Наследие Святой Руси. Памятники древне-русской письменности
 
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Наслѣдiе Святой Руси
-
Гостевая книга
-
Новости
-
Написать письмо
-
Поискъ

Раздѣлы сайта

Святые Кириллъ и Меѳодiй
-
Книги старой печати
-
Патерики и житiя святыхъ
-
Великiя Минеи Четiи
-
Церковно-учит. литература
-
Творенiя русскихъ святыхъ
-
Стоянiе за истину
-
Исторiя Русской Церкви
-
Церковный расколъ XVII в.
-
Исторiя Россiи

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 25 iюня 2017 г. Сейчасъ на порталѣ посѣтителей - 19.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

Патерики и житiя святыхъ

Сказаніе о блаженномъ Петрѣ, царевичѣ Ордынскомъ.

Въ одномъ сборникѣ [1] казанской академической библіотеки помѣщено любопытное сказаніе о блаженномъ Петрѣ царевичѣ ордынскомъ, подъ слѣдующимъ заглавіемъ: «Житіе святаго отца Кирила, архіепископа ростовскаго, како ходи въ татарове съ честію, како явися святая Богородица съ младенцемъ и святымъ Николою и святымъ Дмитріемъ великомученикомъ, како явистася отроку». Житіемъ Кирилла, епископа Ростовскаго, оно названо потому, что обращеніе блаж. Петра въ христіанскую вѣру послѣдовало при этомъ епископѣ, который, какъ говорится въ сказаніи, дважды ходилъ въ орду, и въ послѣдній разъ по приглашенію хана Берки, для исцѣленія его сына. Своею проповѣдію и исцѣленіемъ сына Берки Кириллъ возбудилъ желаніе въ племянникѣ его идти въ Россію и креститься. Берки или Бергай былъ ханомъ по смерти Батыя съ 1257 по 1266 г.; онъ первый изъ хановъ принялъ магометанство; но обращеніе блаж. Петра относится еще къ тому времени его царствованія, когда «цари въ ордѣ вѣровали, солнцу и мѣсяцу и звѣздамъ и огневи».

Блаж. Петръ принялъ крещеніе при еп. Кириллѣ, умершемъ въ 1262 г.; потомъ при преемникѣ его, св. Игнатіѣ, построилъ Петровскую обитель [2], вступилъ въ бракъ, имѣлъ дѣтей и, овдовѣвъ, принялъ иноческій санъ, въ которомъ и скончался, уже послѣ смерти св. Игнатія, послѣдовавшей въ 1288 г. Житіе блаж. Петра, помѣщениое въ Четьи Минеи подъ 30 днемъ іюня, когда празднуется его память, заимствовано, съ нѣкоторыми измѣненіями, изъ предлагаемаго нами сказанія; но въ Четьи Минеи повѣсть о Петрѣ оканчивается его смертію; между тѣмъ въ сказаніи говорится еще о судьбѣ потомства Петрова въ Россіи до четвертаго рода, о сынѣ его, внукѣ Юріѣ и правнукѣ Игнатіѣ, объ отношеніяхъ ихъ къ ордѣ и къ князьямъ русскимъ. Послѣднее событіе, о которомъ здѣсь упоминается, естъ нашествіе на Ростовъ ордынскаго посла Ахмыла при архiеп. Прохорѣ, занимавшемъ ростовскую каѳедру съ 1311 по 1328 г. Въ заключеніи составитель сказанія говоритъ: «дай же Господи утѣху почитающимъ и пишущимъ древнихъ сихъ прародитель дѣянія здѣ и въ будущемъ вѣцѣ, и Петрову роду сему соблюденіе и умноженіе живота, не оскудѣетъ радость безъ печали, вѣчная ихъ память до скончанія міру». Слѣдовательно оно написано еще при жизни потомковъ блаж. Петра, но кѣмъ, не извѣстно. Нѣкоторые составленіе его относятъ ко временамъ ростовскаго архіепископа Трифона, занимавшаго ростовскую каѳедру съ 1462 по 1467 г. [3]. Представляемъ здѣсъ вполнѣ это любопытное сказаніе.

Житіе святаго отца Кирила, архіепископа Ростовскаго, како ходи въ татаровѣ счестiю, како явися Святая Богородица сь Младенцемъ и съ святымъ Николою и святымъ Дмитрѣемъ великомученикомъ, како явистася отроку.
Благослови отче [4].

