Наследие Святой Руси. Памятники древне-русской письменности
 
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Наслѣдiе Святой Руси
-
Гостевая книга
-
Новости
-
Написать письмо
-
Поискъ

Раздѣлы сайта

Святые Кириллъ и Меѳодiй
-
Книги старой печати
-
Патерики и житiя святыхъ
-
Великiя Минеи Четiи
-
Церковно-учит. литература
-
Творенiя русскихъ святыхъ
-
Стоянiе за истину
-
Исторiя Русской Церкви
-
Церковный расколъ XVII в.
-
Исторiя Россiи

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 24 мая 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

Патерики и житiя святыхъ —» Источники

Мѣсяца Маа въ 3 день.
Похвала преподобному отцю нашему Ѳеодосію, игумену Печерьскому, иже есть въ богоспасаемѣмь градѣ Кіевѣ [1].

Похваляему праведнику, възвеселятся людие. Радости бо есть день и веселіа, егда мужъ праведенъ и преподобенъ конець житіа въсприметь, егда покой трудовъ своихъ узрить, егда печаль оставль, на веселіе грядеть, егда земьлю оставивъ и земнаа вся, на небеса идетъ, егда человѣкъ оставль, и съ ангелы въдворяеться и Бога зрѣти сподобляется. /л. 115./

В сій бо день учитель нашь, наставникъ же и пастырь преставися въ вѣчный животъ, великій въ отцѣхъ отець Ѳеодосіе, и прежній свѣтилникъ, трудоположникъ и чюдотворець въ земли Рустей! Гдѣ радости сіи болшіи, еже сподобихомся видѣти отца и учителя нашего отшествіе къ Богу, пріимьша венець нетлѣніа и нѣгде, близъ престола Владычня предотояща всегда и дерзновеніа имуще молити о насъ Владыку [2]? Ибо радуется сынъ, и не точію сынъ, но и раби, видяще господина своего предстояніе имуща у земьнаго царя по многыхъ трудехъ и побѣдахъ на врагы церкви. Мы же, сынове и раби господина своего, ликуимъ, весело празнуемь, хваляще его подвиги и побѣду на духы нечистыа, и честь многу пріимьша у Господа Вседръжителя, и многымъ исходатайствующа жизнь неконьчаемую.

И убо кто достойно хвалить или возвеличить земнаго ангела и небеснаго человѣка? Ибо людие, /л. 115 об./ сѣдяще въ тьмѣ и въ сѣни далече, видѣхомъ свѣтъ вѣры апостоломъ нашимъ, посланнымъ отъ Бога, княземь Владимеромь: самъ Бога познавъ святымь крещеніемь и намъ Того показавъ, покровъ невѣденіа отъ душь нашихъ отъятъ, и свѣтлостью трисъставьнаго Божества озареніи быхомъ.

Другыхъ путь, иже Христосъ ученикомъ показа [3], рекъ: «аще кто остави отца и матерь, градъ и села, стократицею пріиметь мзду, и въ будущій вѣкъ Царство небесное». Отъ кого же увидихомъ сій путь и бремя легкое Ісусово? И кто вы есть показавъ и взяти крестъ и послѣдовати Христу, — точію сій преподобный отець нашь Ѳеодосіе? Быша бо преже сего отходяще отъ мира, узкымь грядуще путемь [4], но отъ сего чинъ и устроеніе всѣмь въ Руси монастыремъ предасться. Ни /л. 116./ бо инъ никто же съвръшенаго умершвеніа прежде его показа, яко же се съ учителемъ своимъ, блаженнымъ Антоніемь, ибо исполни притчю Господню, юже рече: «аще зерьно пшеничьно въпадеть въ земьлю, не умреть, то едино пребываеть; аще ли умреть, то многъ плодъ сътворить». Умерьтви бо ся всему миру, оживе же Христу, и плодъ многъ принесе, его же породи духомъ и упасе преподобіемь и правдою. И умножи талантъ, данный ему отъ Бога, и слышить реченое отъ Бога: «благый рабе, вѣрный, въ мале бѣ вѣренъ, надъ многыми тя поставлю». О семь бо рече Христосъ: «мнози будутъ послѣдніи пръвіи и пръвіи — послѣдніи».

