Наследие Святой Руси. Памятники древне-русской письменности
 
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Наслѣдiе Святой Руси
-
Гостевая книга
-
Новости
-
Написать письмо
-
Поискъ

Раздѣлы сайта

Святые Кириллъ и Меѳодiй
-
Книги старой печати
-
Патерики и житiя святыхъ
-
Великiя Минеи Четiи
-
Церковно-учит. литература
-
Творенiя русскихъ святыхъ
-
Стоянiе за истину
-
Исторiя Русской Церкви
-
Церковный расколъ XVII в.
-
Исторiя Россiи

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 17 октября 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

Патерики и житiя святыхъ —» Источники

Мѣсяца Генваря въ 25 день.
Житіе и иже во святыхъ отца нашего Моисея, архіепископа Новгородцкаго, чюдотворца.
Твореніе Пахомія Сербина.

Понеже убо онѣмъ и великимъ и божественнымъ мужемъ, иже еще отъ чрева матерня освященныхъ архиерействомъ, напослѣдокъ отъ Бога почтеныхъ, и наставникъ человѣкомъ бывшимъ, и многихъ ко спасеному пути наставляюще, мнози отъ нихъ велики бѣды по церкви отъ нечестивыхъ пріяша, о врученной тѣмъ паствѣ пекущеся, како и коимъ образомъ отъ еретикъ соблюсти тѣхъ неврежденыхъ. Тѣмже съ мученики и выше мученикъ виждь вѣнчаныхъ, иже по тѣхъ бывшихъ архиерей же при благочестивыхъ царехъ, яко видѣти, во благоденьствіи живущихъ и ни отъ когоже ратуемыи, но сами себѣ ратницы бяху, видѣвше неправедная, отъ царей и отъ вельможь дѣемая, видяще сиротъ потязаемыхъ, грабленія и хищенія; они бо тогда не терпяще, царей обличаху, еже на восхищеніе не желати и еже и «разумѣйте, яко тѣ и вы судію Царя имутъ на небесѣхъ». Тѣмже мнози и отъ мнящихся благочестивыхъ царей, обличенія о правдѣ не терпяще, многихъ святителей отъ престолъ своихъ отгнаша; иніи же паки, во благоденствіи живуще и во свѣтлыхъ ризахъ ходивше, но почтó творятъ, егда возвысишася? Никакоже, ино сія убо вся (предъ) человѣки творяху, яко да святительства санъ (не) уничижатъ, во умѣ иже вся сія имѣяху, яко впредьходяща и безъ вѣсти бываемая, подобна сія сну. Тѣмже святіи, преже бывше, сія помышляюще, николиже хлѣба въ сладость ядяше, но и всегда поминающе, каковыи бѣды апостоли пострадаша о стадѣ Христовѣ, яко приемницы имъ тѣхъ сановъ, тщахуся вся собою исправити, и всегда тѣхъ гласъ бяше: готово сердце мое, Боже, готово сердце мое! Ти бо не уклониша сердца своя во словеса лукавствія, ниже іелея грѣшниковъ помазати ихъ главы; тѣмже тѣхъ святыхъ житія и повѣсти и древнимъ онѣмъ списателемъ нужна бяху и неудобна, яже тѣхъ подробну онѣмъ написати, ради тѣхъ высокаго пребыванія и любовію, иже къ Богу. Нынѣшняго же рода кто отъ человѣкъ изрещи возможетъ или по достоинству похвалити, ихже сами ангели тѣхъ житію удивишася и похвалиша? Понеже святыхъ похвала до самого Бога восходитъ, по глаголу Господню, иже рече Іоанъ, яко «прославляющая мя прославлю», речетъ; о нихъ житіе по достоинству сказати кто возможетъ?

Прологъ.

