Наследие Святой Руси. Памятники древне-русской письменности
 
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Наслѣдiе Святой Руси
-
Гостевая книга
-
Новости
-
Написать письмо
-
Поискъ

Раздѣлы сайта

Святые Кириллъ и Меѳодiй
-
Книги старой печати
-
Патерики и житiя святыхъ
-
Великiя Минеи Четiи
-
Церковно-учит. литература
-
Творенiя русскихъ святыхъ
-
Стоянiе за истину
-
Исторiя Русской Церкви
-
Церковный расколъ XVII в.
-
Исторiя Россiи

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 23 iюня 2017 г. Сейчасъ на порталѣ посѣтителей - 25.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

Патерики и житiя святыхъ —» Источники

Мѣсяца Септеврiа въ 7 день.
О том' же великомъ святителѣ Іоаннѣ, архіепископѣ Великого Новаграда, како былъ въ единой нощи из Новаграда въ Іеросалимѣ градѣ, и пакы воз'вратися в' Великій Новъградъ тое же нощи.

Понеже нѣсть се достойно мол'чанію предати, еже Богъ сотвори святителемъ Своимъ Іоанномъ. Многажды же бываеть со искушеніемъ надъ святыми /л. 161 а./ попущеніемъ Божіимъ, да бол'ма прославят'ся и просвѣтятся, ıaко злато искушено: прослав'ляюща Мя, рече, прославлю; дивенъ бо есть Богь во святыхъ Своихъ, Богъ прославляа святыя Своа. И паки рече Христосъ: се дахъ вамъ власть надъ духы нечистыми. Во единъ убо отъ дній святому по обычаю своему в лож'ницы своей молитвы нощьныя свер'шающу, имѣяше же святый сосудъ с водою стоящъ, из негоже умывашеся; и слыша в' сосудѣ ономъ нѣкотораго пороп'щюща в' водѣ. И пріиде скоро святый, и уразумѣ бѣсовьское мечтаніе; и сотворь молитву, и огради сосудъ крестомъ, и запрети бѣсу: хотяше бо пострашити святаго, но приразив'ся твердому адаманту; твер'даго же адаман'та не поколѣба, и самъ вселукавый сотреся; и не на долгый часъ не могый тер'пѣти бѣсъ, нача въпити: о лютѣ нужди сея! се бо огнемъ палимъ есмь, не могу тер'пѣти; скоро испусти мя, святче Божій. Святый же рече: кто еси ты и како сѣмо пріиде? Діяволъ же рече: азъ есмь бѣсъ лукавый и пріидохъ смутити тя; мняхъ бо, ıaко человѣкъ устрашишися, ты же мя з'лѣ заключивъ в' сосудѣ семъ, се бо ıaко огнемъ палимъ зило. Горе мнѣ окан'ному! како прельстихся, /л. 161 б./ како внидохъ сѣмо, недоумѣвся. Нынѣ же пусти мя, рабе Божій, и отселе не имамъ приити сѣмо. И надол'зѣ въпіющу непріазненному, святый же рече: се за дер'зость твою повелѣваю ти: сее нощи донеси мя из Великаго Новаграда въ Іеросалимъ градъ, и постави мя у церкви, идеже гробъ Господень, и изъ Еросалима града сее же нощи в' келии моей, в' нюже дерз'нулъ еси внити, и азъ тя испущю. Бѣсъ же всяческы обѣщася сотворити волю святаго; ток'мо, рече испусти мя, рабе Божій, се бо лютѣ стражу. Святый же запретивъ бѣсу, испусті ѝ, рекъ: да будеши ıaко конь уготов'ленъ, предстоя предъ кельею моею, да имамъ на тя въсѣсти и совер'шити желаніе свое. Бѣсъ же изыде ıaко тма изъ сосуда, и ста ıaко конь предъ кельею святаго, ıaкоже требѣ святому. Святый же изыде ис кѣльа, и въоружи себе крестомъ, и всѣде на нь. И обретеся тоя нощи въ Іеросалимѣ градѣ близъ церкви святаго Въскресеніа, идеже гробъ Господень и часть животворящаго Д'рева. Бѣсу же запрети, да не отъидеть отъ мѣста того; бѣсъ же стоя, никакоже могый двигнутися с мѣста, дон'деже святый пріиде къ церкви святаго Въскресеніа, и ста пред' двер'ми церков'ными, и преклонивъ колѣни помолися; и отвер'зо/л. 161 в./шася двери церковныа сами о собѣ, и свѣщи и пан'дикадила во церкви и у гроба Господня възж'гошася. Святый же благодарьственѣ моля Бога и пролья слезы, и поклонися гробу Господню, и облобыза ѝ; ıaкоже и животворящему Древу и всѣмъ святымъ образомъ и мѣстомъ, иже суть въ церкви. Изыде изъ церкви, совер'шивъ желаніе свое; и пакы двери церковныя особь затворишася. И обрѣте святый бѣса стояща на томъ мѣстѣ, идеже повелѣ ему, ıaко коня уготов'лена; и всѣде на нь святый, и обрѣтеся тое же нощи в' Великомъ Новѣградѣ в' кельи своей. И