Наследие Святой Руси. Памятники древне-русской письменности
 
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Наслѣдiе Святой Руси
-
Гостевая книга
-
Новости
-
Написать письмо
-
Поискъ

Раздѣлы сайта

Святые Кириллъ и Меѳодiй
-
Книги старой печати
-
Патерики и житiя святыхъ
-
Великiя Минеи Четiи
-
Церковно-учит. литература
-
Творенiя русскихъ святыхъ
-
Стоянiе за истину
-
Исторiя Русской Церкви
-
Церковный расколъ XVII в.
-
Исторiя Россiи

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 25 апрѣля 2017 г. Сейчасъ на порталѣ посѣтителей - 24.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

Творенiя русскихъ святыхъ

Святаго Серапіона, епископа Владимiрскаго.
Слово о кончинѣ міра [1].

Тѣмъ бойтеся братие. грозы и страха суда Божіа. внезапу бо день той найдеть страшный. аще неуготовимся добродѣтелми. то назіи страннии в негасимый огнь осудимся. о братие живите во страсѣ Божіи. время бо житіа сего мало есть. яко дымъ исчезаетъ. и много намъ бѣды за грѣхи прилучается и скорбь не мала. поганьская нашествіа. людемъ движеніе. церквамъ нестроеніе. княземъ неуправленіе. бесчиніе священникомъ. токмо плотскымъ угажати начнутъ. а духовныхъ не пытають. и игумени також. а черньцы будуть на пиръ тщивіи. и тяжбливіи будутъ. и гневливии. неподобная отець святыхъ житіа имущихъ. владыкы будутъ стыдящеся лиць силныхъ. судяще по мздѣ. обидяще сироты. не заступающе вдовиць и убогыхъ. внидеть же в люди невѣріе и блудъ. и оставя человѣцы правду а неправду творити начнутъ. и в таковыхъ днехъ. аще кто хощетъ. той спасется. и великъ наречется въ царствіи небеснемъ. тако бо и въ дни быша Ноевы. ядяху и піяху. женяхуся. блудяхуся. пріиде же потопъ. и вся погуби за безаконіе. дивно же видети вещь ту страшную. Егда Ной дѣлаше ковчегъ. яко же Господь ему заповѣда. слоны от Идѣи. и от Персиды лвы грядяща съ овцами. и с козами смѣшені. другъ друга не врежая. гады же и птицы събирахуся. идѣже Ной дѣлаше ковчегъ. и глаголаше Ной плача людемъ. покайтеся. потопъ на вы грядетъ. они же вся та видяще. не внимаху. ни ученіа слушаху. даже покры я потопная вода. и злѣ конецъ пріаша. о братие. убоимся. сео бо писанная вся конецъ пріимаютъ. и реченная знаменіа сбываются. и уже мало нашего живота и вѣка. тѣмже хотяй спастися. нынѣ подщися смиреніемъ. алканіемъ. и милостынею. аще бо кто любимии и в разбойникы впадетъ. како ти умилено молится. да быша дали животъ. а имѣніе взяли быша. да како братіе се не зло. худого дѣля живота всего лишаемся. а душевнаго участія почто щадимъ неимущимъ даяти. почто ся не пременимъ от злобъ. и не хощемъ сердца на покаяніе пріклоніти. и земля убо от лица Господня трясется намъ на страхъ. и мнози грады пусты быша. Божіимъ гнѣвомъ. ни тако не убояхомся. но не престаемъ зло творяще. и поганыя Богъ попусти на ны. сынове и дщери ваша в поруганіе быша. и в полонъ. да быхомъ убоялися. но мы единако неправды дѣемъ. гнѣва и зависти не останемъ. блуда и піаньства и грабленія не лишимся. и прочихъ злобъ. яже в ненависть Богу. о братие доколѣ есть время покаянію. потщимся. в добродѣтели быти. и будемъ милостивіи. да милостивъ Господь будетъ намъ. виждьте братие. яко и своихъ церквей не щадить Богъ. ни книгъ святыхъ. егда землю оставляетъ пусту. за злобы человѣческія. да на покаяніе принудитъ ихъ. аще ли казніми а не каются. ни злобъ не останутся. то болшая томленія. и вѣчныя мукы ожидаютъ ихъ. не мозите братие тѣлу угожающе душю погубити. рече бо Іоанъ Богословъ. аще кто миръ сии любитъ. нѣсть любви Отчя в немъ. не вѣсте бо в кый часъ смерть насъ постигнетъ. мнози вечер здрави легша. а нощи сея напрасно умроша. и увязоша в пагубной сѣти. утро же погребаемии. смотрите братие спасеніа душамъ своимъ. страшенъ бо судии есть нестяжавшимъ дѣлъ добрыхъ. о любимии что тогда сотворимъ. егда самъ Господь пріидетъ на месть грѣшныхъ. сдѣ бо егда будеть буря и громъ. того не трьпимъ. а онамо камо ся дѣти. егда судъ будетъ страшный. аще нынѣ не уготовимся.

Примѣчанiе:

[1]
Печатается по рукописному Измарагду XV вѣка соловецкой библіотеки, подъ № 270.

Печатается по изданiю: Памятники Древле-Русской духовной письменности: Новыя поученія Серапіона, епископа Владимiрскаго (ХIII вѣка). // Журналъ «Православный собесѣдникъ», Казань. – 1858 г. – Книга II. – с. 475-480.

Наверхъ / Къ титульной страницѣ

0