Наследие Святой Руси. Памятники древне-русской письменности
 
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Наслѣдiе Святой Руси
-
Гостевая книга
-
Новости
-
Написать письмо
-
Поискъ

Раздѣлы сайта

Святые Кириллъ и Меѳодiй
-
Книги старой печати
-
Патерики и житiя святыхъ
-
Великiя Минеи Четiи
-
Церковно-учит. литература
-
Творенiя русскихъ святыхъ
-
Стоянiе за истину
-
Исторiя Русской Церкви
-
Церковный расколъ XVII в.
-
Исторiя Россiи

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 23 октября 2017 г. Сейчасъ на порталѣ посѣтителей - 21.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ТВОРЕНІЯ РУССКИХЪ СВЯТЫХЪ

Преп. Ѳеодосій Печерскій († 1074 г.)
Слово о терпѣніи и о любви.

Что внесемъ, любимици мои, въ міръ сей, или что имамы изнести (1 Тим. 6, 7)? Не оставихомъ ли міра, и яже въ мірѣ, (по) заповѣди Христовы, глаголавшаго: иже [1] възненавидить всего и послѣдуеть Ми, нѣсть Ми ученикъ (ср. Лук. 14, 26. 33), и пакы: иже Мя аще любить и слово Мое схранить, и иже душу свою погубить Мене ради, обрящеть ю (Іоан. 14, 23). И любы Божія не въ словесѣхъ съвръшается, но въ дѣлѣхъ дѣтельныхъ (ср. Марк. 8, 35; Матѳ. 10, 39; Лук. 9, 24). Рече бо: иже пребудеть въ заповѣдѣхъ Моихъ, Азъ възлюблю и явлюся ему самъ (Іоан. 14, 21). Заповѣдь бо нову даю вамъ, да любите другъ друга, якоже и Азъ възлюбихъ вы, и по семъ разумѣють вси, яко Мои ученици есте, аще любовь имаете междю събою (Іоан. 13, 34-35). Да аще хранимъ заповѣди Его, и Онъ възлюбить насъ. Рече бо Ісусъ въ ономъ долзѣмъ и нощнѣмъ наказаніи къ Іюдѣ Скаріоту, глаголавшему, како есть, яко намъ хощеши явитися, а не всему міру, и отвѣщавъ Ісусъ и рече ему: аще кто слово Мое възглаголеть, и Отець Мой възлюбить и, и къ нему пріидѣвѣ, и обитель въ него створивѣ; а не любяй Мене, иже словесъ Моихъ не сохранить (Іоан. 14, 22-25). Азъ бо есмь виноградъ истинный, и Отець Мой дѣлатель есть, и всяка лоза, не творящіи плода о Мнѣ, посѣкается, а творящіа плодъ, отрѣбится, да болій плодъ сотворить (Іоан. 15, 1-2). Аще бо кто во Мнѣ не пребудеть, и извержется вонъ. Яко же и лоза, съсхнетъ, и сбирають ю, и въ огнь влагають, и сгораеть (Іоан. 15, 6), тако жде и мы, отци мои и братіа, аще потщимыся заповѣди Его творити, да словеса Его въ насъ будуть, и плодъ створимъ. О семъ бо, рече, прославися Отецъ Мой, да плодъ многъ, створите, и будете Мои ученицы (Іоан. 15, 8). И кто не удивится, възлюбленіи, яко Богу прославитися нашими дѣлесы? И колика на насъ худыхъ любы Его изліяся! Яко же бо, рече, възлюби Мя Отецъ, и Азъ възлюбихъ вы (Іоан. 15, 9). Болше сея любве ни кто же не имать, да кто душу свою положитъ за другы своя; вы бо, рече, есте друзи Мои (Іоан. 15, 13-14).

И та слышасте, намъ убогымъ кацѣмь (какими) достоить длъжнымъ быти? Не сердце ли въ насъ горитъ? И та вся слышаще, намъ нимало отъ съвѣсти своеа въсклоняющимся? Что бо добро створихомъ Ему, да насъ изъбра, изведе ны отъ маловременнаго житіа сего? Не вси (ли) уклонимся (уклонихомся) и неключими быхомъ работати Ему? не въ слѣдъ ли похотей идохомъ? И Онъ не презрѣ насъ, въ толицѣ злѣ сущимъ, ни възгнушася естьства нашего, и въспріимъ рабій образъ, уподобися намъ (Флп. 2, 7) и вся та створи, да мы спасены будемъ. Глаголаше бо: вся, елико створятъ вамъ человѣци, и вы творите имъ такожде, и всякому просящему въ васъ, дайте, и взяти хотящимъ у тебе не отвратите (Матѳ. 5, 42), и будете съвръшени, якоже Отецъ Мой свершенъ есть (Матѳ. 5, 48). Якоже сіаеть солнце на злыа и на добрыя, такожде и дождить, не токмо на рабы своя, но и на съпостаты своя (Матѳ. 5, 45). И не себе бо ради сниде Слово Божіе на землю, но всѣхъ ради (Срв. Евр. 2, 9), и за вся пострадати смерть воспріятъ. И Петрови бо нѣкъгда въ обрѣзаннцѣхъ пребывающу и съ тѣми ядущу, а иноязычникъ гнушающуся, не свѣсилъ (ли) ему Господь съсуда нѣкакого, полна суща нечистыхъ годъ? И глаголаше ему: заколи и яжь. И что же рече Петръ? Господи николиже нечисто не вниде въ уста моя. И что противу тому услыша? Рече бо: еже Богъ очисти, человѣкъ да не осквернавить (Дѣян. 10, 11-14). И Богу тако сътворшу, и тако повелѣющу рабомъ своимъ въ годы своя. И како азъ могу, грѣшный и недостойный рабъ вашъ, противникъ Богу быти, оному о мнѣ тако творящу? Трость бо не пишеть сама, аще не будеть пишущаго ею, ниже прославиться сѣкира безъ сѣкущаго ею. Сами бо вѣсте, братіе моя и отци, яко не азъ послахъ проповѣдникъ своихъ, дая всѣмъ покааніе, но Отецъ, живый въ вышнихъ, пославый единороднаго Сына своего за избавленіе всего міра (Ср. 1 Іоан. 4, 9). Тѣмже, братіе моя, дръжаще междю собою любовь истинну, и въспріимемь благаго Бога нашего законъ чистъ, и заповѣди Его ненорочны съблюдемъ, тружающеся въ бдѣніи и въ молитвахъ молящеся за весь міръ безъ прѣстани (= непрестанно), да тѣмъ получимъ царство небесное о Христѣ Ісусѣ, Господѣ нашемъ, ему же [2].

Примѣчанія:
[1] Вѣроятно здѣсь опущена частица «не» (ср. Лук. 14, 26).
[2] Вѣроятно въ спискѣ конецъ недописанъ: «Ему же слава, честь и держава». Ср. ниже, поученіе 5-е.

Источникъ: Слово святаго Ѳеодосія о терпѣніи и о любви. // Памятники древне-русской церковно-учительной литературы. Выпускъ первый, содержащій поученія: Луки Жидяты, митроп. Илларіона, Ѳеодосія Печерскаго и Кирилла Туровскаго. — Изданіе журнала «Странникъ», подъ ред. проф. А. И. Пономарева. — СПб.: Типографія С. Добродѣева, 1894. — С. 33-35.

/ Къ оглавленію раздѣла /


Наверхъ / Къ титульной страницѣ

0