Наследие Святой Руси. Памятники древне-русской письменности
 
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Наслѣдiе Святой Руси
-
Гостевая книга
-
Новости
-
Написать письмо
-
Поискъ

Раздѣлы сайта

Святые Кириллъ и Меѳодiй
-
Книги старой печати
-
Патерики и житiя святыхъ
-
Великiя Минеи Четiи
-
Церковно-учит. литература
-
Творенiя русскихъ святыхъ
-
Стоянiе за истину
-
Исторiя Русской Церкви
-
Церковный расколъ XVII в.
-
Исторiя Россiи

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 24 марта 2017 г. Сейчасъ на порталѣ посѣтителей - 8.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНЫЙ РАСКОЛЪ XVII ВѢКА

Исторія о Павлѣ епископѣ Коломенскомъ и о бѣгствующемъ священствѣ,
кои не приклонишася къ Никоновымъ новотворнымъ догматомъ, и како тіи отъ епископа Павла благословеніе пріяша
[1].

Благословенъ Богъ, иже вся мудростію своею сотворивый, иже всѣмъ человѣкомъ хощетъ спастися /л. 1 об./ и въ разумъ истинный пріити; того ради даде намъ писаніе, да поне сими воспоминаемь присно того хотѣнія. Понеже бо хотяху ереси прозябнути и обычай нашъ растлитися, благоволи написатися благовѣстіе сіе, да отъ нихъ учими будемъ истинѣ не прельщатися отъ ложныхъ учителей и ереси и яже всеконечнѣ растлятъ /л. 2./ обычай нашъ. Ибо отъ того времене егда церковь возмущати начинаше, предвѣдая вся сія Господь, яко таковое въ послѣднія дни будетъ смятеніе, того ради сохраняя насъ отъ соблазнъ и прелести еретической, благоволи написатися лѣту 1666-му, якобы намъ во оное отступленіе не пострадати, якоже списатель вѣрѣ /л. 2 об./ назнаменова. Отъ христіянскаго православія принято отъ грекъ княземъ Владимиромъ и наважденіемъ вселукаваго пастыріе въ волки претворишася и принятаго княземъ Владимиромъ православія отступиша, новое же свое вымышленное ученіе и обряды предаша, и оное всѣмъ повсюду пріимати повелѣша; но мнози того /л. 3./ пріяти не восхотѣша, Никоновы же послушницы на нихъ воздвигоша великое гоненіе и жестоки скорби.

И таковыхъ ради винъ въ то самое время священноіерей   К о з м а   отъ церкве Всѣхъ Святыхъ, нарицаемыя на Кулишкахъ, Московской епархіи, и совѣщася священноіерей Козма съ своими нѣкоторыми духовными дѣтми, возъимѣвши ревность /л. 3 об./ съ пастыремъ своимъ по благочестіи, и ради сохраненія христіянскія вѣры отъидоша изъ Москвы въ Малоросію и поселишася въ Стародубскихъ слободахъ и живяху тамо нѣколико время. Московской же епархіи людіе ревнующіи по благочестіи, услышавше о немъ, яко тамо живяху священноіерей Козма со благочестивыми народы, /л. 4./ многія стекахуся людіе къ нему и собирахуся. Священно же іерей Козма сотвориша совѣтъ о приходящихъ къ нимъ.

Въ тоже время по смотренію Божію пріиде къ нимъ священноіерей   С т е ф а н ъ   изъ Бѣлова, сей знаемь бѣ епископу Павлу. И во время открывшагося смущенія отъ Никона іерей Стефанъ притече къ епископу Павлу съ болѣзнію сердечною и /л. 4 об./ съ сокрушеніемъ, вопрошая о пришедшемъ таковомъ лютомъ отъ Никона смущеніи.

Епископъ же Павелъ Коломенскій исполнися слезъ, съ плачемъ рече іерею: друже! Не смущатися подобаетъ намъ, но на Бога уповати, яко время то пріиде. И совѣтова ему вооружати и крѣпко стояти, не принимая новыхъ Никоновыхъ догматъ, аще /л. 5./ случится даже и до крове, якоже евангелистъ глаголетъ, паче же и умрети подобаетъ. Аще же мощно, не пометати себе въ напасти, памятующе заповѣдь Господа нашего Ісуса Христа, еже рече апостоломъ своимъ, глаголя: аще гонятъ вы во градѣ семъ, бѣгайте въ другіе; и св. апостолъ Павелъ въ кошницѣ свѣшенъ по стѣнѣ и избѣжа изъ руки Иродовы; паче же и /л. 5 об./ самъ Господь нашъ Ісусъ Христосъ, гонимъ былъ отъ Ирода, бѣжа во Египетъ во время убіенія младенецъ. Такъ и тебѣ подобаетъ удалитися отъ гнѣва, грядущаго на вѣрныя рабы Христовы. Азъ же положити имамъ душу мою за овцы моя и за свидѣтельство Ісусъ Христово.

Стефанъ же, слыша сіе отъ епископа Павла, яко хощетъ за благочестивыя овцы /л. 6./ стада и за отеческія догматы положити душю свою, исполнися слезъ и рече: владыко! Благослови, и азъ съ тобою готовъ свидѣтельствовать о истинѣ и душю положити за староотеческое благочестіе и за овцы Христова стада.

Павелъ же рече Стефану: чадо! Но шедъ крыйся и прочихь научи, да творятъ такожде, и настави ихъ на путь /л. 6 об./ спасеный.