Сей бо блаженный отецъ Моисей имѣяше отечество по добродѣтели — вышній Еросалимъ, нижнее же отечество — Великіи Новъградъ, рожденъ отъ благочестива родителя отца, Филиппа именемъ, благочестива и вѣрна вѣрою, богата же и славна и доброродна. Извыче священнаго писанія, измлада Христа возлюбивъ, прихожаше часто во святую церковь, къ дѣтемъ играющимъ не приближашеся. Сего ради вселися въ него Божія благодать: утаившеся отъ родителеи своихъ, отиде въ Тверскую страну, и вшедъ въ отроческіи монастырь Пресвятыя Богородицы, пострижеся отъ преподобнаго игумена; и пребывше ту въ пощеніи; принуженъ бысть родителема своима и родомъ отити оттуду, и пріиде въ Великіи Новъградъ, во отечество свое, и вселися въ монастырь Пресвятыя Богородицы на Коломцу. Иже послѣди пріиде ново на Колмово къ преподобному Макарію, стрыю своему, и ту въ болшіи подвигъ вдастъ себе, къ Богу и божественною любовію разгараяся, день и нощь поучаяся, удручая тѣло свое; и достоинъ бысть честнаго прозвитерства, посемъ поставленъ бысть архимандритомъ отъ боголюбиваго архиепископа Давыда тогоже града. Почившу же Давыду, про изволенію Божію, причтомъ и всѣми людми іизбранъ бысть Моисей на мѣсто Давыда архиепископа и поставленъ бысть архиепископомъ Великому Новуграду отъ преосвященного Петра, митрополита всеа Россіи, и добрѣ пасяше стадо свое. Собра же многи писца книжныя, наятъ ихъ преписывати книги святыя; созда же многи монастыря и священныя церкви, ихже иконами украси и книгами удоволи, и бысть обидімымъ помощникъ, вдовымъ и сиротамъ заступникъ, и силныхъ не устыдися, наставляя ученіемъ своимъ ко спасенію. Пребысть во архиепископіи лѣтъ 7, сниде въ монастырь, иже есть на Колмово, и потомъ на Деревяницу, иже монастырь и церковь созда. И по осминадесятехъ лѣтехъ, въ моръ, преставися Василіи архиепископъ; всѣми же людми и причтомъ умоленъ бысть Моисей паки на архиепископство взяти. И повелѣніе же и благословеніе пріемъ отъ Филоѳея, патриарха Царяграда, и Алексѣя, митрополита всеа Россіи, пасый словесное стадо Христово, подвизався подвигомъ добрымъ противу Стригольниковъ и благочестіе утвердивъ, по седми же лѣтехъ сниде паки въ монастырь святаго архангела Михáила на Сковоротку, егоже самъ созда; и ту поживъ 3 лѣта, ко Господу отиде преже осми (осени? на) память иже во святыхъ отца нашего Григорія Богослова, и погребенъ бысть честно архиепископомъ Алексиемъ въ притворѣ святаго архангела Михáила.

Чюдо первое, о разбойницехъ, преподобнаго архиепископа Моисея.

Лѣтомъ немнозѣмъ мунувшимъ по успеніи блаженнаго Моисея, злодіи мужи со единымъ тридесяте совѣщашася, глаголюще: «идемъ и разбиемъ на Сковоротки монастырь, ту бо Моисей архиепископъ имѣнія много остави и тѣмъ хотяху калугéри совладѣти, и у нихъ отъемше, и удоволимся тѣмъ имѣніемъ». И тако совѣщавшеся, идоша, и пріидоша близъ монастиря; яви бо ся имъ преподобныи Моисей архиепископъ, поемля ихъ по единому, обвожаше по слатѝны, томя ихъ, оставляти ихъ никоегождо погрязнути; и пришедъ Моисей, влачаше ихъ коегождо. Егда же утомишася зѣло, глагола имъ Моисей: «почто совѣщашася злѣ, и како смѣете дерзнути и грабити обитель мою? или не вѣсте силы непобѣдимаго воеводы Господня великаго архангела Михáила? Аще не покаетеся, то всѣ здѣ злѣ погибнете». Они же съ плачемъ и со слезами обѣ(ща)шася покаятися. Преподобный же Моисей архиепископъ изведе ихъ отъ слатѝны и настави ихъ на путь ко граду.

Чюдо второе преподобнаго Моисея архиепископа о Сергіи архиепископѣ.

