Наследие Святой Руси. Памятники древне-русской письменности
 
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Наслѣдiе Святой Руси
-
Гостевая книга
-
Новости
-
Написать письмо
-
Поискъ

Раздѣлы сайта

Святые Кириллъ и Меѳодiй
-
Книги старой печати
-
Патерики и житiя святыхъ
-
Великiя Минеи Четiи
-
Церковно-учит. литература
-
Творенiя русскихъ святыхъ
-
Стоянiе за истину
-
Исторiя Русской Церкви
-
Церковный расколъ XVII в.
-
Исторiя Россiи

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 17 октября 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

Патерики и житiя святыхъ —» Источники

Мѣсяца Септеврiа въ 7 день.
Житіе иже въ святыхъ отца нашего Іоанна, архіепискупа Великого Новаграда и Пьскова.
Благослови отче!

Внимати же подобаетъ намъ, братіе, и учитися закону Господню и приклонити уши свои во глаголаніе истин'ны, не ток'мо уши телесніи, но и уши душев'ніи. И отвер'зу многогрѣшный уста своя, и не въ притчахъ и гаданіи, но ıaвьст'венѣ вашей люб'ви предложу слово; сама бо истин'на Христосъ глаголеть: не в'жигають свѣтил'ника подъ спудомъ, ни подо одръ полагають, но на свѣщници, да свѣтить всѣмъ, иже во храминѣ суть. И пакы рече: не укрыется градъ вер'ху горы стоя. Не полезно бо намъ таити святыхъ житіа; не буди же пакы л'гати на святыя. Но молюся самому тому Христу Сыну Божію, да подасть ми слово сущее, и на раба его молитву надѣюся. Аще бо о семъ лѣнюся, то саму душю погуб'ляю; слышим' бо Павла, вселен'ныа учителя, глаголюща: готови будете на отвѣщаніе всякому просящему в' васъ слова, ıaже в' васъ надежда; ıaкоже и Давыдъ рече: елико слышахомъ и разумѣхомъ я, и отцы наши возвѣстиша намъ, да не утаится отъ чадъ ихъ в родъ инъ, и въз'вѣщающе хвалы Господня и силы его и чюдеса его, ıaже сотвори. И пакы: елика заповѣда отцемъ нашимъ сказаті я сыновомъ своимъ, ıaко да познаеть родъ инъ, сынове родящеися, и въстануть и повѣдять я сыномъ своимъ, ıaко да поло/л. 158 г./жать на Бога упованіе свое, и не забудуть дѣлъ Божіихъ, и заповѣди Его в'зыщють. IЯко никоеже святымъ слово, отъ иже отъ насъ похваляеми и блажими, но нашимъ душамъ пол'зы и исправленіе содѣловающе. Что же к симъ? но со словомъ глаголемо, съ словом' же глаголемо и дѣаніе съприводя. По Господню же реченію, боюся осужденіа ıaко раба оного лѣниваго, погубив'шаго талан'тъ господина своего: того ради глаголю о чюдоносивемъ мужи и отци нашемъ великомъ святители Іоаньнѣ, архіепископѣ Великого Новаграда.

