Наследие Святой Руси. Памятники древне-русской письменности
 
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Наслѣдiе Святой Руси
-
Гостевая книга
-
Новости
-
Написать письмо
-
Поискъ

Раздѣлы сайта

Святые Кириллъ и Меѳодiй
-
Книги старой печати
-
Патерики и житiя святыхъ
-
Великiя Минеи Четiи
-
Церковно-учит. литература
-
Творенiя русскихъ святыхъ
-
Стоянiе за истину
-
Исторiя Русской Церкви
-
Церковный расколъ XVII в.
-
Исторiя Россiи

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 17 октября 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ТВОРЕНІЯ РУССКИХЪ СВЯТЫХЪ

Преп. Ѳеодосій Печерскій († 1074 г.)
Поученіе о терпѣніи и милостыни.

Възлюбленіи! Притчю (примѣръ) пріимите злостраданіа и тръпѣніа — Пророки, иже глаголаша намъ именемъ Господнимъ. Нынѣ бо блажимъ тръпящая. Терпѣніе Іовле слышаше и кончину Господню видяще, яко премилостивъ есть и щедръ (Іак. 5, 10-11) и длъготерпѣливъ, и не помня злобъ нашихъ. Како бо есть не премилостивъ, иже туне насъ спасе, отъ небытіа въ бытіе приведъ всяческая, небесная и земнаа, и намъ обнови путь новъ собою? Мертвы бо ны суща, въринувшимся самоволнѣ и у (въ) дебрь грѣховную, не презрѣ насъ, ни отвержеся насъ; но възыска и обрѣтъ, и на рамѣ понесе, и одесную Отца посади: то како нѣсть милостивъ и человѣколюбивъ? Не мы възыскахомъ Его, но Онъ насъ. Не пророкы ли прежде предасть въ толикы бѣды и напасти? Овіи бо каменіемъ побиваеми, и друзіи же претираеми, иніи же въ пещь вмѣтаеми, иніи къ лвомъ (ср. Евр. 11, 37). И та вся створи насъ дѣля. Святіи бо въ толицѣ суще бѣдѣ и печали, не стужи си, но на помощь Его призывающе глаголаху: ускори, потщися на помощь нашу, яко вся мощна отъ Тебе. Въ толицѣ бо тузѣ суще, не отрекоша Божіа помощи, но мужьскы тръпяху. И Апостоли гоними, и въ темницю всажаеми, и укоряеми, и не стужиша (стужити — унывать) си въ толикахъ бѣдахъ, не отврьгоша отъ упованіа своего. Помянемъ же святыя мученицы, и тръпѣнію ихъ кто почудится, видя ихъ толицѣми страстьми облежаща, яко и самую плоть ту презрѣти Христа ради? И преподобныа отця оны видимъ, въ колицѣ терпѣніи житіе свое скончаніа, ихже памяти творяще и житіа ихъ почитающе, хвалимъ Творца, укрѣпившаго я яремъ благый Его понести. Акы звѣзды сіающе въ памятѣхъ своихъ, просвѣщають душа наша, прибѣгающихъ къ нимъ.

Тѣмъ же молю васъ, братіа моя любимая, не отврьземъ упованіа своего, еже имать мзды и въздааніе велико. Тръпѣніа бо имате тръваніе (терпѣніемъ вооружимся), да волю Божію сътворше, пріимете обѣщаніе. Не призва бо насъ то благоволеніе Его здѣ; да всѣхъ земныхъ насытимся; не бо и того ради насъ сътвори, да обѣщници будемъ временному сему житію лѣности дѣля нашея. Но отрясемъ, молю васъ, любимици мои, уныніе наше. Помянемъ прьвый свой входъ, како быхомъ, но егда къ дверемъ монастырскимъ пріидохомъ, не все ли обѣщахомся тръпѣти, и поношеніа, и укореніа, и уничиженіа, и изгнаніа? Не тогда бо токмо, егда предъ святыми дверцами стоаще отвѣтъ дѣяхомъ о своемъ обѣщаніи, акы и на страшнѣмъ дни предъ видимыми послухы (свидѣтелями) и предъ невидимыми, и самого Владыку и Бога нашего призвахомъ на послушство глаголюще: се Христосъ сдѣ стоить невидимо. Блюди кому ся обѣщаеши: никто же бо тебѣ на се не нудить. И нынѣ же та вся обѣщаніа наша ни въ чтоже вмѣнихомъ. Покореніе бо належить намъ и тръпѣніе, но и того не имамъ. Истаеваеть бо душа наша по вся дни, иже не вижду васъ тщащеся о своемъ обѣщаніи. Житіа бо святыхъ почитающе, и отъ тѣхъ затыкающе ушы своя, яко не слышати мужства (мужество) ихъ. Не ны бо что предословіе речеть, то и того амина не можеть изъглаголати, но тогда болѣ уста своя стиснемъ; а о иномъ ничсоже глаголати. Но на неподобныа рѣчи, и на укореніе, и на гнѣваніе несмы лѣниви. На то бо уста своя отврьземъ, и очи не дремливи, ухо внѣ. Ибо трубѣ (кампанъ — било), убуждающи насъ на святое славословіе и на вся годины, и образъ свой въ томъ подавающи намъ, не малы благостыня. Рати бо належащи и трубѣ воиньстѣй трубящи, никтоже можеть спати: и воину Христову лѣпо ли есть лѣнитися? Да или то они за тщую славу и изгыбающую не помнять ни жены, ни дѣтей, ни имѣніа. Да что мню имѣніе, еже есть хуже всего, но и главы своея ни въ что же помнять, дабы имъ не посрамленымъ быти. Да якоже суть сами временніи: тако и слава ихъ съ животомъ скончевается. Намъ же не тако. Но аще стерпимъ, борющеся съ супостаты нашими, и, одолѣвше, пріимемъ славу безконечную и чьсти неизреченныа сподобимся. Билу бо ударяющу и образы симъ гласы намъ тако испущающе, аще не рѣчію възвѣщающе намъ, но образомъ глаголетъ намъ, призываа къ святой церкви на Божественное пѣніе. Приходяще же съ страхомъ стоимъ до отпущеніа іереева, главу долу покланяюще, а умъ имуще къ Вышнему, и тако улучимъ царство небесное о Христѣ Ісусѣ, Господѣ нашемъ.

Источникъ: Поученіе святаго Ѳеодосія о терпѣніи и милостыни. // Памятники древне-русской церковно-учительной литературы. Выпускъ первый, содержащій поученія: Луки Жидяты, митроп. Илларіона, Ѳеодосія Печерскаго и Кирилла Туровскаго. — Изданіе журнала «Странникъ», подъ ред. проф. А. И. Пономарева. — СПб.: Типографія С. Добродѣева, 1894. — С. 37-39.

/ Къ оглавленію раздѣла /


Наверхъ / Къ титульной страницѣ

0