отходя бѣсъ ис кѣльи святаго и рече: о Іоанне! ты мя потруди въ единой нощи донести себе из Великого Новаграда въ Іеросалимъ градъ, и тое же нощи изъ Іеросалима града в' Великый Новъградъ. Се бо запрещеніемъ твоимъ, ıaко узами, неразрѣшен'но дер'жимъ быхъ и бѣд'нѣ сего претер'пѣхъ; ты же да не повѣси никомуже збыв'шаıaся о мнѣ. Аще ли исповѣси, азъ же имамъ на тя искушеніе навести: имаши бо ıaко блудникъ осуженъ быти, и много поруганъ быти, и на плотъ посажденъ на рѣцѣ, рекомомъ Вол'ховѣ. Сіа же блядущю лукавому, святый же сотвори крестное знаменіе, и изъчезе бѣсъ. Нѣкогда же святому, /л. 161 г./ ıaкоже имѣяше обычай, упражняющуся въ духовнѣй бесѣде съ честными игумены и со искуснѣйшими іереи и съ богобоıaзнивыми мужи, и ученіе свое простирающу, и святыхъ житіа сказающю, еже на пол'зу людемъ, людемь же послушающимъ в' сладость святаго ученіа, не лѣнивь бо бяше, еже учити люди; тогда же глагола, ıaко о иномъ нѣкоторомъ, сказуя, еже сбыстся на немъ: азъ, рече, вѣмъ такова человѣка, быв'ша во единой нощи из Великого Новаграда въ Іеросалимѣ градѣ, и поклонив'ся гробу Господню, и пакы възв'ратив'шася тое же нощи в' Великій Новъградъ. Игуменом' же, іереомъ и всѣмъ людемъ удивльшим'ся о семъ, и отъ того в'ремени, попущеніемъ Божіимъ, нача бѣсъ искушеніе наводити на святаго. Народи убо града того многажды видяху, ıaко жену блуд'ницю текущу ис келіи святаго: бѣсъ бо преображашеся в жену; народи же не вѣдяху, ıaко бѣсъ есть меч'туя, но вес'ма мняху жену блудницю, и соблаж'няхуся о семъ. Иногда же и начальницы града того приходяще в' келью святаго благословения ради, видятъ мониста дѣвичьа лежаща и сан'далья женьска и рубища; и о семъ оскорб'ляхуся, недоумѣюще, что рещи. В'ся же си бѣсъ меч'туя показавааше /л. 162 а./ имъ, да въстануть на святаго, и възглаголють неправед'ная, и из'женуть. Народи же óни с начал'никы своими совѣтовав'ше, рекоша к себѣ: неправедно есть таковому святителю быти на апостольскомъ престолѣ, блуд'нику сущю; идемъ и изженемъ ѝ. О таковыхъ бо людехъ Давыдъ рече: нѣмы да будуть устны лстивыа, глаголющая на правед'наго безаконіе гор'дынею и уничиженіемъ; понеже они мечтанію бѣсовьскому вѣры им'ше, имуще же ıaко и жидовьскую сон'мищю. На предлежащее же възв'ратим'ся. И пришед'ше к' кельи святаго; бѣсъ же потече, народомъ зрящимъ, въ образи отроковици ıaко ис кельи святаго. Народи же въск'лицаша, да изымають ея; и не можаху, гнав'ше довол'но. Святый же слышавъ мол'ву народа у кельи своей, изыде к нимъ и рече: что есть, чада? Ониже изглаголаша ему вся, ıaже видѣша; святаго же глаголомъ не внимаху; и осудиша его ıaко блудника; и им'ше его нудма, поругашася ему; и недоумѣваху, что быша сотворилі ему; и умыслиша тако: посадимъ его на плотъ на реку на Въл'ховъ, и да выпловеть из' града нашего внизъ по рѣцѣ. И выведоша святаго и цѣломудренаго великаго святителя Божіа Іоанна на великый мостъ, еже /л. 162 б./ есть на рѣце на Вол'ховѣ; и низвѣсивше святаго, на плоть посадиша. И збысться лукаваго діявола мечтаніе. Диıaволъ же нача сему радоватися; но Божіа благодать преможе, и святаго вѣра и къ Богу молитвы. I егда посаженъ бысть святитель Божій Іоаннъ на плотъ на рѣце на Волховѣ, и поплове плотъ в'верхъ рѣки никым'же порѣваемъ, на немже святый сѣдяше, противу великіе быст'рины, еже есть у великого мосту, къ святаго Георгіа монастырю. Святый же моляшеся о нихъ, глаголя: Господи! не поставi имъ грѣха сего; не вѣдять бо что творять. Діяволъ же видевъ, посрамися и възрыда. Народи же видѣв'ше таково чюдо, растер'заху ризы своя и въз'вращахуся, рекуще: согрѣшихомъ, неправед'ное содѣяхомъ, овци сы пастыря осудихомъ; се бо видимъ, ıaко отъ бѣсовьскаго мечтаніа сіе сотворися намъ. И шед'ше скоро в' великую церковь Премуд'рость Божію, и повелѣша священ'ному собору, іереомъ и діякономъ, со кресты пойти в'верхъ по брегу рѣки Волхова къ святаго Георгия монастырю, и