Наследие Святой Руси. Памятники древне-русской письменности
 
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Наслѣдiе Святой Руси
-
Гостевая книга
-
Новости
-
Написать письмо
-
Поискъ

Раздѣлы сайта

Святые Кириллъ и Меѳодiй
-
Книги старой печати
-
Патерики и житiя святыхъ
-
Великiя Минеи Четiи
-
Церковно-учит. литература
-
Творенiя русскихъ святыхъ
-
Стоянiе за истину
-
Исторiя Русской Церкви
-
Церковный расколъ XVII в.
-
Исторiя Россiи

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 24 марта 2017 г. Сейчасъ на порталѣ посѣтителей - 6.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

Творенiя русскихъ святыхъ

КАНОНЪ МОЛЕБЕНЪ.
Творенiе Кюрила грѣшнаго, гласъ 5:

Пѣснь 1. Ирмосъ:

Моѵѣйскую поминающе, о душе, десницю, бѣжи грѣхолюбиваго Iегѵпта и разумнаго фараона отверзися работы, да крестную прiимеши палицю и страстное пройдеши море смѣреньем, вопьющи: поимъ Господеви, славно бо прославися.

Азъ есмь обличитель сущихъ во мнѣ золъ дѣянiй, имиже прогнѣвахъ Христа, вся Того преступивъ заповѣди, и вся нынѣ писанью предахъ помыслы моя, словеса же и дѣлеса, скверны вся и беззаконья на слышанье всему мiру.

Доколѣ вязиши, убогая душе, объята тѣлесными страстьми, обидою и немилосердьемъ, гордынею и пьянствомъ? Си суть вражья тенета, иже тя живу до ада сведутъ. Но возпи покаяньемъ: О Христе мой! Расторгни ми съузъ грѣховьный и спаси мя.

Якоже немолчно славятъ огнедохновеньными гласы серафимстiи полцы Тресвятую Троицю, всея твари Сдѣтеля, то и я припадаю, прося отпуста многыхъ ми грѣховъ: о милостивый Творче! Поне наконецъ спаси мя.

Яко уродивыя дѣвы, не имамъ покаяннаго свѣтильника, ни стяжахъ масла милостивнаго, но всуе толку затвореномъ отъ мене дверемъ; но, о, Мати Божiя, избави отъ мукы лютыя убогую ми душю.

Пѣснь 2. Ирмосъ:

Вонми небо, рече Моiси, втораго написая закона перваго преступльшимъ, разумѣй, душе, свое паденiе; Богъ истиненъ, судяй праведно и въздая комуждо по дѣломъ его.

Адамьская помысливъ, въ бѣсовская впадохъ; по законьная емься, въ беззаконьная уклонихся; свѣтъ възненавидѣвъ, во тьмѣ грѣховнѣй заблудилъ есмь.

Грѣхи моя, аки Ламехъ, предъ всѣми исповѣдаю, а своего зла обычая никогда же не остануся. О лютѣ мнѣ, окаяньному, всѣмъ мукамъ повиньному!

Яко Богъ многомилостивъ, прiими мя кающася и даждь ми оставленiе многихъ ми сгрѣшенiй, да въ Троици прославлю Тя, Отца и Сына и Святаго Духа.

Яко всѣхъ сый грѣшнѣй, на небо воззрѣти не смѣю, но къ Тебѣ припадая, вопью: Мати Божiя Пречистая! Умилосердися на мя и избави мя вѣчнаго мученiя.

Пѣснь 3. Ирмосъ:

Яко Богъ всесиленъ, изнемогшюю грѣхми душю мою и сердце, злыми запустѣвше, доброплодно створи, духомъ скрушеномъ молитву Ти принесу.

Аще вспомяну си дѣла, отинудь отчаюся, яко Божiя не сотворихъ воля, но всю плотьскую похоть, прельщенъ врагомъ, сдѣяхъ, да кто мене не плачетъ, погибшаго лютѣ.

Зѣло горька, о душе, темница и люта верига, яже о тебѣ злопомнѣнья страсти; и аще сихъ не останешися, злымъ себѣ предаси бѣсомъ и тѣми лютѣ, яко плѣнница, томима будеши.

Яко человѣкъ сгрѣшихъ; но яко Богъ прости мя, Отче, Сыне и Святый Душе. Тобѣ вѣрою покланяюся и Твоея требую милости и до послѣдняго издыханiя.

