Наследие Святой Руси. Памятники древне-русской письменности
 
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Наслѣдiе Святой Руси
-
Гостевая книга
-
Новости
-
Написать письмо
-
Поискъ

Раздѣлы сайта

Святые Кириллъ и Меѳодiй
-
Книги старой печати
-
Патерики и житiя святыхъ
-
Великiя Минеи Четiи
-
Церковно-учит. литература
-
Творенiя русскихъ святыхъ
-
Стоянiе за истину
-
Исторiя Русской Церкви
-
Церковный расколъ XVII в.
-
Исторiя Россiи

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 23 октября 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

Патерики и житiя святыхъ —» Источники

Мѣсяца априлліа въ 8 день.
Житіе преподобнаго отца нашего Нифонта, бывша въ пощеніи въ велицѣи лавры Киевскія пещеры, въ начальствѣ преподобныхъ отецъ Антонія и Ѳеодосія, посемъ бывша епископомъ въ Великомъ Новѣградѣ и достоино памяти исправиша дѣла.
Списано священноинокомъ Варламомъ, смиреннымъ мнихомъ.
Благослови отче.

Благословенъ Богъ Отецъ Вседержитель, Творецъ небу и земли, видимымъ же всѣмъ и невидимымъ. Благословенъ единочадный Сынъ Слово Божіе, безначале иже отъ Отца родися Богъ, отъ Отца Премудрость, всѣхъ составленіе содержай и сила всея твари сотворша. Благословенъ Параклитъ Святыи и животворящіи Духъ, отъ Отца исходяй и Сыномъ являемь человѣкомъ, всесоставная единосущная Святая Троице, Отецъ и Сынъ и Святыи Духъ, содержавная славою, собствомъ, царство неискоренимое, безначальное естество, владычне достоинство, естественная благостыни!

Въ Троицы единъ Богъ, содѣтель и содержитель и промысленникъ всѣхъ, дая просящему мудрость и разумъ, не презря согрѣшившаго, но положи во спасеніе покаяніе, Егоже поютъ небесныя силы и славятъ воинства ангелъ, Того убо преблагаго и премилостиваго Бога благодарствуя и азъ недостойный и худый во всѣхъ мнисѣхъ священноинокъ Варлааміе, аще нѣсмь достоинъ на славословіе, Того благостыня, Тому и приношу исповѣданіе и велелѣпоту и молюся услышати мя, въ оньже день аще призову тя, яко дати ми слово ко отверзенію устъ моихъ, яко да исповѣмъ слово добродѣтели, пользы душевныя исполнено; воистинну бо того достойно благословити и молитіся Ему непрестанно и призывати на помощь, сошедшимся намъ въ память святаго великаго отца, яже о немъ нынѣ списаніе впреди да глаголется, Нифонта реку, бывшаго въ велицѣй лавры Печерскія божественныхъ отецъ Антонія и Ѳеодосия ангельскимъ житіемъ и пребываніемъ. пришедша и посемъ священія столпъ украсивша Великаго Новаграда, многи же душы спасше и Богу приведша, и равноапостольскую благодать пріимша отъ Бога, и проповѣда во всемъ мирѣ слово истинно, исправляше вѣру Святыя Троицы. Понеже Божій даръ человѣкомъ даровася сей отецъ нашъ, воистинну святый великіи Нифонтъ, преже созданія его, иже въ утробѣ матерня избранъ бѣ Богомъ вышнимъ и преже роженія своего освященъ бѣ Духомъ Святымъ на великіи престолъ Великому Новуграду, пасти стадо христоименитое словесныхъ овецъ новокрещеныхъ людей яко и житія иноческого уставъ ему имѣти и священія истиннаго образъ праведный ему хранити.

Аще боле есть силы моея начатокъ положихъ жітія святаго великаго отца Нифонта, но убо нѣчто зачнетъ ми честная и милостивая óна душа, многогрѣшному и недостойному своему рабу, таковаго бисера во уста своя скверная прияти ми, или во умъ свой скудный вмѣстити. Овому же уразумлено будетъ, разумѣйте же вси душеполезнаго сего житія послуси, ничтоже еже къ силѣ недостаточествующа. Аще болѣ къ достоянію недостаточествую, подобаетъ же мало бывше слово приведша, яко отъ нѣкоея таковыи великіи сей мужь благочестну и святу и милостиву родителю рождься; и о имени же отца его, такоже и матери, въ повѣстехъ нигдѣже писаніе не обьяви, иже многа лѣта прешла суть до написанія сего, иже въ первая лѣта его не написана быша о имени родителехъ его. И сего не свѣмы писанію предати, но токмо вѣмы, яко отъ благочестну родителю и святу рождься сей великіи отрокъ.