Святому архіепископу ростовскому Кирилу ходящу втатары съ честію къ царю Берки за домъ святыа Богородица. царь же слышавъ отъ него. иже о святомъ Леонтіи отъ греческія земли родомъ. и како благословеніемъ патриарха пріиде. како крести градъ ростовъ. и како увѣри люди и како честь прія (отъ) рускіхъ князей и отъ грѣческаго царя и отъ патріарха вселѣньскаго собора. како по преставленіи его съдѣваются чюдѣса преславная отъ раки мощей его и до сего дни. и ина многаа ученіа отъ евангельскыхъ указаній глагола. и слышавъ царь Берка отъ епископа возрадовася. и почести возда ему. его же требуетъ. и отпусти ѝ съ миромъ царь Берка. по его животѣ князи ярославстіи годовніи оброки носятъ на гробъ. втоже лѣто разболѣся сынъ его. единъ бо бѣ у него. царь же отъ врачевъ не обрѣте никоеа пользы, и умысли сице. посла вростовъ по святаго владыку. и обѣща ему дары многы, да исцѣлитъ сына его. владыка же повѣлевъ пѣти молебѣны вростовѣ повсему граду. освятивъ воду и пришедъ въ татары, и исцѣли сына царева. царь же возрадовася со всемъ домомъ и всею ордою своею, и повѣлѣ давати владыцѣ оброки годовніи вдомъ святыа Богородица. нектоже отрокъ брата царева. сынъ юнъ сый, предстоа предъ царемъ всегда, слыша поученіе святаго владыкы. умилися душею. и прослезися выходя на полѣ уединяася и размышляа, како си вѣруютъ цари наши солнцу сему и мѣсяцу и звѣздамъ и огневи. кто сей есть истинный Богъ. разшышляа, аки древній Авраамъ отъ благаго корени и лѣторасль блага, а сей отрокъ отъ злаго корени лѣторасль блага. и умысли сицѣ ийти съ святымъ видѣти божницу [5] рускыа земли. чюдѣса бываема внашихъ божницахъ. отъ солнца сего и отъ мѣсяца и огня чюдѣса не бываютъ. бѣ бо тогда отцу его брату цареву умершу, а матери его дръжащу многа имѣніа ему. онъ же вся та ни во чтоже мняше душею своею, развѣе единоя вѣры. маги же его слѣзящи о размыслѣ отрока, и показа ему имѣніа многа отца его. онъ же вся та разда нищимъ татарскымъ требующимъ, и много имѣніа владыцѣ давъ. и утаився всѣхъ аки древній мѣлхиседѣкъ, сынъ царевъ избѣжа. велію собѣ благодать, преже крещенія приобрѣте, иерѣй саномъ почтеся. такъ и сей отрокъ пріятъ преже крещенія сицѣ въ разумъ. о таковыхъ бо Господь въ евангеліи рече. мнози будуть первіи послѣдніи, а послѣдніи первіи [6]. пріиде съ владыкою вростовъ и видѣ церковь украшенну златомъ и жемчюгомъ, и драгимъ каменіемъ, аки невѣсту украшенну. вней пѣнія доброгласная, якоже ангельская: бѣ бо въ церквѣ святыа Богородица тогда лѣвый крилосъ грѣческыи пояху, а правый рускыи. слышавъ же сіа отрокъ сій бысть вневѣріи, и огнь възгорѣся въ сердцы его, и воста солнце въ души его. и припаде кногама святаго владыкы и рече. господи [7] святче Божій. азъ размышляхъ о бозѣхъ царевыхъ и о родительскыхъ о солнцѣ, и о лунѣ, и о огнѣ, яко тварь суть. а ваша вѣра права и добра, вашь Богъ истиненъ. молю тя да быхъ и азъ пріялъ святое крещеніе. и владыка почти ѝ. и повѣле ждати. бѣ бо размышляа о исканіи отрока [8] и по малѣ времѣни царю Берки умершу, и ордѣ мятущися, и исканія отроку не бѣ. и крести отрока сего святый Кирилъ, и нарече имя ему Петръ. и бѣ Петръ ученіе Господне (слушая) по вся дни въ святилищѣ и у владыкы. и преставися святый владыка Кирилъ, и погрѣбоша его честно, спѣсньми. вѣчная ему память. и пріа престолъ святый владыка Игнатей [9]. и нача церковь крыти оловомъ и дно мостити мраморомъ храмъ святыа Богородици ростовскыя. въ орду ходяще емля оброкы царскыа. Петръ же, яко навыче у владыкы, молитвы плачевныа дневныя и нощныа приносити къ Богу, непрестаннаго