Наследие Святой Руси. Памятники древне-русской письменности
 
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Наслѣдiе Святой Руси
-
Гостевая книга
-
Новости
-
Написать письмо
-
Поискъ

Раздѣлы сайта

Святые Кириллъ и Меѳодiй
-
Книги старой печати
-
Патерики и житiя святыхъ
-
Великiя Минеи Четiи
-
Церковно-учит. литература
-
Творенiя русскихъ святыхъ
-
Стоянiе за истину
-
Исторiя Русской Церкви
-
Церковный расколъ XVII в.
-
Исторiя Россiи

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 25 марта 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

Патерики и житiя святыхъ

Мѣсяца Септеврiа въ 28 день.
Житіе блаженнаго князя Вячеслава бывшаго Чешскаго.

Се нынѣ сбысться пророческое слово, еже глаголаше усты Господа нашего Iсуса Христа: будеть бо рече, в' послѣдняа дни, и ıaже мнимъ нынѣ суща, въстанеть бо братъ на брата своего и сынъ на отца своего, и врази человѣку домашніи его, сами себѣ не мили будуть, да възда имъ Богъ по дѣломъ ихъ. Бѣ же нѣкто князь великъ и славою честенъ в' Чехехъ живый, именемь Вратиславь, и подружіе его, зовомо Драгомиръ; и родиста же сынъ собѣ пръвородный; и ıaко крестиша ѝ, и нарекоша имя ему въ святомъ крещеніи Вячеславъ, сицѣ бѣ зовущі имъ по своему обычаю дѣтище. И възрасте отрокъ; и ıaко бысть отцю его Вратиславу посадити отрока на своемъ столѣ, самъ бѣ старъ, чаıaше смерти себѣ, и призвавъ Вратиславъ князи, иже бѣ тогда въ своей области, і епископы, и весь причетъ церковный. Добрый же и благовѣрный епископъ и нотарiй со всѣмъ клиросомъ отпѣв'ше святую литургію въ церкви Пресвятыя Владычица нашея Богородица и Приснодѣвы Маріа, и възвед'ше отрока, поставиша /л. 945 а/ на степени предъ алтаремъ; и благослови его епископъ, сице рекъ: Господь Богъ Ісусъ Христосъ благослови отроча сіе, имже благословилъ еси вся праведники твоя: Авраама, Исаака, Іıaкова, и вен'чалъ еси правовѣрныхъ царей, равныхъ апостоломъ, Костян'тина и Елену. Сице же рекшу благовѣр'ному тому епископу, и молитвами его начатъ отрокъ, и благодатію Божіею хранимъ. И вда его баба своя Люд'мила учити книгамъ Словеньскымъ. Послѣдуя своему учителю добрѣ и навыче разуму всему в'бор'зѣ; отсади же ѝ князь Вратиславъ в' Будичь, и начатъ отрокъ учитися к'нигамъ Латыньскимъ, и научися добрѣ. В' то же время умре Вратиславь кньзь, и посадиша и князя Вячеслава на столѣ отца своего Вратиславли, а Болеславъ нача подъ нимъ ходити; бѣста же еще юнъ и възрастомъ малъ. Мати же его Драгомиръ и утвер'ди землю, и люди своя устрои; и ıaко въскор'ми сына своего другаго Болеслава, и нача Вячеславъ строити люди своя. И имяста же сестры 4, и вдаста и в разна княжіа и устроиша я. И възложи благодать сицеву на Вячеслава князя, и пача умѣ/л. 945 б./ти к'нигамъ Латыньскимъ или ıaкоже епископъ или священникъ; да аще возяше Греческыа книгы и Словеньскіи, и чтяше в'нѣ собѣ соблазна ради. И не токмо же