молити святаго, дабы възв'ратил'ся на престолъ свой. Священ'ный же съборъ скоро со тщаниемъ в'зяша честный крестъ и икону Святѣй Богородицы, ıaкоже лѣпо бѣ, и поидоша по брегу в'верхъ рѣки Вол'хова во слѣдъ святаго, /л. 162 в./ моляще его, дабы ся воз'вратилъ на престолъ свой. Такоже и народи óни, иже прежде ковъ на святаго въздвигше, текуще по брегу реки Вол'хова ко святаго Георгіа монастырю, умил'нѣ гласъ испущающе, глаголаху: возв'ратися, честный отче, великый святителю Іоанне, на престолъ свой, и не остави чадъ своихъ сирыхъ, и не помяни еже съгрѣшихомъ к' тебѣ. И предвариша святаго и носящихъ іеріевъ честныя кресты близъ святаго Георгіа монастыря ıaко полпоприща, и сташа, прекланяюще главы своя до зем'ля, моляще святаго и слезы проливающе, тако же глаголюще, ıaкоже рѣхомъ: возв'ратися, чест'ный отче, пастырю нашь, на престолъ свой: грѣхъ бо нашь предъ нами есть всегда; предъ тобою съгрѣшихомъ, и діявола лукаваго мечтаніемъ прельстихом'ся, тако сотворити дер'знухомъ. IЯко убо безъотвѣтни прощеніа просимъ; но обаче и благословенія твоего сподоби насъ. И ина многа глаголаху, моляще святаго: не скоро бо пловяше святый на плотѣ ономъ противу великыа быст'рины; но ıaко нѣкоторою божественою силою носимъ, благоговѣйно и честно: не бо предваряше носящихъ честныа кресты по б'регу, но рав'но пловяше с носящими іереи и діяконы честныа кресты. /л. 162 г./ И егда священ'ный соборъ с' чест'ными кресты пріидоша к' мѣсту, идеже народи óни стояще бяху, и начаша в'купѣ бол'ма молити святаго, дабы възв'ратил'ся на престолъ свой. Святый же послуша моленіа ихъ, ıaко по въздуху носимъ къ брегу приплове, и вставъ с п'лота сниде на брегъ. Народи же видѣв'ше, радовахуся, ıaко умолиша святаго възвратитися; и плакахуся еже съгрѣшиша къ святому, прощеніа просяще. Без'злобиваıa же óна душа прощеніа сподоб'ляеть ихъ. Мнози же отъ нихъ на нозѣ падающе, слезами обливаху нозѣ его; друзіи же ризамъ знаменовахуся святаго; и сп'роста рещи, другъ друга утѣсняху, хотяху поне видѣти святаго. Святый же благословяше ихъ; и тако пойде со кресты чюдоносивый архиерей Божій Iоаннъ въ святаго Георгіа монастырь и со священнымъ соборомъ молебная совер'шающе пѣніа, и множест'во народа вослѣдующимъ и глаголющимъ: Господи помилуй! Архиман'дриту же и инокомъ монастыря того не вѣдущимъ, ıaко архиерей Божій Іоаннъ грядетъ в' монастырь. В' тоже время въ святаго Георгіа манастыри бѣ нѣкый человѣкъ, ıaко уродъ ся творя, прозор'лива же дара имѣа отъ Бога благодать. Сей скоро притече ко архимандриту монастыря /л. 163 а./ того, толкій въ двери келіа его и глаголя: изыди противу великаго святителя Божіа Іоанна, архіепископа Великого Новаграда; се грядетъ к' намъ в' монастырь. Архиман'дритъ же усумнѣся и посла видѣти. Посланіи же шед'ше, увидѣша отъ народа ту сущаго в'ся быв'шаа, ıaже о святемъ, и скоро възв'ратив'шеся, възвѣстив'ше архиман'дриту; архиман'дритъ же повелѣ в' тяжкаа звонити. И съшед'шим'ся инокомъ великыа тоа лав'ры и в'зем'ше честнаа кресты, изидоша из монастыря противу святителя Божіа Іоанна. Святый же видѣвъ когождо, благословяше ихъ, и пріиде в монастырь; и вшедъ въ церковъ святаго Великомученика Христова Георгіа со архиман'дритомъ монастыря того и съ всѣмъ священнымъ соборомъ и съ иноческимъ чиномъ и съ множествомъ народа, молеб'ная совер'шивъ, и тако с великою честию воз'вращается на престолъ свой в' Великій Новъградъ. Сіа же самъ о собѣ исповѣда священному собору и прочимъ людемъ: како хотяше его бѣсъ пострашити, и како былъ во Іеросалимѣ градѣ въ единой нощи из Великого Новаграда; и вся ıaже с'бысться ему по ряду сказа, ıaкоже предиречеся. И учаше ихъ святый, глаголя: чада! со испытаніемъ всяко дѣло творите, да не прел'щени будете /л. 163 б./ діяволомъ, да не когда з'добродѣтелію злобу приплетену обрящете и суду Божію повин'ни будете: страш'но бо есть в'пасти в руцѣ Бога живаго. И