И тако имъ довольно бесѣдующемъ о церковномъ строеніи и о прочихъ таинствахъ святыхъ въ вѣрѣ, и како пріимати приходящихъ къ православію, епископъ же рече: самъ вѣдаеши, Стефане, соборное правило и каноны, церковныя узаконенія, святѣйшаго патріарха Филарета соборное изложеніе; тако и ты твори, якоже и азъ /л. 7./ тебѣ повелѣхъ. Гряди и моли Бога о мнѣ грѣшнѣмъ и засвидѣтельствуй всѣмъ вѣрующимъ не отступати отъ преданія святыя соборныя апостольскія церкви и свв. отецъ, и буди благословеніе Божіе и мое на тебѣ во вся роды даже и до вѣка. Якоже и Кирилъ Іерусалимскій глаголетъ, листъ 303 (=л. 336): «(къ Коринѳомъ послан. зач. 182): по числу дней въ седмицѣ, /л. 7 об./ сирѣчь въ недѣли, и святыхъ седмь соборовъ вселенскихъ, иже православную вѣру утвердиша. Аще и множае седмихъ нѣціи высокомысленніи именуютъ вселенскими, но тіи яко суетныя въ число святыхъ не предпочитаеми (=причитаеми). Заколеніе же жертвенное (именуетъ) не агньцы и тельцы, но самое тѣло Христово, еже за прегрѣшеніе наше изволи на /л. 8./ крестѣ пригвоздитися и копіемъ прободену быти. Якоже и апостолъ о семъ пророческое написаше (=писаніе) приводя глаголетъ: жертву и приношеніе не восхотѣ, тѣло же совершилъ ми еси, сирѣчь совершенно, не оскудѣваемо, нетлѣнно, безсмертно. Не оставиши бо, рече, душю мою во адѣ, ни даси же преподобному своему видѣти истлѣнія. /л. 8 об./ Черпаніе же вина и уготованіе трапезы, сирѣчь стола, Тайною вечерею Христосъ (=Тайную вечерю Христову) именуетъ, въ ней же божественною силою Свое (=божественное Свое) Тѣло въ хлѣбъ и животворящую пречистую Кровь Свою въ винѣ на пріятіе вѣрнымъ своимъ уготовалъ единою, и во вѣки не оскудѣваетъ, насыщая и напаяя вѣрныхъ. Тѣло бо, рече, совершилъ /л. 9./ еси, яко всѣхъ насыщая и никогда же убываетъ, но совершенно пребываетъ; якоже и глаголъ онъ божественный, еже рече: раститеся и множитеся и наполните землю. Сіе слово единою речено бѣ, бываетъ же дѣло по вся лѣта, усиляя естество наше къ чадородію. Посланіе же рабовъ имѣнуетъ пророковъ и апостоловъ, созывая всѣхъ во истинную вѣру /л. 9 об./ и сообщенія со Христомъ причастіемъ Животворящаго Тѣла Христова;... не яко общее брашно и питіе, его же всякъ кождо пріимая вкушати обыкохомъ».

Того же Кирила Іерусалимскаго, листъ 78 (=99 об.): «но рекутъ еретицы: то уже іерейства и жертвъ въ церкви Христовѣ не есть потребы. Писано бо есть безъ всякаго прекословія: меншій отъ /л. 10./ большаго благословляется. Въ первомъ законѣ бысть Ааронъ большій, отъ него же поряду вси іереи благословеніе пріимаху; но Мелхиседекъ инаго роду, иже бысть іерей Бога вышняго по образу Христа, той бысть Аарона больши, понеже великій патріархъ Авраамъ даде ему десятину. Мелхиседекъ уставися по чину во іерействѣ (во вѣки пребывати, Ааронъ во своемъ іерействѣ) поставленъ /л. 10 об./ на время, и не возмогоша іереи его во вѣки пребывати, смерть Ааровова ему (=имъ) прекратила. Того ради Христосъ не по Ааронову временнаго, но по Мелхиседекову вѣчнаго чина пріиде архіерей вѣчныхъ благъ. И якоже Самъ никогда же не умираетъ, такоже и іерейство его по чину Мелхиседекову (не престаетъ);... престало бо тогда архіерейство Аароново временное, /л. 11./ востало же Христово вѣчное... (л. 102 об.) О томъ же ихъ безуміи Соломонъ мудрый указуетъ, пиша, глаголетъ: Премудрость Божія, еже есть Сынъ Божій, созда себѣ храмъ, церковь, и утверди столпъ седмь, вселенскихъ соборовъ, закла своя жертвенная и черпа въ чаши своей вино, посла своя рабы съ высокимъ проповѣданіемъ, призывая на чашю, глаголющи: /л. 11 об./ гдѣ (=иже) есть безуменъ, да уклонится ко мнѣ, и требующимъ ума рече: пріидите и ядите мой хлѣбъ, и пійте мое вино, еже черплю вамъ. Оставите безуміе, и живи будете и во вѣки царствуете. Доздѣ Соломонъ, заступая церкви Христовы, пишетъ безумнымъ, иже не разумѣютъ писанія добраго церковнаго чина и /л. 12./ впадаютъ въ ереси. Но оставльше нынѣ сіе, къ концу обратимся, како святый Кирилъ зловѣрныхъ до конца помрачаетъ».

Книга о вѣрѣ, глава 2 о святѣй церкви (=л. 19): «церкови ничто же равно и никогдаже старѣетъ, вышши небесъ взыде, ни варвари, ни бѣсы преодолѣютъ ей. Колицы ратоваша церковь, и ратовавшіи погибоша. Борима есть, /л. 12 об./ и не побѣждается. И чесо ради попусти брань? Яко да покажетъ свѣтлѣйшу побѣду. Не удаляйся церкви, ничтоже бо церкви крѣпчайши. Упованіе твое — церковь и спасеніе твое — церковь. Небесъ вышши есть, каменія твердѣйши, земли ширши и никогда же старѣетъ». — Вѣра, листъ 22: «церковь бо вкоренилася паче небеси и земли. Уне (=удобѣйши есть) солнцу /л. 13./ престати отъ теченія своего, нежели церкви (=безчестнѣ остати) престати»...

Не вѣси ли: не земли ради распяхся, но церкви дѣля. Во евангеліи тако положи и завѣща: тако (рече апостоломъ своимъ), творите въ Мое воспоминаніе, дондеже пріиду. — Ты же, Стефане, шедъ и засвидѣтельствуй всѣмъ вѣрующимъ и послушествующимъ тебе, якоже азъ повелѣхъ тебѣ, отнынѣ и /л. 13 об./ во вся роды и до вѣка, аминь.

И тако по мнозѣй бесѣдѣ слезъ исполнишася и другъ другу цѣлованіе о Господѣ давше, священноіерей Стефанъ отъ епископа Павла Коломенскаго благословеніе пріятъ и разлучишася.

Егда же пріиде въ Стародубскія слободы Стефанъ, пріятъ бысть священноіереомъ Козмою и всѣми тамо иноками и бѣльцами /л. 14./ любезно и радостно, вѣдяще бо о немъ извѣстно, яко мужь силенъ дѣломъ и словомъ наставити люди Господня на путь миренъ.

Времени же нѣколико мимошедшу благополучно, воздвижеся и тамо гоненіе. Видяще людіе толикую бурю стисненія, на нихъ востающу, обще вси совѣтъ сотвориша отъити въ Польшу. И тако поидоша, кождо имъ же образомъ /л. 14 об./ можаше, и посѣлишася въ области пана Халѣцкаго при рѣцѣ Вѣткѣ, и собранія ради молитвословія Божія построиша молитвенный храмъ, и придѣлаша олтарь, и освятиша по правилу седмаго вселенскаго собора 17 правила и по благословенію епископа Павла Коломенскаго; и во оной литоргисаша 2 года безъ всякаго разногласія священники Козма и Стеѳанъ.

Тогда же Стефанъ возжелаше /л. 15./ на безмолвное житіе и, отъиде подалѣе поприщь 15, построиша себѣ кѣлію и живяше въ ней нѣколико время.

