Наследие Святой Руси. Памятники древне-русской письменности
 
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Наслѣдiе Святой Руси
-
Гостевая книга
-
Новости
-
Написать письмо
-
Поискъ

Раздѣлы сайта

Святые Кириллъ и Меѳодiй
-
Книги старой печати
-
Патерики и житiя святыхъ
-
Великiя Минеи Четiи
-
Церковно-учит. литература
-
Творенiя русскихъ святыхъ
-
Стоянiе за истину
-
Исторiя Русской Церкви
-
Церковный расколъ XVII в.
-
Исторiя Россiи

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 24 марта 2017 г. Сейчасъ на порталѣ посѣтителей - 7.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

Творенiя русскихъ святыхъ

Поученiе смиреннаго Петра, митрополита Кіевскаго и всея Руси игуменомъ, попомъ и діакономъ. [1]

Да будеть вамъ, дѣти, разумно, въ кій чинъ позвани есте Богомъ, яко же Апостолъ Павелъ пишеть: воньже кто позванъ, да въ томъ пребываеть. Вы же, дѣти , нарекостеся стражи церковніи и пастуси словесныхъ овець, за няже Христосъ спасеную кровь свою пролья. Будите же, дѣти, истиньніи пастуси, а не яко наимници, млеко снѣдающе и влну объемлюще, а о овцахъ не пекущеся. И не входяще дверми во дворъ овчій, таковіи не суть пастуси, но татіе суть и разбойници. Вы же, дѣти, въ слѣдъ тѣхъ не идете, но уподобитеся истинному пастуху Христу, якоже рече во своемъ Евангеліи: азъ убо есмь пастухъ добрый, и душу свою полагаю за овца, и прочее же. Будите, дѣти, образъ стаду своему, по Спасову слову, — якоже рече своимь Апостоломъ: вы есте свѣтъ міру, вы есте соль земли; да просвѣтится свѣть вашь предъ человѣкы; видѣвше же человѣци дѣла ваша добрая, и прославять Отца вашего, иже есть на небесѣхъ. Сими бо дѣлы подобаетъ прьвое просвѣтитися вамь: кротостію, смиреніемь, такоже сблюдите себе отъ всѣхъ неподобныхъ дѣлъ, имиже міръ сблажняется. Горе бо, рече Спасъ, человѣку тому, имьже сблазнъ приходить. Вы же, дѣти, оградившеся страхомь Божіимъ, отрѣшите отъ сердець вашихъ всяку душегубную отрасль: [2] гнѣвъ, ярость, зависть, ненависть, піаньства, еже есть корень всякому злу, кощюны бесѣды; [3] всяко бо, рече, слово гнило не исходить изъ устъ вашихъ. Рече Спасъ: отъ словесъ своихъ оправдишися, и словесы своими осудишися; вздати, рече, отвѣтъ и о празднѣмъ словѣ. Вы же, дѣти, будите яко маслица плодовита въ дому Божіи, плодяще плоды духовныя, священіе. [4] Будите же, дѣти, въ почитаніи книжномъ и въ поученіи день и нощь, якоже Пророкъ рече: въ законѣ Господни поучится день и нощь, и прочее. Вы же людіе святіи, царьское священіе, языкъ святъ; да почиваеть на васъ Духъ Святый, якоже Василей Великый пишеть Кесарійскый въ Божественнѣй литургіи: святъ бо есть Господь и на святыхъ почивая. Якоже бо, дѣти, имя вашего священьства, такоже бы и дѣла ваша были. Вѣра безъ дѣлъ мертва есть. Вы же, дѣти, облецетеся яко избранніи Божіи въ оружіе свѣта, рекше въ благочестіе. Аще дѣти тако сами исправитеся къ Богу благыми дѣлы; тогда же возможете и дѣти своя духовныя научити. [5] Тѣмже, дѣти, Бога ради потщитеся съ всею силою въ страсѣ Божьи жити и упасти себе, тако же и стадо свое и избыти вѣчныя мукы: того ради писанiемъ и неписаніемъ, понужаю васъ на дѣло благое, занеже и долженъ есмь всегда поминати и писати душеполезная и спасеная. Тѣмже, дѣти, молю и азъ ваше преподобьство, помолитеся убо о моемъ недостоинствѣ и о моей худости, по рекшему: молитеся убо, рече другъ за друга, яко да изцѣлѣете. Да сподобить Богъ всѣхъ насъ избыти суетнаго житія сего безъ вреда, получити вѣчьное блаженьство и радость не изреченную Христа Бога нашего, молитвами пречистыя Владычица наша Богородица. Прочее же прославимъ безначальнаго Отца и Единороднаго Сына Его Христа Бога нашего и пречистаго и преблатаго и животворящаго Духа: тако бо прославляется пресвятое имя Божіе вѣрными человѣкы, и тою Божественною силою избавляемся отъ врагъ видимыхъ и невидимыхъ въ семъ вѣцѣ и въ будущемъ, въ вѣки, аминь.

Примѣчанiя:

[1]
Поученiе печатается по рукоп. Академической Библiотеки, подъ названiемъ: Общая минея, подъ № 77, на бумагѣ въ листъ, конца XV столѣтiя. Оно сличено съ спискомъ Библiотеки Волоколамскаго Iосифова монастыря, подъ № 282, на бумагѣ въ 4, принадлежавшей прежде, по надписи, Леониду, Епископу Рязанскому (упоминается въ 1581 г. См. Акт. Истор. Т. I. прим. къ грам. подъ № 216).
[2]
Въ рук. Волоколамской: душегубную ярость, зависть и пр.
[3]
Въ тойже рукоп. кощуны и срамныя бесѣды.
[4]
Въ тойже рукоп. священный.
[5]
За тѣмъ въ Академической рукописи слѣдуетъ: убо Божество противу единой души человѣчьской. Въ Волоколамской нѣтъ словъ: научиты. Убо Божество. Очевидно, что въ томъ и другомъ спискѣ текстъ поврежденъ, и что для исправленія его нужны другіе списки.

Печатается по изданiю: Поученiе смиреннаго Петра, митрополита Кіевскаго и всея Руси игуменомъ, попомъ и діакономъ. // Журналъ «Прибавленiя къ творенiямъ святыхъ отцевъ, въ русскомъ переводѣ, издаваемымъ при Московской Духовной Академiи». – 1844 г. – Часть II. – с. 85-90.

Наверхъ / Къ титульной страницѣ

0