Наследие Святой Руси. Памятники древне-русской письменности
 
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Наслѣдiе Святой Руси
-
Гостевая книга
-
Новости
-
Написать письмо
-
Поискъ

Раздѣлы сайта

Святые Кириллъ и Меѳодiй
-
Книги старой печати
-
Патерики и житiя святыхъ
-
Великiя Минеи Четiи
-
Церковно-учит. литература
-
Творенiя русскихъ святыхъ
-
Стоянiе за истину
-
Исторiя Русской Церкви
-
Церковный расколъ XVII в.
-
Исторiя Россiи

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 25 марта 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ПАТЕРИКИ И ЖИТІЯ СВЯТЫХЪ

Мѣсяца Августа въ 8 день.
На освященіе церкви и на пренесеніе честныхъ мощей преподобныхъ и богоносныхъ отецъ нашихъ, Зосимы и Савватія, соловецкихъ чудотворцовъ, въ лѣто 7074 (1566), слово похвально.

Благослови отче.

Похваляему праведнику, возвеселятся людіе. Праведникъ аще постигнетъ скончатися, въ покои будетъ (Прем. 4, 7). И паки: праведныхъ душа въ руцѣ Божіи и не прикоснется ихъ мука (Прем. 3, 1) и праведніи во вѣки живутъ и попеченіе ихъ отъ Вышняго. И сотворитъ Господь волю боящихся Его, и молитву ихъ услышитъ (Псал. 144, 19), и въ память вѣчную будетъ праведникъ (Псал. 111, 6), и увѣдите, яко удиви Господь преподобныхъ своихъ (Псал. 4, 4).

Днесь убо, отцы и братія и богособранный соборе, подобаетъ намъ праздновати торжество сіе свѣтло, яко сіи преподобніи отцы наши, Зосима и Савватіе, конецъ житія воспріимше, и покой отъ труда обрѣтше, егда убо земная остависта и на небеса взыдоста, егда убо печаль міра сего остависта и на веселіе пріидоста, егда убо человѣки оставльше и со ангелы водворяются, и Бога зрѣти сподобишася. Нынѣ убо, отцы и братія, наши учители и пастыри и по Бозѣ заступникы преставилися въ вѣчный животъ и въ радость, конца неимущую. Что убо, братіе, сея радости сладчайше нашимъ душамъ, еже сподобихомся видѣти отецъ нашихъ, отсюду ко Господу отшедшихъ, и пріимшихъ вѣнца нетлѣнныя отъ живоначальныя десницы Христа Царя, и близъ престола Владычня всегда стояща, и дерзновеніе къ Нему имуща, о насъ молящеся? Мы же, отцы и братіе, великихъ сихъ имущи свѣтилники, просвѣщающа наша душа, и Господу Богу работати насъ учаща и Пречистой Его Богоматери, ликуемъ убо весело и празднуемъ торжественно (память) преподобныхъ отецъ нашихъ, Зосимы и Савватія, хваляще подвиги ихъ и побѣду на духы лукавые и почести пріемша отъ Господа Бога!

Кто убо, о братіе, отъ земныхъ возможетъ похвалити, или ублажити земныхъ сихъ ангелъ и небесныхъ человѣкъ! Сіи убо преподобніи отцы наши, умертвившеся міру, оживше же Христу и многая плоды принесоша Ему словесныя душа покаяніемъ, еже убо породили духомъ и упасли преподобіемъ и правдою, и умножили талантъ, данный имъ отъ Господа въ 30, и 60, и въ 100, и слышатъ отъ Него: благіи раби, вѣрніи вмалѣ были есте, вѣрни надъ многими васъ поставлю, внидите въ радость Господа своего (Матѳ. 25, 21-23).

Преблаженніи убо отцы наши Зосима и Савватіе вся убо сладкая и красная міра сего нивочтоже положиша, но токмо имѣя едино желаніе, когда пріити и явитися лицу Божію, и единому со единымъ бесѣдовати молитвою, задняя убо забывая и въ предняя простираяся, и апостольское слово на сердцы присно имуща, еже другъ другу тяготы носите и тако скончаете законъ Христовъ (Гал. 6, 2). Сіи убо Божіи человѣцы и чадолюбивіи отцы наши не единою или двою тяготу ношаше, но всея братія своея и о онѣхь печашеся, яко о своей души, на всяко убо время и лѣто приходя къ намъ, и духомъ заступая и сохраняя насъ отъ видимыхъ и невидимыхъ врагъ нашихъ. Кто убо коли проси полезныхъ у честныхъ ихъ ракъ, и не услышанъ бысть? или кто призва съ вѣрою имя ихъ святое, и абіе не избавленъ бываше отъ язвы душевныя и болѣзни телесныя? Сіи убо, отцы и братія, пастухи и учители наши, сіи намъ стѣна и огражденіе и похвала велика и къ Богу дерзновеніе крѣпко.