По лѣтехъ мнозѣхъ преставленія его, обладая всесилною рукою великій князь Иванъ Васильевичъ, и архиепископа сведе Ѳеофила на Москву, въ мѣсто же его поставиша архиепископа Великому Новуграду протопопа бывшаго Московскаго Сергія. Идущу же ему въ Великіи Новъградъ на обрученный ему престолъ и менующе ему монастырь святого архангела Михáила, въ немже положено тѣло преподобнаго архиепископа Моисея, вниде въ монастырь помолитися въ церковъ архангела Михáила. И совершившу же Сергію молебная ту и тогда исходити ему изъ церкви, повѣдаша ему гробъ создателя церкви святаго архистратига Михáила и монастыря, преподобнаго архиепископа Моисея. Сергій же архиепископъ, воззрѣвъ на ту сущаго попа, повелѣ ему отверсти гробъ архиепископа Моисея. Священнику же убоявшуся прикоснутися ракѣ преподобнаго архиепископа, отвѣща ко археипископу Сергію: «не смѣю, владыко, дерзнути открыти мощи святителя; твое бо есть святительское дѣло, еже святителя гробъ отверсти». Сергій же архиепископъ, слышавъ сия отъ попа, вознесеся умомъ высоты ради сана своего, яко отъ Москвы пріиде, величаяся гражданомъ, яко племенемъ ихъ укори Сергій преподобнаго Моисея архиепископа, рекъ: «кого, сего смердія сына смотрѣти?» И тако изшедъ изъ церкви святаго архистратига Михáила, изыде изъ монастыря и пріиде въ Великіи Новъградъ. Бысть же отъ того времени Сергию архиепископу изступленіе уму; и смыслу отступившу отъ него, исхождаше исъ келліи безвременно и нелѣпо, а не по сану святительства своего. Внегда бо прилучашеся ему единому въ келіи своей быти, тогда исхождаше келіи своей единъ, не оболкся въ мантію, и сѣдяше при церкви святыя Софіи, иногда же при церкви преподобнаго Еѵѳимия сѣдяше. Пребывшу же во епископіи 9 мѣсяцъ и дній 24 не здравствуя, и тако отвезенъ бысть въ монастырь Сергія чюдотворца, иже въ Маковцы. И видѣхомъ бо въ писаніи, въ божественномъ во Еѵангеліи, гласъ Господьскіи: приемля пророка во имя пророче, мзду пророчю пріиметъ. Проявлено же о семъ и Господьскаго гласа, якоже иже пророка и праведника не яко пророка или не яко праведника приемля, лишаетъ себе и оноя мзды, и яже пророка ради и праведника ради бываемая; а иже не токмо не приемля пророка, яко праведника, во укорити или озлобити ѝ дерзнетъ, не токмо лишаемъ мзды, и паче же и казни постражетъ таковый и много лучшимъ. Въ Бытейской книгѣ слышахъ Господа Бога, глаголюща великому Аврааму: «благословящая тя благословлю и проклинающыя тя проклену»; въ видѣніи таковое святыхъ ради угодникъ Христовыхъ, благословящіи тя благословляются и презирающіи презираются, укоряющихъ сами укоризну пріимутъ. Укори бо укорити угодника Христова, Моисея, впаде самъ Сергіе во укоризну; никомуже въ человѣцѣхъ быти достойно нарече Моисея, самъ не бысть весма потребенъ въ человѣцѣхъ, и сана не почте архиерейска на Моисеи, и самъ того же испаде сана Сергіи не по мнозѣ.

Чюдо 3 святаго Моисея архиепископа о новгородци Алексіи.

