отче преподобныи Антоніе. молимъ тя мы убозіи, послушаи насъ пищихъ. да пріимеши чинъ священническіи. еще же и совершенныи намъ отецъ буди игуменъ. да приносиши жертву Богу чисту и безкровну о нашемъ согрѣшеніи. да пріята будетъ жертва твоя к Богу въ пренебесныи жертвенникъ. видѣхомъ бо толикы твоя труды и подвиги въ мѣстѣ семъ. яко никакоже мощи по плоти человѣку толикихъ трудовъ понести, аще не Господь поможетъ, и рече преподобныи, добрѣ совѣтъ вашъ братіе. но азъ недостоинъ есмь таковаго великаго сана. но изберемъ себѣ отъ братіи мужа добродѣтельна и достоина на толикое дѣло. братія же со слезами вопіяху. отче святыи. не преслушаися насъ нищихъ. но спаси ны. преподобныи же рече. буди воля Господня. аще что восхощетъ Богъ. то и сотворитъ. шедше же братія ко архіепископу Нифонту со преподобнымъ Антоніемъ. бѣ бо въ то время ему святительскіи престолъ дръжащу. и возвѣщаютъ ему о вещи. святитель же Нифонтъ вельми радъ бысть благому совѣту ихъ. бѣ бо любляше преподобнаго за премногую его добродѣтель. и поставляетъ преподобнаго въ діаконы. потомъ въ священникы, таже и игуменомъ, и поживе преподобныи во игуменствѣ лѣтъ 16, в добрѣ исправленіи упасе стадо Христово.