поста не оставаяся и царскіа своеа не преставая утѣхы. бѣ выѣздяй при езѣре ростовстѣмъ птицами ловя. единому же ему при езѣри ловящу, по обыщнѣй молитвѣ усну. и вѣчеру глубоку сущу, пріидоста кнему два мужа свѣтла суща аки солнцѣ. и възбудиста ѝ глаголюще. друже Петре, услышанна бысть молитва твоя, и милостыня твоа пріидоша предъ Богомъ. оле чюдо братіе. како не удивимся милостынней силѣ и вневѣріи раздаваннѣй, а ввѣрѣ услышанно быти, аки древній Еустаѳій плакида. вневѣріи милостыня дая. а вверѣ какъ сій сугубу пріатъ здѣ мъзду, и по трудѣ царство небесное. се бо милостыни ради рече Господь своими усты [10]. не пять ли птиць наединой цѣниста цатѣ [11]. ніедина ихъ забвѣнна есть предь Богомъ. такъ и сего блаженнаго Петра милостыня, вневѣріи разданна, а ввѣрѣ милостивнѣ услышанна бысть. Петръ же возбнувъ [12], и видѣ два сіа мужа, паче възраста человѣча мнети ему отъ ужасти, аки до облакъ, а свѣтлостію аки весь миръ осіающи. въ ужасти ставъ и паде дващи. въста и падеся. и третіе такоже. сіа же свѣтлая мужа яста за руку и глаголаста ему. друже Петре не бойся. мы есмя посланна ктобѣ Богомъ, въ ньже вѣрова и крестися укрѣпи (ти) родъ твой и племя и внуцы твои до скончанія міра, и вьздати тобѣ мзду милостыня твоеа. а противу трудомъ твоимъ вѣчная и благая пріимеши. и въда ему мѣшца и глаголаста. возми сіа мѣшца. въ единомъ ти злато, а въ друзѣмъ серебро. утро идѣши въ градъ. и вымениши три иконы, икону святыа Богородица со младенцемъ, икону святаго Дмитрѣа и святаго Николы, и вдаси на нихъ, еже просятъ мѣнящіи. Петръ же възрѣвъ на ня и видѣвъ аки человѣка. и взя мѣшца, и мнѣвъ яко въ татарѣхъ племя его укрѣпляетъ, и не разумѣ глаголемаго ими, и рече имъ. господье мои. аще въспросятъ менящіи мешцевъ отъ иконъ что сътворю, а вы кто есте. и рѣста ему два свѣтлая мужа. мѣшца сіа держи у собя впазусѣ инѣми не вѣдоми. а просятъ мѣнящіи 9 сребреныхъ, а 10 злата. и ты дайже по единому. и вземъ иконы да идеши къ владыцѣ и рци ему. Петра и Павла Христова апостола посласта мя ктобѣ. да устроиши церковь. идѣже спахъ при езѣри. а се знамяніе ею. иконы сіа вымѣнихъ. а мѣшца сіа вдаста ми. да что имъ вѣлиши сътворити. елико ти речетъ, сотвори. а мы есмы Христова апостола Петръ и Павелъ. и невидима быста. смотрите братіе, неложь есть рекый прославляющая мя рече прославлю. како ти сего Петра Богъ прослави милостыня его ради. втой же нощи явистася страшная святая апостола владыцѣ и рѣста ему. да устроиши церковь и епископью слузѣ нашему Петру, много бо злата въ епископью вдавъ. освятиши ѝ внаше имя, аще ли сего не сътвориши, то смертію уморивѣ тя. и се рекше невидими быста. и святый Игнатей вста отъ сна. и размышляя о видѣніи злата и сребра въ епископьи. и призва князя и рече ему что сътворю невѣде. явистамися Петръ и Павелъ, аки зракъ на иконѣ написанъ ею, устраши(ша) мя. а глаголы ею устроити церковь ею, невѣмъ гдѣ камо. князь же рече ему. вижду тя господи [13] ужасна суща. сіа же имъ бесѣдующа въ епископьи, и узрѣ князь Петра идуща отъ церкви святыа Богородица въ епископью, и свѣтъ сіяющь отъ иконъ его выше церкви паче огня. и ужасеся и рече. о владыко что естъ сій огнь, мнѣти имъ человѣка горяща. инъ же никтоже не видяще огня. Петръ же утро идѣ въ градъ вземъ иконы, по повѣлѣнію святыхъ апостолъ, иде въ епископью и поставлей иконы предъ княземъ и владыкою и поклонися до земля и рече. о владыко, Петръ и Павелъ Христова апостола посласта мя ктобѣ, да устроши церковь, идѣже азъ спахъ при езѣре. а се ти есть зна(меніе) ею, а мѣшца сіа вдаста ми, да