Мужъ единъ отъ Великого Новаграда, именемъ Алексѣй, куплю дѣя. Прилучися ему нѣкогда въ лодіи по рѣцѣ Невы влыти ко граду, именемъ къ Выбору. Ходящу же ему по ладіи, сотвори ему діяволъ соблазнъ: свержеся съ лодіи въ рѣку, и быстринами рѣчными далече снесе лодіи отъ него скоро на низъ рѣцѣ. Алексѣй же, не могій по водѣ плавати, погрязнути хотяше во глубину водѣ, емляшеся за тресту руками, тонци же ей сущи, пригибашеся и сломляшеся въ рукý его. На долзѣ же времени томящуся ему и утопающу, абіе видѣ мужа, сѣдиною украшена доволною брадою, подъемлюща его водъ руцѣ, донелѣже возвратившимся лодіи, прияша его въ лодію. Тому же Алексѣю, идущу нѣкогда въ той же Выборъ съ торгомъ со инѣми лодіями, и шедше Нѣмецтіи разбойницы, разбиваху лодіи; Алексѣй же видѣ того же святительскаго мужа на лодіи, егоже видѣ подъемлюща его подъ руцѣ отъ воды, егда погрязнути хотяше въ Неву, донелѣже проидоша разбойницы невредившемо (ему). Не вѣдя же Алексѣй, ктó есть являяся на лодіи его, и моляшеся въ мысли своей увѣдати, ктó есть спасая его въ напастехъ? Идущу же ему вспять отъ Выбора къ Великому Новуграду, явися ему паки въ тонцѣ снѣ той же старыи мужъ, избавивый его отъ утопленія прежде и отъ разбоя послѣди, глаголя: «иди въ монастырь святаго архангела Михáила, егоже создахъ, и сотвори покровъ на гробѣ моемъ». И пришедъ въ ся, Алексѣй возрадовася, увидѣвый спасъшаго его отъ утопленія и разбоя; разуми бо явльшагося ему блаженнаго Моисея архиепископа. И пришедъ въ Великій Новъградъ, сотвори покровъ, на немже образъ святителя Моисея вышити повелѣ, и пришедъ въ манастырь великаго архангела Михáила, благодареніе воздавъ святителю Божію Моисею, и положи покровъ на гробѣ святаго Моисея, и отиде въ домъ свой, славя Бога и блаженнаго Моисея.

Иное чюдодѣйствие святаго новоявленнаго быша, ова жъ ино явленно (?).

Слово похвално.

Что же прочее къ симъ, точію: дивенъ Богъ во святыхъ своихъ, и ты еси Богъ, единъ творяй чюдеса, иже толико прославляя святыя своя; и якоже сей блаженный Моисей не бы въ 11 часъ въ Христовъ виноградъ пріиде, наипаче отъ перваго часа, рекше отъ юнаго того возраста, Господеви день и нощь всѣмъ сердцемъ служивше. Понеже бо апостольскимъ стопамъ послѣдовалъ еси, и ты же священноначалникъ и пастырь Христовъ словеснаго стада, пастырь, а не наемникъ, паствѣлъ церковь Божію. Избранъ бысть небеснаго царя добрыи воинъ, въ жизни временнѣй на страсти подвизася доблественнѣ, и въ божественнѣмъ ученіи преблагый, и во смиреніи превысокіи и нищіи духомъ, богатыи добродѣтелію, Троицы служитель, сосудъ и жилище всечестное тому бысть. И что возглаголю прочее, токмо Давыдское рещи, яко Божіи державніи земли зѣло вознесошася, и