Бяху же благочестніи родителіе святаго отрока отъ великаго и столнаго града Киева, отъ окрестныхъ мѣстъ града того, во благочестіи живуще и много милостыню отъ своего имѣнія дающе церквамъ Божіимъ и причетникомъ церковнымъ, и трапезы имъ устраяше въ дому своемъ, и учрежаше доволне сей мужь благочестивый и съ супругою своею многажды; такоже нищихъ и странныхъ и маломощныхъ миловаше, и трапезу имъ поставляше множицею, и тако творяху родителіе блаженнаго отрока и до исхода душы своя еже отъ тѣлеси; и паки всегда хождаху въ церковь Божію ближняго мѣста веси тоя родителіе же блаженніи óни, и моляху Бога и Пречистую Богородицу со многими слезами, чтобо имъ послалъ Богъ плодъ чревныи, понеже бо безчадни бяху они. И услыша Богъ чистую молитву ихъ, и дастъ имъ плодъ чреву мужескіи полъ, сего блаженнаго отрока, о немже намъ повѣсть впреди предлежитъ, якоже древле пророка Самойла. И абіе рождшуся сему великому отроку отъ такову родителю благочестну, понеже Богъ не презри молитвы родителей онѣхъ и дастъ имъ плодъ чрева и милостыни ихъ ради многи и чистоты и добраго ихъ житія иже къ Богу, и тако родителіе великою радостію и желаніемъ сердечнымъ принесоша отрока въ церковь Божію, иже близъ дому ихъ, идѣже и молебныя глаголы возъсылаху къ Богу, и ту крестиша и во имя Отца и Сына и Святаго Духа, во единосущную и нераздѣлимую Троицу, и нарекоша имя ему въ святомъ крещеніи Никита. И о семъ бысть радость велика въ дому родителей онѣхъ о рожденіи блаженнаго отрока, и милостыня бяше многа, учреженіе въ той день прозвитеромъ и причетникомъ церковнымъ, и сосѣдомъ и нищимъ. Якоже древле Іоакима и Анну услыша Богъ паче надежа и неплодная има ложесна разверзе и дастъ имъ плодъ чреву Пречистую Дѣву Богородицу Марію, иже породи намъ Господа нашего Ісуса Христа, Спасителя всему миру, спасша насъ отъ прелести діяволя; такоже и сего святаго отрока родителей не презрѣ Богъ моленія ихъ, и милостыня ихъ ради и добрыхъ дѣлъ дастъ имъ плодъ чрева. И о семъ вси славяху Бога и Пречистую Богородицу, и отхождаху въ домы своя.

И по семъ отроку оному устрабившуся мало нѣчто возрастомъ, и вданъ бываетъ родительми своими учитіся божественнымь книгамъ. И абіе вскорѣ никако извыкшу книжное ученіе, и нимало исхожаше съ сверстники своими на игры дѣтскія, но паче прилежаше къ церкви Божіи и въ сласть почиташе божественная писанія, и внимаше умомъ еже спастися и въ разумъ истинныи пріити и преставити чиста предъ Богомъ и предъ святыми ангелы, и предъ тмы тмамы святыхъ — отъ всѣхъ злыхъ дѣлъ во второе пришествие Христово. И печашеся блаженныи отрокъ о души своей, вещи безсмертнѣй, и ничтоже вмѣняше житіе се, но паче сѣнь и сонъ, или яко цвѣтъ травный вмалѣ является и вскорѣ погибаетъ. И тако блаженный отрокъ Никита отъ того времени никакоже печашеся о плоти своей, но врагъ немилостивый бываше плоти своей, и нача воздержатися постомъ и бдѣніемъ и молитвами, и сладкихъ не ясти отнюдъ, но чтяше день архангельскый, первой недѣли, сирѣчь понедѣльникъ, такоже и среду, иже въ среду предаша жидове на пропятіе Владыку Господа нашего Ісуса Христа архиереомъ; такоже святыи добрѣ чтяше и пятокъ, иже въ пятокъ въ шестый часъ распятъ бысть Господь отъ жидовъ, волную страсть подъятъ за родъ человѣческій, за созданіе свое, Учитель нашъ Христосъ крестъ, копіе, трость, гвоздіе въ честныя и святыя руцѣ свои и нозѣ, такоже и óцетъ со желчию смѣсивъ, напоиша губу, на трость принесоша ко устомъ Господнимъ окаянніи тіи жидове; Христосъ же, вся сия терпя насъ ради и нашего ради спасенія, сие все понесе на пречистѣй плоти своей, хотя насъ избавити, созданіе руку своею, отъ работы вражия, иже праотецъ нашъ Адамъ первозданный и съ праматерию нашею Еввою заповѣдь Божію преступиша въ раи, прельщени быша отъ злаго діявола змія, и паки же Христосъ на крестѣ распяся и рукописаніе Адамле раздра на древѣ, иже преда Адамъ на собя и на весь родъ свой, и въ то время честною кровію Христовою крестися Адамъ, истекшею исъ честныхъ и со святыхъ его ребръ и съ ногъ Господнихъ; и посемъ самъ Господь нашъ Ісусъ Христосъ сниде въ преисподняя страны земли и сокруши адскія вереи, и заклепы вѣчныя излома, и самого діявола сатану связа нерѣшимыми узами желѣзными во вѣки и на вѣки, а Адама же и Еѵву и вся пророки и праведники, иже отъ вѣка держимыя, изведъ съ собою отъ преисподняго ада, и паки внидоша они во святый градъ Іеросалимъ и явишася многимъ по воскресеніи Господни; а нечестивіи же осташа въ преисподнемъ ада тмы мрачныя и несвѣтимыя со діяволомъ и со слугами его. И сие доздѣ. О немъ же слово да глаголется.

