Наследие Святой Руси. Памятники древне-русской письменности
 
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Наслѣдiе Святой Руси
-
Гостевая книга
-
Новости
-
Написать письмо
-
Поискъ

Раздѣлы сайта

Святые Кириллъ и Меѳодiй
-
Книги старой печати
-
Патерики и житiя святыхъ
-
Великiя Минеи Четiи
-
Церковно-учит. литература
-
Творенiя русскихъ святыхъ
-
Стоянiе за истину
-
Исторiя Русской Церкви
-
Церковный расколъ XVII в.
-
Исторiя Россiи

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 25 марта 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

Патерики и житiя святыхъ —» Источники

Мѣсяца Маiя въ 25 день.
Повѣсть житiя и преставленiя святыя и блаженныя Евфросиніи, Игуменьи монастыря Святаго Спаса и Пречистыя Его Матере, иже во Полотьсцѣ градѣ.
Благослови отче.

Благословенъ Господь и Богъ Израилевъ, Богъ Авраамовъ, Богъ Исааковъ и Богъ Іаковль, нѣсть Богъ мертвыхъ, но живыхъ, праведніи бо и по смерти живи суть, якоже Соломонъ въ притчахъ глаголетъ: праведницы въ вѣки живутъ, отъ Господа мзда ихъ и строеніе ихъ отъ Вышняго; сего ради пріимутъ вѣнцы изъ руки Господня, яко и бысть. Яже напредъ пошедша скажемъ, о сихъ же сице есть: снидетеся, сущіи въ пустынехъ и въ горахъ житія ангельская имуще, старіи немощь отложше, юніи же яко елени скачуще, всѣ снидитеся, хощу бо вы представити трапезу отъ брашенъ сихъ, да ядше возвеселитеся душами вашими; се бо есть трапеза нетлѣющихъ брашенъ, не иже гортань услаждаетъ и чрево насыщаетъ, но душа веселяща и умъ укрѣпляющи на подвигъ добрыхъ дѣлъ. Сея бо яди, братіе, аще кто насытится, не вжаждетъ паки, якоже речено есть въ писаніи: не заморитъ Господь гладомъ души праведныхъ. Паки же на предлежащее наидемъ, о немъже начахомъ повѣстъ сію. Вы же, блазіи послушницы, князи и боляре и церковницы и честніи собори святыхъ, сущіи въ монастырѣхъ и простои люди, снидитеся на новое сіе слышаніе и послушайте прилежно, отверзше ушеса своя, умягчивши нивы сердецъ вашихъ, пріимите сѣмена многоспасеннаго житья послушаніемъ жены сея преподобныя святыя, подвиги ея и трудъ и любовь яже къ Богу, иже предоидуще, скажемъ, како родися и како вспитася и како возрасте, въ кою ли мѣру потече въ слѣдъ, Жениха своего Христа. о сихъ сице есть:

Бысть князь во градѣ Полотсцѣ именемъ Всеславъ, той имѣя сынови многи. И бѣ же у него меньшій сынъ именемъ Георгій, отъ негоже родися сія блаженная отроковица. Родителя же ея возрадовастася о рождествѣ ея со всѣми домашними своими, и по днехъ нѣколицѣхъ повелѣста крестити ю; и крестиста ю во имя Отца и Сына и Святого Духа. И питома бяше доилицею ея, дне отъ дне растяше отроковица: тѣло млекомъ растяше, а душа Святого Духа наполняшеся; лучи же ся дѣвицы деснаго (sic) естества и молитвы плодъ. И толма бысть любящи ученіе, якоже чудитися отцу ея о толицѣ любви ученія ея. Вѣсти же разшедшейся по всѣмъ градомъ о мудрости ея и о блазѣмъ ученіи ея и о тѣлеснѣй утвари, — бѣ бо лѣпа лицемъ, красота же ея многи славныя князи на любленіе приведе ко отцу ея: кождо ихъ тщашеся, дабы пояти ю въ жену сыну своему, и всѣмъ часто присылающимся къ отцу ея, онъ же отвѣщаваше: воля Господня да будетъ. Единъ же преодолѣваше славнымъ своимъ княженіемъ и богатствомъ, приславъ къ отцу ея, изпроси дщерь его за сына своего. И пришедши ей въ возрастъ 12 лѣтъ, и нача отецъ ея глаголати княгини своей: нама уже лѣпо дати Предславу за князь; тако бо нарекоста ей имя преже крещенія ея. Она же глагола ему: да како Богъ хощетъ и твоя, княже, воля, тако да будетъ. Тогда слышавши Предслава, размышляше въ себѣ, глаголющи, паче же реку, отъ Святого Духа наполняшеся мысль ея, и рече въ себѣ: како се будетъ, яко отецъ мой мыслитъ припрячи мя мужеви? то аще тако будетъ, то печали міра сего ни како желзѣ гоньзнути. Паки въ себѣ рече: что бо успѣша преже насъ бывшіи роди наши? женишася, посягаша и княжиша, но не вѣчноваша; житіе ихъ мимо тече и слава ихъ погибе яко прахъ и хуже паутины; а иже прежнія жены, вземше мужскую крѣпость, поидоша въ слѣдъ Христа Жениха своего, предаша тѣлеса своя на раны и главы своя мечеви; а другія аще зѣлѣзу выя своя не приклониша, но духовнымъ мечемъ отсѣкоша отъ себе плотскія сласти, предавше тѣлеса своя на постъ и на бдѣніе и колѣнное поклоненіе и на земли леганіе, и имена ихъ написана на небесѣхъ и тамо съ ангелы безпрестани славятъ Бога; а си слава есть прахъ и пепелъ, и яко дымъ расходится и яко пара водная погибаетъ. И тако ей размышляющи въ сердцы своемъ, а умъ ея болма на Божію любовь подвизашеся, и единою положися на сердцы ея таково помышленіе, рече бо въ себѣ: не се ли бы лучше всего житія сего было, да быхъ ся постригла въ черницы и была подъ игуменьею, повинующися сестрамъ и учащися, како страхъ Божій утвердити въ сердцѣ своемъ и како теченіе скончати. Сія на умѣ си положивши и утаившися отъ отца своего и матери и всѣхъ домашнихъ, и иде въ монастырь.