о семъ мало да премол'чимъ. Князь же и начал'ници града того, совѣтовав'ше со множествомъ народа, поставиша крестъ каменъ на томъ мѣстѣ на брегу, идеже приплове святый, иже и донынѣ стоить во свѣдѣтельст'во преславьному сему чюдеси святаго і в наказаніе сонмици Великого Новаграда, да пакы тако не дер'зають скоро безъ испытания святителя осужати і из'женути; о святыхъ бо Своихъ Христосъ рече: блажени из'гнани прав'ды ради, ıaко тѣхъ есть царство небесное. А иже святыя изгоняютъ бес прав'ды, кый отвѣтъ имуть? Пред'лежащее же да глаголется. И мало поживъ святый на великой архіепископьи Великого Новаграда, и увѣдавъ ко Господу свое отшествіе, и положи омофоръ свой, уже сый въ глубоцѣ старости. И пакы пріидоша к нему князи града того и начал'ници градстіи, игумены и священницы и черноризъцы, и спроста рещи и всѣ людіе; и молиша святаго, да благословить брата своего Григорія на архіепископьскій престолъ великіа церкви великого Новаграда святыя Премудрости Божіа. Святый же мо/л. 163 в./леніа ихъ не презри и поручи архіепископью Великого Новаграда брату своему Григорію, и благослови его въ свое мѣсто, иже и бысть, о нем'же и преди рекохомъ, такоже в' добродѣтели просіающю. И тако убо святый поучивъ люди отъ божественаго Писаніа, еже вѣровати въ святую Троицю, Отца и Сына и Святаго Духа, и сице глагола имъ: послушайте, еже реку вамъ. Сами видѣсте, како избави Богъ градъ сей отъ плененіа ратныхъ и васъ отъ напрасныя смерти иконою Матере Своея, Владычици нашей Богородицы и Приснодѣвѣи Маріи, христіяньскіа Заступници въ всѣхъ бѣдахъ. Можаше бо Богъ, невидимъ сый, невидимою силою миръ строя, и васъ невидимо избавити; но того ради се бысть, да пос'рамятся иконобор'ци, и да не растлятся обычаа наша, и да вѣрою несуменною покланяем'ся святымъ иконамъ: понеже описанъ бысть нами неописан'ный и осяжемъ неосязямый. И князя бойтеся еже о благочестіи православ'наго, ıaко Бога: в'сякъ бо против'ляйся князю Богу противит'ся; послан'никъ бо есть Божій, не туне бо мечь носить Божій, во отмщеніе з'лодѣемъ, в' похвалу же доб'родѣемъ. За иновѣрнаго же и нечестиваго князя не предавайтеся. И любовь имѣйте межю собою. Аще сіа сохра/л. 163 г./ните, без'печал'ну в семъ вѣцѣ жизнь поживете, и онамо благыхъ не лишени будете. и тако поучивъ люди, и когождо ихъ благослови: князя же и начал'никовъ градскыхъ, игуменовъ и священ'никовъ и діяконовъ и весь священ'ный соборъ, такоже иноковъ и всѣхъ христолюбивыхъ людей; и повелѣ отъити имъ комуждо во своа. Князю же и людемъ отшед'шимъ, и тако убо святый пострижеся во иноческый чинъ в' скиму, и нареченъ бысть Іоаннъ; преже бяше имя ему Иліа. И преставися с миромъ, предасть душю свою в' руцѣ Божіи, и преселися отъ житіа суетнаго в' вѣчную жизнь, отъ маловремен'ного вѣка в' вѣки бесконеч'ныя, отъ тля въ нетлѣніе, отъ силы в' силу и отъ славы въ славу. Приспѣвает' же преставленіе святаго Сен'тября 7 день, в' предпразнество Рожества Святѣй Богородицы, еıaже преслав'ному чюдеси, честному Ея Знаменію сподобися и послужи святый. Князь же и начал'ници градстіи, и честніи игумени, иереи же и діяконы и весь священ'ный соборъ и иноци, и множество народа плакахуся его ради. И тако съ свѣщами и с кандилы чест'но проводиша священныя его мощи, пѣв'ше над' нимъ обычиая пѣніа и благодарив'ше надгробныя пѣсни, и благочин'нѣ положиша и во гробѣ в' папер'ти /л. 164 а./ велицей церкви Премудрости Божіи, и камень на гробъ приваливъше, отъидоша. Быша тогда многа исцеленіа отъ цѣл'боносныхъ его мощей всякыми недугы одер'жимыхъ, и бѣси отъ человѣкъ отгнашася; но и послѣжде исцеленіа бывають с вѣрою приходящимъ к рацѣ святаго, егоже молитвами, Господи, всѣхъ насъ сподоби деснаго предстоянiа престолу Твоему в' день страшнаго Твоего суда; и Тебѣ славу всылаемъ со Безначал'нымъ Ти Отцемъ и с Пресвятымъ и Благымъ и Животворящимъ Ти Духомъ, нынѣ и присно и в вѣкы вѣкомъ.