Еще же пріиде къ нимъ священноинокъ   I о а с а ѳ ъ   имѣяше постановленіе на себѣ, уже во отступствѣ пріятое. Егда же пріиде, Іоасафъ нача просити священноіерея Козму, да его приметъ. Священно же іерей Козма, видя /л. 15 об./ Іоасафа прилѣжное прошеніе, пріятъ его и радостно привѣтствова, и по согласію священноіерея Стефана и прочихъ съмыслящихъ священныя правилы, а пріяша его подъ мѵропомазаніе и съ тою же хѵротоніею. По пріятіи же священноинока Іоасафа, нѣколика время минуша, іерей Козма отъиде свѣта сего. Іоасаѳъ же, видя тайну Христову /л. 16./ до дѣтей вѣрѣ, возъимѣвши по Бозѣ ревность, построиша церковь и украси ю подобающею красотою чюдно зѣло. Нѣколико же время мимошедшу, случися и сему священноиноку Іоасафу преселитися свѣта сего; церковь же новостроенная по кончинѣ его осталась не освященна.

По смотренію же Божію, рекій: не хощу смерти /л. 16 об./ грѣшному, но живу быти, пріиде съ нимъ священноинокъ Ѳеодосій, иже имѣяше на себѣ рукоположеніе Іосифа патріарха, и нача повѣдовати имъ подробну о произшествіи въ Московской епархіи и въ прочихъ мѣстахъ, что происходитъ отъ Никона и его единомысленниковъ великое мученіе, и како Никонъ патріархъ епископа Павла Коломенскаго /л. 17./ своими руками по ланитомъ билъ и въ темницу посадилъ. И про себе подробну рече Ѳеодосій, како съ епископомъ Павломъ въ темницѣ былъ, Богу тако изволившу (якоже пророкъ Давыдъ глаголетъ: дастъ ти Господь по сердцу твоему и весь совѣтъ твой исполнитъ) чрезъ темничнаго стража, и посему тайно даде видитися съ епископомъ Павломъ. /л. 17 об./ Егда же вниде Ѳеодосій въ темницу, видѣвъ его окована веригами желѣзными, и паде на нозѣ его, не могій проглаголати отъ многаго захлипанія слезнаго, и цѣлова веризѣ его, и испроси благословеніе отъ епископа Павла.

Онъ же благословивъ рече и востати ми повелѣ, и позна мя зѣло, и возрадовася, и нача бесѣдовати съ нимъ. Той же /л. 18./ предивнѣй и плачу достойнѣй бесѣдѣ и самъ стражь темничный сладцѣ слушаше и дивися бесѣдѣ ихъ; бяше бо епископъ Павелъ велій ревнитель по благочестіи, и правыхъ догматъ защититель крѣпкій: всею силою вооружившися за благочестіе, ста противу Никона патріарха и всѣхъ единомысленниковъ его, не /л. 18 об./ пріимая отъ него новыхъ догматъ въ церковь внесенныхъ. Егда же приведоша его на соборъ, начаша увѣщавати многими ласкательствы, яко да пріиметъ новоизложенный ихъ догматъ. Онъ же не приклоньшися никако же, зѣло обличая ихъ, паче же на число 1666 показуя, въ которое подобаетъ за отеческая преданія крѣпко стояти, /л. 19./ а не церковь раздирати, и книгами мѣняти, и неслыханныя обряды издавати, а непріемлющихъ того въ темницу сажати и клятвамъ предавати. Не явно ли на васъ исполнися реченное число отступленію, въ которое подобаетъ оберегатися? Аще ангелъ благовѣститъ паче преданнаго, и той анаѳема. — По многой же бесѣдѣ, отъ /л. 19 об./ обоихъ странъ крѣпкомъ прѣніи, преосвященный Павелъ одолѣ противныхъ, вси бо глаголы ихъ яко волны о камень приражахуся. И егда его не могоша къ своей воли и единомыслію преклонити, тогда Никонъ патріархъ рыкну, яко левъ золъ, и нача бити немилостивно по ланитомъ преосвященнаго; и дотолѣ его біяше, дондеже самъ /л. 20./ изнеможе. А преосвященъный Павелъ паде на землю, аки мертвъ, и мало въ себѣ пришедъ, воста, бившему благодареніе воздаде, и стояше молча.

А предстоящіи Никоновы послушницы рекоша ему: Павле! Что не глаголеши? — Павелъ же рече: Господь нашъ Ісусъ Христосъ даде сей образъ: егда судимъ бѣ отъ іюдей, гнѣвающимся и ярящимся /л. 20 об./ ничтоже глаголаше. Аще бо азъ глаголю, не внимаете, понеже законное испытаніе и опасное вещей разсмотреніе погибе; а посему всякъ разумѣваяй да умолкнетъ, время то приближися, яко вижю необратное ваше паденіе. — Они же глаголаху: Павле! Еда ты насъ равняеши со іюдеями отступившими святоотеческаго преданія? /л. 21./ Павелъ же рече: вы сами глаголете тако. — Они же сурово рекоша: лжеши ты, Павле. — Павелъ же отвѣща: аще азъ лгу, то свидѣтельствуйте во Святомъ Писаніи. Аще же правду глаголахъ, почто біете мя? — Тогда тіи много поносивше ему укориша и за крѣпкою стражею держати повелѣша, творяще ему всякія пакости къ /л. 22 об./ стѣсненію и прискорбію, надѣяся чрезъ то склонити его къ новому новотворчеству; но твердаго адаманта ничтоже возможе поколѣбати, но паче крѣпчае бысть.

И по нѣколицѣхъ днехъ паки предъ духовныя власти приведенъ бысть, иже вопрошаху: Павле! Чесо ради не сообщаешися намъ? Павелъ же рече: понеже вы оставиша /л. 22./ благочестивыхъ отецъ отъ грекъ княземъ Владимеромъ принятое ученіе, чины и обряды и прочыя церковныя церемоніи, отъ которыхъ же вы воспріяли хѵротонію и чинъ святительства и которымъ поклонялись святымъ иконамъ, писаннымъ греческимъ писмомъ съ воображеніемъ двѣма перстома, но вы за ихъ благодѣяніе, что васъ въ святость приведоша и /л. 22 об./ Христовъ чинъ преподавше, показаша злодѣяніе и, яко дивіи звѣріе устремишася, начаша предавать, дѣти суще отецъ своихъ проклинать. Овцы же, видя неистовство ваше, яко вы претворишася въ волки, и начаша другій гласъ испущати, котораго они никогда же слышали, — того ради въ ваше подписаніе не пошедше. Вы же /л. 23./ на нихъ яко звѣріе устремишася, начаша усильствомъ къ своему новому узаконенію принуждать, а непріемлющихъ и непокаряющихся гладною смертію морить. Кія ради вины вы таковое стараніе прикладываете? Души ли ради своей или новотворной своей церкви что приобрѣсти восхотѣли? На семъ фундаментѣ соградить, /л. 23 об./ дабы твердо и крѣпко стояла новотворная, паче же и ереси подобная церковь, дабы и впредь такожде творити мучительскою рукою къ себѣ привлекать. Христосъ ли тако творити повелѣлъ или его святіи апостолы? Но Христосъ Спаситель нашъ Самъ соизволилъ отъ беззаконныхъ жидовъ мученіе претерпѣти и Пречистую Кровь Свою /л. 24./ за погибшихъ изліяти; такоже и божественніи апостоли сами мученіе воспріяша, и кровь свою изліяша, намъ оставиша образъ, да послѣдуемъ стопамъ ихъ, и тѣмъ церковь Христову твердо и крѣпко утвердиша, ея же врата адова не одолѣютъ. И за сію церковь азъ готовъ кровь свою проліяти. Того ради съ вами не общаюся.