Явлена отъ вѣка всѣхъ крестьянъ Заступнице и къ Богу Ходатаица Марье, богоизбранная Владычице! Прiими мою молитву и подаждь отпустъ многихъ ми прегрѣшенiй молитвами Си.

Сѣдаленъ, гласъ 6.

О, всестрастная душе! Како уязвися, како злѣ осквернися и како лютѣ неключима бысть! Подтщися, покайся и припади, вопьющи къ Богу, нѣгли муки избавитъ тя.

Судъ безъ милости, о душе, милости не сотворшимъ, блюди, внимай, Христово слово дѣломъ покажи; масло щедротъ воспрiими, и свѣщю покаянья сблюди неугасающю, побди, ожидающи Жениха, да внидеши въ чертогъ спасеныхъ.

Пѣснь 4. Ирмосъ:

Провидя духомъ Амбакумъ, еже до моея нищеты Твое, Христе, схоженье, укрѣпляяся смотрьно вопьяше: яростью напрязи на враги лукъ Свой, избавляя отъ плѣна рабы Своя, немолчно вопьюща: Слава силѣ Твоей, Господи.

Въ малъ часъ рабъ Христовъ нарекохся, во вся же дни и донынѣ грѣховный рабъ свѣдѣся, дѣлатель бывъ всякаго беззаконья, всѣми нечистотами осквернився и всякой муцѣ повиненъ бывъ, окаянный.

Горе, грѣшная душе, часто каешися и всегда сгрѣшаеши — почто не бѣжиши змьѣ, еяже губительство вѣси? Како не боишися скоропиѣ, смертное жало имущи? Пролѣй сльзы преже смерти, да ти угаснетъ вѣчный огнь.

Яже прiяхъ мнасу, и тою купля не творяхъ, но мысльную раскопавъ землю и лѣностьнымъ обивь платомь, невѣрьемъ душа посыпахъ. Но Троице Святая! Аще и взя отъ мене Свое, нъ въ кромѣшнюю тьму связана не посли мене.

Явленыхъ и неявленыхъ, вѣдомыхъ и невѣдомыхъ, и чресъестьственыхъ безаконiй яко Богъ прости мя молитвами, Богородица, Яже за вся молиться. Христе многомилостиве! Тоя ради възведи мя изъ пропасти грѣховныя.

Пѣснь 5. Ирмосъ:

Огньный умъ Исаiя духодвижимо провъзглашаше; утренюя къ Богу моляшеся приложити зло нечестивымъ, понеже истины не створиша на земли; тѣмъ взникни, душе моя, отъ мрака грѣховнаго и озарися покаянья свѣтомъ.

Быхъ подражатель Скарiоту Iюдѣ неправеднаго имѣнiя ради; лика же апостолъ отпадохъ, продавъ истину на лжу, и быхъ давимъ отчаяньемъ, но не презри мене, Христе Спасе, яко же Петра, плачущася горько.

Не прельщайся глаголющи, о душе, яко просто кающися спасешися; аще не потерпиши преже конца, слезами горько смиряющися, то лукавымъ подобна будеши бѣсомъ, иже вѣдуще Бога злое дѣютъ, и съ ними вѣчно мучена будеши, аще не плачешися нынѣ.

Иже рече Господь вдовицю обидиму отъ супернику, въ томъ же градѣ и судью неправедна: градъ убо, рече, разумѣй свое тѣло, вдовицю же убогую ми душу, обидиму сердечными помыслы, и судью — Слово Божiе, Единаго отъ Троица, ожидающа моего покаянiя, и си вся учившiися видятъ.

Яко всѣхъ крестьянъ Заступниця и Помощница обидимымъ, Мати Божiя Пречистая, къ Тобѣ припадаю моляся, прося отпуста многихъ ми золъ, очисти оскверненую лютѣ убогую ми душю Твоими Богопрiятными молитвами.

Пѣснь 6. Ирмосъ:

Яко Iона вопью Ти, Христе, въ китѣ золъ моихъ одержимъ: изъ глубины возведи мя грѣховныя, даже не искончается душа моя, въ церковь святую твою прiими мою молитву.