книгамъ умѣяшетъ, но и вѣру совѣр'шаа, всѣмъ убогымъ добро дѣаше, и бѣдныя накор'мляше, а странныя пріимаше, по евангельскому слову, Божіа рабы кор'мляше излиха, и вдовиць не дадяше обидѣти никомуже, и люди вся убогыя и богатыя всѣхъ миловашеть, и церкви вся златомъ украси, и вѣроваше въ Бога всѣмъ сердцемъ, и все благое творяше в' животѣ своемъ. И разбуıaше же мужіе Чаховьскыя и въсташа на ся; князь же имъ біаше еще младъ, лѣтъ 18-и, егда умре отець его; да егда възрастетъ и смысла добы и брату его, тогда діяволъ, искони не хотя добра человѣческому роду, в'ниде въ сердца злыхъ совѣтникъ его, ıaкоже иногда въ Іюду предателя, писано бо есть: всякъ востаай на господина своего Іюди подобенъ есть; ти же начаша пострекати Болеслава на зло, рѣша: хощеть тя убити Вячеславъ князь, съвѣщав'ся с матерію своею и с мужи своими; /л. 945 в./ и тіи пси зліи, иже бѣаше то Вячеслава наустили выгнати матерь свою, безъ вины. Вячеславъ же, разумѣвъ страхъ Божій, помяну слово апостола Павла, глаголющее: чти отца своего и матерь свою, и възлюби ближняго своего ıaко самъ ся [1]; хотя блаженный исполнити в'сяку прав'ду Божію, и приведе паки матерь свою в' домъ свой, и вел'ми плакашеся, глаголя сице: Господи Боже мой! не постави имъ грѣха в семъ. Помянув' же слово пророка Давыда: грѣхъ юности моея и невидѣніа моего не помяни, Господи! [2] тѣм'же чтяше матерь свою. Она же радовашеся о вѣре сына своего и о благодати, ıaже творяше: маломощныя кор'мяше; аще сирота г'дѣ обидима, не дадяше обидѣти еи никомуже; и еще странныхъ пріимаше и добръ имъ покой творяше; и ıaкоже речено есть во святомъ евангеліи Матфиомъ Еѵангелистомъ: страненъ бѣхъ, и не в'ведосте Мене; и нагъ, не одѣсте Мене; болѣнъ бѣхъ, в' темници, и не посѣтисте Мене [3], сирѣчь ошуюю имъ тогда: отъидуть тіи в' муку вѣчную; а одесную, иже сотвор'ше сіа благая, тог'да внидуть /л. 945 г./ в' жизнь вѣчную [4]; то сіа блажен'ный князь помышляше въ сердци своемъ, аще кто нищій или домашняа и стран'ныа вся одѣвая и кор'мя; и аще ли который причетникъ церковный или священ'никъ пріобиженъ придеть к' нему, и онъ искупаше и добро творяше всѣмъ; и церкви же бѣ устроилъ по всѣхъ градехъ, и благотворяше имъ; и Божіа рабы собравъ отъ всѣхъ ıaзыкъ, и служ'ба за него сотворяема по вся дни къ Богу, ıaко велицехъ ıaзыцехъ устроеніе добраго и желан'наго князя Вячеслава. И възложи ему Богъ на сердци сицеву мысль создати церковь во имя Святаго Авраама. В' то же время всѣя діяволъ, иже изначала ненавидя рода человѣча, Болеславу лукавая въ сердце его и наусти его на брата своего, ıaкоже и окан'наго Святополка, иже совѣща злое на братію свою и пріимъ власть единъ в Рустей земли, а не вѣдуще отмщеніа Божіа, ıaко слуги Божіа не туне мечь носять, по в' погибель нечестивымъ [5]: тако и тіи злыи совѣт'ницы /л. 946 а./ діяволи, иже совѣщаша злая во сердцихъ своихъ с' Болеславомъ на блаженнаго князя Вячеслава. Пріиде же день святаго Авраама, к немуже бѣ блажен'ный обѣтъ свой творяше, и веселяшеся о Бозѣ; они же тогда, зліи совѣтници діяволи, въз'ваша Болеслава, и совѣтъ сотвор'ше непріазненый о блежен'немъ Вячеславѣ, ıaко же и Жидове о Христѣ в' перьвая лѣта; бяху же священіе церкви тогда, и ѣха Болеславъ во градъ, в недилю же обѣдняа, в нюже творяше праздникъ святыхъ безмездникъ Козмы и Даміяна; и отслушавъ блаженный князь Вячеславъ святую литургію, хотѣвъ ѣхати в' домъ свой в'борзѣ. Болеславъ же не даде ему, моляся с п'лачевнымъ словомъ, глаголя сице: како хощеши отъѣхати, брате, вино и медъ всецѣло имѣю у себе. Онъ же ни отречеся ему, и не ѣха в' домъ свой; и всѣдъ на конь свой, пачатъ играти со слугами своими на дворѣ Болеславли; тѣм'же мнимъ, ıaко повѣдаша ему на дворѣ, и рѣша ему слузи его: княже Вячеславъ! хощет' тя убити Болеславь. Онъ же /л. 946 б./ не имяше вѣры словеси тому и всю надеждю възложи на Бога; и той день весь пиша и веселишася у Болеслава. И в ту же нощь снидошася ратници, иже тіи зліи совѣтници, въ гнѣве сей дворъ, призваша к' себѣ Болеслава, иже сотвориша злый тъй совѣтъ, ıaкоже к' Пилату снидошася Жидове на Христа мысляще злаа; такожде и они зліи тіи п'си тѣм'же ся подобяще, совѣщаша, како быша убити господина своего, рѣша, ıaко пойдеть на утренюю къ церкви, бѣ бо Вячеславъ не лѣнивъ къ церкви, глаголюще к' себѣ: тогда убиемъ его. Утру же быв'шю, възвониша утренюю; Вячеславь же князь, услышавъ звоненіе, и рече сице: слава ти, Господи Боже мой, ıaко далъ еси свѣтъ и достигнути утра сего, — и в' томъ часѣ в'земъ сан'даліа своя обувся, и лице свое умы и пойде на заутренюю, и постиже ѝ Болеславъ во вратѣхъ. Вячеслав' же озрѣвся и рече: добръ день, господи! В'чера Болеславу же приниче дияволъ ко уху, и развари сердце его, да из'влекъ мечь свой, и отвѣщавъ сице: нынѣ тебѣ хощю болій того быти, и удари /л. 946 в./ блажен'наго мечомъ по главѣ. Вячеславь же обратив'ся и рече: что еси умыслилъ, отне и брате, сіе? Имъ его, повер'же и ста над' нимъ; и рече ему: что тебѣ, брате, зло сотворихъ? И притекъ единъ отъ совѣтникъ тѣхъ, усѣкнув руку блаженнаго, князя Вячеслава. Он' же испусті ѝ, и побѣже къ цер'кви; діяволи же совѣтници Чиста и Тира убиста его въ церковныхъ дверехъ, Гнѣвька же притекъ, прободе ему ребра мечемъ. I испусти духъ свой блаженный, глаголя сице: в' руцѣ Твои предаю духъ мой! Убиша же в' томъ гради с нимъ М'стину в Еллину, а на иныя мужи идоша прочее, овы избиша, а друзіи разбѣгошася по земьлямь, а младен'ца избиша его ради; а Божіа рабы и нищихъ пограбив'ше и выгнав'ше ихъ з' земли, а жены ихъ за мужъ даша. Они же вси неприазнени убив'ше господина своего, Тира же рече: идемъ и еще на госпожю свою, да единого ожалѣеши брата и матерь. Болеслав' же рече: нѣкамо ея ей дѣти, да иже имѣми доспѣеть; отъ Вячеслава же