Слово о проявленіи мощій святаго.

Подобаеть же и се приложити къ предречен'ныимъ, еже о проıaвленіи мощей великаго святителя Божіа Іоанна, како бысть и в' кое время, егда въсхотѣ Господь Богъ проıaвити угодника Своего. Минув'шимъ бо многымъ лѣтомъ по престав'леніи святаго, бысть убо в' лѣта благочестиваго великаго князя Василіа Васильевичя всея Руси, при святѣйшимъ архіепископѣ Еуфиміи Великого Новаграда, проıaвленіе мощей святителя Божіа Іоанна; испол'ни бо ся тогда Господне реченіе, еже рече: аще бо вы умол'чите дѣла Божіа, то каменіе возопіетъ; ıaкоже бысть иже о святѣмъ въ церкви Іоанна Предотечи чест'ныя его главы усѣкновеніа, в' папер'ти великіа церкви Премудро/л. 164 б./сти Божіа сице: во единъ убо отъ дній, камень напрасно отпаде отъ вер'хніе стѣны, паче же рекý, оттор'женъ бысть божественою силою. И удари каменьмъ онѣмъ о камень лежащiй на единомъ гробѣ, иже есть въ церкви; лежащій же камень на гробѣ раз'сѣдеся и велику скважню показа, а спадшій камень не великъ зило, лежащій же на гробѣ ономъ твердъ, ıaкоже и на прочихъ гробехъ свѣдительствуеть; гробъ же онъ невѣдомъ человѣки, кто бѣ в немъ лежащій, понеже отъ многъ лѣтъ бѣяше; мнози бо суть гроби в папертехъ великіа церкви Премудрости Божіа: ови убо суть вѣдомы человѣки, кто в' нихъ лежащіи; иніи же невѣдоми, ток'мо единому Богу свѣдущю. И сия видѣвъ іерей тоя церкви, удивися, и шедъ сказа великому архіепискупу Еуѳімію. Архиерей же Божій Еуфвмей скоро пріиде ко гробу оному, да видитъ с'быв'шееся; и видивъ, удивися напрасному спадению камени и раз'сѣдению твердаго камени, лежащаго на гробѣ, отъ мала удареніа спад'шаго камени. Святитель же Божій Еуѳимей повелѣ отвалити раз'сѣдшій камень отъ гроба; и сотвор'шимъ тако, и благоуханіа наполнися церкви. И в'земъ архіепископъ в' руку свою свѣшу въз'жену и прини/л. 164 в./к'нувъ во гробъ, и видѣ въ гробѣ ономъ нѣкоторого лежаща архіепископа во иноческомъ чину в' скимѣ; ризы же его бѣаху никакоже тлѣнію причаст'ны. И рече къ предстоящимъ с нимъ: мню сего раба Божіа быти велика, ıaко чюдно о немъ содѣıaся. И паки повелѣ покрыти гробъ; сам' же отъиде и нача о семъ молитися Богу на в'ремя, да проıaвять ему Богъ кто есть лежащiй въ гробѣ ономъ. Во едину же нощь молящюся Богу святѣйшему архіепископу Еуѳѵмію о семъ, и ста пред' нимъ очивѣсть, ıaко лежащій въ гробѣ ономъ, ıaковаже видѣ. Архиерей же Божій Еуѳиміе ужасеся. И рече ıaвлейся: не ужасайся, рабе Божій. Еуфиміе рече: кто еси, господине? ıaко тайно в'ниде в келію мою. Онъ же рече: азъ есмь лежащій въ гробѣ ономъ, о нем'же ты молишися, архиепископъ Илья, наречен'ный во иноческомъ чину в' скиме Іоаннъ, иже сподобих'ся послужити чюдеси Святей Богородици, чест'ному Еа Знаменію. Се бо Господь посла мя к тебѣ: устроиши память преставльшим'ся и лежащимъ в велицей церкви Премудрости Божіи княземъ рускимъ и архіепископомъ Великого Новаграда и всѣмъ православ'нымъ христіяномъ Октяб'ря 4 день, на память святаго Священномученика Ероѳеıa, епископа Афиньскаго, /л.164 г./ отнынѣ и во вѣки, на в'сякое лѣто: понеже достойна тя изб'ра Богъ строителя и пріатно есть Богу дѣло твое. Да такоже заповѣдай творити и