Съй, аще въ послѣдьняа роды обретеся, но крѣпость и любовь Божіа многыхъ прежде его премину, яже въ немь сіаша. Еще бо въ уностнѣмъ възрастѣ сый, и земныхъ /л. 116 об./ гнушашеся, и небеснаа мудрствоваше младъ, исъ чрева матерня чистъ бысть сосудъ Святому Духу, не възлюби славы мира сего и нищету же вольную пріимъ, и въ всемъ подобяся Господу своему. Доброта мимотекущихъ ни въ что же вменивъ; единаго точію желаа, когда пріити и явитися лицю Божію, и единому съ единѣмъ бесѣдовати молитвою. Иже отъ матере многы и люты раны приемля, и симъ хотя отвратити его злый врагъ помысла святаго отрока, вѣдяше бо, окаанный льстецъ, яко отъ сего хотяше побеженъ быти: тѣмъ же и многы бѣды наведе на нь. Благодать же Божіа вѣдяше его тамо, идѣже яко солнце восіа на тверди небѣснѣй, лучами просвѣти весь миръ и дѣанное пріимъ, и видѣніа не лишенъ бысть, умомъ въсхо/л. 117./дя на лучьшее елико дьній, по апостолу: «задняа забываа, на прѣдняа простираася». Въ послушаніи искусенъ рождьшеи, но паче ведяшеся на Божественаа повеленіа, разумѣвь мудростію Духа Святаго, яко спона есть, мирьскими пекущеся, заповѣди Божественыа исправити. Вся отврьгъ бѣ, Господу вдасть, помысли въ себѣ, глаголя: «лучьши есть матерь оскорбити на мало врѣмя, егда ей Господь дасть разумъ суетьныихъ [5] отлучитися, нежели Царства Господня лишену быти.

Въ градъ Кіевъ пріиде, вожда искаше и правителя, дабы сказалъ ему незаблудьно путь Божественный. И много искавъ, и обрѣтѣ. Не лишить бо Господь желающихъ полѣзнаа: мужа бо чюдна обрете, съвръшена смысломь, и зѣло много разумна, и пророчьства даръ имуща, нарица/л. 117 об./емаго Антоніа. Къ сему пріиде блаженный Ѳеодосіе, младъ сый възрастомъ, разумомъ же старъ. Вся, повелѣннаа ему учителемъ, усердно творяше, къ повеленнымъ прилагаще, и бысть, по Иеву рещи, и «око слепымъ и нога хромымъ». Апостольское слово присно въ сердци дръжа, еже рече: «другъ другу тяготы носите [6], и тако скончаете законъ Христовъ».

Сей же блаженный не единаго или двою понесе тяготу, но всеа братіа служеніе пріимъ и всемъ льготу творяше собою, и мнози отъ нихъ [7] покой пріимаху подвигомъ его. Богу помогающу ему и крѣпость телесную подавающу, се же творяше по вся дни: и николи же събора церковнаго лишися, и правила кѣлейнаго никогда же преступи, къ уставу отечьскому, еже написаше къ доброму труду и благому послушанію, /л. 118./ велико прилежаніе творя. Тѣмъ же и Господь превознесе его. Имъ же работаше, яко послѣдній хуждьшей всѣхъ, и всѣмъ слуга вьменяшеся, и тѣмъ же и пастырь, и отець, и учитель поставленъ бысть.

