Наследие Святой Руси. Памятники древне-русской письменности
 
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Наслѣдiе Святой Руси
-
Гостевая книга
-
Новости
-
Написать письмо
-
Поискъ

Раздѣлы сайта

Святые Кириллъ и Меѳодiй
-
Книги старой печати
-
Патерики и житiя святыхъ
-
Великiя Минеи Четiи
-
Церковно-учит. литература
-
Творенiя русскихъ святыхъ
-
Стоянiе за истину
-
Исторiя Русской Церкви
-
Церковный расколъ XVII в.
-
Исторiя Россiи

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 25 iюня 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

Творенiя русскихъ святыхъ

Молитвы на всю седмицу св. Кирилла, епископа Туровскаго.

МОЛИТВЫ ВЪ СРЕДУ.

Молитва
Въ среду по Утрени преподобнаго Кирила.

Госпоже моя Богородице! Умилосердися на мя, много согрѣшившаго и преступившаго самовластнымъ умомъ заповѣди Сына Твоего и Бога моего. Нѣсть во мнѣ мѣста чиста, но все скверно. Незатвори ушію благоутробія Твоего отъ покаянія; не отврати лица Твоего отъ моленія унылыя душа моеа; не презри движенія нечистую ми устну, но приими въздыханіе убогаго ми сердца. Се бо предстою, яко осуженникъ: скверною грѣховною, яко свидѣтели, одержимь, и все тѣло и душу язвено имѣя, и всяцѣй муцѣ повѣнень [1] сый. Но простри ми, Дѣвице, врачевнѣи Твои руцѣ, на нею же поноси цѣлителя и врачя всего мира Господа нашего Ісуса Христа. О прибѣжище мое и Заступнице! Не престай о мнѣ молящися Ему: яко золъ душа моя наполнися, да тѣмъ ужасаюся и трепещу, съкрушеннымъ сердцемъ и съ слезами вопію: не остави мене до конца погыбнути: имаши бо, Госпоже, дерзновеніе, яко Мати Вышняго: избави мя отъ работы лукаваго; расторгни узы моя; возврати мя отъ плененія вражіа, съкруіпи сѣти ихъ, погуби льщеніе ихъ. Покрый мя Твоимъ заступленіемъ, Надеже всѣмъ концемъ земли, Пресвятая Госпоже Дѣво Богородице, ангельское великое удивленіе, пророческая высокая проповѣдь, апостольскаа похвала, мученикомъ крѣпкое утверженіе, святительское изрядное украшеніе, Царемъ православнымъ и княземъ необоримая держава, церквамъ честное украшеніе; мнишьскому же чину Ты еси, Госпоже Богородице, святое упованіе; постникомъ Ты еси, Госпоже Царице, непобѣдимая надеже; вѣрнымъ всѣмъ твердое ограженіе и сущимъ въ болезнехъ легкое исцѣленіе; блудящимъ нетрудная наставница; въ бѣдахъ скорая заступница; ненавидимымъ ты еси, Госпоже, любовное смиреніе; вдовицамъ и сиротамъ питательнице; матеремъ тихое веселіе; дѣвамъ чистота и похвала; младенцамъ мудрости наказаніе; плавающимъ не влаемое [2] пристанище; путникомъ легкое прехожденіе; тружающимся благое покоище; нищимъ неизготоваемо [3] богатство; обидимымъ покровъ и прибѣжище; печальнымъ присная утѣха; грѣшникомъ Ты еси, Госпоже Мати Божіа, къ Богу присвоеніе; христіаномъ всѣмъ неложная хранительница; миру всему извѣстное спасеніе. О, Пресвятаа Госпоже Дѣво Богородице! Ты едина мое утѣшеніе, не гнушайся мене сквернаго: надѣю бо ся Твоея милости: угаси во мнѣ грѣховный пламень, ороси покаяніемъ иссохновеніе мое [4]; сердце очисти и умъ мой отъ грѣховныхъ мыслей и дажь устомъ моимъ тихоглаголаніе и очима моима источникъ слезъ; сими да омыю калъ неподобныхъ ми дѣлъ. Ты же, Госпоже, съвѣси нечистоту и скверну окаанныа ми душа. Въздыхаю къ Тебѣ изъ глубины сердца и мольбу приношу Ти отъ устъ скверныхъ: умилосордися, Дѣвице, и помилуй мя; призри на моленіе мое; вижь болѣзнь убогіа моеа душа. Приклонися, Госпоже, къ слезамъ моимъ, и вижь немощь естества моего, и буди ми ходатаиця къ Сыну своему и Богу моему и Творцу моему, о мнѣ недостойнѣмъ рабѣ твоемъ (имя рекъ). Укроти, Госпоже, ярость Его матерними Ти молитвами: пріемлетъ бо Тя молящуся о души окааннѣй: заступницу Тя показа вѣрою призывающимъ Тя. Азъ, Госпоже, всегда на Тя надѣюся, упованіе мое и прибѣжище, покровъ и ограженіе, стѣно необоримая: къ Тебѣ прибѣгаю вѣрою, душевныхъ и тѣлесныхъ язвъ исцѣленія прошю. Ты бо съвѣси помышленіе преже прошеніа моего [5]: да что прочее къ съвѣдущей [6] мое естество възглаголю? Аще Госпоже восхощеши, можеши мя очистити и прочее время непорочно съхранити и на добродѣтель укрѣпити мя: да отъ сего часа непоработаю сквернымъ мыслемъ и сластемъ, влекущимъ мя въ глубину нечаанія; да, свободы воля творя [7], славословлю пресвятое имя Твое, Богородице Госпоже Владычице: Ты еси моего невѣденіа направленіе [8]. Приими мое въздыханіе, облегчи мою болѣзнь, устави бурю злыхъ ми напастей, приражающу ми ся всегда моими грѣхы, раздери рукописаніе беззаконій моихъ и бремя грѣховное облегчи: подай жадаемое прошеніе и сподоби мя порадоватися на земли кроткыхъ, въ селехъ праведныхъ, въ земли вѣчной, въ пищи неизготоваемой [9], въ немерцающемъ свѣтѣ. О Госпоже моя! Припади молящися о мнѣ убозѣмъ; вѣси бо, каковыа моа бѣды суть. Подвигнися, яко блага, на помощь мою, да непогибну злѣ за безчисленыя грѣхы моа, но вездѣ [10] Тобою избавлюся. Ангельскый гласъ възываю Ти: радуйся Обрадованная, Дѣво Мати Богородице, земное Небо, огненосный Престоле, одушвленнаа Церкви, пространнаа Палата, Бога невмѣстимаго святое Село, пресвѣтлая Свѣща, скорая Молніе напомощь, Звѣзда незаходимаа, Чаша напаяющи здравія, Баня омывающи грѣхы, Възведеніе человѣческому роду, Трапезо хлѣба животнаго, Мати Христа Бога нашего, Его же моли, да избавитъ мя отъ вѣчныя мукы Твоими молитвами святыми, всегда нынѣ присно, и въ вѣкы вѣкомъ. Аминь.

