Наследие Святой Руси. Памятники древне-русской письменности
 
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Наслѣдiе Святой Руси
-
Гостевая книга
-
Новости
-
Написать письмо
-
Поискъ

Раздѣлы сайта

Святые Кириллъ и Меѳодiй
-
Книги старой печати
-
Патерики и житiя святыхъ
-
Великiя Минеи Четiи
-
Церковно-учит. литература
-
Творенiя русскихъ святыхъ
-
Стоянiе за истину
-
Исторiя Русской Церкви
-
Церковный расколъ XVII в.
-
Исторiя Россiи

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 23 iюня 2017 г. Сейчасъ на порталѣ посѣтителей - 35.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

Творенiя русскихъ святыхъ

Поученiе святаго Иларiона, Митрополита Кiевскаго
О пользѣ душевнѣй къ всѣмъ православнымъ Христiаномъ. [1]

Потщимся, братие и сестры, къ вѣчнѣй жизни свѣтлѣй, яже намъ Господь, по своей милости, туне даетъ, и сея временныя и скверненыя, аки змииныхъ ядовитыхъ устенъ, бѣгаемъ и не прикасаемъся ей. Господу Богу уготовивъшю небеса и насъ позвавъшю, то мы, сему тѣлу годяще сномъ и питiемъ и брашномь и сластьми грѣховными, отречемся Царства Небеснаго и Позвавшаго ны въ не. Онъ же уготовалъ бракъ Сыну своему, рекý же Царствие, и посла рабы своя звати, рекъше Пророкы и Апостолы и Мученики, то мы отрицаемъся, глаголюще: жену пояхъ, и не успѣю ити; и паки: волы купихъ, и искусити ихъ иду; и еще глаголющимъ: село купихъ, и идохъ его соглядати, и инѣми житiя сего дѣлы [2] отрицаемъся вѣчныя жизни. Не слышимъ ли Господа глаголавша: не пцѣтеся о утрешнемъ, что ясте, или что пиете, или во что облечетеся. Возрите на птица небесныя, како не сѣють, ни жнуть, ни сбирають въ житницю свою; и цвѣтець сельныхъ, како ти растуть не тружающеся, ни пекущеся ни о чемъ же. То мы слышаще, братие, въспрянемъ днесь, потщимся, пойдемъ не късняще по ускому пути, въводящему ны въ Царство Небесное; въдадимъ телеса своя въ трудъ и на поты и молитву и на въздержанія, на частое покланяніе. Царство бо, рече, Небесное нужно есть, и нудящеи ся въсхитаютъ е. То почто си не жалимъ, [3] яко своею лѣностыо и сълабостью дьяволу годяще, лишаемься вѣчныя жизни. Да подвигнемься, братіе, и понудимься на семъ малѣмь вѣцѣ и кратцѣмъ. Кая бо намъ польза, тѣломь симь тлѣющимь? То аще убо бѣхомь ныня въ огни горѣли, не токмо тó до смерти; а онамо съ Господомъ царствовали въ славѣ въ вѣки. [4] Но азъ не реку, да быхомь ся въ огнь въвергли, не буди то: но да потрудимься въ исушение телесъ нашихъ. Рече бо Господь: аще зерно пшеничьно падъ на земли не умреть, то едино пребываеть: аще ли умретъ, то плодъ створитъ многъ. Явѣ сіе рече: аще не умерьтвите телеса ваша, то не можеть плодъ небесныхъ творити: не любяй бо, рече, душа своея въ мірѣ семь, прелюбодѣйнѣмь и грѣшнѣмь, во оной жизни обрящеть ю. Се слышаще, любимицы, подвигнемь во ону жизнь неиждиваемую, оставльше сию временную и мимоходимую. Глаголеть бо Павелъ: добрый подвигъ подвигъся, и прочее. Аще ли речеши: не могу подвигнутися, немощенъ есмь: токмо подвигнися по своей силѣ, яко же можеши, и видѣвъ Господь подвигъ твой, послеть ти и на прочая добрая дѣла. Тѣмже потрудимся на семь свѣтѣ. Еда великъ нашь животъ, или 50 лѣтъ, ли 60, или 100? То много ли есть потрудитися? Сдѣ бо вмалѣ потрудившеся, тамо въ вѣки царствовати на небесѣхъ имуть. И паки, сдѣ вмалѣ живше сластно, кормящеся и пиюще, женящеся, посягающе, тамо мучими будуть. Да подвигнемься и потецемь: Христосъ бо зоветь: придѣте вси тружающеся и обремененніи, и Азъ вы покою. Разверземъ уши и очи сердечнѣи, и слышимъ, братіе, гласъ глаголюшь не человѣкъ, но Царь царемъ и Господь всѣхъ. Тѣмже тамо умъ [5] вперимь, сдѣ поживше богомудрено, [6] постомъ, молитвами, трудомь, пѣніемь, плачющеся грѣхъ своихъ и присно имуще Бога предъ очима своима и день смертьныи помышляти, и не ослабѣюще, но якоже и поченше, тако и скончаемь. [7] Рече бо Господь: въ немьже тя обрящю, въ томъ же ти сужю; вонмѣмь въ сердца своя сея, [8] егда къ смерти ослабѣемь? не вѣмь бо, когда приидеть часъ смертный и похитить когождо насъ душю неготову, и осудить ю во огнь вѣчный. Аще пріидетъ часъ и обрящеть душа наша готовы, абие царствовати имамъ въ бесконечныя вѣки, о Христѣ Ісусѣ Господѣ нашемь, Емуже подобаеть слава съ Отцемъ и съ Пресвятымъ, благимъ и животворящимъ Духомъ въ бесконечныя вѣки. Аминь.

