Наследие Святой Руси. Памятники древне-русской письменности
 
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Наслѣдiе Святой Руси
-
Гостевая книга
-
Новости
-
Написать письмо
-
Поискъ

Раздѣлы сайта

Святые Кириллъ и Меѳодiй
-
Книги старой печати
-
Патерики и житiя святыхъ
-
Великiя Минеи Четiи
-
Церковно-учит. литература
-
Творенiя русскихъ святыхъ
-
Стоянiе за истину
-
Исторiя Русской Церкви
-
Церковный расколъ XVII в.
-
Исторiя Россiи

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 25 марта 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

Патерики и житiя святыхъ —» Источники

Мѣсяца Мая въ 23 день.
Обрѣтенiе тѣлесе иже во святыхъ отца нашего Леонтiя, епископа Ростов'скаго чюдотворца.

Сей бѣ блаженныи Констянтиня града. Роженъ и воспитанъ отъ благовѣрну родителю, въ наученiи и наказанiи Господни. русскiи и греческiи ıaзыкъ добрѣ разумѣяше. Книгамъ же рус'скимъ и греческимъ вельми хитрословесенъ, и сказатель отъ юности бысть. Мнихъ чюденъ показася, оставивъ миръ. и за многую его добродѣтель по Божiю откровенiю отъ Фотiя патрiарха Царя града. епископомъ поставленъ бысть граду Ростову. Прежде бо его бывшiи ту епископи Ѳеодоръ и Iларiонъ избѣжаста, нетерпяста досажденiя люд'скаго. Сей же блаженныи укрѣпився силою Святыя Троицы, и помощiю Святыя Богородицы, и чюдесы люди въ вѣрѣ укрѣпи, отъ нихъ же едино скажемъ. Святому убо прилѣжащу ученiю, и наказующу въ церкви и ласкаищу младыя дѣти отступити отъ льсти идольскiя. и поклонятися и вѣровати въ Святую Троицу Отца и Сына и Святаго Духа. Старiи же невѣрьствiемъ своимъ не внимаху ученiю его, изграда из'гнаша ѝ. И паки хотяше ити къ Царю граду, милостивыи же Богъ не хотя дѣла руку Своею погибнути, но въ разумъ паче истинныи прiити, вложи ему мысль благу въ сердце, и глагола, лучше убо мнѣ умрети, нежели ослушатися повелѣнiя Божiя, и моего патрiарха. И мало отшедъ пославляетъ себѣ церковь малу близъ потока вó имя архангела Михáйла. И начатъ варити кутiю, и обилно подаяше приходящимъ младенцемъ, и поучаше ихъ съ любовiю. И мнози отъ него крестишася. и збысться реченное, ıaкоже рече Господь, ıaко вино ново в мѣхи новы вливати, и обое соблюдется. аще ли вино ново въ мѣхи ветхи в'ливати, то мѣси просядутъ, и вино пролiется, и обое погибнетъ. Тако и сей блаженныи учаше младенцы. оставивъ старыя. И абiе устремишася невѣрнiи на святопомазанную главу, хотяще его из'гнати и убити. Онъ же ни мало убояся, но крѣпляше сущыя снимъ презвитеры и дiяконы глаголя, чада небойтеся, не могутъ бо сiи намъ безъ Божiя велѣнiя ничтоже сотворити лиха. И се рекъ, облечеся въ священныя ризы и съ сущими снимъ попы и дiяконы, и изыде со кресты противу ихъ. И видѣвше его падоша вси ıaко мертви. Святыи же молитвою вся з'дравы научи вѣровати Христови. и крести ихъ вó имя Отца и Сына и Святаго Духа. И ина многа чюдеса памяти достойна сотвори. и съ миромъ отиде къ Богу егоже изъ млада возлюби. И положено бысть честное тѣло его въ церкви Святыя Богородицы, юже бѣ созда преднiи епископъ бывыи ту. И посихъ многимъ лѣтомъ минувшимъ, по Божiю благоволенiю загорѣся градъ Ростовъ, и церковь Святыя Богородицы згорѣ. И повелѣ благовѣрныи князь Андрей сынъ Георгiевъ, внука Владимиря, создати церковь каменну на мѣстѣ погорѣвшия церкве. И начаша копати рвы, и обрѣтоша множество мертвыхъ, идѣже обрѣтоша тѣло блаженнаго и Исаiи. Бѣ же церковь мáла основана. и начаша молити князя, да повелѣлъ бы бóлѣ церковь заложити. Князь же повелѣ по воли ихъ быти, ıaко да с'будется реченное Господемъ въ Еваналiи, не можетъ градъ укрытися верху горы стоя, ни свѣтилникъ подъ спудомъ утаитися. Тако и сему свѣтилнику нашему немощно толико лѣтъ покровену быти подъ землею. И се бысть все Божiимъ промысломъ. Копающе же ровъ преднiя стѣны, и обрѣтоша гробъ двѣма д'скама покровенъ. и людемъ не до умѣющимся. И ıaко уразумѣша, ıaко мощи святаго архiепикопа Леонтiя. и открыша гробъ, и видѣша лице его ıaко свѣтъ, и ризы его ıaко вчера оболчены. О, превеликое чюдо братiе, толико лѣтъ мину, не измѣнися святое тѣло его, ни ризы его истлѣша. Тогда же видѣвше вси людiе возрадовашася. и послаша вѣсть кó князю, сущу ему во Владимирѣ. Слышавъ же князь и прослави великую милость Божiю, моляшеся глаголя. Владыко Господи Iсусе Христе, что Ти принесу за се, еже ми еси показалъ во области державы моея, сицево сокровище откры. И посла в'скорѣ гробъ каменъ, и положи внемъ тѣло святаго, идѣже и нынѣ лежитъ въ церкви Святыя Богородицы, содѣвая преславная чюдеса, подая исцѣленiя съ вѣрою приходящимъ къ Святѣй Божiи Матери, и кó гробу святаго, на утѣшенiе душямъ и тѣломъ нашимъ, и въ державу христолюбивому црю нашему. Азъ же рабъ твой по достоянiю чимъ похвалити тя возмогу? Но малое сiе прiими славословiе, еже реку. радуися наставниче нашъ и учителю, ты исхитилъ еси душя [1] нашя отъ тины дна адова, и омылъ еси святымъ крещенiемъ, и накормилъ ны еси брашномъ нетлѣннаго живота. И нынѣ блаженниче помолися за мя всемилостивому Царю Христу Спасу, да безъ напасти житейскую пучину прейду, и спаси милостiю своею.

Примѣчанiе:

[1]
Рядомъ на полѣ киноварью написано: дýши.

Печатается по изданiю: Прóлогъ [Мѣсяцъ Мартъ–Августъ]. Москва: Печатный дворъ, 7152 (06.12.1643). л. 430 об.- 432 об.

Наверхъ / Къ титульной страницѣ

0