Отроку же блаженному Никаты тые три дни хранящу во всемъ, ядь же бяше блаженнаго хлѣбъ и вода, и то въ мѣру ему бяше. Не угожаше святый нимало плоти своей, но души повиноваше плоть свою, якоже рабыню томяше ю алчбою и жаждею и бдѣніемъ и на земли леганиемъ, и молитва бяше во устѣхъ его всегдашняя со слезами сердечными. Аще и въ мирѣ живяше и бѣлыя ризы носяще, но вся ему бяше человѣческая исправленія.

О преставленіи къ Богу родителей блаженнаго отрока.

По малѣ же времени родителемъ святаго отрока отшедшимъ отъ суетнаго житія сего къ Богу въ вѣчный покой, блаженный же отрокъ единъ остася въ дому родителей своихъ. И тако ихъ сохранивъ и предавъ гробу честнѣ и добрѣ, управивъ по нихъ поминаниемъ и милостынею многою, якоже лѣпо бѣ по умершихъ творити, и понеже желаніе велие имѣя отъ уны версты святый отрокъ Никита, еже отврещися мира сего суетнаго и яже въ немъ долу влекущая мудрованія и облещися во иноческий чинъ и ангельскаго спребыванія, — еже и бысть, — и по семъ родителей своихъ имѣніе раздая нищимъ и маломощнымъ, а ино, еже отъ имѣнія своего, церквамъ Божиимъ, блаженныи отрокъ Никита, понеже бо и самъ святый желаше быти церковь Святому Духу, еже и бысть, и по семъ самъ отшедъ святыи въ Печерскіи монастырь Киевскаго мѣста, и тамо паки молитъ игумена монастыря того со слезами, да пострижетъ ѝ во иноческіи чинъ. Игуменъ же паки повелѣ его пострищи во иноческіи чинъ, и абіе постриженъ бысть, и нарекоша имя его иноческое Нифонтъ. И добрѣ предався Богу і игумену и братіи, и отъ того времени вдастъ себе святыи на труды дѣломъ тѣлеснымъ, и бдяще по вси нощи во славословіи Божіи, мало сна пріимая, и воздержася отъ всѣхъ похотей тѣлесныхъ; въ среду же и въ пятокъ, такоже и понедѣлнікъ, ни единощи вкушаше хлѣба, но въ молитвахъ пребываше и въ колѣнопоклоненіихъ, такоже и въ посты четыре постяся и бдя и на земли легая, тѣло свое изнуряя и своима рукама дѣлая на братию, яко дивитися игумену и всей братіи смиренію и покоренію, и великому послушанію святаго Нифонта и воздержанію его и бодрости. И тако игуменъ и братія велми о немъ прослависта Всемилостиваго Бога и Пречистую Богородицу, яко такова свѣтилника и свята мужа дарова Богъ Печерскія честныя обители.

О поставленіи святаго отца Нифонта на епископію Великому Новуграду, и како видѣ святаго Ѳеодосия Печерскаго въ божественномъ откровеніи.

Блаженныи отецъ Нифонтъ бысть у черноризецъ Печерскаго иже въ Кіевѣ святаго монастыря, тѣхъ святыхъ Печерскихъ житію ревнуя. И за премногую его добродѣтель, избраниемъ Святаго Духа, по правилному извѣщенію, поставленъ бысть епископомъ Великому Новуграду, при великомъ князи Новгородцкомъ Всеволодѣ Метиславичѣ. И добрѣ пасяше стадо Христово новопросвѣщенное словесныхъ овецъ, и учаше люди съ прилежаніемъ вѣрѣ Христовѣ и всѣмъ заповѣдемъ Божіимъ. И многия церкви во имя святыхъ поставляше въ Великомъ Новѣградѣ блаженный Нифонтъ, такоже и монастыри строяше святый со блаженнымъ княземъ Всеволодомъ Мстиславичемъ, нареченнымъ во святомъ крещеніи Гавріиломъ. Посемъ же блаженный князь Всеволодъ преставися въ богохранимомъ градѣ Псковѣ, живъ едино лѣто, тамо и положены быша честныя его и святыя мощи, въ церкви святаго великомученика Димитрія Селуньскаго въ Дамантовѣ стѣны; и паки по лѣтѣхъ многихъ обрѣтены быша святыя его мощи цѣлы и ничимже вреждены, и пренесены быша въ соборную церковь Святыя Троицы, и ту положены быша въ предѣлѣ святаго Благовѣщенія Пречистѣй Богородици; и тако многа и различна исцѣленія источаютъ отъ всѣхъ недугъ съ вѣрою приходящымъ даже и до днесь въ память его; но паче же сами чюдеса свидѣтельствуютъ отъ честныя его раки. — Сіе доздѣ, но на предлежащее взыдемъ о блаженномъ Нифонтѣ, о немже слово да глаголется впредѣ.