Подобаетъ убо намъ, братіе, веселитися духовно, и праздновати свѣтло, раки и мощи предъ очима имущи преподобныхъ отецъ нашихъ, въ нихъже положено бысть трудолюбивое ихъ тѣло, испущая рѣку чюдесъ во вся конца Рускія земля. Сія убо намъ раки богатство некрадомо, и сокровище неистощимое, и сосуди бысте Святаго Духа, честное тѣло нашихъ учителей. Аще бо и во гробѣ положени бысте святіи, но духомъ съ нами есть и видятъ всѣхъ насъ. Аще бо по заповѣди ихъ живемъ и повелѣніе ихъ хранимъ, и о семъ убо радуются преподобніи, и милостивно приближаются къ намъ, и хранятъ и блюдутъ насъ, аки чада возлюбленная. Аще ли нерадѣти начнемъ о своемъ спасеніи, и словесъ отецъ нашихъ не послушаемъ, сами помощи ихъ лишаемся, и молитва ихъ святая не помогаетъ намъ.

Мы же убо молимся вамъ, отцы святіи чадолюбивіи! Вы сами недостатки наши наполните; безъ вашія убо, преподобніи, помощи ничтоже благо можемъ сотворити, но въ дому пребывающе Господа Бога и Спаса нашего Ісуса Христа и Пречистые Его Матери, и въ вашей, святіи, оградѣ, надѣемся, преподобніи отцы, вашими святыми молитвами спастися и неврежены быти отъ врагъ видимыхъ и невидимыхъ. Самъ убо преподобне отче Зосимо реклъ еси своимъ ученикомъ, егда хотяше ко Господу отъити: братія моя и чада возлюбленная! не скорбите убо въ день покоя моего, занеже Богомъ повелѣно ми есть отъ міра сего отъити; аще бо и тѣломъ отхожу, но духомъ съ вами присно да буду, аще бо любовь имате другъ со другомъ. Сіе убо да будетъ вамъ разумно, братіе, аще по моемъ отшествіи начнетъ святое сіе мѣсто умножатися мнихи, и потребами изобиловати, по тому вси разумѣйте, яко дерзновеніе имѣю у Бога, и молитва моя приятна бысть отъ Него. Сія убо, братія, преподобнаго отца нашего Зосимы глаголы; сія праведнаго къ намъ обѣщанія; сія блаженнаго отца нашего ученія, и множае сихъ.

Сіи убо преподобніи отцы наши Зосима и Савватіе, крестъ Христовъ на рамо вземше и послѣдовавше Ему невозвратно, иже пустыню сію напоивше слезами и поты воздержанія насладивше, и быша свѣтилники, сіяя чюдесы всей вселенной.

Нынѣ убо, братіе, во святѣй обители сей не свѣдѣтельствуютъ ли дѣла, яже обѣща преподобный отецъ нашь Зосима? не множахулися потребныя его молитвами даже и до сего дне? не слово ли его совершися, еже глагола своимъ ученикомъ, не во всей ли странѣ Рускыя земля прослави ихъ Господь Богъ и Святая Богородица, своихъ угодниковъ?

О богоизбранный соборе и честное совокупленіе! кто убо не удивится, или кто не прославитъ пречестныхъ сихъ мужей терпѣніе и трудолюбіе и на духи лукавыя одоленіе! Сіи убо блаженніи отцы наши образъ и пронаписаніе своимъ ученикомъ быша, алканію научиша, воздержаніе показаша, величанія погубиша, смиреніе похвалиша, мнѣніе [1] омрачиша, и памятозлобіе посрамисте, бѣсы устрашисте, и злохитрство ихъ обличиша.

Вы, о преподобніи отцы, во всемъ животѣ въ правду, яко въ ризу, облекостеся, еже къ Богу молитвами и многія отъ него исхитисте сосуды и приведосте къ Христу покаяніемъ, и пастыри явистеся Христову словесному стаду. Нынѣ убо, о преподобніи отцы, возвеличи васъ Господь Богъ и сама Царица и Богородица Мати Господня; прославиша васъ бесплотныя силы; присвоиша васъ пророцы, объяша васъ мученицы, прияша васъ апостоли; возрадовашася святителіе, срѣтоша васъ полцы иночестіи и душа ваша святая рукама пріемша, и всѣхъ Владыцѣ и Богу, аки даръ освященъ, принесоша.