по престав'леніи твоемъ къ Богу отъ житіа сего: аще кто и по тебѣ будуть архіепископи в' Великомъ Новѣградѣ, да не оставять памяти сея. Аз' же имамъ Христу молитися о всѣхъ христіянехъ, о полезныхъ ихъ; а и самъ будеши причтенъ с нами въ царствіи небеснѣмъ, ıaко единъ отъ святыхъ. И сіа рекъ, невидимъ бысть. Святитель же Божій Еуѳиміе упразнися отъ видѣніа, пребысть всю нощь без сна, в'нимая умомъ о видѣніи святаго и ıaже глагола ему святый; и бѣ радуıaся душею и тѣломъ, ıaкоже сподобися желаемое получити. Наутріа же предив'ный святитель Божій Еуфимие сказа вся искуснѣйшимъ іереомъ собора Премудрости Божіа и ближнимъ своимъ инокомъ, иже с нимъ пребывающимъ, о видѣніи великого святителя Божіа Іоанна, архіепископа Великого Новаграда, и ıaже глагола ему святый. Они же слышав'ше, прославиша Бога, творящаго чюд'наа дѣла святыми Своими. И тако святитель Божій Еуфимей скоро пріиде въ цер'ковъ Іоанна Предотечи и со священ'нымъ соборомъ, и поклонися цѣл'боносному гробу, и облобыза ѝ, и благодареніе святому воз'дая; такоже и весь /л. 165 а./ священный соборъ и вси людіе, обрѣт'шеися ту. И по сему вѣдомъ бысть человѣки гробъ великаго и знаменоноснаго отца нашего святителя Божіа Іоанна, еже есть и донынѣ зримъ нами, и честныя его мощи и многоцелебныя всѣми видимы, и исцеленіе неоскудно подаваютъ вѣрою приходящимъ к рацѣ святаго. И отъ того времени святѣйши архіепископъ Еуѳімей, по глаголу святителя Божіа Іоанна, устрои память велію преставльшимся княземъ рускимъ: великому князю Владимеру, иже соз'да великую церковь святую Премудрость Божію, и матере его благовѣрной и великой княгине Аннѣ, и княгинѣ его, и прочимъ к'няземъ, лежащимъ въ святѣй Премуд'рости Божіи, и ихъ сродникомъ, и архиепископомъ Великого Новаграда, и всѣмъ православ'нымъ христіяномъ, в лѣто 6948 [1439] Октяб'ря въ 4 день, на память святаго Священномученика Ерофѣя. Самъ убо служи панахиду и божественую литургію в' велицей церкви Премудрости Божіи, со архиманд'ритомъ и игумены, иереи и діяконы и со всѣмъ священнымъ соборомъ Премудрости Божіи, ıaкоже лѣпо бѣ святителю. Такоже повелѣ и у прочихъ церквей священникомъ служити понахиду и божественную литургію по всему Великому Новуграду и по /л. 165 б./ окрестнымъ монастыремъ по престав'льших'ся князехъ рускихъ и архіепископовъ Великого Новаграда и по всѣхъ православ'ныхъ крестіянехъ. И отпѣв'шимъ божественую литѵргію, и абіе престав'ляеть имъ трапезу, и вел'ми учредивъ ихъ, отпустиі ѝ, и милостыню дасть по манастыремъ и инокомъ и инокинямъ и ко всѣмъ церквамъ; такоже и нищая и вдовица и сироты накор'ми и напита ѝ, и милостыню в'дасть. И заповѣда аще и по преставленіи его къ Богу архіепископомъ Великаго Новаграда не оставити памяти сея отселе и въ вѣкы, еже есть на память святаго Священномученика Ерофѣа, Октяб'ря въ 4 день, ıaкоже предиречеся. Преже бо того не бѣяше памяти сеа общия в' Великомъ Новѣгради по преставльших'ся к'нязѣхъ рускихъ и по архіепископовъ Великого Новаграда и по всѣхъ православныхъ христіянехъ. Сицевая святыхъ теченіа, такова суть благодѣяніа, сицева дарованіа, сицева чюдесъ приятіа, ıaже не ток'мо в' животѣ, но и по смер'ти, иже