И по семъ блаженныи Ниѳонтъ въ благохранимѣмъ градѣ Псковѣ созда церковь во имя боголѣпнаго Преображенія Господа Бога и Спаса нашего Ісуса Христа, между двою реку — Великія рѣки и Малыя Мирожи, во славу Божію; и созда монастырь превеликъ зѣло и честенъ, и украси ѝ вельми, и села вдаде многы на устроеніе монастырю своему, и братию собра многу на славословіе Божіе. И ту святый остави во обители боголѣпнаго Преображенія Христова жезлъ свой на воспоминаніе братіи и въ память родомъ грядущимъ (жезлъ же той святаго Нифонта цѣлъ даже и до днесь молитвами его святыми пребываетъ въ большей церкви святаго Преображенія всѣмъ видимъ), и старѣйшину имъ игуменомъ постави единаго отъ братіи честнаго и свята, и все ему святый преда — строеніе монастыря своего и попеченіе еже о паствѣ; а самъ святый Нифонтъ отъиде въ Великій Новъградъ.

И тамо бывшу ему на епископіи въ Великомъ Новѣградѣ доволно время, и паки слыша святый, яко отъ вселенскаго патріарха въ Россию иде во градъ Киевъ Констяньтинъ митрополитъ, и абіе радости духовныя наполнився блаженныи епископъ Нифонтъ и помысливъ себѣ, рече, яко «да обое совершу: во обители Пречистыя Печерския буду и преподобнымъ отцемъ Антонію и Ѳеодосію поклонюся» (понеже бо велию вѣру имѣя святый къ Пречистѣй Богородици и къ преподобнымъ отцемъ Антонію и Ѳеодосію) «и отъ святителя благословеніе пріиму». И по семъ таковыя ради вины отъиде святый ко граду Киеву, въ лѣто 6664-го [1156]. И тако пребывающу святому во градѣ Киевѣ въ Печерскомъ святомъ монастырѣ, ожидаше святый митрополича пришествия, бяше бо святому отцу Нифонту вѣдомо, яко извѣстно отъ царствующаго града выиде Констяньтинъ митрополитъ.

Въ то же время Климъ митрополитъ, столпъ святительскій пріимъ Кіевскія митрополіи не патріаршимъ благословеніемъ вселенскаго патріарха Царяграда, но своимъ изволениемъ, и сего блаженнаго Нифонта понуждаше Климъ служити съ собою. Святыи же Нифонтъ глаголаше ему: понеже не приялъ еси, отче, благословения отъ святаго вселенскаго патріарха Царяграда, ни воспоминати тебе во святѣй службѣ, но поминаю въ божественнѣй службѣ святаго патриарха Царяграда. И такоже паки Климу вельми разъярившуся и принужающу святаго служити съ собою, и поминати повелѣваше себе въ божественнѣй службѣ, святый епископъ Нифонтъ никакоже не хотя сего сотворити, еже поминати Клима и служити съ нимъ. И за сие тако научаше Климъ на святаго Нифонта князя Изяслава и своя ему поборники, яко да сотворятъ святому нѣкое зло за преслушаніе святаго. И паки не возможе Климъ митрополитъ съ своими поборники нимало зла святому отцу сотворити, но Божія благодать храняше его за его праведное страданіе, якоже рече Богоотецъ во словесѣхъ своихъ святыи пророкъ и царь Давыдъ, глаголя: тіи съпяти быша и падоша — неправедніи поборники, а святыи воста и исправися предъ Богомъ; не пренеможе бо злоба наносимое на святаго никогдаже, и паки восприятъ святитель Христовъ Нифонтъ вѣчное наслажденіе со святители во Царствіи Небеснѣмъ.

Патриархъ же Царяграда, слышавъ яже о святѣмъ Нифонтѣ, наносимую скорбь на святаго отъ Клима митрополита, восхитившаго санъ святительскій на ся своимъ изволеніемъ, и присла вселенскіи патриархъ Царяграда ко святому посланіе, сице рекъ:

Посланіе.

О Святѣмъ Дусѣ сыну и сослужебнику нашего смиренія радоватися о Господѣ, доброму пастырю Христова стада словесныхъ овецъ, господину епископу Великаго Новаграда Нифонту.

Слышахомъ, господине, о твоемъ праведномъ страданіи, иже Бога ради страждеши противу Клима митрополита, иже безъ нашего благословенія взялъ на ся Киевскую митрополію своимъ изволеніемъ, и ты ему, честный отче, запрещаеши о таковѣй велицѣй дерзости святительскія и не хощеши, отче, съ нимъ служити, ни въ божественнѣй службѣ поминаеши его; и много отъ него досажденія злаго и укоризны претерпѣлъ еси, святче Божіи. И ты, страдалче, и еще терпѣ о правдѣ Бога ради и не пренемогай отъ злаго сего аспида Клима и отъ его злыхъ совѣтникъ, и будеши причтенъ отъ Бога, брате, къ прежнимъ святымъ, иже твердо о православіи пострадавшимъ і иже по тебѣ бывшемъ святителемъ въ Роускои земли, и всѣмъ покажеши образъ терпѣнія своего. Миръ тебѣ, отче, и нашего смиренія, страдальче Христовъ, буди на тебѣ благословеніе во вѣки. аминь.

Святыи же, пріимъ патриарше посланіе и прочетъ, и вельми крѣпостію себе утвердивъ на противника Христову закону Клима митрополита. И тако блаженныи отецъ нашъ Нифонтъ, любовь имѣя велию духовную со княземъ Святославомъ со Олговичемъ (бѣ бо прежде того Святославъ сѣдѣ въ Новѣградѣ), бывшу же сему блаженному Ниѳонту епископу во святѣмъ Печерскомъ манастырѣ и велію вѣру имѣя святыи къ преподобнымъ отцемъ Антонію и Ѳеодосию, якоже речено бысть прежде, и абіе не по мнозѣ времени постиже святаго отца Нифонта болѣзнь; уже бо небесному званію пришедшу. И тако хотяше святый тѣлеснаго союза разрѣшитися и естества отдати долгъ небесному Царю и Владыцѣ Христу. И тако преже болѣзни своея за три дня дивно видѣніе видѣ, и всѣмъ ту повѣда — игумену и братіи видѣніе оно, глаголя: «Пришедшу ми, рече, отцы святіи, отъ заутрени и мало почившу, и абіе въ тонокъ сонъ сведенъ быхъ. И се обрѣтохся въ церкви Печерския Пресвятѣй Богородицы честнаго Ея Успенія, на Святошинѣ мѣстѣ; и молящу ми ся много со слезами Пречистѣй Богородици, да быхъ видѣлъ святаго преподобнаго отца Ѳеодосія, и паки собирающимся братіямъ многимъ въ церковъ святѣй Богородици, и приступивъ ко мнѣ единъ братъ и рече ми: хощеши ли видѣти святаго отца Ѳеодосія? И паки же отвѣщахъ и рекохъ брату, явившему мнѣ, глагола: зѣло желаю, честный отче, видѣти святаго отца Ѳеодосия; аще ти есть мощно, покажи ми его. И паки поимъ мя старецъ онъ, и введе мя во святыи олтарь, о тамо показа ми святаго отца Ѳеодосия. Азъ же смиренный, мніи епископъ Ниѳонтъ, видѣхъ преподобнаго, и отъ радости, притекъ, падохъ на нозѣ его и поклонихся святому до земли. Святыи же Ѳеодосіи востави мя отъ земли и нача благословити, и обыимъ мя святыма своима рукама отецъ Ѳеодосіе, и нача любезно лобызати мя и рече ми: добрѣ, пріиди, отче господине пречестныи и сыну Ниѳонте, и отселѣ будеши съ нами неразлучно. И тако держащу преподобному Ѳеодосію въ руцѣ своей свитокъ, и мнѣ же просящу его, яко вда ми; и разгнухъ свитокъ онъ и прочтохъ. Бяше же въ немъ написано въ началѣ сице: се азъ и дѣти, яже ми есть далъ Богъ. И въ той часъ возбнухъ, и не видѣхъ никогоже. И нынѣ, отцы святіи, вѣмъ, яко сия болѣзнь — посѣщеніе ми отъ Бога бысть».

О преставленіи святаго отца Нифонта.

И по сихъ блаженныи отецъ нашъ Нифонтъ епископъ нача тѣломъ изнемогати, иже душею крѣпкіи, духъ же восхотѣ къ желаемому Христу преди послати. И тако болѣвшу блаженному отцу епископу Нифонтоу въ Печерскомъ монастырѣ 13 дней, і абие святыи, причастився на честный исходъ души своея честному и святому тѣлу и крови Христа Бога, и тако всѣмъ миръ давъ и благословеніе игумону и братіи, и отъ нихъ взя благословеніе и миръ. И начатъ, на образъ Господа нашего Ісуса Христа взирая, и молити со слезами, глаголя:

Молитва.

Но обаче молю ти ся, Владыко мой Ісусе Христе, милостивъ буди души моей, да не усрящутъ ея противъныхъ лукавство, но да пріимутъ ю ангели твои, проводятъ ю отъ темныхъ мытарствъ, и приводяще ю къ твоего милосердія свѣту.

И сие изрекъ, крестнымъ знамениемъ знаменався, и глаголя: Господи, въ руцѣ Твои предаю душу мою. И тако успе съ миромъ, мѣсяца апрѣля въ 8 день, на свѣтлыа недѣли въ субботу. Пасъ же святыи Нифонтъ церковь Божію въ Великомъ Новѣградѣ лѣта 25 и осмь мѣсяцъ. И положено бысть честное и святое тѣло отца въ пещерѣ Ѳеодосиевѣ. Бысть же святыи средніи тѣломъ, браду же имѣя продолгу не велми и не широку, тьмяну, вполсѣду, свилася на четверо. И по семъ паки отъ раки честныя святаго много чюдеса и различна бываютъ вѣрнымъ даже и до сего дни, молитвами его святыми. И тако къ любимому отцу пріиде, якоже обѣщася ему Ѳеодосіе преподобныи, вкупѣ Владыцѣ Христу предстояще и наслаждающеся неизреченныхъ онѣхъ небесныхъ красотъ и о насъ молящеса, своихъ чадѣхъ.

Сицевы чюдніи мужи въ томъ святомъ Печерскомъ монастырѣ быша, иже мнози отъ нихъ апостоломъ сопричастницы быша и престоломъ ихъ намѣстницы: понеже бо сей блаженныи отецъ нашъ чюдотворецъ Нифонтъ епископъ многи церкви Христовы во имя святыхъ устрои, и монастыри въ Великомъ Новѣградѣ и по мѣстомъ, и многа чюдеса сотвори о Христѣ въ животѣ своемъ, и отиде отъ житія сего суетнаго и плача достойнаго въ вѣчный покой и въ непроходимую и неизреченную радость, и преселися ко святымъ, иже отъ вѣка угождшимъ Богу, и тамо любимыхъ своихъ отецъ Печерскихъ Антонія и Ѳеодосія обрѣтъ и съ ними водворился еси въ небесныхъ селѣхъ, и нынѣ со всѣми святыми молитъ непрестанно о православномъ и христолюбивомъ цари и великомъ князѣ, имярекъ, самодержцы всеа Русіи Великія, и о всѣхъ благовѣрныхъ князѣхъ и о всехъ ихъ, иже Рускою землею пекущихся, и о всѣхъ провославныхъ христіянѣхъ, иже даровати на враги, на невидимыя и видимыя, побѣду, на бесерменство и латинство и на вся иновѣрныя языки, иже блудящихъ отъ истинныя вѣры христіанскія и не пріимшихъ святаго крещенія во единосущную и нераздѣлимую Троицу, и не почитающихъ Господа Бога и Спаса нашего Ісуса Христа, единосущна и сопрестолна и нераздѣлна Отцу и Святому Духу и сѣдяще одесную Отца со единосущнымъ и животворящимъ Духомъ Святымъ. И пакп пріити имать второе на землю Господь нашъ Ісусъ Христосъ съ Пречистою Богородицею, Материю Своею, и со Предотечею, и со святыми апостолы и со всѣми небесными силами судити живымъ и мертвымъ и воздати комуждо по дѣломъ его, праведнымъ — животъ вѣчный, а грѣшнымъ — муку безконечную, ейже конца не имущіи во вѣки.

Похвала святителю Христову Нифонту, епископу Новгородцкому.

Ты же, пречестныи отце, святителю Христовъ прекрасныи Нифонте, избѣжалъ еси темныхъ и лукавыхъ духовъ мытарствія добродѣтелнымъ житіемъ и добрымъ изволеніемъ и страданіемъ праведнымъ отъ злаго аспида Клима, митрополита Киевскаго, и добрѣ, отче, преплылъ еси, яко въ бури носимъ, море житія сего, лютаго миродержца непостоянную пучину, и побѣдилъ еси полки темныхъ бѣсовъ, и дошелъ еси, честный отче, святче Божіи, горняго Іеросалима, идѣже Отецъ и Сынъ и Святыи Духъ і идѣже святыхъ отецъ ликове водворяются и праведныхъ дуси веселятся, и тамо наслаждаются неизреченныя радости Царя царствующимъ Владыки Христа, идѣже око не видѣ, ниже ухо слыша, ни на сердце человѣку взыде, яже уготова Богъ любящимъ Его и творящимъ волю Его и хранящимъ заповѣди любящимъ. Ты же, святителю Христовъ Нифонте, вся заповѣди Божия дѣлы добрыми сохранилъ еси и со всѣми святители въ горнемъ Сионѣ водворился еси въ неизреченнѣй радости, идѣже всѣмъ веселящимся есть жилище.