отъидоша, рек'ше, его и не сохранше его. Красей же попъ в'земъ блажен'наго, /л. 946 г./ предъ церковію положи, покры его тонкою плащаницею. Услышав'ша же маті его убіена суще сына своего, и приток'ше искаше его; узрѣв'ши же ѝ, припаде къ сердцю его, и плачющися собираше уды тѣла его сына своего; и собрав'ши же и не смѣ нести в'домъ свой, но в' поповѣ дворѣ омывше и облекше ѝ, и несоша я, и положиша ѝ въ церкви. Убоıaв'шиже ся маті его смерти, и бѣжа въ Кроваты: страшна бо есть смерть отъ чюждую руку, да ея не хотяше претерпѣти. Болеслав' же хотя убити ю, и посла по неа злыи совѣтници; и они же шедше, и не обрѣтоша еа. Ту призваша попа Павла, и да молитву творять надъ нимъ. И погребоша же честное тѣло святаго и блаженнаго Вячеслава, добраго и праведнаго богочетца и Христолюбца, служитель бо бѣ Богу со благоговѣніемъ и со страхомъ; и кровь его потребися, и церкви в'зыде надъ нимъ всѣмъ людемъ видящимъ ту и дивящим'ся, а и еще надѣющеся Бозѣ и на молитву /л. 947 а./ благовѣр'наго Вячеслава, бол'шю чюду ıaвльшуся, воистин'ну бо Христовѣ мученицѣ ıaвльшися, и святыхъ мучениць приложися мука его, и совѣтъ сотвориша о немъ, ıaкоже Іюдеи о Христѣ; посѣкоша же ıaкоже Павла и младенца Христа избиша. Воистинну всь народъ человѣческій вельми ся плакаше его ради. Убіенъ же бысть князь Вячеславъ въ лѣто 6337 [828], индикта въ 2, кругъ солнцю 3, лунѣ и мѣсяца Септевріа въ 28. Богъ же покой душю в' вѣчней жизни со всеми избран'ными, идеже вси праведніи почивають во свѣтѣ животнѣмъ твоимъ, Господи! Не оставьляет же Богъ избраннымъ Своимъ в поруганіе невѣрнымъ, но посѣти милость Свою, преложи окамененое сердце ихъ на покааніе, проразумѣша грѣхъ свой, иже проліаша кровь неповин'ную. Болеслав' же помяну в'ся, къ Богу со плачемъ и съ воздыханіемъ глаголя: Боже! помози мнѣ грѣшному и милостивъ буди ми. И пославъ слугы своя, да принесуть тѣло блажен'наго князя Вячеслава, брата его, из Болеслав'ля града, /л. 947 б./ прозрѣ и глаголя сице: азъ согрѣшихъ, грѣхъ мой вѣмъ и безаконіа моя азъ знаю, и предо мною есть всегда. И положиша его въ церкви святаго Авраама, юже бѣ самъ создалъ, одесную страну олтаря 12-ти апостолу. Принесенъ бысть князь Вячеславъ мѣсяца Мар'та въ 3 день. Богъ покой душю его на лонѣ Авраамовѣ, Исака, Іякова, идеже вси праведніи упочиваютъ, чающе въскресеніа мертвымъ, Емуже подобаеть всяка слава, честь и покланяніе, со Безначал'нымъ Отцемъ и съ Пресвятымъ и Благымь и Животворящимъ Духомъ, нынѣ и присно и въ вѣки вѣкомъ. Аминь.

Примѣчанiя:

[1]
Ефес. 6, 2; Марк. 12, 31.
[2]
Псал. 24, 7.
[3]
Матѳ. 25, 43.
[4]
Матѳ. 25, 46.
[5]
Рим. 12, 4.

Печатается по изданiю: Великiя Минеи Четiи, собранныя всероссiйскимъ Митрополитомъ Макарiемъ. Сентябрь, дни 25-30. – Изданiе Археографической Коммиссiи. СПб: Типографiя Императорской Академiи наукъ, 1883. – стлб. 2186-2192.

Наверхъ / Къ титульной страницѣ

0