Варлааму бо игумену княземь изведену и инъде устроену, Ѳеодосій же много не хотѣвъ, не могый, иже въ ослушаніи быти своему учителю Антонію. И познавъ, яко Божій съвѣтъ се, пріася и не волею игуменити, и въ большій трудъ вдасть себѣ, помышляа, аще и телесною потребою много печахся боле; паче душевне прележати. И глаголаше святый къ себѣ Ѳеодосіе; «приложу ко трудомъ труды и къ подвигомъ подвиги. Како явитися своему Владыцѣ, стада Его добре не упасъ? Како ли речеши: «се азъ и дѣти, яже ми далъ, Боже?» Тѣмъ же по вся нощи безъ сна пребываше: ово въ мо/л. 118 об./литвѣ предстоа, овогда же по кѣліамъ ходя и братію на молитву възбужаше. Иже въ старешиньствѣ сый, добраго начинаніа не лишися: иногда бо воду нося, иногда же дрова секый, и тако всей братіи собою образъ подаваше. И егда приспѣаше великій постъ, тогда храборъ Христовъ Ѳеодосіе всѣхъ земныхъ вещей гнушашеся: изхожаше отъ братіа и въ печерѣ единъ затворяшеся, и тамо всю четыредесятницю пребываше, и единъ ко единому молитвою бесѣдоваше. Кто же исповѣсть труды, и болѣзни, и рыданіа слезнаа, и постъ крѣпкыи, и брани съ лукавыми духы? И егда приближашеся свѣтлый день Въскресеніа Господа нашего Ісуса Христа, тогда преподобный прихождаше, яко Моисій съ горы Синайскыа, душею сіаа паче лица Моисіева. /л. 119./ И въ вся лѣта устава своего не преступи.

Тогда и откровеніа Божіа сподобися: исходъ свой увѣде, яко отъ сего свѣта на бесконечный повелѣно бысть ему пріити. Не утаи сего отъ друговъ и отъ ученикъ своихъ, яко къ Богу идеть и Бога умоляти обещевается, о дому Пречистыа Матере и о стадѣ чадъ своихъ, и до пришествіа Господа Бога нашего. И яко обѣщася, тако и сътвори. Елико большихъ сподоблься дарованій отъ Бога толику и милость Господню подасть намъ на всяко врѣмя и лѣто, приходя и посѣщаа. заступаа и съхраняа, соблюдаа стадо свое отъ врагъ душь нашихъ. Кто бо коли, полѣзныхъ просивъ, еже къ спасенію у ракы святаго, и погрѣшивь надѣжду? Или кто, призвавъ съ вѣрою имя его святое, и не избавленъ бысть язвы душевныа и болѣзни те/л. 119 об./лесныа? Се намъ апостолъ и проповѣдныкъ, сый намъ пастырь и учитель [8], сый намъ вождь и правитель, сый намъ стѣна и огражденіе, похвала наша великаа и дръзновеніе наше къ Богу.

Днѣсь намъ, братіе, радоватися и веселитися духовно подобаетъ, и благоукрашатися, и празновати радостно, имуще всегда предъ очима нашима раку преподобнаго отца нашего Ѳеодосіа, въ ней же днѣсь положено бысть многострадальное и святое тѣло, испущающа луча чюдесъ въ вся конца Рускіа земля. Сіа рака пріатъ съвровище некрадомо, сосудъ Святаго Духа, арганъ Божественный, честное тѣло отца нашего и учителя. Сію сматряюще, яко на самого возирающимъ, ибо аще и въ гробѣ положенъ бысть святый, но духомъ съ нами есть всегда, и видитъ. Аще по заповѣдемъ его /л. 120./ живемъ и повелѣніа его хранимъ, то радуеться и милостивно приближается къ намъ, хранитъ и блюдетъ, яко чада възлюбленаа. Аще ли нерадити начнемъ о своемъ спасеніи, и наказаніи словесъ его не хранимъ, то сами помощі его лишаемся.