Примѣчанiя:

[1]
Наименованiе Иларiона святымъ встречается въ рукописномъ сборникѣ конца XVII – нач. XVIII в., подъ названiемъ: «Книга глаголемая: описанiе о Россiйскихъ святыхъ». Описанiе составлено въ царствованiе Ѳеодора Iоанновича и дополнено въ последствiи.
При изданiи сего Поученiя использованъ хартейный сборникъ въ 16 долю, изъ библiотеки М. П. Погодина, писан. въ концѣ XIV или началѣ XV в. и др. древнiе спп.
[2]
Въ спискѣ Волоколамскомъ и Погодина: нынѣ житія сего дѣля.
[3]
Въ спискѣ Волоколамскомъ и Погодина прибавлено: о иноци. Но въ Академическомъ сего нѣтъ; и Слово въ семъ спискѣ надписывается: Къ всѣмъ православнымъ христіаномъ. По содержанію обличеній оно идетъ более къ мірянамъ, нежели къ инокамъ.
[4]
Вмѣсто: не токмо, вѣроятно должно читать: но токмо. Въ Академическомъ спискѣ читается сіе мѣсто иначе: аще бы вѣдали небесное житіе, то аще бы намъ зде во огни горѣти до смерти, а онамо съ Господемъ царствовати во славѣ во вѣки.
[5]
Въ Волоколамскомъ спискѣ: си мы вперимься.
[6]
Въ спискѣ Погодина; благомудренно; въ Академическомъ: богоугодно.
[7]
Послѣднихъ словъ: тако и скончаемъ, — нѣтъ въ спискѣ Погодина.
[8]
Въ спискѣ Волоколамскомъ и Погодина прибавлено и здѣсь: о иноци.

Печатается по изданiю: Иларiонъ, Митрополитъ Кiевскiй. Поученiе о пользѣ душевнѣй къ всѣмъ православнымъ Христiаномъ. // Журналъ «Прибавленiя къ творенiямъ святыхъ отцевъ, въ русскомъ переводѣ, издаваемымъ при Московской Духовной Академiи». – 1844. – Часть II. – с. 293-299.

Наверхъ / Къ титульной страницѣ

0