святымъ, иже суть на земли Его, удиви Господь вся воля своя въ нихъ? Аще бо успоша мощи святителя, но дѣствиемъ вещи проповѣдуютъ, и умолче тѣлесныи языкъ, но бывающая чюдеса паче трубы вопиютъ: аще и преставися отъ земли, но на небеси живъ Троицѣ предстоиши, намъ оставилъ память честныя мощи, отъ нихже исцеления почерпаемъ не токмо тѣлесная, но и душевная, иже вѣрою приходящимъ. О, архиерею пречестный, небесныи жителю, преподобнымъ и праведнымъ удобреніе, иже обуреваемымъ тихое пристанище и скорбящимъ милостивное утѣшеніе, слѣпымъ вождь, старымъ жезлъ! кротокъ же и милостивъ, отче, всѣмъ былъ еси, всѣхъ яко отецъ любяше и о всѣхъ попеченіе имѣяше, и всѣмъ душевныя струпы обязаше, и всѣмъ цѣлителныи пластырь къ тѣхъ согнѣтію прилагаше и масломъ милованія помазаше. И не бó сребру и злату стяжатель былъ еси, ино въ мѣсто сихъ доброе измѣненіе, глаголю же прежде всѣхъ — начало премудрости и страху Господню научився и любовь къ Богу и ко всѣмъ человѣкомъ нелицемѣрну стяжавъ, къ симъ же и простоту тѣлесную и душевное незлобіе, и воздержаніе о всѣхъ же и дóлу влекущихъ, бдѣніе и постъ, молитву и вѣру несумѣнну, и слезы и сокрушеніе сердца, егоже ради речеся: сердце сокрушенно и смиренно Богъ не уничижитъ. Что же противу сему отъ Бога возмездіе приятъ? — лукавыхъ бѣсовъ отъ человѣкъ отгнаніе и недугомъ исцѣленіе: слѣпымъ прозрѣніе, хромымъ хожденіе, прокаженнымъ очищеніе, разслабленнымъ стягнутіе, слукимъ исправленіе, лишеннымъ ума съ Богомъ цѣломудріе, паче ухо глухимъ, и око слѣпымъ, и нога хромымъ, всяческимъ — весь былъ еси, тѣмже Христови привелъ еси. Пріидемъ же и мы во всечестный праздникъ великаго архиерея Моисея, ликованіе тому составивши въ пѣснехъ и пѣніихъ, радующеся, вѣнчаемъ того верхъ, припадающе и молимся: молися, святителю, о всѣхъ, иже честную память твою почитающихъ, избавитіся отъ врагъ видимыхъ и невидимыхъ; вѣси бо наше неможеніе и лѣность, вѣси иже лукаваго иже на насъ навѣтъ и озлобленіе, вѣси иже и естество наше и удовъ поползаемо и къ лукаваго злоби текущи; отсюду же и твоея помощи требуемъ, милостивное исходатайственное о насъ къ Богу; да яко, егда бѣяше съ нами, много о насъ печашеся и промышляя намъ полезное, тако и нынѣ подаваяй молитвами ти вся, яже ко спасенію, прошенія: благочестивымъ княземъ нашымъ побѣды на противныя даруй, архиерея же, Божія святителя, иже любовію честное твое торжество сотворяющихъ, освяти и всѣхъ насъ помилуй молитвами си, иже тебе ради Богови моленія и молитвы приносящихъ, и сіе доношай ко Вседержителю Богу и моли о насъ, да согрѣшеніемъ оставленіе пріимемъ въ день суда, и вѣчныхъ благъ сподобити насъ. И паки къ похвалѣ устремимся и на предлежащее взыдемъ.