Но, о святый отче Ѳеодосіе, самъ наплъни недостатки наша своими добродѣтельми! Бесъ твоеа помощи нѣсьми мощни благо что сътворити, но въ день преставленіа твоего, любовію ликъ съставлеше, възываемъ тя! Радуйся, просвѣщеніе Русскіа земля, ибо яко деньница на западѣ явлься, отъ востока просіа, и всю земьлю Рускую просвѣти! Радуйся, прописателю и образе пути истинному вождю и правителю, и наставниче иноческому житію! Радуйся, началниче и поборниче, поспешителю и посо/л. 120 об./бьниче хотящимъ спастися! Радуйся, умноживь стадо словесныхъ овець въ дому Божіа Матере, яко ни единъ преже тебѣ, ни по тобѣ въ земли нашей обретеся! Радуйся, насадителю винограда Христова, яко прострошася розгі его до моря и до рекъ отрасли его: нѣсть бо страны тоа, ни мѣста, идѣже не бысть лоза винограда твоего! Радуйся, откровеніа Божіа пріателище и дома Пречистыа Матере Божіа [9] строителю, юже създа и величествомъ украсі, и даръ Богородици принесе! Радуйся, умноживый талантъ господину своему, иже десятъ талантъ пріимъ и тысящу ими приобрѣте! Радуйся, пажити винограда Христова напитавы до избытка словесныа овца, ея же въкусившеи чюждестраньнии овци къ дому Божіа Матере затворишася и вкупѣ съ вѣрными твоими /л. 121./ чады съвъкупишася! Радуйся, источниче сладкый, отъ него же пивьше, плъци мьнишестіи хладъ Божественный пріаша и бесъ труда путь тесный преидоша, и вселишаса прі исходищихъ водъ превысъпренихъ! Радуйся, пастырю и учителю [10], иже съблюдъ стадо отъ влъка разумнаго непорочно и неклосно, начальнику пастыремь Христу приведе! Радуйся, столпе огненый, свѣтлѣе паче при Моисіи бывшаго: онъ бо просвѣщаше телеснѣ, ты же духовно просвѣти новаго Израиля; пустыню, проведе съблазнъ житіа пустошнаго и Амалика мысленаго лучами Духа устраши и въ земьлю Обетованную вьведе, паче реку, райскіа пища, идѣже ученици твои ликуютъ! Радуйся, земный ангеле и небесный человѣче, рабе и слуга Пречистыа Божіа Матере; иного бо не обрете строителя дому своему, развѣ тебе, [11] /л. 121 об/ его же възлюби и обѣщася присѣщати благодатью даровъ, — яко же и бысть! Радуйся, отче Ѳеодосіе, наша похвала и великолѣпѣе!

Лавра твоа хвалится о тобѣ и въ концехъ вселенныа славно бысть нареченіе еа! Страны дивятся отцемъ, бывъшимъ въ ней, како просіаше, яко звѣзды на тверьди небеснѣй, дѣлатели заповѣдемъ Божиимъ явишася, и чюдотворьци показашася, и пророчеству отъ Бога сподобишася, и прозрѣнію отъ Святаго Духа даръ пріаша, и словеси Божественному быша учители. Притекоша царіе, и поклонишася князи, и покоришася вельможа, и въстрепеташа силніи, ужасошася иноязычници, видяще человѣки небесныа, по земли ходяща, яко престолу Господню, въ домъ Божіа Матере събирающеся, пѣснь ангельскую поаху беспрестани, и съ ангелы /л. 122./ вкупѣ въдворяющеся къ жрътовнику Господню. Овѣхъ убо извѣстьно видяще ангельскій зракъ, инѣхъ же мысленѣ и душевна съ ними бесѣдующе [12] и знающеа духомъ, егда Божіихъ ангелъ приходъ бываше, иніи же чювъственѣ духы лукавыя прогоняста и страшніи имъ показашася. И таковіи суть отрасли твоего винограда, таціи суть вѣтви твоего корене, таковіи суть столпи твоеа храмины, такова суть чада твоего порожденіа, таци суть отци твоеа лавры!

Ибо, отче, подоба бѣ такымъ ученикомъ отъ таковаго учителя быти; ибо въистинну река Святаго Духа, истекшіа изъ устъ твоихъ, юже намени Самъ Христосъ, Сынъ Божій, егда глаголаша, уча іудѣа: «вѣруай въ Мя, рекы истекуть исъ чрева его воды живы». Се же глаголаше о Дусѣ, /л. 122 об./ Его же хотяще приимати вѣрующаа въ Него. Тажде река, нѣгде ставящися, беспрестани напаяетъ [13] чада твоа и до вѣка лѣтомъ. Ту реку испустивше, апостоли приведоша вся языки къ Богу. Ту реку пивше, мученици не брегоша телесъ своихъ, но преда à на раны и на мукы различьныа. Сію реку пивьше, отци оставиша гради и села, богатество и домы, и вселишася въ горы и въ врътьпы и въ пещери земныа. Сію реку пивьше, ученици твои небрегоша земьныхъ, но всь имуще умъ къ небеси, и въсприаша, ихъ же желааху, и вселишася въ свѣтъ Божественый, идѣже лици бесплотныхъ, имъ же мы послѣдующе, прибѣгохомъ въ домъ Божіа Матере, въ твою надѣждю и въ твое огражденіе, възложше все упованіе наше на Пречистую Дѣву Богородицю и на тя, преблаженне отче Ѳе/л. 123./одосіе!