Азъ къ Тобѣ припадаю, Христе Спасе, прося прощенiя моихъ грѣховъ, иже отъ уности и донынѣ на убогую ми сдѣяхъ душю, но яко милостивъ, дажь ми сльзы покаянья.

Зѣло милосердъ еси, Христе, и смерти не хощеши грѣшнику, вожьзи Свою великую милость, и Свою обрящи мя драгму, и святыя съзови сусѣды, и всѣмъ створи веселье: ангеломъ и человѣкомъ.

Яко всуе тружаешися, о душе, о собѣ ищющи спастися, аще не отъ Бога дастьтися помощь: тѣмъ усердно покланяютися, Троице Святая, спаси мя на Тя надѣющагося.

Яко всѣхъ пребольши земныхъ и небесныхъ чиновъ, Дево Пречистая Богородице, къ Тобѣ бо припадаю моляся: ходатаи ми буди къ Сыну Си и всѣхъ Богу отраду ми подати въ день судный.

Кондакъ, гласъ 8.

Душевнаго паденiя по вся часы в собѣ видя и Твое долготерпѣнье, Слове, преобидя, всѣхъ благыхъ лишихъся и всякой муце повиненъ быхъ, но възведи мя отчаяна, Богородица ради, Многомилостиве.

Икосъ:

Земная и временная возлюбивъ, вѣчныхъ благъ лишенъ быхъ, приди, душе, и возпи Христу: едине человѣколюбче, грѣшникомъ не отсѣкъ надежи, но милость кающимся пролья, и мене кающася не презри; разумѣю разбойника, исповѣданiемъ спасена, и мытаря, милостынею очищена; ту и блудницю помышляю плакавшюся, яко во всѣхъ положилъ еси образъ покаянiя. Мощенъ же еси и моя отпустите прегрѣшенiя, имиже по крещенiи осквернихся, и чистоту яко Богъ подаждь ми, и спаси мя Богородица ради, Многомилостиве.

Пѣснь 7. Ирмосъ:

Ангеломъ отроки схранивъ въ кипящи пламенемъ пещи, и мучителя опаливъ, посрами, яко Богъ извѣствуя силу Свою, Емуже поюще рцемъ: въ вѣкы благословенъ еси.

Годъ покаянья, о душе, не отлагай, мысли прочее: еда яко на Настасья оного, гнѣвъ Божiй скоро варить тя, [1] и внезапу оставльши все, адьское постигнеши дно.

Ѳеодосья великаго царя бодрое покаянiе ты вѣси, о душе, и чимь своя очисти сгрѣшенья, да и ты отъ унынья вспряни, омывающи слезами своя прегрѣшенiя.

Яко же чту Бога Отца, тако вѣрую въ Сына Христа, единако молю и Духа Святаго, славлю въ единствѣ Троицю, покланяюся единому Богу и прошу грѣховъ отпуста.

Яко едину имамъ, Богородице, утѣху и прибѣжище, и Тя на помощь призываю, умоли Христа, Его же еси родила, милостивому быти сдѣ нынѣ и въ день судный.

Пѣснь 8. Ирмосъ:

Царскихъ дѣтiй молитва пещный пламень прохлади и ярость мучителеву побѣди, и, яко въ чертозѣ поюще, глаголаху: благословите вся тварь.

Безъ добродѣтели молящися, о душе, аще и въздухъ исполниши словесъ, судитъ ти Паѵелъ глаголя: пяти словъ хощу въ молитвѣ съ вѣрою, неже тьму словесъ языкомъ.

Господи многомилостиве, на мя скорбнаго призри, и худую сiю прiими молитву, не хитростью слагаему, но отъ горести убогiя ми душа о грѣсѣхъ приносиму.

Яко единому Богу въ Троици изъ глубины сердца въпью, и вѣрою молютися глаголя: Отче нашъ, Иже еси на небесѣхъ! Отпусти наша долги, ни въведи въ напасть, но отъ непрiязни избави ны.

Яко Заступница сущи вѣрою Тобѣ молящимся, тѣмъ къ Тобѣ нынѣ припадаю: не презри, но спаси, Богородице, и всякого избави зла Ты, и мою къ Богу донеси молитву.