Сей убо чюд'ный и блажен'ный Іоанъ родися в' Великомъ Новѣградѣ отъ благовѣр'ну родителю: отца именемъ Николы и матере Крестины; имяше же и брата благочестива, именемъ Гав'рилъ, иже и настол'никъ его бысть по немъ архіепископъ в' томь же в' Великомъ Новѣгради, въ иноческомъ чину нареченъ Григорій, о нем'же и послѣди скажемъ. Воспитана же быста отъ родителю, благочестно ходяста издѣтьска по заповѣдемъ Божіимъ. Постав'ленъ бысть Іоаннъ прозвитеромъ къ царкви святаго священ'номученика Власіа, и работаше Господеви со страхомъ, божественую литургію совер'шаа; отъ среды бо мол'вы отлучашеся святый и нечистотѣ не прикасашеся: бѣ бо прав'дивь, ходяй бес порока въ всѣхъ заповѣдехъ Господнихъ; того ради свѣдѣтельст'вованъ /л. 159 а./ бысть отъ всѣхъ людей во в'сякой доб'родѣтели. И по преставленіи же къ Богу святѣйшаго архіепископа Аркадіа, изволенъ бысть княземъ и начал'ники града того и всѣми люд'ми и всѣмъ черноризоческымъ соборомъ, іерейскомъ чиномъ возвесті его на архіепископьскый столъ в' томь же в' Великомъ Новѣградѣ. Оному же много отрицающуся того, но за добродѣтель его преможе Божіа благодать, и постав'ленъ бысть архіепископомъ отъ святѣйшаго митрополита Іоанна всея Руси в' Великій Новъградъ. И егда поставленіа сподобися, и на бол'шая добродѣтели под'визашеся, и добрѣ пасяше стадо Христовыхъ овецъ, и поживе въ преподобіи и правдѣ лѣта довол'наа, и вся церковныя благочин'нѣ и благоукорнѣ прошедшю степени и многымъ разумомъ и искусомъ предъимящю, и в самыхъ градскихъ благочестив'нѣ вещехъ, и сего ради ото всѣхъ к'нязей и отъ святителей, и спроста рещи, и отъ всѣхъ людей и почтену и почитаему, ıaко в' мѣру възраста испол'неніа Христова достиг'шу и в' мужа свер'шена; и по вся убо нощи и мало сна пріимаше, ıaко единъ часъ. И на священ'нѣмъ Соборѣ быв'шу ему всея Руси, и велика исправ'леніа показав'шю, и паки возв'ращ'шуся въ Великій Новъградь, и доб'рѣ пасущю стадо Христовыхъ /л. 159 б./ овець, ıaкоже преди речеся, ıaко пастуху истин'ну, а не ıaко наимнику. И в то в'ремя пріидоша ратніи к' Великому Новуграду: князь Романъ Суз'дальскый и иніи князи мнози отъ мно'гыхъ странъ тое же Рускіе земли со множст'вомъ вой, и всѣхъ ихъ князей 72. Аще бо и православніи, но хотяху пріати градъ ихъ и разорити, и срод'ныхъ себѣ человѣкъ и единовѣрныхъ предати напраснѣй смерти и пленити неповин'ныхъ суща. Новаграда же человѣцы бяху во скор'би велицѣй и не доумѣніи, ниоткудуже помощи надѣющеся ток'мо на Бога и на Пречистую Его Богоматерь возложів'ше и на святаго молитвы надѣющеся, и забрала около града сотвор'ше. И пришедше Суз'дал'цы со всею силою стояша подъ градомъ 3 дни. И в' третіюю же нощь, ıaкоже имѣаше обычай святый, нача молитися со слезами образу Господа нашего Ісуса Христа и о избавленіи нашедшаго прещеніа на градъ. И тако ему молящуся, слыша гласъ глаголющь: иди въ церковь Господа нашего Ісуса Христа, иже на Ильинѣ улице, тако бо нарицается; и вземъ тамо образъ Пречистыа Богородица, и възнеси на заб'рала граду противу супостатомъ; и абіе ýзриши спасеніе граду. Чюд'ный же архіепископъ Іоаннъ, ıaко услыша неизрочен'ныа глаголы, радости /л. 159 в./ исполнися, и бѣ умомъ дивяся; и тако в'сю нощь без с'на пребысть. Утру же быв'шю, и абіе созва весь соборъ, и повѣда имъ быв'шей гласъ к нему. Народи же ıaко услышаша, прославиша Бога и Пречистую Его Богоматерь, и святаго