Въ та же лѣта бяше княгиня Романовая игуменьею. Пріиде къ той, просящи пріятія ангельскаго образа и причтатися ту сущимъ инокинямъ и быти подъ игомъ Христовымъ. Видѣвши же óна блаженная жена юность ея и возрастъ цвѣтущій онѣй, и смятеся и нача тѣломъ утерьпати и сердцемъ ужасатися, и лицемъ на землю преклоньши, на долгъ часъ ничущи, и восклоньшися и воззрѣвши на юность ея, воздохну и прослезившися, глагола ей: чадо мое, како могу се сотворити? Отецъ твой увѣдѣвъ, со всякимъ гнѣвомъ возложитъ вредъ на главу мою, и еще же юна еси возрастомъ, не можеши понести тяготы мнишескаго житья, и како можеши оставити княженіе и славу міра сего?

Отвѣщавши же блаженная отроковица: госпоже и мати, вся видимая міра сего красна суть и славна, но вскорѣ минуютъ яко сонъ, или цвѣтъ увядаетъ; вѣчная же, невидимая, въ вѣки пребываютъ, якоже писаніе глаголетъ: око не видѣ, ни ухо слыша, ни на сердце человѣку взыде, иже уготова Богъ любящимъ его; или отца моего ради не хощеши мене острищи? Не бойся, госпоже моя; убойся Господа, владѣющаго всею тварію, и не отлучи мене отъ ангельскаго чина.

Блаженная же княгиня, удивившеся разуму отроковицы о любве ея яже къ Богу, повелѣ воли ея быти; и огласивъ ю іерей, и остриже ю и нарече имя ей Евфросинія; и облече ю въ черныя ризы. И благослови ю игуменія благословеніемъ святыхъ отецъ, и рече ей: буди, чадо, послѣдствующи преже тебя бывшимъ женамъ Февроніи и Евпраксіи и инѣхъ множество, иже Христа ради пострадаша, и Господь Богъ дастъ ти побѣду и силу на супротивника нашего діявола. И тако ей рекши, отпусти ю въ келію свою.

Увѣдѣвъ же сія отецъ ея, скоро иде въ монастырь и жалостно терзаше власы главы своея и любезно цѣловаше ю, глаголя: горе мнѣ, чадо мое, почто ми сице сотворила еси и печаль души моей принесе? Почто ми преже сего мысли сея не явила еси? Лютѣ мнѣ, чадо мое сладкое, жалости сердца моего; о горе мнѣ, чадо мое милое! Како гонзнетъ доброта твоя вражье пронырство? Уже достоитъ ми плакатися острупленію душею къ Богу моему, да внидеши въ чертогъ царствія Его.

Жалость же бѣ всѣмъ въ дому его о ней. Преподобная же Евфросинія сего всего небрежаша, жалости отца своего: но яко доблій храборъ вооружившися на супротивника своего діявола, пребываше въ монастыри, повинующися игуменіи и сестрамъ всѣмъ, и всѣхъ преспѣвающи постомъ и молитвами и бдѣніи нощными. И оттолѣ паче подвижнѣйши нача быти, собирающи мысли благія въ сердцы своемъ, яко пчела сотъ.

