Наследие Святой Руси. Памятники древне-русской письменности
 
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Наслѣдiе Святой Руси
-
Гостевая книга
-
Новости
-
Написать письмо
-
Поискъ

Раздѣлы сайта

Святые Кириллъ и Меѳодiй
-
Книги старой печати
-
Патерики и житiя святыхъ
-
Великiя Минеи Четiи
-
Церковно-учит. литература
-
Творенiя русскихъ святыхъ
-
Стоянiе за истину
-
Исторiя Русской Церкви
-
Церковный расколъ XVII в.
-
Исторiя Россiи

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 15 декабря 2017 г. Сейчасъ на порталѣ посѣтителей - 5.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ТВОРЕНIЯ РУССКИХЪ СВЯТЫХЪ

Свт. Алексій, митр. Кіевскій и всея Руси († 1378 г.)
Поученіе къ христолюбивымъ христіанамъ
[1].

Хощу вамъ воспомянути душеполезная и спасительная. Понеже убо, дѣти, долженъ есмь васъ пасти и учить порученную мнѣ паству, какъ пишетъ Павелъ Апостолъ къ Тимоѳею Критскому: чадо Тимоѳее, учи, моли, запрети во время и безъ времене. Тѣмъ же убо, дѣти, да будетъ отъ васъ всякъ скоръ на послушаніе, а медленъ на глаголаніе, позденъ въ гнѣвъ, гнѣвъ бо не сдѣловаетъ правды Божія. Первое же, дѣти, предлагаю вамъ причту неложныхъ устъ Спасовыхъ, якожъ рече въ своемъ Евангеліи. Се изыде сѣятель (сѣянъ) сѣяти сѣмене своего; ово паде при пути, а другое на камни, а иное въ терніи, а иное на добрѣй земли. Сѣмя есть слово Божіе истинное, а земля, сердца человѣческія. Да не будетъ, дѣти, земля — сердца вашего терновата лѣностію и небреженіемъ, не творяща плода духовнаго, или каменна безстрашіемъ Божіимъ, и при пути — пристрастіемъ житія, (въ добычу) супостату нашему — діаволу и попраніе ногама его, его же да избвитъ ны Господь. Но да будетъ земля сердца вашего блага на пріятіе слова Божія, истиннаго Евангелія, творяще плодъ душевный ово тридцать, ово шестьдесятъ, ово сто. И паки рече Господь въ Своемъ Евангеліи: человѣкъ бѣ домовитъ, иже насади виноградъ и оплотомъ огради его и созда столпъ и ископа точило и передасть ѝ дѣлателемъ, да во время плоды отдадятъ господину своему. Человѣкъ есть Христосъ Богъ нашъ, ибо (елома) Онъ Богъ и человѣкъ; съ человѣки поживе спасенія ради нашего, по всему подобству, развѣ грѣха; яко же свѣтлый нашъ учитель Павелъ Апостолъ пишетъ: иже аще кто не исповѣсть Ісуса Христа Сына Божія во плоти пришедшаго, Бога и человѣка, той нѣсть Божій, но антихристовъ. А виноградъ насади — человѣчество на земли; и оплотомъ огради, рекше (то есть), закономъ Своимъ Божественнымъ; и созда столпъ, — Церкви Божественныя; и ископа точило — излія честную Свою Кровь, нашего ради спасенія, вѣрныхъ, и на пріятіе Царства небеснаго. И предасть дѣлателемъ, — святымъ Апостоломъ и святымъ отцемъ: патріархомъ, митрополитомъ и епископомъ, и всему священническому чину, да пасше и научивше люди закону Божію, рекутъ во второе пришествіе Христа Бога нашего: Господи, се мы и дѣти, яже еси далъ намъ. Тѣмже и азъ грѣшный сподобленъ быхъ сему святительству, рекше іерейству: не по моему недостоинству, но Божіимъ щедротамъ и по великой Его милости, юже излія на ны обильнѣ; сподобленъ быхъ быти вамъ — дѣтемъ моимъ пастухъ и учитель, пасти и наказати порученное ми стадо словесныхъ овецъ. Тѣмже, дѣти, вспоминаю вы Спасово слово, еже рече Своимъ ученикомъ и Апостоломъ: си заповѣдаю вамъ, да любите другъ друга и о семъ познаютъ вси, яко Мои есте ученици, аще пребудете въ любви. Такоже и вы, дѣти, имѣйте между себѣ миръ и любовь; о томъ бо Павелъ Апостолъ вопіетъ и глаголетъ: весь законъ единѣмъ скончавается, еже любити другъ друга и ближняго своего аки самъ себе. Такоже и вы, дѣти, имѣйте страхъ Божій въ сердцахъ своихъ; тѣмъ бо можетъ человѣкъ всяку добродѣтель стяжати: начало бо премудрости, — речено, — страхъ Господень. Такоже и Григорій Богословъ пишетъ: «идѣже боязнь Господня, ту плоти чищеніе и заповѣдемъ Божіимъ соблюденіе, а идѣже заповѣдемъ соблюденіе, ту и душѣ возвышеніе въ горній Іеросалимъ; а заповѣдемъ Божіимъ соблюденіе бываетъ таковыми дѣлы: покаяніемъ чистымъ о своихъ прегрѣшеніихъ, на всякъ день милостынею, и удалятися отъ неподобныхъ дѣлъ, яже суть кромѣ закона Божія: отъ блуда, отъ пьянства и грабленія; отъ насильства и чародѣйства и волшвенія и отъ всякихъ кобенъ и отъ несытости богатства и отъ всякаго злаго имѣнія, еже пребываетъ души на вредъ. Имѣйте же, дѣти, въ умѣ своемъ смерть и воскресеніе и судъ и отданіе комуждо по дѣломъ, по Спасову слову, якоже рече: сотворшіи благая въ воскрешеніе животу, а сотворшіи злая въ воскрешеніи суду. Князи и вельможи, судите судъ милостивно; судъ бо безъ милости есть не сотворшему милости; хвалится милость на судѣ. Мзды на неповинныхъ не пріимайте и не на лица судите, судъ бо Божій есть; судите людемъ въ правду и вдовицъ и сиротъ и пришельцевъ не обидите, да не возопіютъ на васъ къ Богу. А людская чадь (простолюдины), Бога бойтеся, а князя чтите, а святительство имѣйте выше своея главы со всякимъ покореніемъ безъ всякаго прекословія, тіи бо печалуютъ день и ночь о душахъ вашихъ; понеже воздати имъ отвѣтъ Богови о паствѣ своей. А къ церковному пѣнію будите, дѣти, спѣшни, утекаяся другъ предъ другомъ, якоже Іоаннъ Богословъ предъ Петромъ, ко гробу Христову. Князи и бояре и всякій правовѣрный христіянинъ, оставя вся дѣла своя, на церковную молитву стекайтеся безъ лѣности, и не рцыте тако: «отпоемъ себѣ дома»; не можетъ бо та молитва успѣти ничтоже, безъ церковныя молитвы; якоже бо храмина дымомъ безъ огня не можетъ согрѣтися, тако и та молитва безъ церковныя. Церковь бо наречеся земное небо, въ ней же закалается агнецъ — Сынъ Слово Божіе, за очищеніе грѣховъ всего міра нѣрныхъ людей, трепещущихъ словесъ Божіихъ; въ ней же проповѣдуется Евангеліе, благовѣщеніе Царства Божія и святыхъ Апостолъ дѣянія и соборная посланія и свѣтлаго нашего учителя Павла Апостола 14 посланій и святыхъ вселенскихъ Отецъ семь соборовъ почитаются и престолъ Божія славы Херувимы невидимо осѣняется и священническими руками Тѣло и Кровь Божественная пріемлется и вѣрнымъ людемъ подается на спасеніе и на очищеніе душамъ и тѣломъ. И таковое страшное и грозное и преславное чудо Божіе, еже есть церковное управленіе! И хощете домашнимъ своимъ пѣніемъ обрѣсти себѣ пользу? Того же, дѣти, разсмотривше, — прежнихъ тѣхъ словесъ, пострашите сердца ваша, вонмите себѣ разумъ, и прикладайте свою молитву домашнюю къ церковной молитвѣ. Егда, дѣти, прихóдите въ церковь, имѣйте со всѣми миръ и любовь, якоже рекъ Спасъ: егда принесеши даръ твой къ олтарю, иди прежде смирися