что ми велиши сътворити. бѣ же вто время предъ службою. князь же и владыка въста и поклонися святымъ иконамъ. и не вѣдяху откуду. писца въ градехъ не бысть. Петра знааху суща отъ татаръ. и въпрашахуть ѝ, кто суть менящіи иконы сія. Петръ же рече, на торгу вымѣнихъ я господи. и размышляхъ о видѣніи, аще сему быти. свѣту же (сущу) въ храминѣ отъ иконъ, идѣже бѣаху, яко солнцѣ. и вси предстоящіи ужасошася. и по службѣ пѣвъ молебны Святѣй Госпожѣ Богородицѣ и святому Дмитрію и святому Николѣ. и почти святый Игнатей Петра. и повелѣ взыти на колѣсницу съ иконами, и повѣле итти до мѣста, идѣже спа. самъ же владыка и князь и весь градъ проводиста спѣсньми иконы до мѣста Петрова. и на мѣстѣ спанія пояста молебѣны святымъ апостоламъ. князь же и владыка со слезами на молебнѣ и радостію призваста имя святыхъ апостолъ Петра и Павла. и обрѣкоста имъ домы и села. сіи молебны пояху. и людіе клѣть съградиша повелѣніемъ князя. и привезше изъ града, плотомъ оградивше и възвратишася. и ту Петръ иконы постави. князь же всѣдъ на конь, и глумяся изрече Петру. Петре, владыко тобѣ церковь устроитъ, а язъ мѣста не дамъ. что сътвориши. Петръ же рече. повелѣніемъ, княже, святыхъ апостолъ азъ куплю у тобѣ, елико отлучитъ благодать твоя, и земля сіа. князь же яко видѣ мешца Петрова въ епископьи, и помолчя и помысли. у тобѣ колико отлучитъ отъ ужасти [14] владыки [15] отъ святыхъ апостолъ. и рече всебѣ. аще мощно сему быти, яко при Ильи бысть. горсть мукы не оскудѣетъ, водоносъ воды не погыбнетъ и чванецъ масла не умалится. и рече играя Петру. Петре въпрошу тя, якоже вда на иконахъ, сице по моей земли кладеши ли 9 литръ сребра, а десятый злата. сътвориши ли тако. Петръ же рече. святіи апостоли рекоша ми. якоже владыка ми повѣлитъ сътворити сътворю. да въпрашаю господи. и въпраша владыкы. владыка же вземъ крестъ благослови и рече. чадо Петре, Господь рече своими усты всякому просящему дай. ты убо не пощади родитель имѣніа. пишетъбося. чванецъ масла не умалится, горсть мукы не оскудѣетъ. молитвою святыхъ апостолъ родъ твой благословенъ будетъ. дайже князю волю, якоже хощетъ. Петръ же поклонися владыцѣ до земля, вѣруя въ глаголъ его. пришедъ ко князю и рече ему. да будетъ княже воля святыхъ апостолъ и твоя. и повѣлѣ князь извлещи вѣрвь отъ воротъ до воды отъ воротъ до угла, отъ угла возлѣ езѣра. се место великое. Петръ же рече, да повѣлиши княже ровъ копати, якоже въ ордѣ бываетъ, да не будетъ погыбѣніа мѣсту тому. и бысть тако. граждане же, иже провождаху иконы втой часъ ископаша ровъ, иже есть и до нынѣ. Петръ же нача отъ воды класти емля из мешецъ по единому, 9 литръ сребра, а десятый златъ. и наполниша возила петровыхъ кунъ [16]. и тыя колѣсница, на нихже клеть въздааху. едва можаху какъ подвизати ихъ. видѣвъ же князь и владыка множество злата и сребра еже бысть 10 выходъ дати. а мѣшцы цѣлы. и рекоста ксобѣ. что се есть господи, не по нашимъ грѣхомъ сіа сотворишася. велію бо благодать человѣкъ сей обрѣте предъ Богомъ. по силѣ святыхъ апостолъ. и поставльша стражбы у двора у петрова обѣщанныа людіе. иже на молѣбнѣ. и повелѣша Петру итти на конь. и бысть радость веліа въ градѣ. почтиша Петра великою честію и многыми дары и на многы дни поюще молебены. прославляху Бога и святыхъ апостолъ о чюдѣси бывшемъ внаша дни. и многу даянію бывшу милостыня и кормленію нищихъ. не вѣдяше же Петръ что сіа сътворися о чюдѣси семъ и бѣ молча уединяася. видѣвъ же князь и владыка Петра умолкающа и рекоша ксобѣ, аще сей мужь, царево племя, иде(тъ) въ орду, и будетъ спона [17] граду