И пребывши нѣколико время въ монастыри, и потомъ проси у епископа суща тогда, порицаемаго Илью, правящаго столъ святыя Софіи и въ Полотсцѣ, дабы ей велѣлъ ту пребыти въ церкви святѣй Софіи въ голбцѣ каменнѣ. И повелѣ ей, да пребываетъ ту. Вшедши же, начатъ подвижнѣйши подвигъ постническій воспріимати, и начатъ книги писати своими руками и наемъ емлющи, требующимъ даяше. Пребывающи же ей ту нѣколико время, въ едину нощь возлеже опочивати хотящи отъ многаго стоянія въ молитвахъ яже къ Богу; видѣ видѣніе: поемъ ю ангелъ, и веде ю, идѣже бѣ церковьца святаго Спаса метохія святыя Софіи, яже зовется отъ людей Сельце; и ту показа ей ангелъ Господень, глаголя: Евфросиніе, здѣ ти подобаетъ быти. Она же убудшися, дивляшеся въ себѣ, глаюлющи: что хощетъ ми се быти? Тоя же нощи видѣ трищи, и взбудившися отъ сна, со страхомъ вста, славословяще Бога и глаголюще: слава Тебѣ, яко сподоби мя въ нынѣшнюю нощь видѣти святое лице ангельское. И посемъ нача псаломъ глаголати: готово сердце мое, Боже, готово сердце мое, и паки къ Тебѣ привергохся отъ утробы матери моея; Богъ мой еси Ты, яко восхотѣ, тако и сотвори на мнѣ рабѣ Твоей. И кончеваше утреннюю. Тоя же нощи явися епископу Илію тотъ же ангелъ, глаголя: введи ю, рабу Божію Евфросинью, въ церковьцу святого Спаса, на рекомое Сельце, мѣсто бо то свято есть, яко достойна есть царству небесному, яко миро благовонно всходитъ молитва ея къ Богу и яко вѣнецъ на главѣ царевѣ, тако почиваетъ Духъ святый на ней, и яко солнце сіяетъ по всей земли, тако житіе ея просіяетъ предъ ангелы Божіи. Епископъ же вста вскорѣ со страхомъ и трепетомъ, пріиде къ ней. Евфросинія же, видѣвши его, поклонися ему и рече: благослови, владыко святый. Онъ же глагола: Богъ да благословить тя, чадо, и дастъ ти терпѣніе и силу на всѣхъ вразѣхъ видимыхъ и невидимыхъ. Она же поклонившися, рече: аминь, буди мнѣ по глаголу твоему, владыко святый. И сѣдоста. Отверзъ же блаженный епископъ уста своя, начатъ бесѣдовати о спасеніи души. Блаженная же Евфросинія пріимаше словеса его яко сѣмена въ житницу души своея, и плодящи ово 30, ово 60 или 100. Много же побесѣдовавъ съ нею, и се прирече ей, глаголя: дщи, хощу ти речи слово, ты же съ любовію приіми è. Она же рече: рада, отче преподобный, пріиму слово твое яко даръ многоцѣненъ. И глагола ей епископъ: вѣси ли, чадо, се церковь есть соборная, идѣже сѣдиши, ту вси человѣцы собираются, и тебѣ нелѣпо здѣ пребывати; то се есть церковца святаго Спаса въ Сельцѣ, идѣже братья наша лежатъ преже насъ бывшіи епископы; негли Богъ поспѣшитъ молитвами ихъ и трудомъ твоимъ, и возградитъ мѣсто то велико. Евфросинія же, слышавши отъ епископа, яко тако изглагола ей, и возрадовася душею и возвеселися сердцемъ, и явленію ангелову вѣру имши, еже видѣ и слыша отъ него, глагола епископу: Богъ да поспѣшитъ ми, отче, молитвами твоими святыми. Призвавъ же епископъ князя Бориса, сестры ея и отца ея Георгія и преподобную Евфросинію и честныя мужи, и постави я самъ послухы, рекъ: се отдаваю Евфросиніи мѣсто Святого Спаса при васъ, да по моемъ животѣ никтоже не посудитъ моего данія. Се слышавше князя оба и бояре всѣ отъ епископа, поклонистася ему, глалюще тако: ей, владыко святый, се ти есть Богъ положилъ на сердцы твоемъ, еще сице сіе умыслилъ откроковицы сей попеченіе о ней. Евфросиніи же рѣша: ты же иди и послушай епископа, еже ти велитъ, тако створи, то есть отецъ всѣмъ намъ, того подобаетъ слушати. Евросинія же, воззрѣвши на ня осклабленнымъ лицемъ, и рече имъ: рада иду, яко Богъ повелитъ ми, тако и будетъ о мнѣ. Князи же и бояре всѣ, слышавше отъ преподобныя Евфросиніи глаголъ сей, возрадовашася, и пріемше благословеніе отъ епископа и поклонившеся преподобной Евфросиніи и цѣловавъше ю любезнымъ цѣлованіемъ, ѣхаша въ домы своя. Евфросинія же поклонившися въ святѣй Софіи и благословившися отъ епископа, и тоя нощи поимши съ собою едину черноризицу, пріиде на мѣсто, зовомое Сельце, идѣже есть церковьца Святаго Спаса, и вшедши въ церковь и поклонившися, возгласи сице: ты, Господи, заповѣда святымъ своимъ апостоломъ, рекъ: не носите съ собою ничесоже, токмо жезлъ; се азъ Твоему словеси послѣдствующи, изыдохъ на мѣсто се, ничтоже носящи, но точію Твое слово въ себѣ имущи, еже рещи: Господи помилуй, еще же за все имѣніе имѣю книги сія, имиже утѣшаетъ ми ся душа и сердце веселитъ; лише же сихъ трехъ хлѣбъ не имамъ ничтоже, но токмо Тебе помощника и кормителя. Ты бо еси отецъ убогимъ, нагимъ одѣніе, обидимымъ помощьникъ; ненадѣющимся надѣяніе, и буди имя Твое благословено на рабѣ твоей Евфросиніи отселѣ и до вѣка, аминь. Сице рекши и изшедши изъ церкви, нача подвижнѣйши быти на молитву, яже къ Богу.