Тогда /л. 24 об./ Никонъ патріархъ видѣ Павлово дерзновеніе, а себе отъ него во всемъ обличаема и посрамлена, премени ярость въ кротость и рече: молихомъ Павла, да будетъ единомысленъ съ нами и обрѣтохомъ его не повинующася нашему смиренію и не покаряющася святѣй церкви; сего ради данною намъ отъ Христа благодатію и властію чина лишаю и всякаго /л. 25./ священнодѣйствія обнажаю. И повелѣ: да не будетъ ничтоже священнодѣйствуя. — Павелъ же рече: клятва бывающая не по священнымъ правиломъ — недѣйственна есть, но обращается на главу рекшаго ю; ибо неложно учитель нашъ Христосъ рече: въ нюже мѣру мѣрите, возмѣрится и вамъ. И пророче ему, глаголя: тебѣ за мною вскорѣ /л. 25 об./ постигнутъ; им же мя судомъ судиши, самъ осужденъ будеши и обратится болѣзнь твоя на главу твою.

Тогда Никонъ исполнися ярости, повелѣ блаженнаго обложити оковы желѣзными и отвести въ темницу за крѣпкою стражею и стрещи строжайши, никому не дая къ нему входити и пищи не /л. 26./ подавати кромѣ приставленнаго стража. И приставиша человѣка не милостива суща, паче же и злонравнаго и безчеловѣчьнаго; повелѣша же ему, чтобы творилъ великія скорби епископу Павлу и досады. И тако въ темницѣ держимъ бяше въ великомъ озлобленіи до самаго изверженія Никонова; вскорѣ бо блаженнаго /л. 26 об./ прореченіе на Никонѣ исполнися, ибо изъ сана его извергоша, а творящаго озлобленіе стража темничнаго постиже казнь Божія, ибо злѣ изверже душю свою.

По скончаніи же стража темничнаго вышереченный священноинокъ Ѳеодосій улучи время удобно видитися съ преосвященнымъ Павломъ епископомъ. Егда же, рече, /л. 27./ внидохъ къ нему въ темницу, видѣхъ его всего окованнаго и падохъ на нозѣ его, поклонихся до земли и лобызахъ веризѣ его, плакахся зѣло. И егда позна мя блаженный, вельми возрадовася, и востати ми повелѣ, и благослови, и нача мя вопрошати: что, Ѳеодосіе, дѣется отъ Никона патріарха, и како пребываютъ людіе /л. 27 об./ ревнующіи по благочестіи: собираются ли гдѣ на славословіе Божіе или ни?

Азъ же отвѣщахъ ему: Никонъ уже со престола сверженъ и сана лишенъ; а людіе ревнующіи по благочестіи кождо себѣ въ дому поетъ и молится, а прочіи же христіяне оставиша домы, жены и дѣти многое множество народа течетъ въ Польскія предѣлы /л. 28./ сохраненія ради христіянскія вѣры; къ нимъ же и азъ отхожу, надѣюся твоими святыми молитвами достигнуть. И о семъ много молихъ Владыку непрестанно и сего желахъ, еже съ тобою видитися, и отъ тебе благословитися и наставитися на путь спасеный, по нему же мощно бо было безпреткновенно шествовать не токмо мнѣ, но /л. 28 об./ и всѣмъ ревнующимъ по благочестіи. И благодарю Господа моего, яко сподобилъ мя есть тебе видѣти, понеже бо нѣсть нигдѣ слышно епископа православнаго, якоже твоя святыня, отче. Обаче же чрезъ лишенія пастырей не могъ бы произойти каковой любо раздоръ отъ Никоновыхъ послушниковъ крещенныхъ въ три погруженія и, буди они прибѣгати /л. 29./ будутъ къ соединенію нашему, что достоитъ творити и како ихъ пріимати, по коимъ правиломъ и чину?

Епископъ же отвѣща ему: по соборному изложенію святѣйшаго патріарха Филарета, еже о бѣлорусцѣхъ. Егда же пріидетъ кто, вопросити его: како вѣруетъ и что вѣра его, и како крещенъ? И аще въ 3 погруженія, таковаго /л. 29 об./ пріимати яко крещена, токмо прокленше свою ересь и прочихъ еретикъ, и потомъ изложити вѣру: Вѣрую во единаго Бога и прочее, и потомъ помазати мѵромъ; безъ помазанія бо мира никто же можетъ внити въ царство небесное, не помазуеми бо и непечатлѣнніи святымъ миромъ (еже есть печать Святаго Духа) не вѣдоми суть Христу, ниже /л. 30./ ангеломъ знаеми.

Ѳеодосій же рече: отче священнѣйшій! Гдѣ таковое изложеніе писано?

Павелъ же рече кроткимъ гласомъ: Большій Катихисисъ, листъ 308 (357): «есть же особнѣ дѣйство другое, самѣхъ точію тріехъ святыхъ таинъ, сирѣчь крещеніе, помазаніе святаго мира и священство, яко намъ начертаніе содѣваютъ и печатаютъ, еже во вѣки не истребляется, /л. 30 об./ ниже измѣняется». — Тойже Катихис., листъ 328 (377) о мѵропомазаніи: «видотвореніе сея тайны есть, силъ онѣхъ глаголъ, егда бываетъ въ чину крещенія по велицѣй ектеніи и обычныхъ молитвахъ, яже отъ іерея, бываетъ святое помазаніе мѵра крещающемуся сице: еже творитъ крестообразно на челѣ, на очію, на ноздрію, и на грудѣ, на /л. 31./ устахъ и на обѣ уши, на рукахъ и на сердцѣ, и на плечію, и между рамома, глаголя на коемждо помазаніи. Егда помазуетъ на челѣ, тогда сице глаголетъ: печать дара Духа Святаго, аминь, да избудетъ студа, егоже первѣе преступивъ человѣкъ всюду ношаше. А егда помазуетъ на лицѣ, тогда глаголетъ сице: печать дара Духа Святаго, аминь, да откровеннымъ /л. 31 об./ лицемъ славу Господню зритъ. Такожде и вся уды знаменуя глаголетъ. И сими глаголы содѣвается и совершается сія тайна»... — И потомъ Павелъ: глаголетъ писаніе (апостолъ толк., къ Коринѳомъ, зачало 108): вертоградъ заключенъ и источникъ запечатлѣнъ, и сего ради нигдѣ истинѣ совершитися, токмо во единьствѣ церкви, ея же между сонмищи еретическими нѣсть, и /л. 32./ тайны въ нихъ ни единоя нѣсть развѣ крещенія отъ нихъ таковый аще тамо пребудетъ, ничтоже имъ полезно, но прибѣгати имъ къ соединенію святыя соборныя и апостольскія церкви, таковыхъ крестити не требуетъ. — Аще кто скажетъ обливанъ, то таковаго совершенно крестити въ три погруженія и мѵромъ и масломъ помазывать.

Азъ же /л. 32 об./ паки вопросихъ: отче священнѣйшій! Филаретъ святѣйшій отъ всѣхъ различныхъ еретическихъ вѣръ повелѣлъ совершенно крестити, понеже еретическое крещеніе нѣсть крещеніе, но паче оскверненіе, то како о семъ могу разумѣти и что могу пославшимъ мя глаголати?

Отвѣща епископъ: слыши, друже Ѳеодосіе. Еретическое крещеніе, сирѣчь /л. 33./ не въ три погруженія, но обливательно, не по Господню завѣщанію, но различно и своеумышленно, таковыхъ совершенно крестити. А крещенныхъ въ три погруженія: во имя Отца, и Сына, и Святаго Духа, по Господню завѣщанію, чинъ святыя соборныя апостольскія церкви, иди ты такожде творити повели. — И тако буди на васъ благословеніе Божіе и мое отнынѣ и до вѣка. /л. 33 об./ Аще же кто сего моего благословенія не пріиметъ, то и благословеніе Божіе отъ него удалится. Ты же, Ѳеодосіе, не скорби о семъ, время бо то приближися, аще ли удалятся, понеже не послушаютъ здраваго ученія; время бо то пріиде, всякъ свою вѣру возвыситъ. — Кромѣ же церкве спастися невозможно суть, якоже пишетъ (Катихис. Бол., листъ 121, о церкви Божіи): «Вопросъ: кая намъ потреба /л. 34./ сего поученія о соборнѣй церкви? Отвѣтъ: сея ради вины, яко да извѣстно вѣдуще ю, въ ней пребываемъ и спасени будемъ, зане кромѣ церкви Божія нигдѣже нѣсть спасенія, якоже бо при потопѣ вси, елицы съ Ноемъ въ ковчегѣ не бяху, истопоша, тако и въ день судный вси, иже нынѣ въ церкви святѣй не будутъ, тіи во езеро /л. 34 об./ огненное ввержени будутъ. Церковь же свою Самъ Христосъ спасаетъ, якоже святый апостолъ Павелъ возвѣщаетъ, глаголя: Христосъ есть глава церкви и онъ Спаситель тѣла своего. Се убо иже не пребываетъ въ сей соборнѣй церкви, тѣхъ Христосъ не спасаетъ, Святаго Духа сицевіи не имутъ». Ниже: иже «сами отдѣляться отъ единости вѣры, и суть /л. 35./ тѣлесни, духа не имуще. Богъ же Самъ пребываетъ въ церкви своей и спасаетъ ю, якоже Той Моисеомъ глаголетъ: поставлю завѣтъ Мой въ васъ и не похулитъ душа Моя васъ, и похожду въ васъ, и буду вамъ Богъ, и вы будете Ми людіе... Знай прочее добрѣ церковь Божію и пребывай въ ней, терпящи до конца вся нападанія; соборища же бѣсовскаго /л. 35 об./ блюдися, зане и собраніе нечестивыхъ обыче такожде нарицатися церковію Божіею. Но ты вѣждь и бѣгай отъ бѣсовскаго Вавилона, сирѣчь отъ сонмища злыхъ и нечестивыхъ людей, и пріиметъ тя Господь Богъ» (лл. 121 об. — 122 об.). — Ты же, отче Ѳеодосіе, о нихъ не скорби, время бо то приближися, тому подобаетъ быти. Ты же шедъ тако научи творити.

/л. 36./ Азъ же паки вопросихъ: отче священнѣйшій! Аще будутъ приходити отъ Никоніянъ сущихъ, и будѣ отъ священнаго сана, крещены же въ три погруженія, то по пріятіи и мѵропомазаніи можно ли онымъ съ тою же хѵротоніею и властію быть и священнодѣйствовать, и по коимъ правиламъ, дабы сіе пріятіе было основано въ согласность разуму вселенскія /л. 36 об./ церкве, чтобы ни единъ противорѣчить не могъ, видя ясность отъ священныхъ правилъ святыхъ отецъ, и по насъ бы будущіи родовѣ крѣпко того держалися.

Отвѣща епископъ Павелъ и рече: мощно ти, Ѳеодосіе, таковыхъ пріимати подъ мѵропомазаніе, и съ тою же хѵротоніею и властію онымъ пребывати и священнодѣйствовать /л. 37./ по правилу 50-му 1-го вселенскаго собора; а въ толкованіи на оное ясно вселенскія церкве глаголетъ, яко по мѵропомазаніи, аще священника или діякона, аще ли же и епископа, во своемъ чину да пребываютъ, а не снова рукополагаются.

Азъ же паки вопросихъ: отче священнѣйшій! Сіе дѣло свойственно точію епископу. Азъ же таковое творити како возъимѣю, /л. 37 об./ по коему правилу или отъ святыхъ отецъ соборному изложенію, чтобъ хѵротонію пріимать какъ отъ священнаго чина, равно и отъ простолюдинъ, ибо по правилѣхъ святыхъ отецъ, аки зданіе на камени твердомъ основанное непоколѣблемо пребываетъ.