съ братомъ своимъ. А входя въ церковь, потрепещи душею и тѣломъ, понеже не въ простъ храмъ входиши. Аще, дѣти, тако творите, то и молитва церковная за васъ пріидетъ. Съ боязнію бо и съ благоговѣніемъ и съ страхомъ Божіимъ въ церковь входите, а съ радостію изходите, получивше прощеніе грѣховъ. Въ церкви же егда стоите, помышляйте о своихъ прегрѣшеніяхъ; въ таковое время оставляйте за собою вся дѣла внѣ церкви, якоже святіи пишутъ, откровеніемъ Святаго Духа изложившіе святую службу: великій Василій Кесарійскій, Іоаннъ Златоустъ, Григорій Богословъ (Двоесловъ): «станемъ добрѣ, станемъ со страхомъ»; возлюбимъ другъ друга сердечною любовію, а не устами и языкомъ, и всякую нынѣ житейскую отвержемъ печаль (заботу); нынѣ бо «Силы небесныя съ нами невидимо служатъ». Не мозите, дѣти, прогнѣвати Бога бесѣдами своими въ церкви и отселѣ да престанетъ отъ васъ такое безстрашіе, еже есть церковныя повѣсти и некроткое стояніе въ церкви; но да будетъ сердце ваше земля благая, пріемлюща слово нашего ученія. Занеже, дѣти, азъ долженъ есмь, пріемъ отъ Бога талантъ, не крыти его въ земли, но раздати вамъ, добрымъ тружникомъ, и куплю творити духовную съ прибыткомъ, да и азъ съ великимъ Апостоломъ Павломъ дерзнулъ бы рещи, въ день судный, о ихъ же научи: вы похвала моя, вы и радость, вы и вѣнецъ мой предъ Богомъ. Такоже бы и мене грѣшнаго сподобилъ рещи Богъ во второе Его пришествіе съ вами, — съ своими дѣтьми: Господи, се азъ и дѣти, яже ми еси далъ. И нынѣ, дѣти, Бога ради, потщитеся всяко угодити Богови добрыми дѣлы и души своя спасти и гнѣвъ Божій утолити и себе приближити къ Богу. Да имѣли бысте, дѣти, знаменіе Христово въ душахъ вашихъ, якоже пишетъ Григорій Богословъ: «овца знаменана не удобь украдома бываетъ; знаменіе же овцамъ словеснаго стада Божія се есть: еже быти причастникомъ Тѣлу и Крови Христовѣ». Вы же, дѣти, словеснаго стада овцы, не пропустите ни котораго говѣнія безъ того знаменія, но будите причастницы Тѣлу и Крове Христовѣ. Се же, дѣти, аще вкратцѣ писахомъ вамъ вашего ради спасенія, но вы своимъ Богоразуміемъ разпространите въ сердцахъ своихъ плодъ духовный. Приточникъ бо рече: аще таковымъ коварствомъ поживете, рекше, ученіемъ, много лѣтъ поживете и приложатся лѣта живота. Такоже, дѣти, и вы, аще пріимете и соблюдете въ сердцахъ вашихъ еже писахъ вамъ и исполните не словомъ точію, но и дѣломъ, будете причастницы небеснаго Царствія, ему же всѣхъ васъ Богъ да сподобитъ во второе Его пришествіе со всѣми угодившими Ему отъ вѣка, быти обещникомъ горнему Іеросалиму, славяще въ Троици Отца и Сына и Святаго Духа, нынѣ и присно и во вѣки вѣковъ. Аминь.

Примѣчаніе:
[1] По списку съ рукописи Кирилло-бѣлозерскаго монастыря. Это поученіе замѣчательно не только какъ произведеніе нашего великаго отечественнаго святителя, но и какъ образчикъ того метода учительства, какой былъ обыченъ у нашихъ древнихъ пастырей; свойства его: простота, искренность, положительность ученія, библейская назидательность мыслей. Ред.

Печатается по изданію: Поученіе св. Алексія, митрополита Московскаго, къ христолюбивымъ христіанамъ. // Журналъ «Духовная бесѣда» на 1868 годъ. Томъ первый. — СПб.: Типографія А. Траншель, 1868. — С. 409-414.

Наверхъ / Къ титульной страницѣ

0