И ту ей пребывающе(й) нѣколико время, и тако посла ко отцу своему, глаголющи: пусти ко мнѣ сестру мою Городиславу; такое ей бѣста имя нарекла родителя, — да научится, рече, грамотѣ. Онъ же пусти ю къ ней; она же съ прилежаніемъ учаше ея спасенію души; сія же со прилежаніемъ пріимаше, яко нива плодовита, умягчивши сердце свое, и глаголаше: Господь Богъ да устроитъ ми на спасеніе души моей твоими святыми, госпоже, молитвами. Сіе рекше ей, преподобная же Евфросинія введши ю въ церковь, и повелѣ іерееви огласивши, облещи въ чернеческія ризы, и нарече имя ей Евдокія. И по малѣхъ днехъ присла отецъ къ ней, глаголя: пусти уже сестру свою ко мнѣ. Она же отвѣща: еще не извыче всей грамотѣ. Увѣдѣвъ же отецъ ея, яко утаивши его постриже ю, и взъярися на преподобную Евфросинію, сердцемъ горя, пріѣхавъ къ монастыреви, глагола: чадо мое, что сотвори? приложи ми сѣтованіе къ сѣтованію и души моей печаль къ печали. И сія ему глаголющу, отъ горести сердца своего рѣками слезъ часто изливаше отъ очію своею, любезно держа Евдокею и глаголя: чада моя, на се ли васъ родихъ? или на се васъ мати воспита? ужели ваю бракъ уготовахъ? ужели чертогъ и брачныя ризы ваю на сѣтованіе положихъ себѣ? чада моя милая, что ми воздаста, въ радости мѣсто горькія печали сердце мое наполниста. Вси же бояре его, слышавши жалость князя своего, горько плакахуся о напраснѣй печали князя своего. Блаженная же Евфросинія отвѣщаваше ко отцу своему: что ради печалуешися на мя? имѣяве печальника и помощника единого Бога. Отецъ же ея малу утѣху пріимъ отъ словеси преподобныя Евфросиніи, ѣха въ домъ свой. И Евдокея же пребываше въ монастыри, повивующися сестрѣ своей.

Блаженная же Евфросинія трудомъ многимъ моляшеся къ Богу о мѣстѣ томъ, моляше, дабы è устроилъ Богъ. Бяше же во градѣ княжна Борисовна, именемъ Звенислава; та во единъ отъ дній пріиде въ монастырь и изнесе всю свою утварь златую и ризы многоцѣнны ко Евфросиніи, и рече ей: госпоже и сестро, вся красная міра сего ни во чтоже ми ся мнитъ; сія вся даю святому Спасу, а сама хощу поклонити главу свою подъ иго Христово. Она же пріятъ ю съ радостію, и повелѣ іерееви пострищи ю и нарече имя ей Евпраксія. И тако начаста пребывати въ монастыри въ едину мысль въ молитвахъ яже къ Богу; и тако бяше видѣти, яко едина душа въ дву тѣлесу. И по семъ блаженная Евфросинія заложи церковь каменну святаго Спаса, и отъ начатка доспѣ за 30 недѣль.