нашему. бѣ бо Петръ возрастомъ великъ и лицемъ красенъ. и рече ему, Петре, хощеши ли поймевѣ за тя невѣсту. Петръ же прослезився и отвѣщавъ. азъ господи възлюбихъ вашу вѣру, и оставль родительскую вѣру и прiидохъ квамъ. воля Господня и ваша будетъ. князъ же поимъ ему отъ великнхъ вельможъ невѣсту. бѣша бо тогда вростовѣ ординьстіи вельможи. владыка же вѣнча Петра и устрои церковь ему и святи ю по заповѣди святыхъ апостолъ. князь же поимаше Петра на царскую утѣху [18] около езера съ ястребы. тѣшаше его, дабы ся внашей вѣрѣ удержалъ. и рече ему, Петре, велію ты благодать обрѣте предъ Богомъ (себѣ) и граду нашему. писано бо есть. что въздамъ Господеви о всѣхъ, яже въздасть намъ [19]. пріими господине Петре малое сіе, земля нашіа отчины противу дому святыхъ апостолъ отъ езера сего. азъ тобѣ грамоты испишу. отвѣщавъ же Петръ азъ княже отъ отца и матери не знаю землею владети, а грамоты сіа чему суть. князь же рече, азъ тебѣ все уряжу Петре. а грамоты суть на се, да не отъимаютъ тѣхъ земель мои дѣти и внуцы у твоихъ внукъ по насъ. Петръ же рече. воля Господня да будеть княже. и повелѣ князь предъ владыкою грамоты писати множество земли отъ езера воды и лѣсы, яже суть и до нынѣ, и урядиша ему домы по его землямъ. орда же тиха тогда бѣ на многа лѣта. бяху бо Петрови сладцы отвѣти, добрыа обычая во всемъ. и тольми любляше князь Петра, яко и хлѣба безнего не ясти, яко владыцѣ братати Петра въ церкви съ княземъ. и прозваста Петра брата князю. и родиша(ся) Петру сыновѣ внего мѣсто. и по малѣхъ лѣтехъ святый Игнатей преставися. пріятъ царство небесное. вѣчная ему память. старый же князь по владыцѣ не по мнозѣхъ днехъ преставися. сего же князя дѣти зваху Петра дядею до старости. и (бысть) миръ на многа лѣта. поживъ же преставися Петръ въ глубоцѣ старости въ мнишескомъ чину къ Господу отъидѣ, его же возлюби. и положиша у святаго Петра у его спалища. и отъ того дни уставися монастырь сій. внуцы же стараго князя забыша Петра и добродѣтель его, начаша отъимати лузи и украйны земель у петровыхъ дѣтей. сынъ же петровъ шедъ въ орду сказася брата царева внукъ. и возрадовашася ему дяди его. и почтиша его и многы дары даша ему и посолъ у царя исправиша ему. пришедъ же посолъ царевъ вростовъ и возрѣвъ въ грамоты петровы стараго князя и судіи его. и положи рубежъ землямъ по грамотамъ стараго князя и оправи Петрова сына. и вда ему грамоту со златою печатію, еже у младыхъ князей и внукъ стараго князя по цареву слову, отъидѣ. младыи же князи рѣша ксебѣ и своимъ боляромъ, слышахомъ еже родители наши зваху дядею его отца Петра. дѣдъ бо нашь много сребра у него взятъ и брашася снимъ въ церкви. а родъ татарской, кость не наша. что есть намъ за племя. сребра намъ не остави ни сей ни родители наши. сицевыми бесѣдами глаголаху и не искаху чюдотвореніа святыхъ апостолъ. а прародителю любовь забыша. и тако пожиша лѣта многа, зазирающе Петровымъ дѣтемъ, еже въ ордѣ выше ихъ честь пріимаху. сыну же Петрову родиша сыновѣ и дщери. въ глубоцѣ старости къ Господу отъиде. внукъ же Петровъ именемъ Юрье, якоже навыче у родителей своихъ, честь творити святѣй Богородици вростовѣ и гривны на ню возлагати, и пированія владыкамъ и всему клиросу и собору церковному и праздникомъ святыхъ апостолъ Петра и Павла, и память творити родитель и прародитель. вѣчная ихъ память по вся лѣта. ловцемъ же ихъ задѣвахутца рыбы паче градцкихъ ловцевъ. аще бо играя петровстіи ловцы ввѣряли суть сеть, то множество рыбъ. а градстіи ловцы тружающеся много оскудѣваху. рѣша же ловцы. господіе