И нынѣ, святителю Христовъ, угодниче Нифонте, како тя похвалимъ, или кими похвалными вѣнцы вѣнчаимъ верхъ твоея добродѣтели, или которыми похвалами почтемъ мы, смиренніи и недостойніи раби твои? Понеже бо хвалу приялъ еси и вѣнецъ терпѣнія побѣды отъ Вседержителя Бога. Хвалитъ бо Римъ великіи и со окрестными грады Петра и Павла, иже просвѣтиша святымъ крещеніемъ иновѣрныя языки и научиша вѣровати ихъ во единосущную и нераздѣлимую Троицу. А Иоанна Богослова, дѣвьственника и наперстника Христова, Ефесъ градъ великіи и Патмоскіи островъ и вся страна Асійская похвалными пѣсньми почитаетъ, яко много капища бѣсовскія сокрушившаго силою Ісуса Христа, Сына Божія, и научи(в)ша вѣровати многи языки Отцу и Сыну и Святому Духу, во единосущную и нераздѣлимую Троицу, и во вся концы вселенныя яко громъ возгремѣлъ еси: искони бѣ Слово и Слово бѣ къ своему родителю; таже и прочее. Марка же великая Александрия хвалитъ, яко многи церкви во славу Христову создавшаго и епископы и попы и діяконы освятившаго, и люди научившаго вѣровати во Христа. Такоже хвалитъ и Луку градъ Аньтиохія и со окрестными грады и весми, яко врача хитростію искуснѣйша, и многа исцѣленія цѣлбы творяща человѣкомъ о Исусовѣ имени во славу Христову, и написавъ часть божественнаго евангелія болѣ инѣхъ евангелистъ, и Дѣянія Апостольска сложивъ къ нѣкоему Ѳеофилу князю, и во дни Траиана царя безбожнаго собравъ христіянъ множество мужей и женъ и младенецъ на мѣсто нѣкое, отъ града яко три поприща, идѣже себѣ святый мѣсто уготова, в поучивъ ихъ о пользѣ душевнѣй и о возданіи будущихъ и вѣчныхъ благъ отъ Господа нашего Исуса Христа, иже воздастъ комуждо по дѣломъ его, и тако успе съ миромъ и погребенъ бысть вѣрными на мѣстѣ томъ. Такоже хвалитъ и Греческая земля царя Констянтина съ матерію Еленою, равноапостольское дѣло сотвори(в)ша, и крестъ Христовъ и копіе и гвоздне обрѣтша. И градъ же Кіевъ и вся Руская земля великаго князя Владиміра похваляетъ; сей же Владиміръ просвѣтилъ бяше Рускую землю святымъ крещеніемъ. Московская же земля Петра митрополита, иже во ученіи превеликаго. Ростовская же — святителя своего Леонтія епископа, сокрушившаго капища идольская и породившаго люди Ростовския божественнымъ крещеніемъ. Псковская земля ублажаетъ своихъ чюдотворцевъ, великаго князя Всеволода Мстиславича, нареченнаго во святомъ крещеніи Гавріила, и преподобныхъ отецъ Еѳросина и (с)постника его Саву, Крыпецкія обители началника, иже во мнозѣхъ и различныхъ чюдесѣхъ і исцѣленіи просиявши, такоже и нынѣ творятъ непрестанно отъ честныхъ и святыхъ своихъ ковчеговъ, идѣже лежатъ святыя ихъ мощи; въ житияхъ ихъ святыхъ свидѣтельствуетъ о чюдотвореніи ихъ. О пречистнѣйшіи святителю Христовъ Ниѳонте! тебе же хвалитъ Великій Новъградъ и вся земля Новгородцкая и Псковская, епископа своего, нелѣностнаго во ученіихъ и крѣпкаго въ терпѣніи, и многи душы спасша добродѣтельнымъ своимъ ученіемъ и ко Христу приведшаго, и церковь Божію просвѣтившаго, и отъ ересей соблюлъ еси непоколебиму и немятежну.