И се хощу вамъ, братіе, чудо сказати: Бѣ мужъ именемъ Иванъ, приставникъ надъ дѣлатели церковными; къ нему же прихождаше многажды гласъ, свитающу дни, глагола: о Иване, востани и поиди на дѣло Вседержителя Спаса. И во единъ отъ дній воставъ, пріиде ко блаженной Евфросиніи и рече ей: ты ли, госпоже, присылаешь понужати мене на дѣло? Она же рече: ни. И паки разсмотрѣвши премудрая жена, рече ему: аще и не азъ тя возбуждаю, а кто тя не позываетъ на таковое дѣло, того послушай прилежно съ потщаніемъ. И паки другое чудо скажу вамъ, добріи послушницы. Уже скончаннѣй бывши церкви, и мало не доставши плитамъ, нечѣмъ бяше церковь скончати, и поискавше, не обрѣтоша ничтоже; и печаловашеся о томъ Евфросинія, и воздохнувши, рече: слава Тебѣ, Владыко Вседержителю и Человѣколюбче, даровавый си намъ большая, подай намъ и меньшая, имъже совершится церковь Твоя. И тако ей помольшися, заутра, по устроенію Божію, обрѣтошася въ пещи плиты, и того дни свершися церковь и крестъ воставиша.

Преподобная же Евфросинія, видѣвше совершену церковь, возрадовася душею, и бысть священіе ей — велія радость всѣмъ христьяномъ; и собрашася и князи и сильніи мужіе, иноки и инокиня и простіи людіе, и бысть торжество веліе, и праздноваша многи дни; и разыдошася кождо во своя си.

Видѣвши же блаженная, яко исполнилъ есть Богъ желаніе сердца ея, и вшедши въ церковь, паде ницъ на землю и, вздохнувши изъ глубины души, лице свое мочащи слезами, и нача глаголати: Ты, Господи Сердцевѣдче, Благодателю, Боже богомъ, милостивый Господи, призри на храмъ Свой, яже создахъ во имя Твое, якоже рече Соломонъ: Вышній не въ рукотворенныхъ церквахъ живетъ. Ты, Господи, призри на мя, на рабу твою Евфросинію, и на рабыня Твоя сія, яже собрахъ во имя Твое, да пріимше иго Твое легкое на выя своя, пойдутъ въ слѣдъ Тебе, и сотвори я овцы двора Твоего и буди имъ Пастухъ и Дверникъ, да ни едино отъ нихъ не будетъ восхищено волкомъ-губителемъ дьяволомъ, буди имъ, Господи, Оружіе имъ и Забрало, да не пріидетъ нань зло, ни рана не подвижится къ тѣлесемъ нашимъ, и не погуби насъ со беззаконіи нашими; на тя бо упованіе наше положихомъ, яко ты еси Богъ знающимъ Тя и Тебѣ хвалу воспущаю до послѣдняго моего издыханія въ вѣки, аминь. — Сестры же сице учаше, глаголющи: се собрахъ вы, яко кокошъ птенца подъ крылѣ свои и въ паствину яко овца, да пасется въ заповѣдяхъ Божіихъ, да и азъ веселымъ сердцемъ подвизаюся учити васъ, видящи плоды ваша трудовная, и толикъ дождь проливаю къ вамъ ученіемъ, а нивы ваша во едину мѣру стоятъ, не растуще, ни поступающе горѣ, а годъ приспѣваетъ въ совершеніе и лопата на гумнѣ лежитъ; но боюся, егда будетъ плевелъ въ васъ и предани будите огню негасимому; потщитеся, чада моя, убѣжати сихъ всѣхъ, и сотворитеся пшеница чиста и смелитеся въ жерновахъ смиреніемъ и молитвами и постомъ, да хлѣбъ чистъ принесетеся на трапезу Христову. Сице же и всегда учаще и безпрестани, яко мати чадолюбивая къ дѣтемъ своимъ любовь показующи.