Пѣснь 9. Ирмосъ:

Тя по естеству Деву и паче естьства Бога рожьшю Евжину клятву потребивша и Адама отъ узъ избавльшаго, Его же нынѣ моли подати ми оставленiе грѣховъ, да Тя, Богородице, радостнымъ сердцемъ правовѣрно възвеличимъ.

Ангели и Архангели, Херовими и Серафими, Власти и Владычьства, Престоли, Господьства и вся чиноначалiя горнихъ чиновъ молятъ Тя, Христе, Царю всего мiра: молитвами небесныхъ силъ помилуй мя, грѣшнаго.

Единому Тобѣ, Христе, сгрѣшихъ, и паче всѣхъ Тя прогнѣвахъ, и душю злыми осквернихъ, но Своею милостiю оцисти мя, послушавъ моленья Божественныхъ Властiй, окрестъ престола стоящихъ и за весь мiръ молящихся.

Како хощу осуженный предстати Тобѣ, Судiи всѣхъ Богу, обличаемъ за вся злая моя, яже безъ ума сгрѣшихъ, волею себе всего осквернихъ, но щедротами своими, Христе, помилуй мя осуженаго.

Помилуй мя, Боже, помилуй, егда хощеши ми судити, не осуди мене въ огнь, ни обличи мене яростью Си: молить Тя Дева чиста, рожъшiя Тя, Христе, и множьство ангелъ и мученикъ сборъ.

Cвѣтиленъ: Небо звезд. На хвалитехъ, гласъ 4.

Престолъ тщеславьемъ собѣ поставихъ, ложнымъ многословiемь на немъ възлегохъ, самохваленiемь вся осужаю, пагубно омрачихся, дымъ въ солнца мѣсто держю, съ горы закона уклонихся, яко тощь корабль мысленными волнами умъ погрузихъ въ мiрстѣмъ любоимѣнья мори, възлюбихъ нынѣшнiй вѣкъ и гнусныхъ наполнихся дѣлъ: Господи, потопа грѣховнаго избави мя.

Колесницю уготовихъ си, похотьми грѣха утворену; акы коня впрягохъ злую скверну и безаконья, имиже несомъ по широкому пути стыднаго обычая, въ послѣднее се спасительное крещенье темнаго огня: не презри мене милостiю Си, Iсусе, всего мiра грѣхы вспрiимъ, и настави мя на путь покаянья, да дѣло съ разумомъ принесу Ти; яко и кадило, прiими молитву мою.

Бѣжати грѣха помыслихъ и скоро многими постиженъ быхъ, похоть грѣха удолжихъ, и еще мысль прилежатъ ми на зло, но уподобихся свиньямъ, радующимся сквернѣ, и поревновахъ псомъ, поядающимъ своя блевотины, и утольстихъ плоть, и бѣсомъ игралище оставихъ, — и како исповѣдѣ по числу, а не свѣдѣ моихъ золъ? О Христе мой, Слове! Отъ грѣховныя мя работы, яко милостивъ, свободи.

Слава, и нынѣ: Богородице, о мiрѣ молитвенице и Богу нудительнице, человѣкомъ спасительнице и бѣсомъ лютая томительнице! Хотѣнiю Ти, Дево, пресильна сила въслѣдуетъ, токмо въсхощи; не мьнѣ, Владычице, но имени Твоему дажь славу, молютися, милостивая, створи, да буду царь тѣлу своему и господинъ вредомъ и естьству приставникъ, подражатель Сына Ти. Отъ помощи Твоея утѣшенiе мое скорое.

На стиховнѣ стихѣры, гласъ 8. Подобенъ: Что вы.

Еже ми подкопа врагъ въ первую годину храмину, и душевную украде чистоту, понеже въ третью годину старости дажь възбнути на покаянье, да не въ грѣсѣ и нищетѣ скончаюся. Ищѣте, реклъ еси, и просящему дати обѣщася, и толкущему ми отверзи двьри милости Твоея.

Шатанiе уности, лицемѣрье старости — обое безъ ума притяжахъ, въ лестную одѣяхся ризу и всь студа наполнихся; се, яко въ зерцало приникъ дѣлъ моихъ, скверно душа моея узрѣхъ, и яко во окринѣ слезъ моихъ омыти подвигнуся, дажь ми время покаянiю.