Аще и не достигнемъ грясти путемь прежнихъ твоихъ ученикъ, но поминающе рекшаа святаа уста: «аще кто скончаетъ животъ свой в дому Пречистыа Божіа Матере и въ моей надѣжди, и аще чимъ не достигнуть на подвиги, азъ сіе наплъню и Бога умолю о нихъ». Тѣмъ же тому словеси надѣющеся, молебно призываемъ тя. Самъ вѣси, преподобне, аще и намъ млъчащимъ, яко дніе наши исчезоша въ пустошныхъ мира сего, и мало въсклоньшеся, пріахомъ иго Христово и прибегохомъ в домъ Пречистыа Владычица нашеа Богородица и въ ограду святую твою. Не предай же врагомъ душь нашихъ, ибо въоружишася на насъ и пленяють ны на всякъ часъ, и различными помыслы стрѣляють сердца наша, отводять ны Божіа разумѣніа и любити нудять ны мимотекущаа и тлѣннаа, /л. 123 об./ и до коньца погружають ны въ глубинѣ грѣховней. Но тебѣ, кръмчію, обретохомъ: направи нас къ пристанищу тихому и бурю мысленую утиши, и умоли о насъ общаго Владыку, да подасть нам глаголъ и слово, мысль и дѣаніе вся заповѣди Его творити. Аще бо и отъ пути заповѣдей Господнихъ уклонихомься и устава, тобою преданнаго, лѣностію не исполнихомъ, но единыа ради вѣры нашіа, еже къ Пречистей Дѣвѣ и къ тобѣ, о честный Ѳеодосіе, да причтены къ лику чадъ твоихъ, еже ходиша бес порока по стезямъ правды и неразлучьныи сътворить ны зрѣніа свѣтообразнаго Своего лица, егда отсюду поиметь ны.

Еще же в житіи семъ намъ сущимъ, да посѣщаеши насъ и соблюдаеши отъ всякыа козни неприазненыа и дѣлъ, яже отводять отъ Бога. Но молитвою ти пода/л. 124./ждь намъ житіе чисто и богоугодно, и въздвигнеши умъ нашъ, падшій лѣностію на земьлю. Бодрость подаси и страждю внутренюю, и дрѣвнимъ грѣхомъ отданіе. Аще бо и небреженіе ума нашего преможе ны, но тебѣ имуще пособника и помощника лавре твоей пребывающе, надѣемь тобою свободни предъ Богомъ явитися и не обладаніи врагы видимы и и невидимыми. Самъ бо своимъ ученикомъ реклъ еси, егда отъити отсюду Богомъ повелѣно тя бысть: «извѣстно вы буди, чада, аще по отшествіи моемь къ Господу начнеть мѣсто сіе умножатися мнихъ и потрѣбными изобиловатися, и отъ сего разумно буди вамъ, яко дръзновеніе имѣю у Бога и молитва моа пріатна есть отъ Него».

Мы же, отче преподобне, извѣстно вѣмы, по равноангельскому житію и по страсторьпъческому подвигу, яко прежде исхо/л. 124 об./да своего дръзновеніе имѣаше къ Вседръжителю Богу. Кольми паче поисходно пророчество показуа, яко хощеть мѣсто сіе Пресвятыа Богородица и твоа святаа лавра възвеличиться и възрастити славою и величествомь. И се назнаменуа, яко беспрестани хощеши молитися о оградѣ святей своей. Яко же и съвръшися истинное твое и неложьное обѣщаніе, ибо, по преставленіи твоемь, обладано бысть, ни разрушено отъ кого мѣсто твое, но отъ лѣта расташе и превосхождаше. Егда умножишася грѣси наша и съвръшишася безаконіа наша, и злоба наша Бога прогнѣва, тогда Божіимъ попущеніемь грѣхъ ради нашихъ разрушишася домове Божіи, и монастыреве разорени быша, и грады пленени суть [14], и села опустѣша: отъ языка незнаема, отъ /л. 125./ языка немилостива, отъ языка студа исполнена, ни Бога боащеся, ни утробы человѣколюбівы дръжаще.