Мы же на предлежащая возвратимся. Видѣвши же преподобная Евфросинія монастырь свой украшенъ и всего благаго исполненъ, умысли создати вторую церковь каменну Святѣй Богородицѣ. И ту свершивши, и иконами украси, и освятивши, предасть ю мнихомъ, и бысть монастырь велій. Видѣвши же блаженная монастыря два устроена превелика зѣло и пребогата, и рече въ себѣ: слава Тебѣ, Владыко; благодарю Тя, Святый! что есмь восхотѣла, подалъ еси ми и скончалъ, Господи, желаніе сердца моего; и паки рече: помилуй мя, Господи, и сконча прошеніе мое, да быхъ видѣла Пресвятую Богородицу Одигитрію въ сей святѣй церкви. И посла слугу своего Михáила въ Царьградъ къ цареви, нарицаемому именемъ Мануилу, и къ патріарху Луцѣ съ дары многоцѣнными, просяще отъ него иконы Святыя Богородицы, еже бѣ евангелистъ Лука написа 3 иконы еще при животѣ Святыя Богородицы, и постави едину во Іеросалимѣ, а другую въ Царѣградѣ, а третью въ Ефесѣ; она же съ прилежаніемъ прошаше Ефескія иконы Святыя Богородицы. Видѣвъ же царь любовь ея, и посла въ Ефесъ семьсотъ оружникъ своихъ, и шедше, принесоша икону Святыя Богородицы въ Царьградъ. Патріархъ же Лука собра епископы и соборь весь во святую Софію, и благословивъ, дасть ю слузѣ преподобныя Евфросиніи. Она же внесши въ церковь Святыя Богородицы, постави ю, вздѣвша руцѣ, и рече: слава Тебѣ, Господи, слава Тебѣ, и еще реку: слава Тебѣ, Владыко, сподобивый мя видѣти въ днешній образъ Матере Своея. И се рекши, украси ю златомъ и каменіемъ многоцѣннымъ, и устави по вся вторники носити ю по святымъ церквамъ. Украси же всю землю Полотскую своима благолѣпныма монастырема. И видѣвши, яко Богъ просвѣти монастыри ея, и вжелѣ глаголющи: абы ми доити святаго града Іеросалима и поклонитися гробу Господню и всѣмъ святымъ мѣстомъ, видѣти и цѣловати, и тамо животъ свой скончати. Видѣвши же стадо божественныхъ овецъ совокуплено множество, и радовашеся имъ, яко своему спасенію, и на всякъ день учаше сестры своя, — старыя учаше терпѣнію и воздержанію, юныя же учаше душевнѣй чистотѣ и безстрастію тѣлесному, говѣнію образну, ступанію кротку, гласу смиренну, слову благочинну, яденію и питью безмолвну, при старѣйшей молчати, мудрѣйшихъ послушати, къ старѣйшимъ покореніе, къ точнымъ и меньшимъ любовь безъ лицемѣрія, мало вѣщати, а множае разумѣти. Тако бо бяше даръ сей данъ блаженной Евфросиніи отъ Бога: аще кто ея впрошае о коей вещи, она ему разрѣшаше чему быти, и кто ея послушаше, тои добро получаше, не бо хотяше видѣти кого которающася, ни князя со княземъ, ни болярина съ боляриномъ, ни отъ простыхъ кого со своимъ другомъ, но всѣхъ хотяше имѣти яко едину душу. Посла же по всей братьи своей, повѣдающи имъ мысль свою, еже восхотѣ ити во Іеросалимъ. Они же слышавше вѣсть сію, съ жалостію многою съѣхашася отвсюду ко блаженнѣй Евфросиніи и моляху ея со слезами, дабы ихъ не оставила сирыхъ. Она же тѣшаше благимъ смысломъ своимъ, яко мати дѣти своя любящи.

