Наследие Святой Руси. Памятники древне-русской письменности
 
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Наслѣдiе Святой Руси
-
Гостевая книга
-
Новости
-
Написать письмо
-
Поискъ

Раздѣлы сайта

Святые Кириллъ и Меѳодiй
-
Книги старой печати
-
Патерики и житiя святыхъ
-
Великiя Минеи Четiи
-
Церковно-учит. литература
-
Творенiя русскихъ святыхъ
-
Стоянiе за истину
-
Исторiя Русской Церкви
-
Церковный расколъ XVII в.
-
Исторiя Россiи

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 24 марта 2017 г. Сейчасъ на порталѣ посѣтителей - 9.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

Творенiя русскихъ святыхъ

Два поученія о постахъ.

Предлагаемыя поученія заимствованы изъ тогоже Измарагда казанскай академической библіотеки (№ 270) [1], изъ котораго мы представили нашимъ читателямъ уже нѣсколько поученій. Они принадлежатъ къ роду тѣхъ словъ и поученій, разсѣянныхъ во множествѣ въ старинныхъ нашихъ сборникахъ, которыя, по складу и воззрѣнію, представляются русскими сочиненіями, но не заключаютъ въ себѣ однакожъ никакихъ признаковъ, по которымъ составленіе ихъ можно было бы отнести къ какому-нибудь опредѣленному времени. Окончаніе перваго поученія начиная отъ словъ: «о братія, како ся не боимъ Бога, а той сотворилъ насъ...» сходно въ нѣкоторыми мѣстами Слóва о постѣ, уже напечатаннаго въ нашемъ журналѣ (январь 1858 г), гдѣ распространены разными объясненіями и дополненіями тѣ мѣста, которыя въ предлагаемомъ здѣсь поученіи изложены кратко. Такія заимствованія изъ одного сочиненія въ другое, распространенія или сокращенія однихъ и тѣхъ же мѣстъ, были, какъ извѣстно, въ большомъ обыкновеніи у древнихъ нашихъ сочинителей и переписчиковъ. Во второмъ поученіи сочинитель, не называя себя по имени, между прочимъ, съ особенною силою говоритъ о своей обязанности поучать свою паству: «аще по повелѣніи Божіи поживете, и мене убогаго спасете; ащели азъ учу вы всегда, а вы не творите того, то осудитеся; мнѣ бо, аще не учу, золъ судъ пріяти…» и проч.

1. Слово святыхъ апостолъ и святыхъ отецъ
О Велицѣмъ постѣ и о Петровѣ и о Ѳилиповѣ [2].