Епископъ же Павелъ отвѣща: чадо Ѳеодосіе! Святый апостолъ рече: Братіе! Помнитѣ наставники вашя и покаряйтеся, /л. 38./ иже глаголаша вамъ слово, на ихъ же взирающе житіе, подражайте вѣрѣ ихъ. Рекохъ ти прежде сего 50-е правило вселенскаго собора о приходящихъ отъ Наватіанской ереси къ святѣй соборнѣй и апостольстѣй церкви: аще епископи пріидутъ, а въ томъ градѣ инъ епископъ не обрящется, то онаго, по небытности православнаго епископа, /л. 38 об./ отринути не повелѣваетъ, но по проклятіи ереси мѵромъ помазати узаконоположено, а въ томъ же чину пребываетъ, яко истиннаго епископа на престолѣ въ небытность въ томъ градѣ православнаго епископа пребывати. Въ согласность же сотвориша преподобніи и богоносніи отцы Савва и Ѳеодосій, отъ ереси Севировой Іоанна патріарха Іерусалимскаго, /л. 39./ отъ еретикъ хѵротонисаннаго, въ правовѣріе пріяша и оному съ тою же хѵротоніею, паче же и властію, а не рекоша, яко сіе дѣло точію епископское. Но даже и отъ преподобныхъ, тогда съ Саввою пришедшихъ, ни единъ сего пріяти не зазрѣ, яко сего Іоанна еретика суща, паче же и мучителя бывша, пріяша съ тою же титлою патріаршею, /л. 39 об./ понеже онъ Іоанна Постника, не общающася ереси Севировой, мучи изгнаніемъ и ранами; но по обращеніи его вси почитаху, яко истиннаго патріарха, а не рекоша, яко безъ епископля повелѣнія пріяша, но съ радостію и честію почитаху, яко истиннаго патріарха. — Видиши ли, Ѳеодосіе, яко безъ епископля повелѣнія преподобніи отцы /л. 40./ онаго патріарха еретика суща пріяша, и въ томъ же чину священнодѣйствовати повелѣша; таковое же ихъ пріятіе и донынѣ почитается, иже писано въ житіи преподобнаго Савы мѣсяца декабря 5. И тебѣ же азъ, чадо Ѳеодосіе, тако повелѣваю творити, паче же и благословляю. Да и въ правилѣхъ святыхъ отецъ заповѣдано пріимати отъ ереси приходящихъ /л. 40 об./ ко святѣй церкви; единаково пишетъ 45 и 46-е правило Лаодикійскаго собора, повелѣно равно яко архіерею, такожде и іерею.

Азъ же паки вопросихъ епископа: единымъ ли чиномъ подобаеть пріимати приходящихъ къ православію подъ мѵропомазаніе, какъ отъ священнаго чину, такъ и отъ простолюдинъ, или какое различіе въ правилѣхъ /л. 41./ оныхъ имѣть?

Епископъ же отвѣща: безъ всякого различія между оными, всѣхъ равно да пріемлетѣ подъ мѵропомазаніе, а потомъ кто въ какомъ чину есть, въ томъ и пребываетъ по правилу 50-му перваго вселенскаго собора.

Азъ же паки вопросихъ его, глаголя: отче священнѣйшій! Аще будетъ угодно Богу и продлитъ Господь вѣкъ, и оставшееся святое мѵро /л. 41 об./ начнетъ умалятися, то что тогда сотворити подобаетъ?

Отвѣща епископъ Павелъ и рече: якоже святая церковь впредь законоположенія утверди и положи, тако и ты твори и будущемъ творити повѣли. И азъ благословляю и повелѣваю: аще скудно будетъ мѵра божественнаго въ крещеніи, или въ церковноосвященіи, или въ каковой /л. 42./ любо потребѣ, малому мѵру примѣшати елей прощено есть, яко да сице удовлетворитъ и умножитъ исполнити освященіе требующимъ его. Аще скудно будетъ святаго мира на освященіе церкви или коея потребы, то смѣшавши съ масломъ за скудость узаконеннаго елея примѣшати, яко да умножитъ и удовлетворитъ нужды. И сице /л. 42 об./ тебѣ и будущимъ по васъ родомъ тако повѣли творити къ требованію онаго, ибо отъ сего времени церковь Христова гонима имать быти и пребывати во уничиженіи и бѣгствѣ и въ великомъ озлобленіи.

Азъ же паки вопросихъ епископа: отче священнѣйшій! Нынѣ убо нѣсть осталось ни единаго благочестиваго епископа, якоже твоя, /л. 43./ отче, святыня. И будѣ пресѣлитъ тя Господь отъ здѣшнихъ временныхъ на вѣчная благая, то мощно ли мнѣ и будущимъ по мнѣ въ небытіи епископа православнаго построити церковь и освятити?

Отвѣща епископъ, глагола: аще будетъ тишина и дозволеніе, и зѣло мощно, аще не возбранитъ власть еретическая, мощно построить и освятить /л. 43 об./ по 17-му правилу седмаго вселенскаго собора и по повелѣнію, иже во святыхъ отца нашего Іоанна Златоустаго, повелѣвающаго стяжаніе имущимъ во своихъ селѣхъ созидати церкви. Писано сіе доказаніе ясно во нравоученіи осмомъ. За симъ же и азъ тя благословлаю и повелѣваю: буди на тебѣ и на будущихъ по тебѣ братіяхъ /л. 44./ благословеніе Божіе и мое отнынѣ и до вѣка и во вся роды, аминь. — И никтоже о семъ да усумнится, яко азъ будущихъ сужу и нерожденными повелѣваю: время бо то настоитъ; да никтоже о семъ крамолу и противу речетъ, и маловѣріемъ да не поболитъ, но вѣрующему вся возможна суть. Аще ли удалятся нѣцыи, ты же, /л. 44 об./ чадо Ѳеодосіе, не скорби о семъ.

Вѣра, листъ 218 (216) о юнитахъ. «Вѣдая вся сія Господь яко таковое будетъ въ послѣднія дни смятеніе повелѣваетъ, яко иже суть христіяне хотящіи въ правду во христіяньствѣ утвердитися, ни къ чесому же да бѣжатъ иному, точію къ писанію, аще бо на ино что взирати будутъ, соблазнятся и погибнутъ, не разумѣюще кая бы была истинная Христова церковь... /л. 45./ Ими же образъ нынѣшнихъ временъ правое житіе изобразихъ, явѣ о томъ вѣдати, яко въ нихъ избранніи Божіи по благодати Его святѣй большаго утѣшенія и подтвержденіе, паче сего еже отъ святаго писанія и прилѣжнаго испытанія велія польза, яко да познаетъ и вѣдаетъ /л. 45 об./ добрѣ, яко всякому человѣку подобно есть знать истинную, а не смышленную церковь, но единаго Жениха небеснаго чистую и нескверную невѣсту. Ибо кто не познаетъ ю, како въ ней и при ней въ таковѣмъ велицѣмъ обуреваніи пребудетъ? Аще кто въ ней не обрящется, той вѣчнаго онаго и блаженнаго живота наслѣдити не можетъ,... /л. 46./ и повреждающую тщету подъиметъ,... чтобы ты, православный читателю, остерегая всѣ свои о временномъ покои и попеченіи, имѣй днемъ и нощію въ православной соборной вѣрѣ животъ свой скончать могъ,... и оную Духомъ Святымъ въ церкви устроенную пѣснь воспоминая себѣ: ненавидящіи Сіона посрамятся отъ Господа, яко трава изсохшая огню /л. 46 об./ вѣчному предани будутъ». — Катихис. Больш., листъ 335 (384): «о семъ святый Іоаннъ Златоустый въ 3-мъ томѣ, сирѣчь книгѣ, о предательствѣ Іюдиномъ сице глаголетъ: яко же оно слово, еже рече Господь Богъ: раститеся и множитеся и наполните землю, единою речено бысть и во вся времена совершително есть внегда къ рожденію естество прелагается; /л. 47./ сице и сіе слово Господне единою речено бысть, еже на всѣхъ престолѣхъ олтаревыхъ, даже до сего дне и до пришествія его, подаетъ силу жертвѣ. Зриши ли, еретиче?» —