Молитва
Въ среду по часѣхъ святаго Кирила священноинока.

Пріими, Госпоже Богородице, гласъ молитвы моея, юже недостойнѣ [11] приношу отъ смиреннаго ми сердца. Иного бо развѣе Тебе не свѣмъ ходатая къ Сыну Твоему и Богу и Творцу моему. Яко въ суетнемь семь житіи вся неподобная, стыднаа дѣла сътворихъ, яже аще помянути восхощу, весь въ глубину нечаянія погружаюся. Съвѣсть бо ми душа дѣянiя, яже сътворихъ въ мимошедшее время живота моего и до сего дне плотьскыми похотьми облекохся [12] и вся чювствіа моя, душевнаа и тѣлеснаа, осквернихъ. Того ради уны въ мнѣ духъ мой, трепещутъ ми составы, и ужасаеть ми ся сердце, изнемогаеть ми языкъ. Нѣсть ни единаго дѣла зла, его же не сотворихъ окаанный азъ; но Ты, Пресвятая Богородице Дѣво Маріе, живота моего прибѣжище, помощнице вѣрнымъ, грѣшникомъ надеже, непрезри моленіа [13] моего; къ Тебѣ все упованіе възложихъ, умилосердися, Владычице, неостави мене до конца погыбнути; зане зѣло грѣшень есмь и нѣсмь достоинъ много глаголати предъ Тобою Госпоже. Поминаю бо Давыда, рекшаго: мужь языченъ не исправится на земли [14]. Но сама, Госпоже, вѣси струпы сердца моего и болѣзнь душа моея; тужю и скорблю и печалію уязвляюся; судный часъ помышляю и весь изнемогаю, въ оньже [15] судъ [16] праведенъ, и никто никому же помощи можетъ. Того ради, жерломъ [17] съ слезами вопію Ти, Мати Божіа Пресвятая: умоли Христа преблагаго Человѣколюбчя: да непомянетъ многыхъ безаконій моихъ, но избавитъ мя плача оного безконечнаго и скрежета зубнаго и червіа неусыпающаго и огненного родства, идѣже грѣховніи козлища пасоми суть. Но дай же ми твою милость и сподоби мя десныхъ овецъ паствины, окрестъ святыхъ селищъ, въ оплотѣ небеснаго [18] рая. Ты бо еси намъ надежа убогимъ и Тебѣ ся мили дѣемъ [19], просяще получити прощенія грѣховъ Твоими богопріятными молитвами, всегда нынѣ присно, въ вѣкы вѣкомъ. Аминь.