не мощно есть писанію предати. Азъ же окаян'ный слышахъ о житіи правед'наго мужа великаго святителя Божіа Іоанна и невѣріемъ одер'жимъ быхъ; и ıaтъ мя нѣкоторый недугъ неис'цѣленъ: /л. 165 в./ азъ же уразумѣхъ, ıaко мое невѣріе, увиряетъ святый, начахъ молитися святому, исповѣдая свое невѣріе, в'купѣ же исцѣленіа прося, многажды припадая к раки святаго, окаıaнна себе глаголахъ, ıaко праваго пути погрѣшивша, и незапное исцѣленіе получихъ, и быхъ ıaко ничтоже пострадахъ. Паки же правою вѣрою одер'жимъ быхъ, грѣхъ же ради своихъ ужасах'ся. Написахъ житіе святаго истинна Божіа человѣка, великаго архиерѣя Іоанна, отъ великихъ малая же свѣмъ, і елика смиренію моему възмож'на, і елика изообрѣтохъ написана о святѣмъ, о роженiи и о возрасту его, и о див'ныхъ чюдесехъ, о житіи же и о преставленіи; ина же слышахъ отъ неложныхъ свѣдителей и отъ старець многолѣтныхъ; многа же ина повѣсти достойна святаго чюдеса преминухъ; сиıa же написахъ, да не заб'венію предана будутъ. Но обаче звѣздъ убо на высотѣ множест'ва немощно исчести, и святыхъ чюдеса неисчетена суть. Паки же исчитаяй множество звѣздъ, Иже всѣмъ имъ имена нарицая, Той вѣсть в'ся чюдеса, иже святыми Своими содѣла. Велiй Господь нашь, и веліа крѣпость Его, и разуму Его нѣсть числа! Мы же на славословіе потщимся святаго, и сицевая /л. 165 г./ к'нему да речемъ: радуйся, великій святителю Іоанне, ıaко сподобися Божій гласъ слышати, ıaже на пол'зю людемъ христіяньскимъ, понеже молитва твоя в'зыде къ Богу! Радуйся, ıaко велій еси молебникъ ко Пресвятѣй Владычицѣ нашей Богородици и Приснодѣвѣи Маріи! Радуйся, истин'ный православіа учителю, и наказателю не ток'мо пасомымъ отъ тебе, но и всей вселеннѣй! Радуйся, ıaко тобою еретицѣ до кон'ца посрамишася, и мудрость ихъ поглощена бысть! Радуйся, прогонителю и побѣдителю лукавыхъ духовъ, ихже и безвѣсти сътворилъ еси! Радуйся, скудныхъ умомъ и невѣриемъ одер'жимыхъ еже о православіи истин'ный учителю и наказателю! Радуйся, ıaко и въистинну ничим'же окудевъ еси иже древ'ле просіавшихъ преже закона онѣмъ божественымъ мужемъ: великому Моѵсѣю и иже по немъ Ісусу Навгину, ıaко соборовидѣць былъ еси и пастырь людемъ многымъ! Радуйся, законоположитель новый и наслѣд'никъ небеснаго царствіа, и пасомымъ отъ тебе истинный правитель! Но о, великій святителю Христовъ Іоанне, и пастырю доб'рый, и настав'ниче, и наказателю, и истинный строителю, предстояй престолу Божію! молися Святѣй Троици о великодръжав'номь, иже в Рустіи земли скипетръ /л. 166 а./ царства дръжащу, и о благороднѣмъ сѣмени его, и о дръжавѣ его, и о пребываніи, и о здравіи, и о спасеніи, и еже на врагы побѣда на иновѣрныя многоплѣмен'ныя и на вся врагы и съпостаты, и о мирѣ всего мира; избавитися намъ единовѣрнымъ всѣмъ православнымъ христіяномъ междоусобныя брани, и о спасеніи душь нашихъ, и о благостояніи святыхъ Божіихъ церквей и о съвокупленіи всѣхъ.

Чюдо о томъ же архіепископѣ Іоаннѣ и о братѣ его Григоріи. Тъй же ми чюдный мужъ Сергій повѣда о Благовѣщеньской церкви монастыря Благовѣщеніа, юже създашя два брата по плоти Григорій і Иоан'нъ; потомъ же оба бышя архіепископи Великому Новуграду и Пьсковѫ.