Вѣка сего любовiю многа имѣнiя желаю, а самъ долго жити не могу; покаянiю годъ отлагаю, въ старости Богу послужити мышлю, и лѣнивѣ свою жизнь скончаваю, сластьными ласкосердуя, похотьми побѣжаемь, гордъ, и величавъ, и самомнивъ, Господи, избави мя отъ смерти тѣла моего.

Разумное Утро, Богородице, и Заре безначальнаго Свѣта, Встокъ сiянiя славы Отча и чувьственое солнце свѣтомь подарившаго, ангельскый умъ разумомъ кормящаго, сего многоочитiи видѣти не могуще, крилы закрываються, о Мати свѣтлыя чистоты, створи мене сына дни и чадо света!

Блаженны, гласъ 6. Ирмосъ:

Разбойникъ оглагола — разбойникъ же благослови; сiя оба на крестѣ повѣшена, но, о Милостиве, яко тому рцы познавшему Тя, Господи, и мнѣ отверзи двьри преславнаго Ти царствiя.

Страшенъ еси, Господи, изливая безчестье на князя, на священникы гнѣвъ открывая и судiя въ плѣнъ посылая, по воли сгрѣшившихъ и волею не кающихся.

Горе лѣности моего спасенiя; людская грѣхы присно изѣдаю, просимыя скоро прiемля дары; но си праведничю прiимуть мьзду, азъ же съ лицемѣры осуженъ буду. Имже вѣси судомъ, Iсусе, спаси мя.

Падшiй мя умъ въздвигни, Господи, да жертву словесну исповѣданiя устъ принесу Ти и душевное кадило — сердца воздыханiе; послушай моего моленiя, яко отецъ своего чада нѣмованiя, и прiими мою молитву, яко мати младенца.

Божьство въ Собѣ сый, Свой имѣя умъ, бѣ присно умъ свѣтелъ, а ино ничтоже — се единьство не обято мыслью, ни кый же умъ достигнеть, ни Сына кто вѣсть, аще не Духъ право сроденъ просвѣтить приглашати: Троице Святая, спаси души наша.

Марiе, небесное Кадило! Божественный Угль въ Собѣ имѣла еси, Егоже Моиси въ купинѣ, Исаiя отъ Серафимъ, Езекiиль въ колесихъ видѣти сподобишася, Богородице, пресвятое имя, спаси душа наша.

Примѣчанiе:

[1]
Разумѣется императоръ Анастáсiй Диррахъ (ум. 518 г.), за свое нечестiе пораженный внезапной смертiю. Вотъ что объ этомъ сообщаетъ блаж. Iоаннъ Мосхъ (†619г.), писатель книги «Лугъ духовный» (Сергiевъ Посадъ, 1915 г., стр. 50):

«Одинъ хрістолюбецъ повѣдалъ намъ слѣдующее объ императорѣ Анастáсіи. Послѣ того, какъ онъ изгналъ патріарховъ константинопольскихъ Евѳимія и Македонія и отправилъ ихъ въ ссылку къ Понту въ Евхаиты, по дѣлу о Соборѣ отцовъ, бывшихъ въ Халкидонѣ, самъ императоръ Анастасій видѣлъ во снѣ прекраснаго мужа, одѣтаго въ бѣлую одежду. Явившійся стоялъ противъ него, держалъ въ рукахъ исписанную книгу и читалъ ее. Перевернувъ пять листовъ, онъ прочиталъ имя императора и сказалъ ему: «вотъ – за твое зловѣріе я изглаждаю четырнадцать [лѣтъ]» – и изгладилъ своимъ перстомъ. Спустя два дня – вдругъ сверкнула ослѣпительная молнія и раздался страшный ударъ грома. Анастáсій въ ужасѣ испустилъ духъ съ невыразимой тоской. Это – воздаяніе за то, что онъ нечестиво поступалъ противъ святой Церкви Христа Бога нашего и ссылалъ въ ссылку ея пастырей». (примѣч. – А. К.)

Печатается по изданiю: Творенiя святаго отца нашего Кѵрiлла, епископа Туровскаго съ предварительнымъ очеркомъ исторiи Турова и туровской iерархiи до XIII вѣка. – Изданiе Преосвященнаго Евгенiя, епископа Минскаго и Туровскаго. Кiевъ: Въ Типографiи Кiево-Печерской Лавры, 1880. – с. 246-264.

Наверхъ / Къ титульной страницѣ

0