И увѣдѣ преподобныи о своемъ отшествіи к Богу. призвавъ мене священноинока Андрея. и нарече себе мене отца духовнаго. и добрѣ исповѣдавъ со слезами. и повѣда моему окаянству преподобныи свое пришествіе изъ Рима. и о камени, и сосудѣ древяномъ, о делви. сирѣчь бочки. еже исперва писана. и повелѣ ми вся сія написати по преставленіи своемъ и церкви Божіей предати, чтущимъ и послушающимъ на пользу души и на исправленіе добрыхъ дѣлъ. въ славу и честь святѣй и живоначальнѣй Троицы Отцу и Сыну и Святому Духу и пречистѣи Богородицы. мнѣ же о семъ въ велицѣ удивленіи бывшу. и посемъ призва братію и рече имъ. братія моя и спостницы. молю убо васъ, се нынѣ отхожду отъ жизни сея ко Господу Богу моему Ісусу Христу, да молите за мя и пречистую Богородицу въ преставленіи моемъ. да измутъ ангели милостивіи душу мою. и да избѣгну сѣтей вражіихъ отъ воздушныхъ мытарствъ вашими святыми молитвами, понеже грѣшенъ есмь. вы же изберите себѣ на игуменство отъ братіина мое мѣсто отца и учителя. и пребудите у него въ постѣ в молитвахъ и в трудѣхъ, во бдѣніи и в слезахъ. еще же молю вы. о немъже изыдосте о томъ и подвизаитеся и о своемъ спасеніи не нерадите, и миръ и любовь между собою имѣите. и милостыни прилежите. и страннолюбіа не забываите. и аще тако пребудете обитель сія пречистыя Богородица никогдаже не оскудѣетъ. еще же молю вы, пребудите въ послушаніи ко игумену и ко отцемъ своимъ духовнымъ. ко старѣйшимъ братіи. писано бо есть. блажени нищіи духомъ яко тѣхъ есть царство небесное. блажени плачущеися, яко тіи утѣшатся. блажени кротцiи. яко тіи наслѣдятъ землю. блажени алчущіи и жаждущіи правды яко тіи насытятся. блажени милостивіи. яко тіи помиловани будутъ, блажени чистіи сердцемъ яко тіи Бога узрятъ. блажени миротворцы яко тіи сынове Божіи нарекутся. блажени изгнани правды ради яко тѣхъ есть царство небесное, блажени есте, егда поносятъ вамъ и ижденутъ вы и рекутъ всякъ золъ глаголъ на васъ лжуще имени моего ради: радуйтеся и веселитеся, яко мзда ваша многа будетъ на небеси. и ина многа наказавъ преподобныи братіи и поучивъ яже ко спасенію. братія же видѣвше преподобнаго в послѣднемъ издыханіи. быша в велицѣ умиленіи и в сѣтованіи, и в слезахъ многихъ. и рекоша. о добрый нашъ пастырю и учителю. се нынѣ уже зримъ тя в послѣднемъ издыханіи на кончинѣ вѣка. и нынѣ къ кому прибѣгнемъ и отъ кого насладимся медоточныхъ словесъ ученія. и кто попечется о нашихъ грѣшныхъ душахъ. но молимъ тя угодниче Спасовъ. аще обрящеши предъ Богомъ благодать и милость и по отшествіи своемъ отъ жизни сея моли о насъ неослабнѣ Бога и пречистую Богородицу, ты бо отецъ нашъ. при тлѣннемъ семъ житіи имѣлъ еси попеченіе о нашемъ смиреніи, молимъ тя, не остави насъ сирыхъ и по твоемъ отшествіи къ Богу. а иже извѣсти отшествіе твое къ себѣ на вѣчныи покои Владыка Хростосъ Богъ нашъ, тои можетъ тобою подати намъ пастыря и учителя егоже хощетъ и правителя нашему спасенію. и твоего преподобьствія благословеніе и молитвы. и сія рекше, умолчаша, плачуще рыданіемъ многимъ. блаженныи же глагола имъ. чадца моя. се уже предаю васъ въ руцѣ Господни и пречистыя Богородицы. а о игуменѣ возложите на Господа Бога и пречистую Богородицу и на наше смиреніе. то уже наставникомъ вамъ вмѣсто мене да будетъ отецъ мои духовныи священноинокъ Андреи. и тако предаетъ ему монастырь и братію ему, вручивъ глаголя. се убо брате Андрее, оставляю тя съ Богомъ строителя и кормника обители сеи святѣи. и всю братью о Бозѣ собранную. но блюди брате прочее, да ничтоже оставится отъ монастырскихъ законъ, отъ святыхъ апостолъ и пророкъ, и святыхъ вселенскихъ соборъ. иже имать церкви Божіа. и на пѣніи соборнемъ. и на трапезѣ ястіа и питіа, и весь чинъ монастыря сего. и обычаи уставленныи нашимъ смиреніемъ. и Господь Богъ исправитъ стопы ваша къ дѣланію заповѣдеи его молитвами пречистыя Госпожи владычицы нашея Богородицы и всѣхъ святыхъ. и Господь нашъ Ісусъ Христосъ да сохранитъ вы въ любви своеи и утвердитъ вы. азъ же аще тѣлеснѣ отхожду отъ васъ но духомъ съ вами неотступно пребуду. и о семъ разумно да будетъ вамъ, аще обрѣлъ буду благодать предъ Богомъ. то обитель сіа по моемъ отшествіи умножится наипаче. и соберутся братіи множество въ духовной любви. и умножится святая сія обитель всѣмъ обильствомъ духовнымъ. и въ тѣлесныхъ потребахъ не будете скорбни. и тако учивъ ихъ довольно. и духовнымъ лобзаніемъ цѣловавъ ихъ. и когождо по единому. и одаривъ ихъ молитвами и благословеніемъ печатлѣ. и впредъ полагаетъ братіи заповѣдь. аще лучится избрати игумена то избирати отъ братіи. иже кто на мѣстѣ семъ трьпитъ. и аще князь нашлетъ игумена. или епископъ по насилію или по мздѣ. или который братъ нашъ отъ мѣста сего. а начнетъ хотѣти игуменства кромѣ братскаго соборнаго изволенія, егоже не произволятъ братія на игуменство. тоиже мздою или насиліемъ отъ князя или отъ епископа поставленъ будетъ, тѣхъ преподобныи проклятію предаетъ. таже и о земли утверждая и глаголетъ: о братія моя. егда сѣдохъ на мѣстѣ семъ купилъ есмь село сіе и землю. и на рѣцѣ сеи рыбную ловитву. на строеніе монастырю, цѣною изъ пречистыя сосуди, сирѣчь изъ бочки. и аще кто начнетъ обидѣти васъ, или наступати на сію землю. ино имъ судитъ Мати Божія. и давъ братіи послѣднее прощеніе и о Христѣ цѣлованіе. и ставъ на молитвѣ и воздвигъ руцѣ горѣ. и знамена вся животворящимъ крестомъ перекрести лице свое рекъ. миръ всѣмъ. и помолився на многъ часъ. аще убо и радостно тому бяше, еже разрѣшитися отъ плоти, и съ Христомъ быти. но показуя яко всѣмъ страшна чаша смертная. и многія же по воздухомъ истязателя имамы. паче же смиреніемъ ведыися, помолися къ Богу сице глаголя. Владыко человѣколюбче Господи, явися Господи и помози ми. и избави мя отъ рукы князя и властеи и миродержителеи тмы. да не покрыетъ мене темныи тѣхъ воздухъ. ниже дымъ ихъ помрачитъ душу мою. укрѣпи мя Господи мои, Господи, да преиду огненыя волны, и глубины бездонныя. яко да не потопленъ буду въ нихъ. да не обрящетъ врагъ оклеветати мя. но да преиду миродержителя и лукаваго вождя ихъ. и отъ темныхъ князи тартаръ избавленъ буду. и тако да явлюся предъ тобою чистъ и непороченъ. и сподоби мя одесную тебя стати. и воспріяти тобою обѣщанная благая святымъ твоимъ, егда пріидеши въ славѣ судити живымъ и мертвымъ и воздати комуждо по дѣломъ его! Оле великаго и богоподражаннаго смиренномудрія, богоноснаго отца и апостоломъ подобна. како можаху тому прикоснутися темніи князи. егоже Господь по водамъ на камени, аки безплотна во плоти управляше. и не ктому нарече раба. но искреняго друга. и обѣща идѣже будетъ самъ и тому вселитися. еже зрѣти славу его. сія вся вѣдый. смиреная паче изволи. иже не повреждаютъ. но паче укрѣпляютъ таковая. сего ради таковыя молитвы источи глаголы. и сіа рекъ. и повелѣ священноиноку Андрею отцу своему духовному себе покадити и отходная пѣти. и возлегъ на одрѣ своемъ и отыде къ Богу въ вѣчныи покои. и погребенъ бысть честно архіепископомъ Нифонтомъ съ священнымъ соборомъ и со множествомъ народа града того. со свѣщами и съ кадилы. со псалмы и пѣнiи и пѣсными духовными. в лѣто 6655 [1146]. мѣсяца августа въ 3 день. на память преподобныхъ и богоносныхъ отецъ нашихъ Исакіа далматіа и Фавста, и положено бысть честное тѣло его въ церкви пречистыя Богородицы. юже, самъ созда. поживе же съ пришествіа своего до игуменства лѣт 14, въ игуменствѣ же бысть лѣт 16. и всѣх лѣт поживе во обители 30. и по благословенію преподобнаго архіепископъ Нифонтъ поставляетъ во игумены ученика преподобнаго священноинока Андрея. сеи же Андреи повѣда архіепископу Нифонту и княземъ града того и всѣмъ людемъ. еже слыша отъ преподобнаго о чудссѣхъ сихъ. архіепископъ же и вси людіе вельми почудившеся и воздаша хвалу Богу и пречистѣй Богородицы. и великому чудотворцу Антонію. и оттолѣ начатъ зватися Антонiи римлянинъ. и повелѣ архіепископъ Нифонтъ сіе жітіе преподобнаго изложити и написати и церкви Божіи предати. на утверженіе вѣрѣ христіанстѣй и на спасеніе душамъ нашимъ. а римляномъ еже отступиша отъ православныя греческія вѣры, и преложишася въ латынскую вѣру, на посрамленіе и на укоризну, и проклятіе, въ славу же и въ честъ животворящей Троицы. Отцу и Сыну и Святому Духу. нынѣ и присно и во вѣки вѣкомъ, аминь [11].