князи, аще петровстіи ловцы не престанутъ ловити, то езеро наше будетъ пусто. они бо вся рыбы поймаху. правнуцы же стараго князя глаголаша Юрью. слышахомъ исперва, еже дѣдъ вашь грамоты взя у прародитель нашихъ на мѣсто монастыря вашего и рубежи землямъ его. а езеро есть наше. грамоты нань не взясте. да уже не ловятъ ловцы ваши. и збысться пророчество стараго князя брата Петрова, еже рече о обидѣ внукъ предъ грамотою. слышавъ же сія Юрьи внукъ Петровъ, иде въ орду, и сказася правнукъ брата царева. дяди же честыми мнозими почтоша и дары многы даша и посолъ у царя исправиша ему. пріиде посолъ вростовъ и сѣдъ при езерѣ у святаго Петра. и бысть боязнь княземъ царева посла. и суди ихъ съ внуки петровыми. Юрье же предъ посломъ положи вся грамоты. и посолъ возрѣвъ грамоты и рече княземъ. не ложь ли суть грамоты сія и купля сія. ваша ли есть вода, есть ли подъ нею земля, можете ли воду сняти съ земли той. и отвѣщаша князи реша. ей господи, не ложь суть грамоты сія, а земли подъ нею несть, а вода наша есть вотчина господине, а сняти ей не можемъ. и рече посолъ сице царевъ судія. аще не можете сняти воду съ земля, то почто своею имѣнуета. а сотвореніе есть вышняго Бога на службу всѣмъ человѣкомъ. и присуди внукомъ Петровымъ Юрью, какъ есть землямъ купля, такъ и водамъ. и вдасть Юрью грамоту съ златою печатію по цареву слову, и отъиде, князи же не можаху зла сътворити ничтоже Юрью. и утишися житіе на многа лѣта. и славляху Бога, якоже навыкоша у родитель своихъ творити, памяти святыхъ апостолъ съ слезами и радостію поминающе съ воздыханіемъ чюдеса ихъ и памяти годовніи родитель свеликими милостынями. возрасте же правнукъ Петровъ, а Юрьевъ сынъ Игнатъ. и при его животѣ съдѣяся сія. пріиде Ахмылъ на Рускую землю и пожже градъ Ярославль. и пойде кростову съ всею силою своею. и устрашися его вся земля. и бѣжаша князи ростовстіи и владыка побѣже Прохоръ. Игнатъ извлече мѣчь и угна владыку и рече ему. аще не идѣши съ мною противу Ахмыла, то самъ посѣку тя. наше есть племя и сродичи. и послуша его владыка. и со всѣмъ клиросомъ вризахъ, вземъ крестъ и хорюговь, и пойде противу Ахмыла. а Игнатъ предъ кресты съ гражданы вземъ тѣшь [20] царъскую кречеты и шубы и питіе. и край поля езера ста на колѣну предъ Ахмыломъ. и сказася ему древняго брата царево племя. а се есть село царево и твое господи купля прадѣда нашего идѣже чюдеса творяхуся господи. и страшно еже видѣти рать его вооруженну. и рече Ахмылъ. ты тѣшь подаеши, а сіи что суть вбѣлыхъ ризахъ и хорюговь сія. егда сѣщися снами хотятъ. Игнатъ же отвѣщавъ. сіи богомольцы церкви твои суть, да благословятъ тя. а се ношаху божницу по закону нашему. втоже время у Ярославля, втяжцѣ недузѣ бысть сынъ Ахмыловъ, вожахуть его на возилѣхъ. и повелѣ вести сына. да благословитъ его. владыка же Прохоръ святи воду, и вда ему пити, и благослови его крестомъ, и бысть здравъ. Ахмылъ же видѣ сына здрава, възрадовася, и сниде сконя противу крестовъ, и въздѣвъ руцѣ на небо, и рече. благословенъ Богъ вышній, иже вложи ми всердцѣ идти до здѣ, праведенъ еси господи Прохоре, яко молитва твоя въскреси сына моего. благословенъ ты Игнатій, иже упасе люди своя и соблюде градъ сій. царева кость наше племя. еже ти здѣ будеть обида, да не ленися дойти до насъ. и вземъ 40 литръ сребра, и вда владыцѣ. а тридѣсятъ литръ дасть клиросу его. и взя тѣшь у Игната и поклонися владыцѣ, и взыдѣ на конь, и отъидѣ въ свояси. Игнатъ же провожая Ахмыла, возвратися съ владыкою и съ гражданы, и возрадовашася, и пѣвъ молебенъ, и прославиша Бога.