блажаще, и со гласомъ, ıaкоже нѣкую силу въспріим'ше, дер'зааху. Iоаннъ же архіепископъ посла протодіякона своего со клиросомъ Премудрости Божіи, и повелѣвь чест'ную ону икону принести на соборъ; сам' же и со священ'нымъ соборомъ в' велицѣй цер'кви Премудрости Божіи беспрестани молеб'ная совер'шаа. И пришедше же посланіи въ церковь, идеже чюдотвор'наа икона бѣ, и поклон'шеся, ıaкоже лѣпо бѣ, и хотяще в'зяті ю, никакоже въз'могоша. И възв'ратив'шеся посланіи, възвѣстиша святому быв'шее. Сии же слышавъ рабъ Божій Іоаннъ, иде со т'щаніемъ и со всемъ соборомъ; и ıaкоже пріиде въ церковь, падъ на колѣну свою святый предъ образомъ Владычици нашей Богородицы, моляшеся, глаголя: о, Премилостивая еси Госпоже Дѣво Богородице! Ты еси Упованіе и Надежа и Заступ'ница граду нашему, Стена же и Покровъ и Прибѣжище всѣмъ христіяномъ. Тѣм'же и мы грѣшніи на Тя надѣем'ся; молися, Госпоже, Сыну своему и Богу нашему за градъ нашь и не предажь насъ /л. 159 г./ врагомъ нашимъ грѣхъ ради нашихъ; но услыши плачь и въздыханіе людей своихъ; и пощади, ıaкоже иногда Нинев'гитяны Сынъ Твой покаяніа ради пощади: ıaкожде же и зде покажи милость Твою, Владычнце. И скончавъ святый молитву, начаша пѣти молебенъ, и абіе кондакъ на 6 пѣсни: Заступ'нице христіяномъ непостыдная; и внезапу видять честную ону икону саму о собѣ под'виг'шюся. Народи же видѣв'ше неизречен'ное чюдо, абіе ничтоже отъ пох'валы иного могуще принести, ток'мо единемъ гласомъ в'зываху: Господи помилуй! Святѣйши же архіепископъ Іоаннъ пріимъ честную ону и Ангеломъ говѣйную икону, любезно и с прочимъ народомъ облобызаху; и дасть ю двѣма діяконома; сам' же святый послѣдоваше со священнымъ соборомъ и с' прочимъ народомъ, молеб'ная совер'шающе. И пришедше же на мѣсто зовома Десятина, иже и донынѣ монастырь и церковь Святѣй Богородици честнаго Еа Рожества, честную же ону икону на томъ мѣстѣ поставиша на острогъ противу ратныхъ. Видѣв'ше же противныхъ, ıaко звѣри на нь устремишася, умилен'нѣ гласъ с плачемъ испущаху, глаголюще: виждь, Богородител'нице, смиреніе наше и не отрини моленіа нашего в' конець; но умилосер'дися на стадо Свое, Пречистая! /л. 160 а./ видиши бо, Владычице, нещад'наго ихъ стремленіа на смирен'ное Твое стадо. Рат'нии же они надѣющеся на множест'во силы своеа, ıaкоже гор'дый онъ Гольяфъ, зря кроткаго Давыда юностію обложена, и не раз'суди божественую силу, по обаче самъ побѣженъ бысть, нежели побѣди: тако же сии на себе надежу възложше, а не на Бога; улицѣ же по жребію расчитаху, что которому тѣхъ князей будеть. И тако совѣщав'шемъ имъ, но что речемъ к' нимъ? Иже совѣтъ съвѣщаете, потворитъ и Господь; и слово аще възглаголете, не имать пребывати в' васъ. Мы же страха вашего не имамъ убоıaтися: ıaко с нами Богъ! Приспѣв'шю же, рече, шестому часу, бол'ма начаша ратовати, и пустивше стрѣлы неисчетеное множество, ıaко дождь многъ, идущь въ градъ; честная же она икона, отвращ'шися отъ нихъ образомъ, абіе на градъ обратися не ток'мо образомъ, но и милосердіемъ. Видя же святитель Божій Іоанъ и весь священническій съборъ и множест'во народа слезы отъ иконы, ıaкоже нѣкій едемъскій источ'никъ; и приятъ святый в' фелонь свой, и рече: о преславное чюдо! како слезы текуть отъ суха д'рева: се бо, Царице, знаменіе Свое ıaвляеши, симъ бо образомъ молишися /л. 160 б./ Сыну Своему и Богу нашему о избавленiи