Наследие Святой Руси. Памятники древне-русской письменности
 
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Наслѣдiе Святой Руси
-
Гостевая книга
-
Новости
-
Написать письмо
-
Поискъ

Раздѣлы сайта

Святые Кириллъ и Меѳодiй
-
Книги старой печати
-
Патерики и житiя святыхъ
-
Великiя Минеи Четiи
-
Церковно-учит. литература
-
Творенiя русскихъ святыхъ
-
Стоянiе за истину
-
Исторiя Русской Церкви
-
Церковный расколъ XVII в.
-
Исторiя Россiи

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 25 апрѣля 2017 г. Сейчасъ на порталѣ посѣтителей - 20.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ТВОРЕНІЯ РУССКИХЪ СВЯТЫХЪ

Преп. Максимъ Грекъ († 1556 г.)
О освященіи водъ на заутріи Святыхъ Богоявленій.

О немъ же спрошалъ еси мене, твое благовѣинство, мало скажу не отъ гаданіа, ниже по любопрѣнію, да не самъ мудрѣйши нѣкихъ явлюся, — буди далече отъ насъ благовѣрныхъ сущихъ таково что поганско словобѣсіе, — но поелико самъ своима очима видѣхъ въ честныхъ обителехъ Святыя горы совершаемо и еже обрѣтохъ въ толкованіи апостольскихъ и соборныхъ правилѣхъ списано премудрымъ Вальсамономъ толковникомъ тѣхъ, тому и учю твое благовѣинство, со всякою истинною.

Вѣдомо да есть тебѣ и тобою всякому благовѣрному, яко совершаемый нами на заутріе Святыхъ Богоявленіихъ происходъ на рѣку, ниже Спасу нашему второе крещьшуся, ниже всенароднаго ради собранія христоименитыхъ людей уставися таковому совершатися таинству, якоже нѣцыи непщуютъ; ниже бо Спасъ второе крестися, ниже христоименитіи людіе остаютъ совершаемаго въ вечеръ Святыхъ Богоявленій освященія; койждо бо приходитъ въ свой приходъ и освящаются по обычаю; но сіе совершается сицовыя ради вины, якоже премудрый Вальсамонъ сказуетъ въ толкованіихъ священныхъ правилъ: Ѳотій, иже при Львѣ цари премудромъ блаженный патріархъ, видѣ нѣкія останки древнія идолослужителей претести еще соблюдаемы и дѣйствуемы благовѣрными и ученіи преже различными подвигся отсѣщи ихъ отъ благовѣрныхъ, тщася таже и соборнѣ уставилъ, завѣщавъ сущимъ вездѣ боголюбивымъ епископомъ въ первую недѣлю всякаго мѣсяца собирати христолюбивыхъ людей во священныхъ храмѣхъ и совершати освященіе воды и свящати ихъ, да симъ чиномъ отсѣчется отъ нихъ, юже дѣяху по всякому новомѣсячію, еллинская прелесть, вжигающи бо кождо огни предъ своими дворы, скакаху многажды чрезъ нихъ, здравымъ преити мняще наставшаго мѣсяца. И благодатію убо Господа нашего Ісуса Христа и подвигомъ многимъ и преподобными молитвами блаженнаго патріарха Фотія исчезе сицевая еллинская прелесть отъ благовѣрныхъ.

Изложенный же тогда соборнѣ уставъ, еже освящать христоименитыхъ людей окропленіемъ священныя воды въ первую недѣлю коегождо мѣсяца, пребываетъ даже и доселѣ въ честныхъ обителехъ Святыя горы, по всякой бо первой недѣли коегождо мѣсяца, выносяще изъ олтаря пречистыя образъ Божія Матере и честный и животворящій крестъ большій, поставятъ внѣ храма предъ дверми пречистую икону на престолѣ, предпославше коверъ предъ престоломъ, двѣ большія свѣщи зажегше отъ обоюду святыя иконы, а честный крестъ инокъ держа, стоитъ созади мало пречистыя иконы, игуменъ же со священники и ликостоятели, ликъ составивше отъ обоюду святаго образа, совершаютъ обычное правило освященія. Предстоящимъ въ ризѣ священнѣй іерею и діакону и честному кресту трижды погружену въ водѣ іереомъ приглаголему тропарю сему трижды: Твоихъ даровъ достойны сотвори насъ Богородице Дѣво и прочая, входитъ въ церковь іерей со діакономъ, носяще отъ священныя воды въ сребренѣй лохани и окропляетъ крестообразно іерей олтарь же и весь храмъ, таже исходя кропитъ яже обоюду храма сущыя предѣлы и обоя паперти, и тако исходитъ въ преддверіихъ и кропитъ всю братію, благочинно комуждо приступающу ко священнику, стоящу на высоцѣ мѣстѣ, и діякону у него поддержащу священную лохань съ водою освященною. По окропленіи же всѣхъ братій вземше со страхомъ два инока святый образъ, аще случится быти великъ и тяжекъ, обходятъ съ нимъ игуменъ же и вся братія монастырскія службы, въ нихъ же и ходитъ іерей и діаконъ и носяще святый образъ окропляютъ я; прошедше же святыя вся службы, исходятъ и до самыхъ вратъ обители, поюще догматики и осмогласны Божія Матере и славники стихеръ празднуемыхъ святыхъ въ различныхъ предѣлехъ внутрь монастыря и по стрѣльницамъ. Стоящу же игумену предъ враты монастырскими съ братіею и поющимъ, священникъ со діакономъ входятъ въ сущій близъ обители огородъ и кропитъ водою вся въ немъ саженая зелія, и сице соблюдаются невредима отъ червей и гусеницъ. Таже входятъ во обитель съ пѣснми духовными и, вшедше въ церковь, поставятъ посреди святую икону и обстояще ея, оба лика поютъ: Достойно есть яко воистинну большее демествомъ, и потомъ, бывши ектеніи малѣй и отпуску, вносятъ ея во олтарь священники и поставятъ на мѣстѣ своемъ. Таковъ убо совершаемый чинъ въ первой недѣли всякого мѣсяца, развѣ іаннуарія, въ немъ бо таковый чинъ отлагаютъ въ наутріе день Богоявленія и ходятъ со святыми образы и свѣщами и кадилы и пѣсньми духовными въ близъ сущую рѣку, или источникъ.

Явлено уже ти бысть, откуду начало пріятъ сицевый чинъ и коея ради вины второе бываетъ освященіе воды въ рѣкѣ въ заутріе Богоявленія; ты же молитвами преподобными воздари малый сей трудъ, егоже воспріяхъ по божественной ревности, яже ко мнѣ, духовнѣй любви твоей. Здравствуй о Господѣ!

Источникъ: Сочиненія преподобнаго Максима Грека, изданныя при Казанской Духовной Академіи. Часть третья: Разныя сочиненія. — Изданiе второе. — Казань: Типо-литографія   И м п е р а т о р с к а г о   Университета, 1897. — С. 97-100.

Назадъ / Къ оглавленію раздѣла / Впередъ


Наверхъ / Къ титульной страницѣ

0