Дайже Господи утѣху почитающимъ и пишущимъ древнихъ сихъ прародитель дѣянія здѣ и вбудущемъ вѣце. а Петрову роду сему соблюденіе и умноженіе живота, не оскудѣетъ радость беспечали. вѣчная ихъ память до скончаніа міру. Богу нашему слава, и нынѣ и присно, и ввѣки вѣкомъ, аминь.

Примѣчанiя:

[1]
Сборникъ этотъ подъ № 854 въ 4 д. содержитъ въ себѣ житія нѣкоторыхъ святыхъ и разныя слова и поученія, между которыми помѣщены два слова Кирилла еп, Туровскаго; письмо разныхъ почерковъ и, кажется, не одного времени; статья, заключающая сказаніе о блаж. Петрѣ, написана не позже XVI в. Кромѣ этого списка мы руководствовались, при изданіи сказанія, еще другимъ его спискомъ, помѣщеннымъ въ сборникѣ житій святыхъ, бóльшею частію Русской Церкви, принадлежащемъ проф. В. И. Григоровичу. Сборникъ XVII в.; сказаніе о блаж. Петрѣ въ немъ имѣетъ такое заглавіе: «житіе блаженнаго Петра, братанича царева Беркина. како пріиде во страхъ Божій и умилився душею и пришедь изорды въ Ростовъ крестися. и како видѣніе видѣ святыхъ апостолъ Петра и Павла на поли. идѣже нынѣ церковь стоитъ святыхъ апостолъ Петра и Павла».
[2]
Близь Ростова, при озерѣ Неро. Истор. іерарх, т. V. стр. 534.
[3]
Обзоръ рус. дух. литературы. № 94. Учебн. зап. акад. наукъ. Кн. III.
[4]
По языку и способу писанія предлагаемый списокъ принадлежитъ къ такъ называемой синкретической или смѣшанной рецензіи. Потому въ немъ древніе палеографическіе признаки перемѣшаны съ новыми знаками, входившими въ письменность въ XVI в.
[5]
церковь, храмъ.
[6]
Матѳ. 19, 30.
[7]
господине.
[8]
думая, что будутъ искать отрока.
[9]
Въ спискѣ Григоровича прибавлено: въ лѣто 6770. мѣсяца сентября въ 19 день. при князѣ Борисѣ Васильковичѣ ростовстемъ.
[10]
Лук. 12, 6.
[11]
Цата - мелкая монета, динарій.
[12]
пробудившись.
[13]
господине.
[14]
Можетъ быть: ужести отъ ýже - часть наслѣдства; отъ ужести т. е. отъ наслѣдія.
[15]
владыка.
[16]
денегь.
[17]
непріятность.
[18]
на охоту.
[19]
Псал. 115, 3.
[20]
Словомъ этимъ назывались прежде разныя вещи, служившія къ увеселенію, какъ то: музыкальныя орудія, принадлежности охоты, кречеты, соколы и проч.

Печатается по изданiю: Памятники Древле-Русской духовной письменности: Сказаніе о блаженномъ Петрѣ, царевичѣ Ордынскомъ. // Журналъ «Православный собесѣдникъ», Казань. - 1859 г. - Книга I. - с. 356-376.

Наверхъ / Къ титульной страницѣ

0