Книга Вѣра, листъ 20: «церковь бо паче небеси въкоренилася есть и удобнѣе есть солнцу отъ теченія своего престати, нежели церковь обесчестити и остатися». Ниже, листъ 21: /л. 47 об./ «яко святая восточная церковь истинная невѣста Христова на основаніи главы своея во изгнаніи основана и чрезъ апостольскую кровь въ стѣны произведеся, и въ томъ основаніи даже и въ страданіи скончатися не имать». Ибо въ прежнія гонительныя времена православныя священники и святіи отцы безъ епископля благословенія, токмо не презря епископа /л. 48./ за неимѣніемъ той страны церкви воздвизали и святили, якоже повѣствуется въ житіяхъ ихъ, или посла посылаютъ, онъ же пишетъ на хартіи благословеніе.

Азъ же ти въмѣсто хартіи свидѣтель неложенъ буду. Азъ же васъ на се благословляю. Еще же съ моимъ благословеніемъ да будетъ вамъ къ тому повелѣніемъ 7-го вселенскаго собора правило 17-е, /л. 48 об./ ибо оное зѣло паче архіерейскаго благословенія. Ибо никому же отъ епископъ не подобаетъ особно себѣ монастыря здати на раззореніе і истощеніе епископіи своей; аще ли дерзнетъ тако сотворити, запрещеніе да пріиметъ, а созданный монастырь яко простое людское жилище подъ епископію да преданъ будетъ.

Виждь, яко и самъ епископъ въ строеніи церкви или /л. 49./ монастыря никакой воли не имать. А что речено: безъ повелѣнія епископа никому же не подобаетъ ни церкви, ни монастыря строити, — не того ради, чтобы безъ повелѣнія епископа не могла быть церковь, ибо многія святіи во время гоненія въ домахъ и въ темницахъ, въ поляхъ и пещерахъ и въ баняхъ литургисаху. А посему оное смотреніе епископомъ, /л. 49 об./ дабы строеній оныхъ не производили своевольно для прибытка съ вымысломъ, или по какому протчему случаю, или якобы откровеніемъ нѣкоторымъ начата будетъ строитися, а потомъ послѣдуетъ недостатокъ къ совершенію оной, и та не достроена и не докончена будетъ. Того ради таковое смотреніе опасно епископомъ имѣть, якоже въ толкованіи /л. 50./ правила 84-го Карѳагенскаго собора и заповѣдь благочестиваго царя Іустиніяна 27 явьственно показуетъ, чтобы зданіе церквей безъ воли и благословенія епископли не ставили, не того ради, чтобы существо отъ его воли зависимо было, но чтобы не могли происходить вышереченныя беззаконныя вымыслы и недостатки, ибо и самому /л. 50 об./ епископу ради себя строеніе оныхъ запрещается вышереченнымъ 17-мъ правиломъ 7-го вселенскаго собора.

Азъ же паки вопросихъ: отче священнѣйшій! Твоя святыня благословила насъ церковь и монастырь построити и освятить ту нововоздвигнутую церковь. А святый антимисъ гдѣ возмемъ, ибо безъ онаго невозможно быть церкви, /л. 51./ а сіе принадлежитъ до епископа; а православнаго епископа, кромѣ тебе, владыко, и не слышно? Въ таковомъ случаѣ что сотворить имамъ: гдѣ святый антимисъ возмемъ? Да и будущіи родове гдѣ оной брати будутъ? Но я, отче священнѣйшій, о семъ въ великомъ недоуменіи, паче же и смущеніи.

Епископъ же рече ми: не сомнѣвайся о семъ, Ѳеодосіе, ибо много святыхъ антимисовъ /л. 51 об./ имѣется отъ священныхъ церквей великихъ епархій, заготовлено болѣе 15; оныя должны оставаться безъ всякаго дѣйствія, новолюбителямъ непотребны, да и въ прочихъ многихъ мѣстѣхъ много оставшихъ. Но обаче можеши оныхъ докупить у Никоновыхъ послушницѣхъ златомъ чрезъ благолюбцевъ. Но и еще можеши изъ обѣтшавшихъ /л. 52./ церквей взимати.

Азъ же ему рекохъ на сіе: отче священнѣйшій! Но тако творити во Уставѣ запрещается.

