Наследие Святой Руси. Памятники древне-русской письменности
 
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Наслѣдiе Святой Руси
-
Гостевая книга
-
Новости
-
Написать письмо
-
Поискъ

Раздѣлы сайта

Святые Кириллъ и Меѳодiй
-
Книги старой печати
-
Патерики и житiя святыхъ
-
Великiя Минеи Четiи
-
Церковно-учит. литература
-
Творенiя русскихъ святыхъ
-
Стоянiе за истину
-
Исторiя Русской Церкви
-
Церковный расколъ XVII в.
-
Исторiя Россiи

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 20 августа 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-УЧИТЕЛЬНАЯ ЛИТЕРАТУРА

Славяно-русскій прологъ.
Часть вторая: Январь-Апрѣль.

МАРТЪ.
Слово на Благовѣщеніе Пресвятыя Владычицы нашея Богородицы и присно Дѣвы Маріи (25 марта).

Нынѣ подобно есть, братіе, къ вамъ велегласно изрещи апостольскій глаголъ о семъ велицемъ дни, яко убо сему ясно возгласившу и извѣстнѣ показавшу начало праздниковъ и царя свѣтлаго дне сего. Глаголетъ бо святый апостолъ Павелъ Святымъ Духомъ: нощь успе, а день приближися. Днесь Сынъ и Слово Божіе, Господь и Богъ нашъ, неизреченно во чрево Дѣвы вмѣщается, хотя тварь, рукъ Своихъ созданіе, Своимъ вочеловѣченіемъ обожити и въ древній рай паки возвести. Днесь Несозданный въ свое созданіе вмѣщается. Днесь Невмѣстимый въ небеса во чрево Дѣвы вмѣщается. Днесь Невидимый видимъ бываетъ. Днесь неосязаемый во чревѣ Дѣвы зачинается и осязуемъ бываетъ. Днесь Божіе Слово плоть пріемлетъ, Сынъ Божій сынъ Дѣвичь бываетъ. Иже прежде всѣхъ вѣкъ отъ Отца безъ матере рождся несказанно и Сый на небесѣхъ, нынѣ дивно и страшно на земли безъ отца во чревѣ Дѣвы воплощается. Сугубъ по естеству, Богъ и человѣкъ, разумѣваемь и сказуемь, еже есть съ нами Богъ. Но аще человѣчя ради спасенія хотяй пріиде на землю, весь же Богъ со Отцемъ и Духомъ на небеси Сый и весь на земли равно спрославляемь и поклоняемь и сцарствуя. Дивно и страшно рождество введе: не инъ бо прежде вѣкъ рождся отъ Отца безъ матере, но Той есть и отъ Дѣвы рождся, Единочадный Сынъ Божій, Иже отъ Отча существа возсіявъ явися намъ, Свѣтъ отъ Свѣта, Богъ истиненъ отъ Бога истинна, рожденъ, а не сотворенъ. Зиждитель Адамовъ пріиде на землю взыскати заблуждшаго человѣка. Видѣвъ бо насъ (ны) впадшія во многобожныя имена и прелестію тѣхъ запеньшіяся и поработившіяся имъ, не терпя зрѣти діаволомъ расхащаема стада Своего, но посла первое пророки, возвѣщая Свое пришествіе. Глаголетъ бо Исаіемъ: се Дѣва во чревѣ пріиметъ и родитъ Сына, и нарекутъ имя Ему Еммануилъ, иже есть сказуемое съ нами Богъ. Пришедшу же времени сбытія ихъ, посла свыше архангела Своего Гавріила, рекъ ему: иди ко дѣвѣ Маріи и рцы Ей: радуйся, обрадованная, Господь съ Тобою, благословенна Ты въ женахъ и благословенъ плодъ чрева Твоего; Тебе ради прабабная клятва разорится, женою бо процвѣтоша злая и печальная, Тобою же нынѣ истекаютъ лучшая; се бо зачнеши во чревѣ и родиши сына и наречеши имя ему Іисусъ: той бо спасетъ люди своя отъ грѣхъ ихъ», — яко же слышаете евангелиста глаголюща о прочей бесѣдѣ (Лук. 1 гл.). Та вся помыслимъ, братіе, колику благодать пріяхомъ днесь и коликихъ благъ сподоблени быхомъ. Днесь бо супостатъ нашъ діаволъ связанъ бысть, и бѣсовская служба и требища ихъ попрана быша. Днесъ райскія двери отверзаютея, и пламенное оружіе, отгнавши человѣчо естество, плещи даетъ, и человѣческій родъ вѣрою, яже во Христа, и благими дѣлы съ радостію паки въ рай входитъ. Днесъ Адамъ ликовствуетъ, пріемля въ свой составъ Зиждителя своего. Днесь Ева зміеви главу стерши, горкому ея прелестнику, на веселіе всего міра созываетъ глаголющи: радуйтеся со мною, яко днесь обрѣтохомъ радость неизглаголанную и свобожденіе отъ всѣхъ грѣхъ. Днесь и мы, братіе, радости исполнившеся и благими дѣлы украсившеся, потщимся достойно препроводити сія святыя дни постныя, воздержащеся отъ объяденія и піянства и плотскихъ похотей, отъ гнѣва и клеветы, отъ обиды и зависти и многаго сна, та бо дѣла душу помрачаютъ и отъ Бога отлучаютъ. Тѣмъ же, та вся отложше, подвигнемся святая дни сія миромъ скончати, да не постигнетъ насъ день смертный въ лѣности и во грѣсѣхъ. Не ложь бо есть рекій пророкомъ древле: въ немъ же обрящу тя, въ томъ и сужду ти. Тѣмъ же молю вы и понуждаю съ любовію: трезвенно бдимъ постящеся, дабы насъ день смертвый во благихъ дѣлѣхъ обрѣлъ и не въ злыхъ. Се бо Вѣнцедавецъ предстоитъ и вѣнцы простираетъ, сія готовляяй постникомъ. И веселится зря Церковь по вся дни не празднику сущу отъ насъ и вскорѣ въ ню предваряющихъ. Въ ней же убо и купѣль предстоитъ, омыти хотяща прегрѣшенія наша, и трапеза уготована, Телца упитаннаго имущи, за весь міръ закалаема, Ісуса Христа, Сына Божія предлежаща на ней и вѣрныя вся созывающа на святое празднество и на живоносное брашно. Еже всякъ пріемляй вѣрою живъ будетъ во вѣки, яко же самъ Господь рече: ядый Мою плоть и піяй Мою Кровь во Мнѣ пребываетъ, и Азъ въ немъ; яко же Азъ живу Отца ради, и ядый Мя живъ будетъ во вѣки. И пророкомъ приглашаетъ намъ рекій: вкусите и видите, яко благъ Господь. Къ тому приступимъ яко незлобивіи младенцы, вѣтви въ рукахъ держаще, сирѣчь добрая дѣтели, зовуще и глаголюще Христу: осанна, благословенъ грядый во имя Господне (грядущъ во имени Господни), Богъ и Господь явися намъ.

Источникъ: Памятники древне-русской церковно-учительной литературы. Выпускъ четвертый: Славяно-русскій прологъ. Часть вторая: Январь-Апрѣль. — Изданіе подъ ред. проф. А. И. Пономарева. — СПб.: Типографія А. П. Лопухина, 1898. — С. 132-134.

/ Къ оглавленію раздѣла /


Наверхъ / Къ титульной страницѣ

0