О, богоблаженніи и преподобніи отцы наши, Зосима и Савватіе! молимся вамъ, чадолюбивымъ отцемъ и отъ сердца съ любовію вопіемъ: своими молитвами очистите наша согрѣшенія, и отжените отъ насъ облакъ страстей, и просвѣтите наши душевніи очи, и немотующій языкъ нашъ исправите, и смыслъ оцыстите, и разумъ освятите, да нѣкая похвальная словеса въ память вашу, преблаженніи и богоносніи отцы, принести возможемъ. И сія убо, не мудрости слова дерзая, глаголемъ, но многою вѣрою и любовію вопіемъ, глаголюще: радуйтеся преподобніи отцы Зосима и Савватіе, во отоцѣ [2] семъ пустыню сію непроходимую градъ сотворили есте, и инокъ множество собрали есте, и своему житію послѣдовати научили есте; радуйтеся преподобніи отцы Зосима и Савватіе, началницы наши и поспѣшницы хотящимъ спастися, (пастыри) Христова стада словесныхъ овецъ, въ дому Господа Бога и Пречистые Его Матере; радуйтеся преблаженніи отцы, Зосима и Савватіе, умноживыи талантъ Господу своему, десять убо отъ Бога пріимша, а тысяща ими пріобрѣтосте; радуйтеся богоблаженніи отцы, Зосима и Савватіе, наша похвала и наша слава, и обитель ваша святая славится вашимъ нареченіемъ во всѣхъ концѣхъ Рускія земля; радуйтеся богоносніи отцы, Зосима и Савватіе, пастыри и учители Христова стада, сохраняя и соблюдая насъ отъ волковъ губительныхъ и непорочны приведосте къ пастырю и начальнику Христу; радуйтеся преблаженніи отцы, Зосима и Савватіе, пустынное украшеніе и безмолвное желаніе, ото всѣхъ странъ ученики къ себѣ собрали есте и своему житію ревновати научили есте; радуйтеся богодухновенніи отцы, Зосима и Савватіе, яко явистеся дѣлатели апостольскихъ преданій и исполнители неложны отеческихъ повелѣній; радуйтеся преподобніи отцы, Зосима и Савватіе, яко вы убо страну сію своимъ житіемъ и поученіемъ просвѣтисте и всякому благочестію наказасте! — Радуйся богоблаженне Зосима! Сія глаголалъ еси своимъ ученикомъ: братіе моя и чада, вѣсте убо сами, что слышали есте во время обѣщанія вашего, яко добрая убо дѣла трудомъ снискаются, и болѣзнію исправляются. Радуйтеся преподобніи отцы, Зосима и Савватіе, огражающе насъ, своихъ ученикъ, молитвами своими, и направляюще насъ ко иноческому житію, и уча нась терпѣти находящая ны скорби, со благодареніемъ; радуйтеся богоблаженніи отцы, Зосима и Савватіе, пріимшіи отъ Бога даръ и Пречистые Его Матери, по вашемъ, еже къ Богу, отшествіи, у честныхъ гробовъ вашихъ, Богъ творитъ чюдеса дивна, и Пречистая Богомати, множество недужныхъ приходящихъ съ вѣрою къ пречестнымъ вашимъ ракамъ, исцѣленіе всѣмъ вашими молитвами даруется.

И что много глаголю о велицѣхъ сихъ свѣтильницѣхъ, имъже нѣсть достоинъ весь міръ! или убо кто отъ земныхъ, по достоянію, возможетъ похвалити ихъ! Зосима убо явися небеснымъ силамъ собесѣдникъ, Зосима святыхъ апостолъ послѣдователь многотрудный, Савватей подражатель и ревнителъ всѣхъ святыхъ исправленіемъ. Зосима преподобнаго Евфимія житію подражатель явися, Савватіе же великаго Антонія разумъ и разсуженія прія. Зосима освященнаго Саввы уставу и чину совершитель показася, Зосима Ѳеодосію общежителю неложный подражатель явися, Зосима пастырь бысть Христова стада. Зосима и Савватіе врачеве отъ Бога даровастеся всѣмъ приходящимъ съ вѣрою къ честнымъ ихъ гробомъ, мужемъ и женамъ, старымъ и юннымъ, здравымъ и нужнымъ [3]. Тѣмже убо и всѣмъ всячески бывающе, по апостолу, да вся пріобрящутъ, да вся спасутъ, да всѣхъ ко Христу приведутъ покаяніемъ.

О, богоблаженіи отцы наши, Зосима и Савватіе, вы убо преподобніи были есте своимъ ученикомъ образъ и пронаписаніе, и ваше, преподобніи отцы, преданіе, иже во святѣй вашей обители вашими молитвами соблюдается невредно отъ вашихъ ученикъ даже и до сего дни, идѣже ваше многотрудное и пречестное тѣло лежитъ, источая чюдеса, яко рѣку многа, въ славу и честь Господу нашему Ісусу Христу, и Пречистѣй Его Богоматери.