Молитва
Въ среду по Вечерніи святаго Кирила.

Вечеръ и заутра и полудне исповѣдаю Ти ся, Господи Боже Вседержителю, Отче Господа нашего Ісуса Христа, Его же послалъ еси взыскати заблужшихъ и спасти погыбшихъ, отъ нихъ же первый есмь азъ, заблудивый [20] праваго пути, ведущаго въ жизнь и уклонився въ дебри любосластныя, углебохъ въ тинѣ дѣлъ моихъ, и безаконнымъ терніемъ весь осуженъ быхъ [21]! И видя мя врагъ, въ тѣхъ тружающася [22], болшими сквернами хощетъ потопити окаанную мою душю; но Тебе Единаго Избавителю молю, Тебе помощника призываю милостива и человѣколюбца: не гнушайся мене, Владыко, не отрини отъ Твоего лица, зане вся злаа предъ Тобою съдѣяхъ. Исповѣдаю Ти, Господи, вся грѣхы моя, яже сътворихъ на убогую мою душю, и быхъ преступникъ всѣхъ Твоихъ заповѣдей, безсловеснымъ повѣнуяся похотемъ; работая чреву, душю измождихъ [23]. Нынѣ примѣтаюся въ щедроты Твоя [24] и вечернюю Ти приношу молитву. Послушай мене, Господи, обѣщавыйся услышати во истину призывающихъ Тя. Дажь ми Твой ангелъ, да запретитъ всѣмъ нечистымъ духомъ, борющимся со мною, да постыдятся и посрамятся ищущеи душю мою, и да потребить отъ моего сердца всяко подвиженіе моего плотскаго помысла, отъ непріязненыхъ похотей въстающее. Да будетъ всегда со мною хряняй мя, укрѣпляя мя на дѣла блага и на всякъ день донося молитвы моя Тобѣ Богу и Творцу моему. Ты убо Пресвятый Царю, отъ всеа твари поклоняемый Ісусе Христе, праведники любя, никогдаже отступающаа отъ Тебе, и грѣшники милуя, обращающаася къ покаянію, и вся призывая на спасеніе: направи нозѣ мои къ заповѣдемъ Твоимъ, пригвозди плоть мою страсѣ Твоемь; сердце очисти правовѣріемъ, уста наполни богословія [25] Твоего; языкъ умири [26] смирено глаголати, душю освяти и очисти Святаго Твоего Духа посѣщеніемь [27]; мысль исправи не прилѣпну земныхъ; умъ возвыси крилома богоразумія и всего мя устрой, яко Своего угодника. Да якоже сподобилъ ми еси преити день сій, и нощный покой дайждь ми [28] безо всякаго мечтаніа, діявольскыхъ дѣяній: да и на одрѣ постеля моея поминаю пресвятое имя Твое, и тѣмь просвѣщаемь, не омрачаюся въ день исхода, егда же разлучается душа моя отъ тѣлесе моего. Но дай же ми обрѣсти радость предъ славою Твоею, да приимуть мя праведници съ веселіемъ въ вѣчную жизнь въ невечерній свѣтъ [29], въ неизреченную радость, молитвами Пречистыя Ти Владичица нашеа Богородица [30] и святыхъ верховныхъ Апостолъ Твоихъ и святаго святителя отца нашего Николы и всѣхъ святыхъ. Яко благословися и прославися велелѣпно имя Твое Отца, и Сына, и Святаго Духа, нынѣ и присно и въ вѣкы вѣкомъ. Аминь.