И бѣ любимъ ей братъ Вячеславъ; пріѣха и той къ сестрѣ своей Евфросиніи со княгинею и съ дѣтьми своими, и пришедъ, поклонися ей и рече: госпоже моя мати и сестро, что оставляеши мя, правителю души моей и свѣти очію моею? И горько ему плачущуся, блаженная же Евфросинія повелѣ ему ити къ домови, дѣти же его повелѣ оставити у сестры своя Евдокеи. Данъ же бысть даръ блаженнѣй Евфросиніи отъ Бога сице: кого зряше очима своима, то разумѣяше, въ коемъ человѣцѣ сосудъ будетъ избранъ Богови. Тогда же преблаженная Евфросинія видѣвши братаинѣ свои, и рече има: хощу ваю обручити Жениху безсмертному и ввести въ чертогъ царства Его. Онѣма же послушающема, усладися душа ею паче сота медвена словесемъ преблаженныя Евфросиніи, и падше на ногу ея, глаголаста къ ней: воля Господня да будетъ и твоя святая молитва, яко хощеши, сотвори нама, госпоже. Преподобная же Евфросинія съ радостію и съ поспѣшеніемъ призвавши брата своего, и рече ему: азъ хощу пострищи Кираанну и Ольгу, — тако бо и бяста нарекла родителя ею. Смяте же ся отецъ ею о словеси семъ и рече: госпоже моя, что ми хощеши сотворити? два плача прилагаеши души моей, да плачуся отхода твоего ради и сѣтую чаду дѣля своею. Мати же ею жалобно терзашеся. Блаженная же Евфросинія, пославши, призва епископа, тогда столъ правяща святѣй Софій, нарицаемаго Діонисія, и введши ю въ церковь, и повелѣ острищи ею и нарече имя Кироаннѣ Агафія, а Ользѣ Евфимія; и благословивши ѝ благословеніемъ святый отецъ, сама же блаженная Евфросинія положивши великое устроеніе обѣма монастырема, братіи и сестрамъ, и дасть держати и рядити сестрѣ своей Евдокеи обама манастыря, сама же, поклонившися въ церкви Святаго Спаса и у Святыя Богородицы, и рече: Господи сердцевидче! се оставляю домъ Твой незатворенъ никомуже; Ты же, Господи, не затвори отъ насъ небеснаго Ти царствія. И тако поиде во Іеросалимъ, поимши съ собою брата своего Давыда и сестру свою Евпраксію. Вся же братія горько плакахуся отхода ради госпожи своея, и вся граждане выидоша проводить ея; старіи плакаху яко дщери, рекуще: увы намъ, вожу старости нашея, просвѣщеніе душъ нашихъ, подпоре немощи нашей; юніи же глаголаху: камо заходиши, свѣте очію нашею? кто нашу юность укрѣпитъ, воздержаніе юности нашея! не оставляй насъ сиры, но въ молитвахъ своихъ не забывай насъ. Она же цѣловавши всѣхъ, благословивши и воззрѣвши на небо, рече: Ты, Господи сердцевидче, ходивый со Авраамомъ, иди съ нами рабы твоими, съ Евфросиніею, съ Давыдомъ и съ Евпраксіею. И тако поидоша всѣ, еже суще съ нею. О дивное чудо, не бывавши ни въ коей странѣ, ни во градѣ, ни въ селѣ! Нынѣ же, вземши мужескую крѣпость, премину вся грады и власти, и пріимаше отъ всѣхъ князей честь велику. И тако пришедше въ страны, и срѣте ю царь, идый на Угры, съ великою честію, посла ю въ Царьградъ. Она же пришедши и вшедши въ великую церковь святыя Софіи, и поклонися, таже и всѣмъ святымъ Божіимъ церквамъ, и благословися отъ патріарха. И покупивши разноличныя фиміаны и кадильницу злату, и иде во Іеросалимъ. И пришедши во Іеросалимъ, посла слугу своего Михáила тогда сущему патріарху, глаголюще: владыко святый, сотвори милость на мнѣ, повели, да отворятмися врата Христова. Онъ же повелѣ прошенію ея быти. Пришедши же ко вратомъ, паде на земли, глаголющи: Господа Ісусе Христе, не вмѣни ми сего въ грѣхъ, занеже изволихъ по стопамъ Твоимъ ходити и внидохъ въ святый градъ сій. И цѣловавши врата и сущіи съ нею, и вниде во градъ и иде ко гробу Господню, и пришедши, поклонися и цѣлова гробъ Господень и сущіи съ нею, и покади гробъ Господень златою кадильницею и многоразличными фиміяны, и изыде и обита у Святыя Богородицы въ Русскомъ манастыри. И во вторый день иде второе ко гробу Господню и такоже сотвори, поклонися и цѣлова и покадивши, изыде. Въ третій же день тоже сотвори, и давши злата много и поставивши кадильницу злату на гробѣ и многоразличныя фиміяны, воззрѣвши очима своима и руцѣ воздѣвши на небо и со слезами воздохнувши изъ глубины сердца, глаголаше: Господи Ісусе Христе Сыне Божій, рожейся отъ Приснодѣвы Маріи спасенія ради нашего, реклъ ей: просите и пріимете; азъ же грѣшная егоже, просихъ, получилъ отъ тебе, Владыко; се же и еще прошу у Тебе, милостиве, да скончаю мѣсто прошенія моего: пріими духъ мой отъ мене во святѣмъ градѣ Твоемъ Іеросалимѣ и пресели мя въ вышній градъ Твой Іеросалимъ, и покои мя на лонѣ патріарха Авраама со всѣми угодшими, аминь.