Подражаемъ убо и мы, братіе, елико по силѣ, богоносныхъ отецъ нашихъ подвигомъ, сохранимъ заповѣди ихъ, возлюбимъ Возлюбившаго насъ, будемъ (другъ) другу блази, милостиви, милосердни, братолюбни, конецъ же всѣмъ, любовь отъ чиста сердца и совѣсти благы, молящеся Владыцѣ Господу нашему Ісусу Христу, яко да избавитъ ны отъ тмы страстей и призоветъ ны въ небесное свое Царство.

Но, о священніи отцы наши, Зосима и Савватіе, молимъ васъ: испросите смиреніе міру, сирымъ будите помощницы, алчущимъ питатели, скорбнымъ утѣшители и поборники, старости подпоръ, юннымъ наказатели, плѣннымъ свободители, и всѣмъ недужнымъ даруете здравіе, слѣпыхъ просвѣщаете, бѣсныхъ исцѣляете, прокаженныхъ очищаете, хромымъ даете хоженіе, глухимъ слышаніе, немотующимъ глаголаніе, разслабленнымъ стягнутіе, и всѣмъ намъ подайте, еже ко спасенію, прошеніе, иже во храмъ вашъ приходящимъ и память вашу съ вѣрою празднующимъ, сохраните и соблюдите всякаго навѣта вражія ненавѣтны!

Сицево ваше житіе, таково ваше и пребываніе, преблаженныхъ отецъ Зосимы и Савватія. Тѣмже коими словесы возможемъ васъ похвалити, преподобніи отцы? по исходѣ сего натрижненія [4] добрымъ убо подвигомъ подвизалися есте, по апостолу, теченіе скончасте, и вѣру соблюдосте, тѣмже и вѣнца пріясте отъ Бога, и нынѣ со всѣми водворяетеся въ небеснемъ Царствіи, со апостолы и пророки, и съ патріархи и съ мученики, со святители и преподобными, и со всѣми угодившими Богу отъ вѣка, наслаждаетеся съ ними неизреченныя радости, яже око не видѣ и ухо не слыша и на сердце человѣку не взыде, яже уготова Богъ любящимъ Его (1 Кор. 2, 9).

Что же и азъ, непотребный рабъ вашь, скверная уста имѣя и нечистъ языкъ, не имамъ что принести вамъ, въ день честнаго вашего пренесенія! Сіе убо малое приношу похваленіе, по силѣ нашея грубости, не яко даръ, сынъ отцу приношу сія, но яко рабъ неключимъ, долгъ сій Господеви своему отдаю.

О, пастыри добріи и истинніи, строители винограда Христова, отцемъ слава, и преподобнымъ единокровніи, и праведнымъ совсельницы, инокомъ наставницы, и общему житію совершители, и нынѣ на небеси Святѣй Троицы предстоите со всѣми святыми! И нынѣ убо молимъ васъ, о богоблаженніи и преподобніи отцы наши, Зосима и Савватіе, помяните свое стадо, еже мудре собрали есте, и соблюдайте своими святыми молитвами богодарованную вашу паству, яко чадолюбивіи отцы, и не презрите насъ, чтущихъ пречестную и многорадостную вашу память, и сохраните насъ и соблюдайте отъ всѣхъ видимыхъ и невидимыхъ врагъ, и пріидите посреди насъ невидимо, и всѣхъ насъ моленія, Богови возсылаемыя, пріимите и принесите сія ходатайственнѣ всѣхъ Творцу и Избавителю, иже въ Троицы Святѣй покланяемому, истинному Богу нашему, яко да согрѣшеніемъ нашимъ оставленіе получимъ, благодатію и человѣколюбіемъ Господа нашего Ісуса Христа, съ нимже Отцу слава со Святымъ Духомъ, нынѣ и присно и во вѣки вѣкомъ. Аминь.

Примѣчанія:
[1] гордость.
[2] островѣ.
[3] недужнымъ.
[4] поприща.

Источникъ: Памятники Древле-Русской духовной письменности: На освященіе церкви и на пренесеніе честныхъ мощей преподобныхъ и богоносныхъ отецъ нашихъ, Зосимы и Савваія, соловецкихъ чудотворцовъ, въ лѣто 7074 (1566), слово похвально. // Журналъ «Православный собесѣдникъ», Казань. — 1859 г. — Книга III. — С. 302-314.

Наверхъ / Къ титульной страницѣ

0