Наследие Святой Руси. Памятники древне-русской письменности
 
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Наслѣдiе Святой Руси
-
Гостевая книга
-
Новости
-
Написать письмо
-
Поискъ

Раздѣлы сайта

Святые Кириллъ и Меѳодiй
-
Книги старой печати
-
Патерики и житiя святыхъ
-
Великiя Минеи Четiи
-
Церковно-учит. литература
-
Творенiя русскихъ святыхъ
-
Стоянiе за истину
-
Исторiя Русской Церкви
-
Церковный расколъ XVII в.
-
Исторiя Россiи

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 17 августа 2017 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ПАТЕРИКИ И ЖИТIЯ СВЯТЫХЪ

Мѣсяца Июня въ 1 день.
Память преподобнаго отца нашего Дiонисiя игумена Глушицкаго, новаго чюдотворца.

Cей преподобныи отецъ нашъ Дiонисiи бѣ отъ града Вологды поприщъ четыредесять, близъ езера глаголемаго великаго Кубенскаго, отъ восточную страну солнечнаго восхода. Посѣмъ обхожаше реченнаго езера великаго ища покой обрести, идѣже Богу работати, и прiиде въ весь глаголемую Лучицу, имѣя съ собою брата именемъ Пахомiя. И постависта себѣ прѣже на томъ мѣстѣ кѣлiю, таже и церковь создаша во имя святаго Николы, и освятиша ю по благословѣнiю Григорiя, епископа Ростовскаго, и начаша братiя сожительствовати с нимъ пользы ради. Святыи же монастырь устроивъ на мѣстѣ томъ, и обще житiе состави. Посемъ священства санъ прiятъ си, и чистѣ жѣртву принося Господеви. Таже въ той обители, идѣже живяше святыи, постави настоятеля ученика своего предиреченнаго Пахомiя, самъ же миръ давъ братiи, и отъ того отъиде въ далѣ пять надѣсять поприщъ, на рѣку Глушицу, и ту обнощева. И тонцѣ уснувъ, и слышавъ манiемъ ıaко гласъ звонящъ въ той пустыни, и абiе воставъ радостенъ въ борзѣ. И молитву сотворивъ, и на томъ мѣстѣ крестъ постави, иже ношаше съ собою, посемъ же постави себѣ кѣлiицу малу при нѣкоемъ дрѣвѣ. Дрѣво же то вънутрь монастыря есть и до сего дне, ıaгодичiе имать черно, зовомо черемха. (И нѣкiи человѣкъ имѣ зубомъ болѣзнь, и съ вѣрою сьяде ıaгоду отъ того древа, и абiе получи здравiе.) И потомъ преподобныи отецъ нашъ Дiонисiи, въда себѣ воздержанiю зѣльному и всенощному бдѣнiю, посту же и молитвѣ. По мале же времени начаша братiя къ нему приходити на то мѣсто, единъ по единому, и число ученикъ множашеся. И посемъ пораз'судивъ святыи, и постави на томъ мѣстѣ церковь во имя Пресвятыя Богородицы, честнаго Ея Покрова, и монастырь состави. И по лѣтѣхъ нѣкихъ нача множитися братiи, ıaко в'мѣщенiе бѣ въ церкви мало, братiя же молиша святаго да ину церковь воз'двигнетъ больши сея. Святыи же постави церковь велiю больши первыя, и украси ю чюдно иконами и книгами, и безъ лѣности учаше братiю еже о пользѣ душевнѣй. Посемъ же идущу святому въ церковь на молитву, и нападоша на святаго множество бѣсовъ, зубы с'крегчюще и биша ѝ. И в'зняша мостъ, положиша святаго тамо, и глаголаша ему: изыди отъ мѣста того, ıaко да не злѣ умреши. Святыи же молитвою побѣди ихъ не крѣпкую силу, и абiе исчезоша. Братiя же пришед'ше въ кѣлiю святаго, и видѣша святаго утѣсняема, и в'зняша мостъ. Онъ же глаголаше: братiе, видите врагъ нашихъ боренiя, и не устрашимъся ихъ. И посемъ изыде святыи изъ обители въ тай братiи, и прiиде въ пустыню на полуденную страну, отъ большiя лавры, поприща четыре на край брега, на той же рѣцѣ Глушицѣ, зовомо Сосновецъ мѣсто то. И ту церковь постави во имя Iоанна Крестителя, и кѣлiи устроивъ преподобныи отецъ, и нѣкоихъ отъ братiи устроивъ тамо жити. И рече братiи: ıaко въ сей пустыни положено будетъ тѣло мое. Заповѣда имъ всякое требованiе приимати отъ большiя лавры. Посемъ убо блаженныи отецъ нашъ Дiонисiи ископа себѣ гробъ за седмь лѣтъ преже своего преставленiя въ той же во отходней пустыни, поминая на всякъ день, ıaко вселити ся тамо. И больма нача подвизатися къ Богу постомъ и молитвами и бдѣнiемъ. Многащи же всю нощь стояше на мразѣ, удручая тѣло свое, и многа чюдеса сотворивъ о Христѣ. И на исходъ души своея причастися Пречистаго Тела и Крове, и преставися въ вѣчный покой. Бѣ же видѣнiемъ святыи малъ тѣломъ, и сухъ излишъ плотiю. Главу имѣ немалу, брови окружении, лице долго, влущенѣ скранiи. Тихи имѣя очи, браду имѣя до персей густу, власы свѣтлы русы в полъ сѣдины.

Печатается по изданію: Прóлогъ [Мѣсяцъ Мартъ–Августъ]. Москва: Печатный дворъ, 7152 (06.12.1643). л. 464 - 466.

Наверхъ / Къ титульной страницѣ

0