града. Посем' же, рече, разгнѣвася Господь на сопротив'ныхъ и богоранными ıaзвами приразишася сущимъ тмамъ многамъ; покры же ихъ, рече, т'ма, ıaкоже иногда Египетъ, и другъ друга ıaко сопротив'наа зряще, оружіемъ немилостив'но себе уıaзв'ляюще. Посемъ дасть Богъ побѣду див'ну сущіимъ во градѣ безъ оружіа и безъ брани; богатест'вомъ же и плѣномъ довол'но испол'нив'шим'ся: видѣв'ше бо, рече, народи града того рат'ныхъ другъ друга секущихъ, и из'шедше изъ града, овыихъ избиша, иных' же живыхъ ем'ше. И отъ того времени великій святитель Божій Іоаннъ устави праздникъ свѣтелъ празновати предив'ное Знамение Святѣй Богородицы, быв'шее в' Великомъ Новѣградѣ, всѣмъ христіяномъ, и нарече день онъ день избавленіа и день наказаніа: сій, рече, день избавленіа сущимъ в' Великомъ Новѣградѣ человѣкомъ, и да не превъзнесутся гор'достію и велехваленіемъ и буйствомъ неистовьст'ва, и да не рекуть, ıaко собою побѣдив'ше, побѣженыхъ уничижающе; велегласный бо Пророкъ Исаіа рече: аще бо пакы възможете, сирѣчь и превъзнесетеся, и пакы побѣжени будете; но да въспоминають великая благодѣаніа Божіа, бы/л. 160 в./в'шая к' нимъ. День же наказаніа ратныимъ онѣмъ, пришед'шимъ ко граду, сирѣчь побѣженымъ, да не уповають на множество силы своеа, но на Бога; рече бо Богь Пророкомъ своимъ: и исполинъ не спасется множествомъ силы своеа; ложь конь во спасеніе, во множествѣ силы своеа не спасет'ся. Се очи Господни на боıaщаıaся Его и уповающая на милость Его, избавити отъ смерти душа ихъ; и да отженуть отъ себе негодованіе и распыханіе еже о сихъ: лесть бо боговъ своихъ миловати и наказати, и паки миловати. Подобаеть убо всѣмъ намъ сыновомъ Рускымъ честный и свѣтлый сий праздникъ, Знаменіе святѣй Владычици нашей Богородици и Приснодѣвѣи Маріи обще празновати с вѣрою и любовию. Се же съпротив'ни Богу ıaвляем'ся и себѣ велику пол'зу приобрѣтаемъ, ıaкоже убо въ древ'немъ Писаніи речеся: предъ двѣма или трема свѣдѣтели быв'шеи всякъ глаголъ истиненъ есть. Сии же преславное чюдо не предъ двѣма или предъ трема свѣдители бысть; но святъ мужь и остроуменъ сый и всякіа добродѣтели исполненъ великій святитель Божій Іоаннъ и всь священ'ный соборъ, иноци же и священ'ницы, и многы т'мы народа свѣдителіе быша, ıaкоже и предиречеся, насто/л. 160 г./ящее же да глаголется многи же. Архиерей же Божій Іоаннъ и съ предиреченымъ братомъ своимъ Гавріиломъ в' Великомъ Новѣградѣ церкви созда: 1-е, святое Благовѣщеніе, и украсиста ю чюдно, и сотвориста монастырь честенъ во спасеніе всѣмъ християномъ; 2-е, святое Богоявленіе; 3-е, святаго Пророка Илью; 4-е, преподобнаго Феодора, игумена Студійскаго; 5-е, святыхъ треи отрокъ: Аваніа, Азарію, Мисаила и Данила Пророка; 6-е, святаго праведнаго четвероднев'наго Лазоря; 7-е, святаго архиерея Николу. Милостивь же и великый святитель Божій Іоаннъ по премногу бысть ко в'сѣмъ, и кротость велію притяжа, и любовь нелицемѣр'ну не ток'мо къ славнымъ велицимъ, но и къ убозѣй чади. Учаше бо люди бесп'рестани ıaже на спасеный путь, еже о православіи. Многа же и чюдна дѣаніа и чюдеса памяти достойны Богъ сотвори угодникомъ своимъ Іоанномъ.

Печатается по изданiю: Великiя Минеи Четiи, собранныя всероссiйскимъ Митрополитомъ Макарiемъ. Сентябрь, дни 1-13. – Изданiе Археографической Коммиссiи. СПб: Типографiя Императорской Академiи наукъ, 1868. – стлб. 327-333.

Наверхъ / Къ титульной страницѣ

0