Примѣчанiя:

[1]
Въ сборн. Соловец. библ. ХVІ в. №№ 834 и 912. Царскаго № 132, 133, 135, 450. Опис. Рум, муз. стр. 207.
[2] Полное Собранiе Лѣтописей. т. III, стр. 4-5.
[3] Соф. врем. ч. II, стр. 387.
[4] По языку и способу писанія предлагаемый списокъ принадлежитъ къ такъ называемой синкретической или смѣшанной рецензіи. Потому въ немъ древніе палеографическіе признаки перемѣшаны съ новыми знаками, входившими въ письменность въ XVI в.
[5] и во время заутрення пѣніа.
[6] Т. е. кýплю, торговлю.
[7] нашея худости.
[8] Духовн. граматы преп. Антонія см. у Карамзина въ Истор. Гос. Рос. т. II, стр. 210, въ Истор. росс. іер. ч. III, стр. 123-125.
[9] и заложиша церковь камену.
[10] и всемъ обиліемъ добрѣ устроивъ.
[11] Окончаніе, вѣроятно, прибавлено уже редакторомъ XVI вѣка (Нифонтомъ?).

Источникъ: Памятники Древле-Русской духовной письменности: Житіе преподобнаго Антонія Римлянина. // Журналъ «Православный собесѣдникъ», Казань. - 1858 г. - Книга II. - с. 157-171, 310-324.

/ Къ оглавленію раздѣла /


Наверхъ / Къ титульной страницѣ

0