Иже вѣрнии суть. слышите братіе и сестры и вси старци и юніи писаніа о постѣ. самъ бо Господь Богъ нашь прообразова намъ собою честный постъ. сорокъ дний постився. якоже Марко евангелистъ рече. абие ведеся Духомъ Ісусъ впустыню. и постися сорокъ дний. искушаемъ сатаною [3]. отъ того же тако велѣ ученикомъ и апостоломъ творити. Апостоли крестяще вѣрныа. заповѣдаша Господне проповѣданіе дрьжати. рече бо имъ Господь. проповѣдайте всей твари покаяние въ оставленіе грѣхомъ. иже вѣру иметъ спасется. а иже вѣры не иметъ осуженъ будеть [4]. по тому Спасову глаголу апостоли вѣрныхъ научиша покаянію посту поклонамъ. молитвѣ милостыни и сміренію. и прочимъ добродѣтелемъ. говѣнья уставиша три. едино Христово. а два апостольскихъ. Петрово и Ѳилипово. въ та говѣнья вѣрніи вчистотѣ пребывающе и милостыню подающе очищаются отъ грѣхъ. якоже писано есть. милостыня и постъ отъ смерти избавляета человѣки. постъ бо на небо возводитъ. а милостыни во царство вселитъ. Давыдъ убо двое зло сотвори. покаяние и постъ пріатъ. слезы многи изливаше. и милостыню безъ числа даяше. тогда видѣ Богъ покаяніе его и скрушеніе сердца и слезы. помилова его. и во пророкы причьте. и Данилъ пророкъ. егда повелѣніемъ царя къ львомъ вверженъ бысть. онъ же постомъ и молитвою змиа укроти. и самого царя закону научи. трие же отроцы въ пещь ражжену ввержени. постомъ и молитвою огнь погасиша. постився Моѵсий съ Богомъ бесѣдоваше. постився Ісусъ Наввинъ молитвою иноплеменникы победи. и солнце отъ теченія устави. постився Илиа пророкъ молитвою огнь снебеси сведе. и сына вдовича воскреси. и землю одождити сотвори. и на огненей колесницѣ взятъ бысть. и до нынѣ есть живъ. постився Елисѣй. мольбою Іорданъ по суху прейде. и горькыя воды во сладость преложи. и сына воскреси господина дому. пощеніемъ ниневъгитяне Божій гнѣвъ на милость преложиша. постився Исаія херувимы видѣ. постився Архипа пономарь видѣ архистратига Михáила. Анна постящися моляшеся Богу. дарова ей Господь плодъ. роди Самоила пророка. постився Сампсонъ. иноплеменникы побежаше многы. молитвою отъ ослея сухия челюсти воду источи многу. и львы единъ убиваше. Іоакимъ и Анна постящеся моляшеся Богу день и нощь. и посла Господь ангела повѣдати има зачатие и рожество Святыа Дѣвы Мария. постився Давыдъ Голияѳа убий. Нѣсторъ мученикъ постомъ и молитвою злага Лия [5] уби. пощеніемъ и молитвою и милостынею мнози быша святии. и многа сотвориша чюдеса. ихъ же невозможно исписати всѣхъ. постомъ вся добрая свершаются. тѣло постомъ чистится. грѣси милостынею оцѣщаются. смиреніемъ душа красится. мольбами покляняніемъ со ангелы водворится. бдѣніемъ на небо взыдемъ. милостивъ Господь есть братие. кающаяся пріиметъ вы. время любиміи святаго поста есть. потщимся о грѣсѣхъ нашихъ каятися. то бо просвѣщеніе душѝ и тѣлу есть. блаженъ человѣкъ кайяся. а не тая грѣхъ своихъ. не срамляяся паденіемъ своимъ. покаяніе грѣховъ оставление есть отъ сердца кающимся. никогда мысли злыя не приближаются къ души всегда покаяніе имущи. покаяніе есть скровище некрадомое и неизглаголема радость. радуется душа кающагося человѣка. се бо покаяніе есть пріятно (предъ) Богомъ. ему же Духъ Святый учитъ ны Давыдомъ глаголя. уклонися отъ зла. сотвори добро [6]. отъ зла уклоненіе. еже отъ грѣхъ престати. а добро сътворити. аще пияница еси былъ. постникъ нынѣ буди. и аще еси блудилъ и чюжая грабилъ и обидилъ еси. своя нынѣ раздавай. и добро твори обидящему тя. а зла за зло не воздавай. гнѣва не имѣй. то истинно есть покаяніе. вся остави злобы. слышаще се братие и сестры. потщимся вчистотѣ дніи сіи постныя преити покаяніемъ и милостынею и прочими добротами. святии бо отцы постъ намъ предали. отъ апостолъ научишася. о постѣ слово на подвизаніе вѣрнымъ а слушающимъ на воздержаніе. да ся печалятъ о душахъ. покаяние и смиреніе и милостыню и прочая да имѣютъ. нѣсть бо забыти дний своихъ доброты. егда бо время питвеное. піяницы радуются. а егда постъ будетъ. оскорбляются піяницы. а вѣрнин радуются душами. самъ бо Господь глаголеть [7]. егда поститеся да не будеши яве предъ человѣкы. а еда мóлишися. вниди во храмъ. и затвори двери твоя. втайнѣ Богови молися. да тя помилуетъ. и милостыню давай не явно предъ человѣками да не яко фарисѣй мьзду погубиши. аще ся постиши. то не токмо отъ хлѣба постиши. но и отъ пития удрьжися. гнѣва и ярости. гордости и хулы. клеветы. зависти. татьбы осуженіа и неправды всякыя. похотей плотцкыхъ. да не вотъще трудъ вашь будетъ. и яко наченьше святый сий постъ. да свершимъ тако. да мьзду отъ Бога съвершену пріимете вси. мнози бо впостѣ честнѣе творятъ недѣлю Ѳедорову [8]. а инѣхъ лѣностию не брегутъ. О братие. вси честни суть дни до воскресенія Господня. аще бо человѣкъ что любо наченъ не свершитъ. аще наимьникъ есть. то не прииметъ мьзды. тако и въ постѣ. аще наченъ не свершитъ. то погубитъ трудъ свой. и діяволъ об лѣности его обрадовася. а хранитель ангелъ скорбитъ о нерадѣніи его. молю вы вся вѣрныа. послѣдуимъ дѣломъ святыхъ. творящихъ заповѣди Божиа. святии бо отцы намъ предали въ суботы и въ недѣли дважды днемъ ясти. а въ прочая дни по единова. великую суботу едину впостъ причте. за неже тогда во гробѣ Христосъ бѣ. апостоли же и Богородица и вѣрнии бяху печальни втой день. а жидове тогда радостни ясти и пити идяху. утро же бысть жидомъ велика печаль. слышавше воскресша Христа. худая радость на пагубу имъ бысть. а Богородици со апостолы и со всѣми вѣрными бысть мала скорбь на радость на не кончаемую. сия вся слышаще братие. потщимся въ чистотѣ дни сия постныя прейти. въздержаніемъ отъ всякого зла. да радостно въскресения дойдемъ. славяще Святую Тройцю Отца и Сына и Святаго Духа. Еже предъ Богомъ творимъ злая. намъ достояло ни главы восклонити. плачюще и скорбяще о томъ и біюще челомъ. О братие како ся не боимъ Бога. и Той насъ сотворилъ. отъ земля тѣло созда и душу вдохну. и оживи ны видимая и невидимая словомъ сотвори. небо и землю словомъ утверди ангелы и архангелы устрои. херувими и сераѳими. престоли и господьства. солнце и луну и звѣзды. моря и источникы. горы и холми. вѣтри и дождь. снѣгъ гóлоть звѣри и скóти. гади и птица. древа сады и сѣмена на пищю животнымъ и траву плодовиту. вся сия Бога боятся. и кождо во своемъ уставѣ стоитъ. земля плоды даетъ. свѣтъ же освѣщаетъ. вся не преступаютъ велѣнія Божія. да толико человѣцы мы Бога не боимся. и воли Его не творимъ. и пути спасенаго бѣгаемъ. иже во Царство Небесное ведетъ а на погибельный путь наступаемъ. вѣдуще ны въ муку вѣчную и во тьму кромѣшную. сами своею волею погибаемъ. имъ же дияволу угожаемъ. а Божия велѣния не творимъ. аще бо постъ душамъ и тѣломъ приспѣетъ. то мы скръбимъ. и печалуемъ. а иже попове насъ учатъ. то тяжко си творимъ. не хотяще злобъ остатися. піяньства обьядения и блуда и всякыя нечистоты. нимало волею не спѣемъ къ Богу на добрая дѣла. слаби есми и ленивы. ими же душа спасти. а на злая дѣла крѣпцы и востанивы и быстри есмы и легцы. яже души на пагубу суть. Господня же заповѣди. и апостолъ и святыхъ отець творимъ тяжкы яко камень. всѣхъ дѣлъ тяжчае творимъ. О братіе и чада. чимъ Божия заповѣди тяжкы творите. а легота и спасеніе душамъ внихъ. аще соблюдемъ, учатъ бо насъ попове отъ погибельнаго пути [9]. к Богу насъ на спасеный путь направляютъ. толи тяжко намъ. еже каятися о гресѣхъ велятъ и злобъ остатися. к Богу прійти постомъ покланяніемъ и милостынею. молитвами, смиреніемъ любовию и въздержаниемъ отъ всякого зла. да како намъ братие милость отъ Бога пріати. и како суда Его избудемъ злая творяще. завидяще. оклеветающе. гнѣвающися. обидяще. крадуще. лжюще. мьзды емлюще. упивающеся. и многа неподобна дѣлающе. нужно бо и попомъ о насъ печаловати о стадѣ Христовыхъ овець. аще бо и пастухъ которой лѣностию стадо изгубитъ. велико ему зло и пагуба есть. а попомъ же Христово пасущемъ стадо. много блюдение требе. а не учивъше люди злой судъ пріати имъ. да то слышаще братие и сестры. подвигнемся на добрая дѣла. а злыхъ останемся. и постныя сия дни счистотою пройдемъ. заповѣди Божіа сотворяюще. съ смирениемъ тѣло и кровь Христову достойне да пріимемъ на освященіе душамъ и тѣломъ и на отъданіе грѣхомъ.

Примѣчанiя:

[1]
Писанномъ въ концѣ XV, началѣ XVI вѣка.
[2]
По языку и способу писанія предлагаемый списокъ принадлежитъ къ такъ называемой синкретической или смѣшанной рецензіи. Потому въ немъ древніе палеографическіе признаки перемѣшаны съ новыми знаками, входившими въ письменность въ XVI в.
[3]
Марк. 1, 13.
[4]
Марк. 16, 16.
[5]
Имя бойца великана. см. житіе пр. Нестора. Мин. Чет. 27 окт.
[6]
Псал. 35, 15.
[7]
Матѳ. 6, 16.
[8]
Т. е. первую недѣлю Великаго поста, когда совершается память св. Ѳеодора Тирона.
[9]
удаляться.

Печатается по изданiю: Памятники Древле-Русской духовной письменности: Два поученія о постахъ. // Журналъ «Православный собесѣдникъ», Казань. – 1859 г. – Книга III. – с. 444-452.

Наверхъ / Къ титульной страницѣ

0