Молитва
Въ среду по Вечерни [31].

Моля, нынѣ предстахъ Апостольскій ликъ, числомъ дванадесять! Пріимите воздыханіе мое и милосердно съ небеси призрите на мя, спасенія просяща; молитвами вашими, блаженніи, изъ глубины золъ возведите мя; яже всего міра отъ тля восхищающе, отъ прелести діяволя избавите; вѣрніи столпове пріисходньцы (?); заповѣдьми Христовыми утвердите мя: церковніи свѣтильницы, озарите мя, грѣхми ослѣпленна; изъ Египта страстей изведите мя и на землю спасеніа наставите; воздѣяніе руку моею пріимите и воздыханіе сердца моего услышите и къ Богу о мнѣ мольбу сотворите Апостоли! Да милостивъ ми будетъ Богъ и увѣтливъ: ожидаетъ бо человѣкомъ покааніа, зане человѣкъ бысть. Святіи Апостолп славніи, Петре и Павле, Іоанне треблаженный, Матфею, Марко и Лука съ Филиппомъ и съ Симономъ, разумѣеми вѣрнымъ заступници, Фома, Варфломею, Андрею и Іакове и вси святіи Апостоли, утверженіе всѣхъ, заступница же и стѣны недвижимыя: молитеся избавитися мнѣ мученіа; молитвенници сущіи, всегда славніи, милости мене сподобите и пленица моихъ грѣховъ разрѣшите и въ онъ часъ варите, егда предъ Богомъ станемъ: страшно бо тамъ судище, нагимъ всѣмъ стоящимъ на обличеніе. Апостоли святіи, законоположници славніи! Тогда мя вскорѣ избавите и ущедрите мя грѣшнаго, егда Богу предстанемъ, Емуже поклоненіе, слава и хваленіе со Отцемъ и съ безначальнымъ Духомъ, и нынѣ и присно и въ вѣкы Аминь.

Молитва
Въ среду по Вечерни святому Николѣ.

Яко тепла въ бѣдахъ помощника молю, Тя, треблаженный Николае! Се бо прихожю Ти осуженый, многими грѣхи уязвенъ. Полунощи припадаю Ти въ молитвахъ молящися: милостивнѣ приклони уши и гласъ моленіа моего внуши. Се бо страсти моя плотьскіа мучащи: якоже преже избавилъ еси воеводы пришедша, блаженне, якоже во снѣ цареви предсталъ еси и отъ темница неповинныя избавилъ еси, тако и мене, связаннаго страстьми, спаси и избави, молю Ти ся, многосплетеныхъ сѣтей зміинъ: яко избавляеши къ Тебѣ прибѣгающаго отъ врагъ видимыхъ и невидимыхъ и подаеши божественную помощь, яко пастухъ милостивый отъ гордаго мя звѣря исхити, яко же тріе воеводы. Первіе Троицы бывъ служитель, и молитвы творя къ Ней, пріиди и возстави мя отъ глубины согрѣшеній моихъ. Отче Николае! Заступи мя въ день страшный и отъ муки изми и свободи мя отъ тьмы несвѣтимыя и отъ скрежета зубнаго. Святителю! да побѣдитъ множество щедротъ твоихъ соблазнъ моихъ бездну. Егда хощетъ мя судити Зиждитель, испытая золъ моихъ множество, и тогда да обрящю тя помощника, избавляющаго мя отъ напасти видимыхъ и невидимыхъ врагъ моихъ. Святителю, молитвами си исцѣли и избави! Покажи, отче Николае, твоими молитвами бодра мя къ Богу, отъ всякаго мя избави кова бѣсовъ. Христе Боже, молитвами Пречистыя Твоея Матере муки страшныя избави: свѣси бо моя согрѣшенія многая, но сія очисти по благости. Святъ, святъ, святъ еси во вѣкы вѣкомъ. Аминь.