Земля же Киевская и священныхъ множества и Печерская обитель, въ нейже сподобился еси яремъ Христовъ прияти, и стада иночестіи и твоея ограды иноцы, юже составилъ еси во градѣ Псковѣ надъ Мирожею рѣкою, вси тебе духовными пѣснми воспѣваютъ, и похваляюще, глаголютъ:

Радуйся, отца благочестива и матере благоговѣйны и доброплодны вѣтвь. Радуйся, отче Нифонте, иже измлада Христа возлюбилъ еси и Пречистую Богородицу, Ейже и служитель бысть. Радуйся, отче Нифонте, иже въ Печерскія обители всѣмъ на устѣхъ былъ еси инокомъ, и вси, по Бозѣ ревнующе твоему добродѣтелному житію, спасошася. Радуйся, святителю Христовъ Нифонте, иже отъ столнаго града Кіева яко свѣтозарное солнце восиялъ еси Великому Новуграду, и престолъ (Пре)мудрости Божіа украсилъ еси, и нелѣностно апостольски люди своя научилъ еси ученіи божественныхъ словесъ медоточнаго языка, и всѣмъ всякъ былъ еси по апостолу, да вся и приобрѣлъ еси отъ Христа (Христу). Радуйся, святителемъ изрядная похвало отче Ниѳонте, и нищимъ, бѣднымъ и вдовицамъ заступникъ и кормитель былъ еси. Радуйся, свѣтозарное солнце святителю Христовъ Ниѳонте, иже отъ Великаго Новаграда свыше званіе приялъ еси отъ вышния десницы Владыки Христа, и предтеклъ еси, отче, радуяся, яко на аерѣ къ славному граду Киеву во свое отечество, идѣже яремъ Христовъ сподобился еси прияти въ пречистыя обители Печерския, и тамо преподобнымъ отцемъ Антонію и Ѳеодосію поклонился еси, извѣщеніе отъ святыхъ приялъ еси, отче прекрасне Нифонте, о своемъ преставленіи къ Богу. Радуйся, отче Нифонте, преудобренный благодатію Святаго Духа и преукрашенный истинною и правдою оболченныи. Радуйся, отче прехвалне Нифонте, иже святыхъ ангелъ ликове съ радостию предстрѣтаху тя и честно пріимаху пресвятую душу твою, почесть творяху, отче, души твоей и радостно съ духовными нѣсньми приношаху душу твою ко престолу Владыки Христа. Радуйся, иже честно и радостно святую душу свою въ руцѣ Господеви предалъ еси, яко пресвѣтлая луна къ незаходимому солнцу Христу пріиде и со всѣми святыми во дворѣхъ Господа Саваофа препочилъ еси, и любимыхъ своихъ отецъ Антонія и Ѳеодосія обрѣтъ и съ ними же Христу предстоиши, и тамо наслаждаешися доброты Владыки Христа, человѣколюбца всѣхъ Бога. И моли о мирѣ всего мира, о благосостояніи святыхъ Божіихъ церквахъ. Радуйся, отче Нифонте, иже сподобился еси честнымъ твоимъ мощемъ положеномъ быти со отцы преподобными въ Киевския пещеры, и тамо духи лукавыя прогоними бываютъ отъ вѣрныхъ; но и на всякомъ мѣстѣ призваніемъ святаго твоего имени вси исцѣляхуся во имя Христово.

Помоли же ся Христоу Богу, священный отче Нифонте, за пречестнѣйшаго архиерея Макария, иже престолъ держащаго Пречистѣй Богородици честнаго Ея Успенія во всей Великія Россіи і исправляющаго слово Божія истинныя вѣры православныя, иже уставльша праздновати соборнѣ память твоего честнаго и святаго преставленія, и предавше святымъ Божіимъ церквамъ. Такоже, отче святыи, помолися и о архиепископѣ Великаго Новаграда, имярекъ, правящаго престолъ твой Софіи, Премудрости Божіи, и о всемъ священноиноческомъ, священническомъ и діяконскомъ чину, да молитвами твоими святыми прейдемъ немятежно жизнь вѣка сего суетнаго, и получимъ животъ вѣчный на небесныхъ крузѣхъ, идѣже самъ, пречестный архиерею, пребываеши съ чинми ангельскихъ воинствъ и со всѣми святыми.

О пречестнѣйшіи и великіи святителю Христовъ Нифонте пречюдне! помяни мене недостойнаго раба твоего священноинока Варлама, смиреннаго мниха, во святыхъ своихъ молитвахъ, но да и азъ спасенъ буду і избавлюся мукъ вѣчныхъ, написавшаго въ похвалу и въ честь святому твоему имени малую сию службицу, и во славу Святѣй и единосущнѣй и животворящей и нераздѣлимѣй Троицы Отцу и Сыну и Святому Духу, нынѣ и присно, и во вѣки вѣковъ. Аминь.

Печатается по изданiю: Памятники старинной русской литературы, издаваемые Графомъ Григоріемъ Кушелевымъ-Безбородко. Выпускъ четвертый: Повѣсти религіознаго содержанія, древнія поученія и посланія, извлеченныя изъ рукописей Николаемъ Костомаровымъ. – СПб.: Въ типографiи П. А. Кулиша, 1862. – с. 1-9.

Наверхъ / Къ титульной страницѣ

0