Онъ же рече: Ѳеодосіе! Крамолиши, яко не смысля священныхъ правилъ, ни вѣдая святаго писанія, ниже силы его. Не слышалъ ли святаго Кирила Іерусалимскаго въ своей книзѣ глаголюща: якоже Христосъ не умираетъ, тако и священство его /л. 52 об./ во вѣки пребудетъ. А паче же сосудъ избранный Павелъ рече: помните наставники ваша. Еще Спасъ глаголаше: слушаяй Мя, слушаетъ пославшаго Мя; отметаяйся васъ, Мене отметается. Вѣрующему вся возможна суть. Обаче же нужда бывающая закону касается. Аще бо безъ нужды дерзнути запрещается, нужда бо закономъ не судится. Егда же /л. 53./ бываетъ христіяномъ насиліе и гоненіе отъ еретикъ или отъ невѣрныхъ, таковая нашедшая нужда творити закономъ церковнымъ разрѣшается. — Воззри же на прежнія роды и святыхъ отецъ и узриши, како тогда святіи страха ради гоненія и мученія службы въ различныхъ мѣстѣхъ литургію совершаху. Священнопрезвитеръ Лукіянъ въ темницѣ и /л. 53 об./ во оковахъ соверши святую литоргію, и вси христіяне въ темницѣ пресвятыхъ Таинъ причащахуся. А ни единъ сего не рече по коему правилу или благословенію дерзну тако творити, но и не помысли, како безъ антимису возможетъ литоргію совершити и прямо сумнѣвающимся рече, яко живый престолъ живому Богу будетъ, а обаче же въ житіяхъ святыхъ /л. 54./ обрящеши. Того ради подобаетъ вамъ вся имѣти въ памяти и словеса оныя держати: взирающе на скончаніе жительства ихъ, подражайте вѣрѣ, и тако спастися можете. — Прочее гряди, аможе желаеши, и Богъ да поспѣшитъ и направитъ путь твой своими неизреченными судьбами, еже сохранити и соблюсти благочестіе цѣло и непорочно /л. 54 об./ и церковь свою тверду и непоколѣбиму отъ вратъ адовыхъ неодолѣну во вся вѣки. — Ты же, Ѳеодосіе, еже отъ мене слышалъ, тако и твори и прочимъ такоже творити повели будущимъ родомъ, а не раздирати Христову церковь. Ты же, Ѳеодосіе, еже отъ мене слышалъ, сія вся писанію предаждь и по себѣ церкви, дабы память моя незабвена /л. 55./ была во всѣхъ родѣхъ. И буди на васъ благословеніе Божіе и мое отнынѣ и до вѣка, и на будущихъ родѣхъ, которіи слѣдовать будутъ моему повелѣнію. — Аще же православнаго епископа лицемъ и не будетъ, но обаче въ томъ не сомнѣватися, но подъ главою Христа Спасителя возможетъ неблазнено пребыти и при священникахъ спастися можете, /л. 55 об./ якоже въ бытіи соблазновъ иконоборныхъ Цареградскія области, идѣже патріархъ Павелъ, уклонивыйся тайно отъ состоянія иконоборнаго въ монастырѣхъ святаго Флора, егоже память августа 3 дня, а ѳевраля 25, и по подобію преподобнаго отца Антонія Римлянина августа 3-го дня, како сіи святіи творили, такожде и въ правилѣхъ святыхъ отецъ повелѣваетъ. /л. 56./ Аще ли нѣцыи отступятъ отъ нѣкоего епископа не грѣховнаго ради извѣта, но за ерѳсь, таковіи чести и пріятію достойни суть, яко въ правовѣріи подобнѣ и Матѳей Правильникъ въ составѣ 200 пишетъ. — Ты же, Ѳеодосіе, сія сохрани и не стужай, обаче же не пометай себе въ напасти по Христову словеси: аще гонятъ вы во градѣ семъ, бѣгайте въ другій. Церковь же Христа /л. 56 об./ Спасителя не имать одолѣна быти, якоже Кирилъ Іерусалимскій въ 11 знаменіи глаголетъ: не имутъ скончатися грады Ізраилевы до пришествія Христова, имиже вѣсть судбами сохранитъ и спасетъ церковь свою отъ вратъ адовыхъ.

Ѳеодосій же, слыша сіе, исполнися слезъ и поклонися до земли, прося послѣдняго благословенія, глаголя: благослови, владыко святый, /л. 57./ послѣднимъ своимъ благословеніемъ.

Онъ же воздвиже его отъ земли и благослови рече: буди благословеніе Господне на васъ и на чадѣхъ вашихъ и на будущихъ родѣхъ всегда и нынѣ и во вся вѣки.

И тако другъ другу цѣлованіе о Господѣ давше, и отъ преосвященнаго епископа Павла благословися Ѳеодосій и наставися, яко драгоцѣнное и неоцѣненное сокровище /л. 57 об./ и слезно разлучися изыде отъ него. И Богу помогающу пріиде и возвѣсти про вся бывшая съ Павломъ епископомъ, и пріятъ бысть отъ всѣхъ любезно и честно, яко истинный пастырь и учитель, и предложиша ему учиненная о пріемѣ приходящихъ къ православію. Онъ же прочетъ похваливъ и согласное повелѣніе и благословеніе епископа Павла /л. 58./ утвердивъ, и тако крѣпко того преданіе держати, мужественно и крѣпко во благочестіи стояти. И вси сладцѣ того пріяша и послушающе, вѣдуще, яко наставлѣніе и благословеніе отъ епископа Павла. И стекахуся отъ мирскаго и священнаго чина. И тако отъ самаго того времени, то есть отъ лѣтъ Павла епископа Коломенскаго, и до днесь /л. 58 об./ другъ друга пріемнѣ вси священноиноцы і священники имѣютъ его же благословеніе, и имѣти будутъ другъ по друзѣ безъ зазору во всѣхъ родѣхъ. Аминь.

3ри. Книга Кирила Іерусалимскаго листъ 76 и 305.

Вѣра глава 2, о святѣй церкви, листъ 19 и 20 и 216.

Катихис. Велик. листъ 308 и 335.




Другое поясненіе вкратцѣ [2].

Въ лѣто 7160 іюня во 2-й день попущеніемъ Божіимъ вкрадеся ва престолъ патріаршій бывый попомъ Никита Никитичь, въ черньцахъ Никонъ, обольстя благую душю протопопа духовника царева Стефана, являяся ему, яко ангелъ, а внутрь ино крыяше въ себѣ. Протопопъ же увѣща царя и царицу, да поставятъ Никона на /л. 59 об./ Іосифово патріаршее мѣсто (и яко о благочестивомъ патріархѣ много онъ въ челобитной приписалъ своею рукою къ царю, похваляя Никона, о томъ много бесѣдовать). Егда же бысть патріархомъ (Никонъ) нача повелѣвать инако: въ постъ Великій въ церкви вмѣсто метаній поклоны въ поясъ творити, и сложеніе перстовъ, и прочая. Мы же /л. 60./ со отцы и братіею не умолчали, обличали ревностно въ ересѣхъ его. Онъ же муча много муками различными и послѣ мукъ разослалъ всѣхъ въ ссылки: епископа Павла Колеменскаго муча и по мукахъ въ Новгородскихъ предѣлѣхъ огнемъ сожеглъ; Даніила Костромскаго протопопа муча много и въ Астрахани въ земляной тюрмѣ заморилъ; /л. 60 об./ Муромскаго протопопа Логина остригше и муча въ Муромъ сославъ и ту въ Муромѣ скончася; Гавріилу священнику въ Нижнѣмъ повелѣ главу отсѣчь.

Примѣчанія:
[1] По ркп. собранія А. И. Хлудова (XIX в., по дополнительному каталогу № 59) въ Московскомъ Никольскомъ единовѣрческомъ монастырѣ.
[2] Изъ той же рукописи, лл. 59 – 60 об.

Источникъ: 2. Еще сказанія о Павлѣ епископѣ Коломенскомъ († ок. 1655 г.). // Чтенія въ   И м п е р а т о р с к о м ъ   обществѣ Исторіи и Древностей Россійскихъ при Московскомъ Университетѣ. — 1905 годъ. — Книга четвертая. (Двѣсти пятнадцатая.) — Издана подъ завѣдываніемъ Е. В. Барсова. — М.: Университетская типографія, 1905. — С. 28-44. (Ос. паг.)

/ Къ оглавленію раздѣла /


Наверхъ / Къ титульной страницѣ

0