И сице ей глаголавши, изыде въ преже реченный манастырь Святыя Богородицы, идѣже бѣ обитала; ту же посѣщеніемъ Божіимъ впаде въ недугъ и нача болѣти. И лежащи на ложи своемъ, глаголаше: слава Тебѣ, Владыко, яко восхотѣ, и сотвори на мнѣ рабѣ Твоей. И тоя же ради болѣзни не може ити на Іерданъ; иде братъ ея Давыдъ и сестра ея Евпраксія и сущіи съ ними; она же, лежащи на ложи своемъ, хваляше Бога, глаголющи: Господи, призри на рабу твою Евфросинію и помилуй мя. И пріидоша бывши на Іерданѣ принесоша ей воды отъ Іордана: она же съ радостію воставши и пріемши и пивши, и обліяся по всему тѣлу своему, и возлегши на ложи, и рече: благословенъ Богъ, просвѣщая всякаго человѣка, грядущаго въ міръ! въ вѣки молюся человѣколюбивому Богу, ревнующи Петрову покаянію, еже въ отверженіи не отчаявше себѣ, но плакася горко; Господи, пріимый того покаяніе, пріими и мене недостойную рабу твою Евфросинію, молящуся на супротивника своего діявола, да не возглаголетъ ми на страшнемъ судѣ ничтоже предъ Тобою, Господи, онъ злый рабъ; вступивъ бо ногама своима на зміевую его главу, и супротивихся дерзости его окаянной, надѣющися на Твое человѣколюбіе, Господи. И услыша Богъ молитву ея, и посла ангела Своего къ ней, глаголющи: блаженна ты еси въ женахъ, благословенъ трудъ твой; се уже отверзоша ти ся двери породныя, и вси ангели собрашася, держаще свѣщи, чающе твоего срѣтенія; а даръ, егоже просиши у Бога, дасть ти ся. И се рекъ ангелъ, отыде отъ нея.

Блаженная же Евфросиніи возрадовася душею и вскорѣ посла въ лавру святаго Саввы, глаголющи: се уже приспѣ время, да же мя Богъ покоитъ, и пріимете мя, абыхъ легла въ церкви святаго Саввы. Отвѣща же ту сущіи иноцы, глаголюще: имѣемъ запрещеніе отъ святаго Саввы, еже жены не пріимати никоеяже; но се ти есть монастырь Святыя Богородицы Ѳеодосіевъ общій, въ немъже лежатъ святыя жены — мати святаго Саввы и мати святаго Ѳеодосія и мати святую безмезднику Козмы и Даміяна, именемъ Ѳеодотія, и иніи мнози святіи; ту ти подобаетъ лещи. Пришедши же посланному отъ нея, и возвѣсти Евфросиніи. Она же о всемъ похвали Бога, и пославши, купи гробъ въ комарѣ Святыя Богородицы. Лежаше же въ болѣзни своей 24 дни, и познася при скончаніи, и рече: призовите ми пресвитера, да ми дастъ причащеніе святыхъ таинъ, уже бо зватай близь предстоитъ, ждый повелѣнія Владычня. И пріиде пресвитеръ, несый причащеніе. Она же вставши, поклонися трижды, и пріемши пречистое тѣло и честную кровь Христову, и возлеже на одрѣ своемъ, и предасть душу свою въ руцѣ Бога жива, мѣсяца мая въ 24 иде въ покой небесный. Давыдъ же и Евпраксія и съ прочими спряташа тѣло ея честно.

Кіимъ убо языкомъ, братіе, достоитъ ми похвалити свѣтозарную память преблаженныя невѣсты Христовы Евфросиніи? Бяше бо помощница обидимымъ, скорбящимъ утѣшеніе, нагимъ одѣніе, больнымъ посѣщеніе, и съ проста рещи, — всѣмъ всяка бысть. Евфросинія убо сердце свое напаяше Божія премудрости; Евфросинія неувядающій цвѣтъ райскаго сада; Евфросинія небопарный орелъ, попарившія отъ запада до востока, яко луча солнечныя просвѣтившія землю Полотскую. Тѣмъ же хвалится Селунь о святѣмъ Димитріи, а Вышгородъ мученикома Борисомъ и Глѣбомъ. Азъ же хвалюся: блаженъ се и ты, градъ Полотскій, такову лѣторасль возрастивый — преподобную Евфросинію. Блажени людіе, живущіи во градѣ томъ; блажени родители твои; блажена утроба, отъ неяже изыде преподобная госпожа Евфросинія, блажено рожество ея; блажено воспитаніе ея; блаженъ и возрастъ ея, Евфросиніи достохвальныя; блаженъ трудъ твой и подвизи, яже къ Богу; блаженъ и манастырь твой; блажены и живущіи въ манастырѣ Святаго Спаса и Святыя Богородицы; блажени и людіе, послужившіи тебѣ. Но, о преблаженная невѣста Христа Бога нашего, молися къ Богу о стадѣ твоемъ, еже еси совокупила о Христѣ, яко Тому подобаетъ всяка слава, честь и поклоненіе со Отцемъ и со Святымъ Духомъ нынѣ и присно и вó вѣки вѣкомъ, аминь.

Печатается по изданiю: Памятники старинной русской литературы, издаваемые Графомъ Григоріемъ Кушелевымъ-Безбородко. Выпускъ четвертый: Повѣсти религіознаго содержанія, древнія поученія и посланія, извлеченныя изъ рукописей Николаемъ Костомаровымъ. – СПб.: Въ типографiи П. А. Кулиша, 1862. – с. 172-179.

Наверхъ / Къ титульной страницѣ

0