Сіи убо бѣста брата себѣ по плоти; бѣста же благородну и благочестиву и богату родителю чада; имѣста же оба между собою любовь, ıaко истин'наа братіа плотію и духомъ. IЯкоже видѣста родителя своя преставлешася, имѣніа же многа оставльша имъ имѣста же вѣру велию Пречистей Богоматери Владычицѣ нашей Богородици и Приснодѣвѣи Маріи; помыслиста же създати монастырь во имя Пречистыя, честнаго Ея Благовѣщеніа. I акоже поставиша церковь древяну и монастырь съградиша, и вся ıaже на потребу устроишя, и келіа и трапезу; таже не по мнозѣ времени съвѣщастася поставити церковь камен'ну, и наяша хитреца зиждущихъ церковь. І акоже начаша цер/л. 166 б./ковь съзидати и доспѣша до раменъ, и недостà сребра на съвершеніе. Они же начаша тужити, не вѣдуще, что створити. I отъ многиıa же печали и срама помолишася Пречистой Богоматери, глаголюще: Ты убо, Владычице, вѣси вѣру нашу и любовь, еже къ Сыну Твоему и Богу нашему и к Тебѣ, ıaко съ всѣмъ усердиемъ и вѣрою на дѣло сіе пречестнаго твоего храма подвигохомся, и на тя, Богомати, помощь и надѣжу възложихомъ. Помози намъ насъ съвершеніе храма Твоего пречестнаго сего; посли помощь Свою, Владычице, и не посрами насъ рабъ Своихъ: ıaко начахомъ созидати и не можемъ съвер'шити бес' Твоея помощи, недоставшу сребра, ıaже къ совер'шенію. Сѣтующима же има о сребрѣ, в'купѣ же и молящимася милостивому Спасу и Пречистѣй Его Богоматери, ıaвляется имъ Пречистаа Царица и Богомати во снѣ, глаголя имъ: что убо в толику печаль и сѣтованіе взястася о созданіи церкви Моея, любимаа Моя мною раба Божія? не презрю моленіа вашего и вѣры и люб'ве, в'скорѣ убо послю вамъ ıaже къ совер'шенію, ıaко и на иную потребу преизбудетъ, токмо подщитеся к дѣлу и не оскудѣйта вѣрою. Тоже видѣніе оба брата видѣста и слышаста; въставша отъ сна радостна и надѣждею укрѣпляетася. В' той же день, по отпѣтіи убо утреняго, изыдоста оба брата предъ врата монастырскаа, по обычаю, напередъ всѣмъ; по Божию устроенію и Его Пречистыя Богоматере видятъ оба брата не в' меч'таніи, но на ıaвѣ /л. 166 в./ конь вел'ми дивенъ, предстоящъ предъ враты монастырьскими, обузданъ поз'лащен'ною уздою, и сѣдло на немъ оковано златомъ; ıaздящаго же на немъ не бѣ; стояше же кротцѣ недвижимо, ıaко ожидаа мужа óна к себѣ. Они же дивящеся вельми, зряще красотѣ и величества коня оного. I абіе страхомъ и радостию приступиста к' коню, и видятъ два чемодан'ца не мала, по обѣ страды сѣдла висяща, полна суща. И дивястася коня оного стоянію и кротости; и помыс'листа оба брата послану ему отъ Бога сущу быти; и таже смѣя и не смѣя, помянув'ше Пречистые имя, взяста мѣшца óна с' сѣдла оба; конь же не обрѣтеся предъ ними въ тъй часъ. Они же въздавъ хвалу Богу, и начяшя радующеся разрѣшити мѣшца; и обрѣтошя въ единомъ злато, а въ другомъ сребро, плъна сущихъ оба. Милостію же Божіею и Пречистые Богоматере съвръшиста церковь и украсиста всякою лѣпотою, иконами и подпис'ми и книгами. Такоже и селъ довольно куписта и предаста монастырю; прочее же даша игумену и братьи. Таже и сами в'зяста на ся иночьскій образъ, и пожиста в томъ монастырѣ в' постѣ и в' молитвахъ и въ прочихъ добродѣтелехъ просияста и Богу угодиста; и Богъ прослави ихъ ради добрыхъ дѣлъ ихъ: в'зята быста единъ по единому, по времени, на архіепискупьскій столъ Великаго Новаграда и Пскова; и добрѣ упасше порученное стадо; и положена быста оба в соборной церкви /л. 166 г./ святыя Соѳия; а у Благовѣщеніа въ церкви положенъ бысть архіепископъ Феоктистъ: бѣ бо ис тогоже монастыря взятъ бысть на престолъ той великій. Богу нашему слава, нынѣ и присно и въ вѣки вѣкомъ. Аминь.

Печатается по изданiю: Великiя Минеи Четiи, собранныя всероссiйскимъ Митрополитомъ Макарiемъ. Сентябрь, дни 1-13. – Изданiе Археографической Коммиссiи. СПб: Типографiя Императорской Академiи наукъ, 1868. – стлб. 333-347.

Наверхъ / Къ титульной страницѣ

0