Наследие Святой Руси. Памятники древне-русской письменности
 
Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Наслѣдiе Святой Руси
-
Гостевая книга
-
Новости
-
Написать письмо
-
Поискъ

Раздѣлы сайта

Святые Кириллъ и Меѳодiй
-
Книги старой печати
-
Патерики и житiя святыхъ
-
Великiя Минеи Четiи
-
Церковно-учит. литература
-
Творенiя русскихъ святыхъ
-
Стоянiе за истину
-
Исторiя Русской Церкви
-
Церковный расколъ XVII в.
-
Исторiя Россiи

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 1 мая 2017 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-УЧИТЕЛЬНАЯ ЛИТЕРАТУРА

Въ недѣлю 3-ю поста поученія Іоанна Златоустаго о святѣмъ постѣ на поклоненіе Честнаго и Животворящаго Креста.

Братье, преполовльше нынѣ святыя сія дни постныя, възрадуемся душею поклоняющеся честному кресту и, того насладившеся, подвигнемся на прочая дни къ Христовѣ страсти, чистяще си телеса и душа просвѣщающе пречестными молитвами; и придемь непорочни на воскресеніе Господне, се бо призываеть ны Господь Богъ нашь на свѣтлую радость, держа вѣнца небесныя алкавшимъ и жадавшимъ Его ради и тружаюшимся въ бдѣньи, въ подвизѣ духовнѣ; да въ семъ святомъ пощеньи не мозѣмъ лишитися тоя радости неизъреченьныя и тѣхъ вѣнецъ нетлѣнныхъ за малую сію лѣность и ласкосердья утробнаго. Еже въ малъ часъ насладимъ гортань свою и послѣдь же горьчае золчи обрящется; о семъ възбраняя, Павелъ апостолъ глаголетъ: да не блазнить васъ неприязнь яденьемъ и питьемъ паче сытости (Кол. 2, 16), и паки: не упиваитеся виномъ, въ немже нѣсть спасенья (Ефес. 5, 18). И самъ Господь възбраняеть ны, глаголя: блюдитеся, да не отягьчають сердца ваша объяденьемъ и піяньствомъ и печальми житіисками (Лук. 21, 34); и святіи отци отъ того же възбраняють, глаголюще: аще еси былъ вчера многотрапезникъ, то днесь постникъ крѣпокъ явися; аще вчера плотиугодникъ былъ еси, то днесь души просвѣтникъ явися.

Не мозите, братье, словомъ точью крестьянѣ быти, но и дѣла покажемъ, да не речеть къ намъ Господь Богъ: си людье усты точью чтутъ Мя, а сердца ихъ далече Мене отстоятъ (Ис. 29, 13). Поистинѣ же тако видимь васъ; аще бо отъ земнаго князя како любо придеть слово къ подручнымъ его гражаномъ, то вси, съ страхомъ пришедше, послушають его и, слышавьше, творять повелѣная имъ. А Богу по вся дни зовущю насъ к Собѣ пророки и апостолы и святыми отци, паче же и Своими усты святыми Евангельи на свѣтъ немерцающіи, на радость бесконечную и на царство небесное, еже уготова творящимъ волю Его; то же нѣсть его, кто послушаяи и притекіи къ нему, ни воля Его творя.

Видите, братье, любовь Божью, еже къ намъ; яко не терпѣ насъ зрѣти поработившихся бѣсу, бездушнымъ кумирамъ требу полагающа; тако бо бяху ослѣплена сердца ихъ дьяволомъ, да ови сыны своя жряхуть имъ, ови же дщери своя. И того всего не терпя, Господь Богъ нашъ приде на землю, да земныя обожить, и паки на небо възведеть; того ради и крестися, намъ дая образъ обращенью и се паки понавляя крещеніе симъ святымъ постомъ. Еже есмы по крещеніи съгрѣшили, да симъ очистимся; тѣмже, препоясавшеся крѣпка удержаньемъ, подвигнемся преполовльше сія дни постныя. Аще ли и лѣностію преидосте, но поне богоугодно отъселѣ скончаите; не тяшько вы буди къ церкви ити на Божіе дѣло и слышати въ неи святое Писаніе и творити добрая дѣла, да освятиться вы душа и тѣла собдюдеться Богомъ.

Стоящи же; братіе, въ церкви да небесѣдуите ничто же ни съ кимъ; да не погубимъ мьзды своея; иже бо аще бестраха бесѣдуеть въ церкви другъ о друзѣ, то радость непріязни творить. Отъ сего бо разумѣніе: егда стануть предъ земнымъ царемъ, то ни кто же смѣетъ рещи простаго слова, ни очима инамо зрѣти и осязати; да еще тѣхъ чтемъ и боимся ихъ тацѣхъ же суще человѣкъ, не паче ли подобаеть сугубь съ страхомъ и трепетомъ Бога почтити и волю Его творити? Тои владѣеть душею и тѣломъ нашимъ, могыи умертвити и оживити, и убожити паки обогатити, якоже глаголетъ Соломонъ: отъ лица Божія мнози цари царствують и силніи держать землю, и Азъ вѣнчаю славящихъ Мя и почетьшихъ Мене (Притч. 8, 15-17). Того убоимся, Того съ страхомъ прославимъ и трепетомъ.

Поразумѣемъ службу церковную: что сего есть пристраннѣе, егда видиши Сына Божіа закалаема и тѣло Свое хлѣбомъ претворяюща и кровь Свою изливающа въ оставленіе грѣховъ? Тѣмь же съ страхомъ приступимъ къ святымъ таинамъ и примемъ я чистыми усты и сердцемъ свѣтлымъ, всяку вражду поправши, да доидемъ свѣтлаго воскресенія Христова и тоя радости насладимся. Сія же святыя дни постныя отъселѣ чисто схранимъ. Не буди же вамъ тяжко послужившимъ Богу; понужаемъ бо васъ на добръ подвигъ, да на воскресеніе услышимъ святыи онъ гласъ Господа Бога нашего, зовуща праведныя и глаголюща: придите, благословеніи Отца Моего, пріимите уготованое вамъ царство (Матѳ. 25, 34). О Христѣ Ісусѣ Господѣ нашемъ, Ему же слава въ вѣки, аминь.

Источникъ: Въ недѣлю 3-ю поста поученія Іоанна Златоустаго о святѣмъ постѣ на поклоненіе честнаго и животворящаго креста. // Памятники древне-русской церковно-учительной литературы. Выпускъ третій. — Изданіе журнала «Странникъ», подъ ред. проф. А. И. Пономарева. — СПб.: Типографія СПб. Акціон. Общ. печ. дѣла «Издатель», 1897. — С. 185-187.

/ Къ оглавленію раздѣла /


Наверхъ / Къ титульной страницѣ

0