Той бѣ архиерей смиренъ цѣломудриемъ и благоговѣинъ и нищелюбивъ, иже есть отцемъ отецъ, святителемъ благолѣпіе и молитвенникъ крѣпокъ, чистотѣ рачитель, цѣломудрію образъ; ангельскимъ житіемъ на земли поживъ и въ Великомъ Новѣградѣ на престолѣ архиерейства саномъ божественнымъ почтенъ и украшенъ, восія, яко звѣзда пресвѣтлая, и бысть многимъ успѣхъ и многимъ на спасеніе. Мы же вѣрою и любовію припадающе, со умиленіемъ приничюще очима и темнымъ нынѣ прикасающеся, и руками обемлюще, любезно цѣлующе раку, честныя мощи твоя, и память твою святую благочестно празднуемъ. Что убо возможемъ тебѣ дати на похваленіе твоея памяти цѣльбоносныя: ангела ли тя наречемъ, яко во плоти безплотно пожилъ еси? О, святче Божіи и угодниче Спасовъ, о святителю архиерею, избранниче Христовъ, о всечестная главо, о пастырю намъ честныи и учителю, о наказателю благихъ, уча къ разуму божественному! Радуйся, твердое основаніе отечеству своему. Радуйся, яко пастырь истинный, полагая душу свою за стадо именитое. Радуйся, яко отъ младенства Богу поработавъ. Радуйся, яко мирская вся оплевалъ еси и Христовъ яремъ на рамо вземъ, усердно Тому послѣдовалъ еси. Радуйся, яко врученное ти стадо добрѣ упаслъ еси. Радуйся, Премудрости Божія престолъ украсилъ еси и градъ свой чюдесы озаривый. Радуйся, обличилъ злокозненныхъ ересь Стриголниковъ. Радуйся, святителю Моисее, Великому Новуграду похвала и всея Рускія земли пресвѣтлыи свѣтилниче. Радуйся, священный отче, насадителю винограда Христова въ домехъ Божія Матери, ихже самъ создалъ еси. Радуйся, началниче и пособниче хотящимъ спастися Христова стада словесныхъ овецъ. Радуйся, блаженный отче, умноживыи талантъ Господеви своему. Радуйся, отче освященный, пастырю и учителю Христова стада, сохраняя и соблюдая отъ волкъ мысленныхъ. Радуйся, извѣстный хранителю апостольскихъ преданій, отеческихъ повелѣніи 7 соборъ. Радуйся, преподобне отче, иже просвѣтивый страну сію чистымъ житіемъ своимъ, благочестію и страху Божію научивый. Радуйся, святителю, отечеству своему пресвѣтлый свѣтилниче, словомъ житіе просіявый. Радуйся, блаженный отче нашъ, похвала и слава великому Новуграду и всея Рускія земли удобреніе. Радуйся, отче блаженныи, украсивый Новъградъ, аки пречестнымъ утвариемъ, множествомъ божественныхъ храмовъ и священныхъ монастырей созданиемъ. Радуйся, священныи отче, теплыи молебниче къ Богу о благочестивомъ и христолюбивомъ великомъ самодержцѣ всея Рускія земли и о благородныхъ его чадѣхъ, подати побѣду на вся враги, умножити лѣтъ живота ихъ во благоденьствіи со благовѣрными самодержцы, и направити разумъ ко спасенію душамъ ихъ, и державу ихъ мирну устроити и исполнити всякія благодати. Радуйся, святителю Моисее миротворче, укротивый межу собою брань, совокупивыи любовь, ратующыяся прогнавыи и вражебныя человѣки и ненавистныя бѣсы, возвеселивыи благыя, человѣколюбныя ангелы. Радуйся, отче блаженне, ходатаю къ Богу о всѣхъ православныхъ християнехъ — направити на спасительныя. Радуйся, отче священне, скорбнымъ тишина и нищимъ заступленіе, вдовицамъ и сиротамъ помощниче, старости жезлъ, юнымъ сказателю, во бранѣхъ поборниче. Радуйся, всея Рускія земли свѣтило и украшеніе. Но, о всеблаженныи архиерею Моисее, слуго Господень, апостолу послѣдователю, ревнителю и подражателю, исправленіемъ святыхъ святителей и преподобныхъ, всѣмъ намъ молитвами твоими подавая яже ко спасенію прошенія, иже ко гробу твоему вѣрою приходящимъ, избавляя бѣдъ и недугъ и скорбей, злобующихъ нахожденія, яко добрымъ подвигомъ подвизался еси по апостолу: теченіе скончавъ и вѣру соблюдъ, тѣмже нынѣ водворяешися со святителемъ и преподобнымъ, со всѣми, óтъ вѣка Богу угодившихъ, и нынѣ наслаждаяся съ ними неизреченныя красоты и радости, яже уготова Богъ любящимъ его. Имѣя дерзновеніе ко Христу Богу, всесвященне, блаженне и преподобне отче, яко чадолюбивыи отецъ посѣщая паству свою, не презри насъ, чтущихъ вѣрою и любовію честную твою и многорадостную память, пріиди посредѣ насъ невидимо, избавляя насъ отъ всѣхъ видимыхъ и невидимыхъ врагъ, и скорбей и болѣзней и напастей, и да не оставиши моленія иже на тя зъ Богомъ надежду имущихъ, но сотвори находящимъ на ны скорбемъ премѣненіе. Ей, отче, се время, еже помощи ти и печаль на радость претворити! Можеши бо ходатайствомъ си ко Владыцѣ, точию аще хощеши, предстоя престолу всѣхъ Творца и Бога, о насъ грѣшныхъ моля, и всегда намъ помогати. Приемлетъ бо всѣхъ Владыка и твою молитву, яко благоугодилъ еси ему доброю жизнію своею, еяже ради похвалиша тя божественніи ангели, восприяша тя собори святыхъ мученикъ, апостоли, пророцы, святители, преподобніи и вси праведніи Господни; прослави же тя Господь, яко прославилъ еси Его во времена сея жизни, безконечнаго царствія своего. Егоже да не лішени будемъ и мы смиренніи, сподобившеся пожити въ вѣцѣ семъ съ правдою и милосердіемъ. Ему же слава и держава, честь и поклоненіе со безначалнымъ его Отцемъ и съ Пресвятымъ и Благимъ и Животворящимъ Духомъ нынѣ и присно и вó вѣки вѣкомъ. Аминь.

Печатается по изданiю: Памятники старинной русской литературы, издаваемые Графомъ Григоріемъ Кушелевымъ-Безбородко. Выпускъ четвертый: Повѣсти религіознаго содержанія, древнія поученія и посланія, извлеченныя изъ рукописей Николаемъ Костомаровымъ. – СПб.: Въ типографiи П. А. Кулиша, 1862. – с. 10-15.

Наверхъ / Къ титульной страницѣ

0