Наследие Святой Руси. Памятники древне-русской письменности
 
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Наслѣдiе Святой Руси
-
Гостевая книга
-
Новости
-
Написать письмо
-
Поискъ

Раздѣлы сайта

Святые Кириллъ и Меѳодiй
-
Книги старой печати
-
Патерики и житiя святыхъ
-
Великiя Минеи Четiи
-
Церковно-учит. литература
-
Творенiя русскихъ святыхъ
-
Стоянiе за истину
-
Исторiя Русской Церкви
-
Церковный расколъ XVII в.
-
Исторiя Россiи

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 25 августа 2016 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ПАТЕРИКИ И ЖИТІЯ СВЯТЫХЪ

Житіе святыя великія княгини Ольги.

Святая великая княгиня Олга родися въ плесковской странѣ, въ веси зовомыя Выбуто. Отца имѣаше невѣрна сущи, такожъ и матерь некрещену отъ языка Варяжска; и отъ рода не княжска, ни отъ велможъ, но отъ простыхъ бяше человѣкъ. О имени жъ отца и матере писаніе нигдѣжъ изъяви. Образомъ бяше святая тиха и кротка и любима ко всѣмъ и мудра зѣло. Посемъ князь Рускій Игоуръ поня ю за ся за премногую ея добродѣтель и добронравіе. По времени жъ родися сынъ има Святославъ, еще бо въ невѣрствіи има сущи. Посемъ Древяне убиша великаго князя Игоуря. Сыну жъ его Святославу въ то время еще младу сущу, оста отца своего и сѣде въ Кіевѣ. Святая же княгиня Олга, по смерти мужа своего Игоря, просвѣщена бывши Божіею благодатію, и иде въ землю греческую, въ царствующій градъ взыскати вѣры Христовы, идѣже христіянъство утвердися. И паки пришедъ святая въ царствующій градъ, и испроси отъ патріярха святаго крещеніа. Посемъ царь въсхотѣ пояти святую за ся, понеже бо мудра бѣ и красна зѣло. И абіе Божіею помощію упремудри царя и глагола: царю, не подобаетъ христіяномъ поганыхъ поимати. Посемъ царь же с патріархомъ самъ крести, споима рукама, святую, въ имя Отца и Сына и Святаго Духа, и нарекоша имя ей: Елена. И паки поучивъ ю патріархъ отъ божественыхъ писаній. Посемъ святая даде патріярху блюдо злато з драгими камыкі, иж женчюгомъ устроено, на послуженіе святому олтарю соборны церкви. И паки царь глагола святѣй: пойди за мя: сее уже крещена еси. Святая же глагола: царю, не подобно ти есть поняти; понеже породилъ мя еси въ купѣли святаго крещеніа. Царь же, помысливъ, и патріярхъ, яко не подобаетъ поняти ей, и даде святей дары многи, — царь такожъ и патріярхъ; и отпустиша ю съ великою честью въ землю Рускую к людемъ своимъ. И посемъ святая нача требища и кумиры сокрушати по многимъ мѣстомъ, и въ тѣхъ мѣсто нача кресты Христовы поставляти: кресты же тѣ Христовы знаменіа и чюдеса творятъ и до сего дни, идѣже святая поставила бяше. Посемъ же святая хожаше по градомъ и по мѣстомъ, учаше вѣры Христовѣ, и уроки легкіи и дани полагаше на людехъ. И паки пріидѣ святая на мѣсто Плесковы рѣки и Великіе, и възлюби мѣсто вельми; бяху бо на мѣстѣ томъ лѣсъ великъ и дубровы многи. И ту видѣ лучю трисіятельнаго Божества, и на мѣстѣ томъ крестъ постави: крестъ же той стоитъ и до сего дни въ память святыя. Святая же пророчески глагола бояромъ своимъ и рече: на мѣстѣ семъ будетъ церковь Святыа Троицы; градъ же будетъ великъ и славенъ зѣло, и изобиліа въ немъ будеть многа. И посемъ святая пріиде къ сыну своему Святославу и живяше съ нимъ. И абіе нача святая учити сына своего Святослава о вѣрѣ Христовѣ; сынъ же святыя нимало внятъ о семъ, но хожаше въ мнозѣ силы, и плѣняше грады и языцы, и дани многи полажаше на нихъ, и послѣди и самъ Святославъ въ невѣріи убьенъ бысть отъ агарянъ. И посемъ святая посла много злата на Плескову реку, идѣже видѣ лучю трисіятельнаго Божества, на поставленіе церькви Святыа Троица. И посемъ по крещеніи живяше лѣтъ 15 и угоди Богу, и съ миромъ предавъ святую свою и честную душю въ руцѣ Христу Богу въ лѣто 6477, мѣсяца Іюля въ 11 день. И посемъ, времени многу минувшу по преставленіи святыа, внукъ же ея — блаженный князь Владимеръ въспомяну о мощехъ святыа бабы своеа, и пріиде на мѣсто самъ с митрополитомъ и со всѣмъ священнымъ соборомъ и съ фимяномъ, и раскопавше землю, и обрѣтоша честныа мощи святыя бабы своея княини Олги цѣлы и нерушимы пребывають. Они же прославиша Бога, и въземъше мощи, и положиша въ церкви Святыа Богородица, въ гробѣ каменѣ мале; и на верху гроба того честнаго оконце сътвориша: и тудѣ видять блаженныа тѣло лежаше цѣло и тлѣнію непричастно, но свѣтяшеся яко солнце. А иже кто пріидѣтъ съ вѣрою ко гробу святыя: и оконце оно, иже на гробѣ святыа, само о себе отверзется, и видятъ честное тѣло и мнози пріемлютъ исцѣленіе неоскудно; а другимъ, иже не съ вѣрою приходящимъ къ честному ковчегу святыа, не отворится оконце гробное, и не видятъ святаго и честнаго ея тѣла, но токмо гробъ видяху святыя (Рук. Рум. Муз. XVI в. № 397, л. 380 об., Восток. Опис. стр. 601).

Источникъ: Исторія Русской Церкви. Макарія, Архіепископа Харьковскаго. Томъ I. — Второе, исправленное изданіе. — СПб.: Типографія Юлія Андр. Бокрама, 1868. — С. 276-278.

/ Къ оглавленію раздѣла /


Наверхъ / Къ титульной страницѣ

0