Примѣчанiя:

При изданіи молитвъ св. Кирилла, были использованы:

Три рукописи Соловецкой библіотеки
а)
сборникъ подъ № 802, состоящій изъ статей разнаго содержанія, написанныхъ въ XV и XVI в., въ 4-ю долю, на 202 стр; здѣсь помѣщены 21 молитва св. Кирилла на л. 171-201: всѣ молитвы названы именемъ Кирилла Туровскаго, или Кирилла преподобнаго, Кирилла священноинока;
б)
Большой Требникъ дачи Новгор. Митроп. Макарія подъ № 1085, написаный въ 1505 г., въ листъ, на 712 листахъ: молитвы св. Кирилла, въ числѣ 21, занимаютъ здѣсь 684-712 стр;
в)
Слѣдованная Псалтырь, принадлежавшая св. Филиппу Митрополиту, написанная въ XVI в. въ 4 долю на 547 стр: здѣсь помѣщены четыре молитвы св. Кирилла: по одной молитвѣ послѣ каждаго молебнаго канона Святой Троицѣ, св. Крестителю, св. Апостоламъ и всѣмъ Святымъ;

Двѣ рукописи Волоколамскаго Монастыря
г)
Сборникъ подъ № 109, состоящій изъ разныхъ молитвъ и написанный въ концѣ XV или началѣ XVI в., въ 4 долю, на 258 стр: здѣсь, на стр. 46-138, находится 50 молитвъ, которыя названы именемъ Кирилла грѣшнаго, мниха недостойнаго, кромѣ 8 молитвъ, не означенныхъ ни чьимъ именемъ;
д)
Сборникъ подъ № 413, написанный въ XVI в, въ 4-ю долю, на 788 стр: здѣсь помѣщено 12 молитвъ съ именемъ преподобнаго Кирилла или Кирилла священноинока, на стр. 648-686. За основанiе текста молитвъ мы принимаемъ списокъ ихъ въ сборн. Солов. № 802, какъ болѣе исправный сравнительно съ другими списками и будемъ указывать на замѣчательныя разности, заключающіяся какъ въ этихъ спискахъ, такъ и въ печатномъ изданіи (см. статью «Отъ издателя»). Молитвы же, не находящіяся въ этомъ спискѣ, будутъ напечатаны по рукописи Волокол. № 109.

[1]
Т. е. повиненъ.
[2]
Въ печатномъ изданіи: не бурное...
[3]
Въ печатномъ изданіи: неисчерпаемое
[4]
Въ печ. изданіи: иссохшее ми сердце...
[5]
Въ печат. изданіи словъ: преже прошеніа моего, нѣтъ.
[6]
Въ печат. изданіи: свѣдущій...
[7]
Въ печат. изданіи: свободный волю творяй
[8]
Такъ и въ печатномъ изданіи.
[9]
Въ печат. изданіи: неиждиваемѣй
[10]
Въ печат. изданіи: всегда...
[11]
Въ печат. изданіи: недостойный...
[12]
Въ печ. изданіи: сплетохся; въ ркп. Волок. № 109: оплетохся.
[13]
Въ печ. изданіи и ркп. Волок. № 109 воздыханія...
[14]
Псал. 139, 12.
[15]
Въ печат. изданіи: понеже...
[16]
Въ рук. Волок. № 109: судія.
[17]
Т. е. гортанью.
[18]
Въ рук. Вол. № 109: благословеннаго.
[19]
Т. е. молимся.
[20]
Въ печат. изданіи: заблудихъ...
[21]
Въ печатн. изданіи: избодохся...
[22]
Въ печатн. изданіи: тѣми боляща...
[23]
Въ печатн. изданіи: острупихъ...
[24]
Въ печатн. изданiи: нынѣ на щедроты Твоя уповая...
[25]
Въ печатн. изданіи: благодати...
[26]
Въ ркп. Волок. № 109: умили...
[27]
Въ печатн. изданіи: душу освяти Духомъ Святымъ...
[28]
Вь печатн. изданiи: тако и нощь сію даруй ми...
[29]
Въ печатн. изданіи слова: въ невечерній свѣтъ – пропущены.
[30]
Въ печатн. изданіи прибавлено: Приснодѣвы Маріи, а послѣ словъ: Апостолъ Твоихъ – прибавлено: всея вселенныя свѣтильникъ...
[31]
Молитва эта и слѣдующая напечатаны по списку Волок. № 109., въ которомъ онѣ не означены именемъ святаго Кирилла.

Печатается по изданiю: Молитвы на всю седмицу святаго Кирилла Туровскаго. // Журналъ «Православный собесѣдникъ», Казань. – 1857 г. – Книга II. – с. 286-298.

Наверхъ / Къ титульной страницѣ

0