Тѣмъ же и еще отъ них в работѣ сущеи, и въ озлобленіи злѣ, и в томленіи лютѣ, припадаемъ ти, мольбу приносяще. Въздвигни руцѣ твои о насъ къ Владычицѣ Дѣвѣ Пречистей Богородици, да помянеть милости своа дрѣвняа о оградѣ сей [15], еже дасть Ей въ достоаніе, и ослабу подаеть намъ отъ съгрѣшеніа горькаго. И отженѣть врагы лукавыа и хулникы нашей православней вѣре, и сътворить не оборимую церковь свою святую, юже Сама изволи въздвигнути въ жилище Себѣ. И умножить стадо ограды твоеа и присѣщаеть, яко же и прежде, съблюдающе и утверьжающи, заступающи и хранящи отъ врагъ видимыхъ и невидимыхъ, да свободни о/л. 125 об/бретъшеся душами и телесы, и въ свѣте семъ временемъ богоугодно поживемъ, не обладани никимъ же, развѣ Пречистою Богородицею, яко же и прежде отци наши, и тобою.

Преподобне Ѳеодосіе! вѣдаа твое легкосердіе, дръзнухъ прострети язывъ свой на твое хваленіе: не яко по достоанію хвалу [16] ти принося, но себѣ чаахъ успѣхъ приобрѣсти, отче, отъ тебѣ и ослабу грѣхомъ своимъ, и на прочіа съблюденіа и неподобнаа обученіа. Ибо прославиша тя небесныа силы, пріаша тя апостоли, и присвоиша тя пророци, обіаша тя мученици, срадують ти ся святлтели, сретоша тя лици [17] черьноризець, и възвеличи тя и сама Царица Пречистаа, Мати Господня, и зѣло превознесе [18] и знаема показа отъ конець вселенныа до конець земьли, вѣрный рабъ Господень!

Азъ же како по достоанію възмогу по/л. 126./хвалити тя, сквѣрнаа уста имѣа и нечистъ языкъ, но [19] не имый что принести тобѣ въ день преставленіа твоего. Сіе малое похваленіе, яко малъ и смердящь потокъ къ ширинѣ морьстей приливаася, не да море наплънити, но да смрада очистится. Тѣмъ же, о честная главо, святый отче Ѳеодосіе, не прогнѣвайся на мя грѣшнаго, но моли о мнѣ, рабѣ твоемь, да не осудить менѣ въ день пряшествіа своего Господь Ісусъ Христосъ, Ему же слава подобаеть съ Безначальнымь Его Отцемь и съ Пресвятымъ и Благымъ и Животворящимь Духомъ, нынѣ и присно [и во вѣкы вѣкомъ, аминь].

Примѣчанiя:

[1]
Печатается по рукописи Московскихъ Публичнаго и Румянцовскаго Музеевъ № CCCV, въ 4-ю д. л., конца XV в.
[2]
въ рукоп. предстояща Владыку вписано позже, на поляхъ, внизу.
[3]
въ рукоп. на поляхъ, сбоку.
[4]
въ рукоп. путемь пропущено.
[5]
въ рукоп. суетныхъ ихъ.
[6]
въ рукоп. носить.
[7]
въ рукоп, нехъ.
[8]
въ рукоп. читель.
[9]
въ рукоп. Божіа на поляхъ, сбоку.
[10]
въ рукоп. чителю.
[11]
въ рукоп. те.
[12]
въ рукоп. бесѣдуающе.
[13]
въ рукоп. нѣтъ.
[14]
въ рукоп. суть на поляхъ, а въ текстѣ быша.
[15]
въ рукоп. огра сіи.
[16]
въ рукоп. хваля.
[17]
въ рукоп. лици пропущено.
[18]
въ рукоп. было превознесеся, но ся зачеркнуто.
[19]
въ рукоп. было поне, зачеркнуто.

Печатается по изданiю: Патерикъ Кiевскаго Печерскаго монастыря. – Изданiе Императорской Археографической Коммиссiи. СПб.: Типографiя М. А. Александрова, 1911. – с. 64-70.

Наверхъ / Къ титульной страницѣ

0